Birthright citizenship | ಜನ್ಮದತ್ತ ಪೌರತ್ವ; ಟ್ರಂಪ್ ಆದೇಶಕ್ಕೆ ಫೆಡರಲ್‌ ಕೋರ್ಟ್ ತಡೆ
Birthright citizenship : ಈ ಕುರಿತು ಆದೇಶ ಹೊರಡಿಸಿರುವ ಫೆಡರಲ್‌ ಕೋರ್ಟ್ ನ್ಯಾಯಾಧೀಶರು ಟ್ರಂಪ್ ನಿರ್ಧಾರ ಅಸಂವಿಧಾನಿಕ ಎಂದು ಕರೆದಿದ್ದಾರೆ. ಡೆಮಾಕ್ರಟಿಕ್‌ ನೇತೃತ್ವದ ನಾಲ್ಕು ರಾಜ್ಯಗಳು ಈ ಬಗ್ಗೆ ಮನವಿ ಮಾಡಿದ್ದವು.;
ಜನ್ಮದತ್ತ ಪೌರತ್ವದ (Birthright citizenship) ವಿಷಯದಲ್ಲಿ ಟ್ರಂಪ್ ತೆಗೆದುಕೊಂಡಿರುವ ನಿರ್ಧಾರ ಜಾಗತಿಕವಾಗಿ ಚರ್ಚೆಯ ವಿಚಾರವಾಗಿತ್ತು. ಅಮೆರಿಕದಲ್ಲಿ ಕೆಲಸ ಮಾಡುವ ಹಾಗೂ ನೆಲೆಯೂರುವ ಲಕ್ಷಾಂತರ ಮಂದಿಯ ಕನಸಿಗೆ ತಣ್ಣಿರು ಎರಚಿದ ವಿಚಾರವಾಗಿದೆ. ಹೀಗಾಗಿ ರದ್ದು ಮಾಡುವ ಟ್ರಂಪ್ (Donald Trump) ಆದೇಶಕ್ಕೆ ದೊಡ್ಡ ಮಟ್ಟಿನ ವಿರೋಧ ವ್ಯಕ್ತಗೊಂಡಿತ್ತು. ಇದೀಗ ಟ್ರಂಪ್ ಆದೇಶವನ್ನು ಅಮೆರಿಕದ ಫೆಡರಲ್‌ ನ್ಯಾಯಾಲಯ ತಡೆಹಿಡಿದಿದೆ ಎಂದು ವರದಿಯಾಗಿದೆ.
ಈ ಕುರಿತು ಆದೇಶ ಹೊರಡಿಸಿರುವ ಫೆಡರಲ್‌ ಕೋರ್ಟ್ ನ್ಯಾಯಾಧೀಶರು ಟ್ರಂಪ್ ನಿರ್ಧಾರ ಅಸಂವಿಧಾನಿಕ ಎಂದು ಕರೆದಿದ್ದಾರೆ. ಡೆಮಾಕ್ರಟಿಕ್‌ ನೇತೃತ್ವದ ನಾಲ್ಕು ರಾಜ್ಯಗಳು ಈ ಬಗ್ಗೆ ಮನವಿ ಮಾಡಿದ್ದವು. ನ್ಯಾಯಾಧೀಶ ಜಾನ್ ಕೋಘೆನೂರ್ ಅವರು ಆದೇಶವನ್ನು ಜಾರಿಗೊಳಿಸದಂತೆ ತಾತ್ಕಾಲಿಕ ತಡೆಯಾಜ್ಞೆ ನೀಡಿದ್ದಾರೆ. ಟ್ರಂಪ್ ನೀಡಿದ ಆದೇಶದ ಪ್ರಕಾರ ಜನನ ಹಕ್ಕು ಪೌರತ್ವವನ್ನು ಕೊನೆಗೊಳಿಸಲು ಫೆ.20 ಕೊನೆಯ ದಿನಾಂಕವಾಗಿದೆ.
ಈ ಮೊದಲು ಅಮೆರಿಕದಲ್ಲಿ ಜನಿಸಿದ ಮಕ್ಕಳಿಗೆ ಸ್ವಾಭಾವಿಕವಾಗಿ ಅಲ್ಲಿನ ನಾಗರಿಕತ್ವ ದೊರಕುತ್ತಿತ್ತು. ಇದನ್ನು ಬಳಸಿಕೊಂಡು ಅನೇಕರು ತಾತ್ಕಾಲಿಕ ವೀಸಾ ಪಡೆದು ಅಥವಾ ಅಮೆರಿಕ್ಕೆ ಹೋಗಿ ಮಕ್ಕಳಿಗೆ ಜನ್ಮ ನೀಡುತ್ತಿದ್ದರು. ಫೆ.19ರ ಬಳಿಕ ಜನಿಸುವ ಮಕ್ಕಳ ಪೋಷಕರಲ್ಲಿ ಒಬ್ಬರಾದರೂ ಅಮೆರಿಕ ನಾಗರಿಕ ಆಗಿರಬೇಕು ಅಥವಾ ಅಮೆರಿಕದ ಮಿಲಿಟರಿಯಲ್ಲಿ ಸೇವೆ ಸಲ್ಲಿಸಬೇಕು ಎಂದು ಹೊಸ ಆದೇಶ ಹೇಳುತ್ತದೆ.
ಭಾರತೀಯರ ಮೇಲೇನು ಪರಿಣಾಮ?
ಅಮೆರಿಕದಲ್ಲಿ ಸದ್ಯ 54 ಲಕ್ಷ ಭಾರತೀಯರು ನೆಲೆಸಿದ್ದಾರೆ. ಇವರಲ್ಲಿ ಶೇ.66ರಷ್ಟು ಜನ ವಲಸಿಗರಾಗಿದ್ದು, ಶೇ.34 ಜನ ಮಾತ್ರ ಅಮೆರಿಕ ನಾಗರಿಕರಾಗಿದ್ದಾರೆ. ಎಚ್‌1ಬಿ ವೀಸಾ ಹಾಗೂ ಪ್ರವಾಸಿ ವೀಸಾದ ಮೇಲೆ ನೆಲೆಸಿರುವ ಭಾರತೀಯರಿಗೆ ಮಕ್ಕಳಾದರೆ ಅವರು ಪೌರತ್ವಕ್ಕಾಗಿ ಮತ್ತೆ ಅರ್ಜಿ ಸಲ್ಲಿಸಬೇಕು. ಇಲ್ಲವೇ ಪ್ರವಾಸಿ ವೀಸಾ ಪಡೆದು ತೆರಳಬೇಕಾಗಿದೆ. ಸದ್ಯ ಟ್ರಂಪ್ ಅವರ ಈ ಆದೇಶಕ್ಕೆ ಭಾರತೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ