ಸಂಸತ್‌ ಮೇಲಿನ ಉಗ್ರರ ದಾಳಿಗೆ 24 ವರ್ಷ- 2001ರಲ್ಲಿ ಏನಾಗಿತ್ತು?

ಡಿ. 13, 2001. ಸಂಸತ್‌ನಲ್ಲಿ ಪ್ರತಿವರ್ಷದಂತೆ ನಿಯಮಿತ ಚಳಿಗಾಲದ ಅಧಿವೇಶನ ನಡೆಯುತ್ತಿತ್ತು. ಪ್ರಮುಖ ನಾಯಕರು ಸೇರಿದಂತೆ ಸಂಸದರು, ಸಚಿವರು ಕಲಾಪದ ಚರ್ಚೆಯಲ್ಲಿ ಮಗ್ನರಾಗಿದ್ದರು. ಏಕಾಏಕಿ ಗುಂಡಿನ ಶಬ್ದ ಮೂಲೆ ಮೂಲೆಗಳಿಂದ ಕೇಳಲು ಶುರುವಾಗಿತ್ತು. ಗಾಬರಿಗೊಂಡ ಸಚಿವರು, ಸಂಸದರು ದಿಕ್ಕಾಪಾಲಾಗಿ ಓಡಲು ಶುರುಮಾಡಿದ್ದರು. ಕೆಲವೇ ಕ್ಷಣಗಳಲ್ಲಿ, ಭದ್ರತಾ ಸಿಬ್ಬಂದಿ ಒಳಗೆ ಧಾವಿಸಿ, ಕಟ್ಟಡವನ್ನು ನಿಯಂತ್ರಣಕ್ಕೆ ತೆಗೆದುಕೊಂಡು, ಆವರಣವನ್ನು ಮುಚ್ಚಿ, ಸಂಸದರು ಮತ್ತು ಸಚಿವರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಿದರು. ಗೃಹ ಸಚಿವ ಲಾಲ್ ಕೃಷ್ಣ ಅಡ್ವಾಣಿ ಸೇರಿದಂತೆ ಹಲವಾರು ಪ್ರಮುಖ ನಾಯಕರು ಮತ್ತು ಪತ್ರಕರ್ತರು ದಾಳಿ ವೇಳೆ ಇನ್ನೂ ಒಳಗೇ ಇದ್ದರು.

ಮಹಿಳಾ ಮೀಸಲಾತಿ ಮಸೂದೆಯ ಕುರಿತು ಸದನವು ಬಿಸಿ ಚರ್ಚೆಯಲ್ಲಿ ಮುಳುಗಿದ್ದಾಗ ಇಷ್ಟೆಲ್ಲಾ ನಡೆದಿತ್ತು. ಆ ಹೊತ್ತಿಗೆ, ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಮತ್ತು ವಿರೋಧ ಪಕ್ಷದ ನಾಯಕಿ ಸೋನಿಯಾ ಗಾಂಧಿ ಆಗಷ್ಟೇ ಸಂಸತ್ತಿನಿಂದ ಹೊರಬಂದಿದ್ದರು. ಮುಂದಿನ ಕೆಲವೇ ಕ್ಷಣಗಳಲ್ಲಿ, ಭಾರತೀಯ ಪ್ರಜಾಪ್ರಭುತ್ವದ ದೇವಾಲಯದ ಮೇಲೆ ಅತಿದೊಡ್ಡ ಭಯೋತ್ಪಾದಕ ದಾಳಿ ನಡೆಯಲಿದೆ ಎಂದು ಯಾರೂ ಊಹಿಸಿರಲಿಲ್ಲ.

ಶ್ವೇತ ಬಣ್ಣ ಅಂಬಾಸಿಡರ್‌ ಕಾರು ಮತ್ತು ಗೇಟ್ ಸಂಖ್ಯೆ 12

ಬೆಳಿಗ್ಗೆ 11:30 ರ ಸುಮಾರಿಗೆ ಬಿಳಿ ಬಣ್ಣದ ಅಂಬಾಸಿಡರ್‌ ಕಾರು ಸಂಸತ್ತಿನ ಸಂಕೀರ್ಣದ ಗೇಟ್ ಸಂಖ್ಯೆ 12 ಮೂಲಕ ವೇಗವಾಗಿ ಧಾವಿಸಿತ್ತು. ಆ ವಾಹನವು ಗೃಹ ಸಚಿವಾಲಯ ಮತ್ತು ಸಂಸತ್ತಿನ ನಕಲಿ ಸ್ಟಿಕ್ಕರ್‌ಗಳನ್ನು ಹೊಂದಿತ್ತು. ಅದರ ವೇಗ ಮತ್ತು ಅಜಾಗರೂಕ ಚಲನೆಯಿಂದಾಗಿ ತಕ್ಷಣವೇ ಅನುಮಾನವನ್ನು ಹುಟ್ಟುಹಾಕಿತು. ಭದ್ರತಾ ಸಿಬ್ಬಂದಿ ಕಾರನ್ನು ಬೆನ್ನಟ್ಟಿದರು. ಆಗ ಅದು ಹತ್ತಿರದಲ್ಲಿ ನಿಲ್ಲಿಸಿದ್ದ ಉಪರಾಷ್ಟ್ರಪತಿಯವರ ಕಾರಿಗೆ ಡಿಕ್ಕಿ ಹೊಡೆದಿತ್ತು.

ಭಯೋತ್ಪಾದಕರು ಕಾರಿನ ಡಿಕ್ಕಿನಿಂದ ಹೊರಗೆ ಬಂದು ತಮ್ಮ AK-47 ರೈಫಲ್‌ಗಳಿಂದ ಮನಬಂದಂತೆ ಗುಂಡು ಹಾರಿಸಿದರು. ಆಗ ಭದ್ರತಾ ಪಡೆಗೆ ಸಂಸತ್‌ ಮೇಲೆ ಉಗ್ರರ ದಾಳಿ ನಡೆಯುತ್ತಿದೆ ಎಂಬುದು ಮನವರಿಕೆ ಆಗಿತ್ತು.

ಮುಂದೆ ಏನಾಯಿತು?

ಸಂಸತ್ತಿನ ಕಟ್ಟಡದ ಎಲ್ಲಾ ಬಾಗಿಲುಗಳು ಮುಚ್ಚಲ್ಪಟ್ಟವು. ಒಳಗಿದ್ದ ಸಂಸದರು ಮತ್ತು ಮಂತ್ರಿಗಳನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಯಿತು. ಭದ್ರತಾ ಪಡೆಗಳು ಹೊರಗೆ ಕಾರ್ಯಾಚರಣೆ ಕೈಗೊಂಡವು. ಇದ್ದಕ್ಕಿದ್ದಂತೆ, ಒಬ್ಬ ಭಯೋತ್ಪಾದಕ ಗೇಟ್ ಸಂಖ್ಯೆ 1 ಮೂಲಕ ಸಂಸತ್ತಿನ ಕಟ್ಟಡವನ್ನು ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದನು. ಆದಾಗ್ಯೂ, ಜಾಗೃತ ಭದ್ರತಾ ಸಿಬ್ಬಂದಿ ಸ್ಥಳದಲ್ಲೇ ಅವನನ್ನು ಹೊಡೆದುರುಳಿಸಿದರು.

ಉಳಿದ ನಾಲ್ವರು ಭಯೋತ್ಪಾದಕರು ಸಂಸತ್ತಿಗೆ ಪ್ರವೇಶಿಸಲು ಗೇಟ್ ಸಂಖ್ಯೆ 4 ರ ಕಡೆಗೆ ಧಾವಿಸಿದರು. ಭಯೋತ್ಪಾದಕರು ಮತ್ತು ಭದ್ರತಾ ಸಿಬ್ಬಂದಿಗಳ ನಡುವೆ ಭೀಕರ ಗುಂಡಿನ ಚಕಮಕಿ ನಡೆಯಿತು, ಇದರಲ್ಲಿ ಮೂವರು ಕೊಲ್ಲಲ್ಪಟ್ಟರು. ಕೊನೆಯ ಭಯೋತ್ಪಾದಕ ಗೇಟ್ ಸಂಖ್ಯೆ 5 ರ ಕಡೆಗೆ ಓಡಿಹೋದನು, ಆದರೆ ಅವನೂ ಭದ್ರತಾ ಪಡೆಗಳ ಗುಂಡುಗಳಿಗೆ ಬಲಿಯಾದನು. ಡಿಸೆಂಬರ್ 13, 2001 ರಂದು ಬೆಳಿಗ್ಗೆ 11:30 ರಿಂದ ಸಂಜೆ 4:00 ರವರೆಗೆ ಈ ಭೀಕರ ಕಾಳಗ ಮುಂದುವರಿಯಿತು

ಹುತಾತ್ಮರಾದ 9 ವೀರ ಯೋಧರು

ದೇಶವು ತನ್ನ ವೀರಪುತ್ರರನ್ನು ಕಳೆದುಕೊಂಡಿತ್ತು. ಭಯೋತ್ಪಾದಕರ ವಿರುದ್ಧ ಹೋರಾಡುವಾಗ ಐವರು ದೆಹಲಿ ಪೊಲೀಸ್ ಸಿಬ್ಬಂದಿ, ಸಿಆರ್‌ಪಿಎಫ್ ಮಹಿಳಾ ಕಾನ್‌ಸ್ಟೆಬಲ್ ಕಮಲೇಶ್ ಕುಮಾರಿ, ಇಬ್ಬರು ರಾಜ್ಯಸಭಾ ಸಚಿವಾಲಯದ ನೌಕರರು ಮತ್ತು ಒಬ್ಬ ತೋಟದ ಮಾಲಿ ಹುತಾತ್ಮರಾದರು. ಈ ವೀರರ ಧೈರ್ಯದಿಂದಾಗಿ ಭಯೋತ್ಪಾದಕರು ಸಂಸತ್‌ ಕಟ್ಟಡದ ಮುಖ್ಯ ಸಭಾಂಗಣವನ್ನು ತಲುಪಲು ಸಾಧ್ಯವಾಗಲಿಲ್ಲ. ಇಲ್ಲದಿದ್ದರೆ, ಒಂದು ದೊಡ್ಡ ದುರಂತವೇ ಸಂಭವಿಸಬಹುದಿತ್ತು.

2013 ರಲ್ಲಿ ಅಫ್ಜಲ್ ಗುರುಗೆ ಗಲ್ಲು

ದಾಳಿಯ ಕೇವಲ ಎರಡು ದಿನಗಳ ನಂತರ, ಡಿಸೆಂಬರ್ 15, 2001 ರಂದು, ದೆಹಲಿ ಪೊಲೀಸರು ಈ ಭೀಕರ ಉಗ್ರ ದಾಳಿಯ ಪ್ರಕರಣವನ್ನು ಭೇದಿಸಿದ್ದರು. ಮಾಸ್ಟರ್‌ಮೈಂಡ್ ಅಫ್ಜಲ್ ಗುರು, ಎಸ್‌ಎಆರ್ ಗೀಲಾನಿ, ಅಫ್ಶಾನ್ ಗುರು ಮತ್ತು ಶೌಕತ್ ಹುಸೇನ್‌ನನ್ನು ಬಂಧಿಸಲಾಯಿತು. ನಂತರ ದೀರ್ಘ ಕಾನೂನು ಹೋರಾಟ ನಡೆಯಿತು. ಸುಪ್ರೀಂ ಕೋರ್ಟ್ ಗೀಲಾನಿ ಮತ್ತು ಅಫ್ಶಾನ್‌ನನ್ನು ಖುಲಾಸೆಗೊಳಿಸಿತು, ಆದರೆ ಶೌಕತ್ ಹುಸೇನ್ ಶಿಕ್ಷೆಯನ್ನು ಕಡಿಮೆ ಮಾಡಲಾಯಿತು. ಆದಾಗ್ಯೂ, ದಾಳಿಯ ಪ್ರಮುಖ ಸಂಚುಕೋರ ಅಫ್ಜಲ್ ಗುರು ತಪ್ಪಿತಸ್ಥನೆಂದು ಕಂಡುಬಂದಿತ್ತು. ಫೆಬ್ರವರಿ 9, 2013 ರಂದು ಬೆಳಿಗ್ಗೆ 8:00 ಗಂಟೆಗೆ ದೆಹಲಿಯ ತಿಹಾರ್ ಜೈಲಿನಲ್ಲಿ ಅಫ್ಜಲ್ ಗುರುವನ್ನು ಗಲ್ಲಿಗೇರಿಸಲಾಯಿತು. ಇಂದಿಗೂ, ಡಿಸೆಂಬರ್ 13 ಪ್ರಜಾಪ್ರಭುತ್ವವನ್ನು ರಕ್ಷಿಸಲು ತಮ್ಮ ಪ್ರಾಣವನ್ನೇ ತ್ಯಾಗ ಮಾಡಿದ ಹುತಾತ್ಮರನ್ನು ನೆನಪಿಸುತ್ತದೆ.

ಹುತಾತ್ಮರನ್ನು ಸ್ಮರಿಸಿದ ಪ್ರಧಾನಿ ಮೋದಿ, ರಾಹುಲ್‌

ಈ ದುರ್ಘಟನೆ ನಡೆದು ಇಂದಿಗೆ 24 ವರ್ಷಗಳು ಕಳೆದಿದೆ. ಪ್ರತಿವರ್ಷವೂ ಡಿ.13ರಂದು ದುರಂತದಲ್ಲಿ ಮಡಿದವರನ್ನು ಸ್ಮರಿಸಲಾಗುತ್ತದೆ. ಆ ಭಯೋತ್ಪಾದಕ ದಾಳಿಯಲ್ಲಿ ಪ್ರಾಣತ್ಯಾಗ ಮಾಡಿದ ಹುತಾತ್ಮರಿಗೆ ಶ್ರದ್ಧಾಂಜಲಿ ಕಾರ್ಯಕ್ರಮವನ್ನು ಸಂಸತ್‌ನಲ್ಲಿ ಆಯೋಜಿಸಲಾಯಿತು. ಹುತಾತ್ಮ ಯೋಧರ ಸ್ಮರಣಾರ್ಥ ಸಂಸತ್ತಿನ ಆವರಣದಲ್ಲಿ ನಡೆದ ಶ್ರದ್ಧಾಂಜಲಿ ಕಾರ್ಯಕ್ರಮದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು, ಪ್ರಧಾನಿ ಮೋದಿ, ವಿಪಕ್ಷ ನಾಯಕ ರಾಹುಲ್ ಗಾಂಧಿ ಸಹಿತ ಗಣ್ಯರು ಹುತಾತ್ಮ ಯೋಧರಿಗೆ ಶ್ರದ್ಧಾಂಜಲಿ ಸಲ್ಲಿಸಿದರು.