ಇಸ್ರೇಲ್, ಅಮೆರಿಕ ದಾಳಿ ನಡುವೆಯೂ ಪರಮಾಣು ಯೋಜನೆ ಮುಂದುವರಿಸುವುದಾಗಿ ಹೇಳಿದ ಇರಾನ್‌

ಇಸ್ರೇಲ್ ಮತ್ತು ಅಮೆರಿಕಾದ ವೈಮಾನಿಕ ದಾಳಿಗಳ ಸರಣಿಯ ಹೊರತಾಗಿಯೂ ತನ್ನ ಮಹತ್ವಾಕಾಂಕ್ಷೆಯ ಪರಮಾಣು ಯೋಜನೆಯನ್ನು ಮುಂದುವರಿಸಲು ಇರಾನ್ ದೃಢ ನಿರ್ಧಾರ ಕೈಗೊಂಡಿದೆ. ದಾಳಿಯಿಂದ ಉಂಟಾದ ಹಾನಿಯನ್ನು ಸರಿಪಡಿಸಲು ಮತ್ತು ಯೋಜನೆಯ ನಿರಂತರತೆ ಖಚಿತಪಡಿಸಿಕೊಳ್ಳಲು "ಅಗತ್ಯ ಕ್ರಮಗಳನ್ನು" ಕೈಗೊಂಡಿರುವುದಾಗಿ ಇರಾನ್ ಸರ್ಕಾರ ಮಂಗಳವಾರ ಪ್ರಕಟಿಸಿದೆ.

ಇರಾನ್‌ನ ಪ್ರಮುಖ ಪರಮಾಣು ಘಟಕಗಳಾದ ಫೋರ್ಡೊ, ನಟಾನ್ಜ್ ಮತ್ತು ಎಸ್‌ಫಹಾನ್ ಮೇಲೆ ಅಮೆರಿಕಾ ಮತ್ತು ಇಸ್ರೇಲ್ ದಾಳಿ ನಡೆಸಿದ್ದವು. ಈ ದಾಳಿಗಳಿಂದಾಗಿ ಮೂರೂ ಘಟಕಗಳಿಗೆ ಹಾನಿಯಾಗಿದ್ದರೂ, ಇರಾನ್‌ನ ಅಣು ಶಕ್ತಿ ಸಂಸ್ಥೆಯ ಮುಖ್ಯಸ್ಥ ಮೊಹಮ್ಮದ್ ಇಸ್ಲಾಮಿ ಅವರು, "ಅಣು ಯೋಜನೆ ಮುಂದುವರಿಸಲು ನಾವು ಅಗತ್ಯ ಕ್ರಮಗಳನ್ನು ತೆಗೆದುಕೊಂಡಿದ್ದೇವೆ ಮತ್ತು ದಾಳಿಯಿಂದ ಆಗಿರುವ ಹಾನಿಯನ್ನು ಅಂದಾಜು ಮಾಡುತ್ತಿದ್ದೇವೆ," ಎಂದು ಸ್ಪಷ್ಟಪಡಿಸಿದ್ದಾರೆ. "ಪರಮಾಣು ಘಟಕಗಳನ್ನು ಪುನರಾರಂಭಿಸಲು ಬೇಕಾದ ಯೋಜನೆಗಳನ್ನು ಮುಂಚಿತವಾಗಿಯೇ ಸಿದ್ಧಪಡಿಸಲಾಗಿದೆ ಮತ್ತು ಉತ್ಪಾದನೆಗೆ ಅಡ್ಡಿಯಾಗದಂತೆ ನೋಡಿಕೊಳ್ಳುವುದು ನಮ್ಮ ಕಾರ್ಯತಂತ್ರವಾಗಿದೆ," ಎಂದು ಅವರು ಒತ್ತಿ ಹೇಳಿದ್ದಾರೆ.

'ಆಟ ಇನ್ನೂ ಮುಗಿದಿಲ್ಲ': ಇರಾನ್‌ನ ಎಚ್ಚರಿಕೆ

ಇರಾನ್‌ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅವರ ಸಲಹೆಗಾರರೊಬ್ಬರು ಹೇಳಿಕೆ ನೀಡಿದ್ದು, ತಮ್ಮ ದೇಶದಲ್ಲಿ ಸಾಕಷ್ಟು ಶುದ್ಧೀಕರಿಸಿದ ಯುರೇನಿಯಂನ ದಾಸ್ತಾನು ಇರುವುದನ್ನು ಅವರು ಖಚಿತಪಡಿಸಿದ್ದು, "ಆಟ ಇನ್ನೂ ಮುಗಿದಿಲ್ಲ," ಎಂದು ಎಚ್ಚರಿಕೆ ನೀಡಿದ್ದಾರೆ. ಫೋರ್ಡೊ ಪರಮಾಣು ಘಟಕದ ಮೇಲೆ ಅಮೆರಿಕಾ ದಾಳಿ ನಡೆಸಿದ ಬೆನ್ನಲ್ಲೇ, ಇಸ್ರೇಲ್ ಕೂಡಾ ದಾಳಿ ನಡೆಸಿ, "ಫೋರ್ಡೊ ಘಟಕವನ್ನು ತಲುಪುವ ದಾರಿಯನ್ನು ಧ್ವಂಸ ಮಾಡಿದ್ದೇವೆ," ಎಂದು ಹೇಳಿಕೊಂಡಿತ್ತು.

ಎವಿನ್ ಕಾರಾಗೃಹದ ಮೇಲೆ ದಾಳಿ: ಕೈದಿಗಳ ಸ್ಥಳಾಂತರ, ಸಾವು-ನೋವು

ಇರಾನ್‌ನ ನ್ಯಾಯಾಂಗದ ಮಿಜಾನ್ ವೆಬ್‌ಸೈಟ್ ಪ್ರಕಾರ, ಟೆಹರಾನ್‌ನ ಕುಖ್ಯಾತ ಎವಿನ್ ಕಾರಾಗೃಹದ ಮೇಲೆ ಇಸ್ರೇಲ್ ಸೋಮವಾರ ದಾಳಿ ನಡೆಸಿದ ನಂತರ, ಅಲ್ಲಿನ ಕೈದಿಗಳನ್ನು ಬೇರೆ ಜೈಲುಗಳಿಗೆ ಸ್ಥಳಾಂತರಿಸಲಾಗಿದೆ. ಖಮೇನಿ ಮತ್ತು ಇರಾನ್ ಸರ್ಕಾರದ ವಿರುದ್ಧ ಇರುವ ರಾಜಕೀಯ ಕೈದಿಗಳನ್ನು ಈ ಜೈಲಿನಲ್ಲಿ ಇರಿಸಲಾಗುತ್ತಿತ್ತು. ದಾಳಿಯಿಂದ ಜೈಲಿನ ಒಂದು ಭಾಗಕ್ಕೆ ಹಾನಿಯಾಗಿದೆ. "ಕೈದಿಗಳ ಹಕ್ಕುಗಳನ್ನು ರಕ್ಷಿಸಲು ಮತ್ತು ರಕ್ಷಣಾ ಕಾರ್ಯಾಚರಣೆ ತಂಡಗಳಿಗೆ ಅನುವು ಮಾಡಿಕೊಡಲು ಈ ಕ್ರಮ ತೆಗೆದುಕೊಳ್ಳಲಾಗಿದೆ," ಎಂದು ನ್ಯಾಯಾಂಗ ತಿಳಿಸಿದೆ. ಸ್ಥಳಾಂತರ ಪ್ರಕ್ರಿಯೆ ಪೂರ್ಣಗೊಂಡಿದ್ದರೂ, ಎಷ್ಟು ಕೈದಿಗಳನ್ನು ಸ್ಥಳಾಂತರಿಸಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿಲ್ಲ.

ಇಸ್ರೇಲ್ ದಾಳಿ ವೇಳೆ ಎವಿನ್ ಕಾರಾಗೃಹದ ಬಳಿ ಬಿದ್ದ ಎರಡು ಕ್ಷಿಪಣಿಗಳು ಸ್ಫೋಟಗೊಳ್ಳದೆ ಇದ್ದು, ಅವುಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಇರಾನ್‌ನ ಅಧಿಕಾರಿಗಳು ತಿಳಿಸಿದ್ದಾರೆ. ಆದಾಗ್ಯೂ, ಕಾರಾಗೃಹದ ಮೇಲಿನ ದಾಳಿಯಲ್ಲಿ ಹಲವು ಸಾವು-ನೋವುಗಳು ಸಂಭವಿಸಿವೆ ಎಂದು ನ್ಯಾಯಾಂಗದ ವಕ್ತಾರ ಅಸ್ಗರ್ ಜಹಾಂಗೀರ್‌ ಹೇಳಿದ್ದಾರೆ.