ಬೆಂಗಳೂರಿನಲ್ಲಿ 40 ಕೋಟಿ ರೂ ಚಿಟ್ ಫಂಡ್ ವಂಚನೆ: ಕೇರಳದ ದಂಪತಿ ಕೀನ್ಯಾಗೆ ಪರಾರಿ ಶಂಕೆ

ಬೆಂಗಳೂರಿನಲ್ಲಿ ಸುಮಾರು 40 ರಿಂದ 100 ಕೋಟಿ ರೂಪಾಯಿ ಮೊತ್ತದ ಚಿಟ್​ ಫಂಡ್​ ವಂಚನೆ ನಡೆಸಿದ ಆರೋಪ ಎದುರಿಸುತ್ತಿರುವ ಕೇರಳ ಮೂಲದ ದಂಪತಿ ತೋಮಿ ಎ.ವಿ. (57) ಮತ್ತು ಶೈನಿ ತೋಮಿ (52) ಕೀನ್ಯಾಕ್ಕೆ ಪರಾರಿಯಾಗಿರುವ ಶಂಕೆ ವ್ಯಕ್ತವಾಗಿದೆ. ರಾಮಮೂರ್ತಿ ನಗರದಲ್ಲಿ ಕಳೆದ ಇಪ್ಪತ್ತು ವರ್ಷಗಳಿಂದ 'ಎ&ಎ ಚಿಟ್ ಫಂಡ್ಸ್ ಆ್ಯಂಡ್ ಫೈನಾನ್ಸ್' ಹೆಸರಿನಲ್ಲಿ ಚಟುವಟಿಕೆ ನಡೆಸುತ್ತಿದ್ದ ಈ ದಂಪತಿ, ಜುಲೈ 3ರ ರಾತ್ರಿಯೇ ತಮ್ಮ ಕಚೇರಿಯನ್ನು ಮುಚ್ಚಿ ಪರಾರಿಯಾಗಿದ್ದಾರೆ. ಇದು ಸಾವಿರಾರು ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ.

ದೊಡ್ಡ ಮಟ್ಟದ ವಂಚನೆ

ಪೊಲೀಸ್ ತನಿಖೆಯ ಪ್ರಕಾರ, ತೋಮಿ ಮತ್ತು ಶೈನಿ ತಮ್ಮ ಕ್ರಿಸ್‌ನರಾಜಪುರಂನಲ್ಲಿರುವ ಅಪಾರ್ಟ್‌ಮೆಂಟ್‌, ಕಾರುಗಳನ್ನು ಮಾರಿ ತಪ್ಪಿಸಿಕೊಂಡಿದ್ದಾರೆ. ಇವರು ಮುಖ್ಯವಾಗಿ ಮಲಯಾಳಿ ಸಮುದಾಯದವರು, ಧಾರ್ಮಿಕ ಗುಂಪುಗಳು ಮತ್ತು ಅಪಾರ್ಟ್‌ಮೆಂಟ್ ಸಂಘಗಳ ಸದಸ್ಯರನ್ನು ಗುರಿಯಾಗಿಸಿಕೊಂಡು, 6 ರಿಂದ 20 ಶೇಕಡಾ ಲಾಭದ ಆಮಿಷವೊಡ್ಡಿ ಹೂಡಿಕೆ ಮಾಡಿಸಿದ್ದಾರೆ. ಮಲಯಾಳ ಮನೋರಮಾ ವರದಿಯ ಪ್ರಕಾರ, ಈ ದಂಪತಿ ಈಗ ಕೀನ್ಯಾದಲ್ಲಿ ತಲೆಮರೆಸಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ತೋಮಿ ಮತ್ತು ಶೈನಿ ವಿರುದ್ಧ ನೂರಾರು ದೂರುಗಳು ದಾಖಲಾಗಿದ್ದು, ಮೊದಲ ಅಂದಾಜಿನ ಪ್ರಕಾರ 400ಕ್ಕೂ ಹೆಚ್ಚು ಹೂಡಿಕೆದಾರರು ₹100 ಕೋಟಿಗೂ ಅಧಿಕ ಹಣವನ್ನು ಕಳೆದುಕೊಂಡಿದ್ದಾರೆ.

ಪೊಲೀಸ್ ತನಿಖೆ ಚುರುಕು

ಜುಲೈ 7ರಂದು ಬೆಂಗಳೂರು ಪೊಲೀಸರು ದಂಪತಿ ವಿರುದ್ಧ ಚಿಟ್ ಫಂಡ್ ಯೋಜನೆಯ ಮೂಲಕ ಹೂಡಿಕೆದಾರರನ್ನು ವಂಚಿಸಿದ ಆರೋಪದಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ರಾಮಮೂರ್ತಿ ನಗರದ 64 ವರ್ಷದ ಸಾವಿಯೋ ಪಿ.ಟಿ. ಅವರು ಜುಲೈ 5ರಂದು ಮೊದಲ ದೂರು ದಾಖಲಿಸಿದ್ದು, ತಮ್ಮ ಕುಟುಂಬ 70 ಲಕ್ಷ ರೂಪಾಯಿ ಕಳೆದುಕೊಂಡಿದೆ ಎಂದು ಆರೋಪಿಸಿದ್ದಾರೆ. ಜುಲೈ 6ರ ಸಂಜೆಯ ವೇಳೆಗೆ 265 ಜನರಿಂದ ದೂರುಗಳು ಬಂದಿವೆ.

"ಜುಲೈ 5ರಂದು ಪರಿಶೀಲಿಸಿದಾಗ ಕಚೇರಿ ಬೀಗ ಹಾಕಿತ್ತು. ಅವರು ದೂರವಾಣಿಗಳನ್ನು ಸ್ವಿಚ್ ಆಫ್ ಮಾಡಿದ್ದರು," ಎಂದು ಸಾವಿಯೋ ಪೊಲೀಸರಿಗೆ ತಿಳಿಸಿದ್ದಾರೆ. ಕಚೇರಿ ಸಿಬ್ಬಂದಿಗೂ ದಂಪತಿಗಳ ಬಗ್ಗೆ ಯಾವುದೇ ಮಾಹಿತಿ ಇಲ್ಲ.

ಪೊಲೀಸರು ಚಿಟ್ ಫಂಡ್ಸ್ ಕಾಯಿದೆ, 1982 ಮತ್ತು ಅನಿಯಂತ್ರಿತ ಠೇವಣಿ ಯೋಜನೆಗಳ ನಿಷೇಧ ಆದೇಶ, 2019 ರ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಅಲ್ಲದೆ, ಭಾರತೀಯ ನ್ಯಾಯ ಸಂಹಿತೆಯ 318(4) (ವಂಚನೆ) ಮತ್ತು 316(2) (ಕ್ರಿಮಿನಲ್ ಬ್ರೀಚ್ ಆಫ್ ಟ್ರಸ್ಟ್) ವಿಭಾಗಗಳನ್ನು ಅನ್ವಯಿಸಲಾಗಿದೆ. ವಂಚನೆಗೆ ಒಳಗಾದವರಲ್ಲಿ ಬಹುತೇಕರು ಮಲಯಾಳಿಗಳೇ ಆಗಿದ್ದು, ಮಲಯಾಳಿ ಸಮುದಾಯ ಸಂಘಟನೆಗಳ ಮೂಲಕವೇ ಈ ಹೂಡಿಕೆಗಳನ್ನು ಮಾಡಿದ್ದಾರೆ.