ಭಾರತದ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲಿಗೆ ಚಾಲನೆ: ಏನೆಲ್ಲಾ ವಿಶೇಷತೆಗಳಿವೆ?

ಪಶ್ಚಿಮ ಬಂಗಾಳದ ಮಾಲ್ಡಾ ಟೌನ್ ರೈಲ್ವೇ ನಿಲ್ದಾಣದಲ್ಲಿ ಶನಿವಾರ ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಮೊಟ್ಟಮೊದಲ ವಂದೇ ಭಾರತ್ ಸ್ಲೀಪರ್ ರೈಲಿಗೆ ಚಾಲನೆ ನೀಡಿದ್ದಾರೆ. ಈ ರೈಲು ಪಶ್ಚಿಮ ಬಂಗಾಳದ ಹೌರಾ ಮತ್ತು ಅಸ್ಸಾಂನ ಗುವಾಹಟಿ (ಕಾಮಾಖ್ಯ) ನಡುವೆ ಸಂಚರಿಸಲಿದ್ದು, ಈ ಎರಡು ರಾಜ್ಯಗಳ ನಡುವಿನ ದೂರವನ್ನು ಅತ್ಯಂತ ವೇಗವಾಗಿ ಕ್ರಮಿಸಲಿದೆ. ಚುನಾವಣಾ ಹೊಸ್ತಿಲಲ್ಲಿರುವ ಈ ರಾಜ್ಯಗಳಿಗೆ ಇದು ಕೇಂದ್ರ ಸರ್ಕಾರದ ದೊಡ್ಡ ಕೊಡುಗೆಯಾಗಿದೆ.

ಈ ರೈಲು ಪಶ್ಚಿಮ ಬಂಗಾಳ ಮತ್ತು ಅಸ್ಸಾಂ ರಾಜ್ಯಗಳ ನಡುವೆ ಹೈಸ್ಪೀಡ್ ಸಂಪರ್ಕ ಕಲ್ಪಿಸಲಿದ್ದು, ಪ್ರಯಾಣದ ಸಮಯವನ್ನು ಸುಮಾರು 2.5 ಗಂಟೆಗಳಷ್ಟು ಕಡಿಮೆ ಮಾಡಲಿದೆ. ಈ ವೇಗದ ಸಂಪರ್ಕವು ಪ್ರವಾಸೋದ್ಯಮ ಮತ್ತು ಧಾರ್ಮಿಕ ಯಾತ್ರೆಗಳಿಗೆ ಹೆಚ್ಚಿನ ಉತ್ತೇಜನ ನೀಡಲಿದೆ.

ರೈಲಿಗೆ ಚಾಲನೆ ಸಿಕ್ಕ ವಿಡಿಯೊ

ಪ್ರಮುಖ ತಾಂತ್ರಿಕ ವೈಶಿಷ್ಟ್ಯಗಳು

• ವೇಗ: ಈ ರೈಲು ಗಂಟೆಗೆ 180 ಕಿ.ಮೀ ಗರಿಷ್ಠ ವೇಗ ತಲುಪುವ ಸಾಮರ್ಥ್ಯ ಹೊಂದಿದ್ದರೂ, ಸದ್ಯಕ್ಕೆ ಗಂಟೆಗೆ 120-130 ಕಿ.ಮೀ ವೇಗದಲ್ಲಿ ಚಲಿಸಲಿದೆ.

• ಸುರಕ್ಷತೆ: ಸ್ವದೇಶಿ ನಿರ್ಮಿತ 'ಕವಚ' (Kavach) ಸ್ವಯಂಚಾಲಿತ ರಕ್ಷಣಾ ವ್ಯವಸ್ಥೆ ಮತ್ತು ಸುಧಾರಿತ ಸಿಸಿಟಿವಿ ಕಣ್ಗಾವಲು ಅಳವಡಿಸಲಾಗಿದೆ.

• ಸ್ವಯಂಚಾಲಿತ ಬಾಗಿಲುಗಳು: ಪ್ರಯಾಣದ ಸಮಯದಲ್ಲಿ ಬಾಗಿಲುಗಳು ಮುಚ್ಚಿರುತ್ತವೆ ಮತ್ತು ನಿಲ್ದಾಣ ಬಂದಾಗ ಮಾತ್ರ ಸ್ವಯಂಚಾಲಿತವಾಗಿ ತೆರೆಯುತ್ತವೆ.

ಪ್ರಯಾಣಿಕರ ಸೌಕರ್ಯ ಮತ್ತು ನೈರ್ಮಲ್ಯ

• ವಿಮಾನದಂತಹ ಅನುಭವ: ಸಂಪೂರ್ಣ ಹವಾನಿಯಂತ್ರಿತ (AC) ಬೋಗಿಗಳು, ಎರ್ಗೋನಾಮಿಕ್ ವಿನ್ಯಾಸದ ಬರ್ತ್‌ಗಳು ಮತ್ತು ಅತ್ಯಾಧುನಿಕ ಸಸ್ಪೆನ್ಷನ್ ವ್ಯವಸ್ಥೆಯಿಂದಾಗಿ ಪ್ರಯಾಣ ಅತ್ಯಂತ ಆರಾಮದಾಯಕವಾಗಿರುತ್ತದೆ.

• ರೋಗಾಣು ಮುಕ್ತ: ಶೇ. 99ರಷ್ಟು ಜರ್ಮ್ಸ್ ಕೊಲ್ಲುವ ಸುಧಾರಿತ ಸೋಂಕುನಿವಾರಕ ತಂತ್ರಜ್ಞಾನ ಮತ್ತು ಅತ್ಯುನ್ನತ ದರ್ಜೆಯ ಬೆಡ್‌ಶೀಟ್ ಹಾಗೂ ಟವೆಲ್‌ಗಳ ಸೌಲಭ್ಯವಿದೆ.

ಸ್ಥಳೀಯ ಆಹಾರದ ಸವಿಗೆ ಆದ್ಯತೆ

• ಪ್ರಾದೇಶಿಕ ಭೋಜನ: ಪ್ರಯಾಣಿಕರಿಗೆ ವಿಮಾನದ ಮಾದರಿಯಲ್ಲಿ ಊಟದ ಸೌಲಭ್ಯವಿದ್ದು, ಟಿಕೆಟ್ ದರದಲ್ಲೇ ಇದು ಸೇರಿರುತ್ತದೆ.

• ಅಸ್ಸಾಂ ಮತ್ತು ಬಂಗಾಳಿ ರುಚಿ: ಗುವಾಹಟಿಯಿಂದ ಹೌರಾಗೆ ಹೋಗುವವರಿಗೆ ಅಸ್ಸಾಮಿ ಭೋಜನ ಮತ್ತು ಹೌರಾದಿಂದ ಗುವಾಹಟಿಗೆ ಮರಳುವವರಿಗೆ ಬಂಗಾಳಿ ಶೈಲಿಯ ಆಹಾರ ನೀಡಲಾಗುತ್ತದೆ.

ಟಿಕೆಟ್ ದರ

ಈ ರೈಲು ಮೂರು ಹಂತದ ದರಗಳನ್ನು ಹೊಂದಿದ್ದು, ಅವುಗಳ ವಿವರ ಹೀಗಿದೆ:

• 3AC: ಸುಮಾರು ₹2,300

• 2AC: ಸುಮಾರು ₹3,000

• 1AC: ಸುಮಾರು ₹3,600