Iran-Israel war| ಕರ್ನಾಟಕದಿಂದಲೂ ಇರಾನ್ಗೆ ಸಹಾಯಹಸ್ತ-ಅಲಿಪುರ ಉದ್ಯಮಿಗಳಿಂದ ನೆರವು
ಪಶ್ಚಿಮ ಏಷ್ಯಾ ಸಂಘರ್ಷದಿಂದ ಬಾಧಿತವಾಗಿರುವ ಇರಾನ್ ಜನತೆಗಾಗಿ ಕರ್ನಾಟಕದ ಅಲಿಪುರ ಮತ್ತು ಕಾಶ್ಮೀರದ ಶಿಯಾ ಸಮುದಾಯದವರು ಬೃಹತ್ ದೇಣಿಗೆ ಅಭಿಯಾನ ಆರಂಭಿಸಿದ್ದಾರೆ. ಆಹಾರ, ಔಷಧ ಮತ್ತು ಆಭರಣಗಳ ನೆರವಿನ ಸಂಪೂರ್ಣ ವರದಿ ಇಲ್ಲಿದೆ.
ಪಶ್ಚಿಮ ಏಷ್ಯಾದಲ್ಲಿ ಸಂಭವಿಸುತ್ತಿರುವ ಭೀಕರ ಯುದ್ಧದಿಂದ ತತ್ತರಿಸಿರುವ ಇರಾನ್ ಜನತೆಗೆ ಭಾರತದಲ್ಲಿರುವ ಶಿಯಾ ಸಮುದಾಯದವರು ಮಾನವೀಯತೆಯ ಹಸ್ತ ಚಾಚಿದ್ದಾರೆ. ಯುದ್ಧಪೀಡಿತ ಪ್ರದೇಶಗಳಲ್ಲಿನ ಸಾವು-ನೋವುಗಳನ್ನು ಕಂಡು ಮಿಡಿದಿರುವ ಸಮುದಾಯವು ಸ್ವಯಂಪ್ರೇರಿತವಾಗಿ ಆಹಾರ ಮತ್ತು ವೈದ್ಯಕೀಯ ಸಾಮಗ್ರಿಗಳನ್ನು ಪೂರೈಸಲು ಮುಂದಾಗಿದೆ.
ವಿಶೇಷವೆಂದರೆ, ಇರಾನ್ ಸರ್ಕಾರದಿಂದ ಯಾವುದೇ ಅಧಿಕೃತ ಆದೇಶ ಅಥವಾ ದೇಣಿಗೆಯ ಮನವಿ (ಫರ್ಮಾನು) ಬರದಿದ್ದರೂ, ಭಾರತೀಯ ಶಿಯಾ ಸಮುದಾಯದವರೇ ಈ ನಿರ್ಧಾರ ಕೈಗೊಂಡಿದ್ದಾರೆ. ಸಂಕಷ್ಟದಲ್ಲಿರುವ ಜನರಿಗೆ ನೆರವಾಗುವುದು ಸಮುದಾಯದ ಆದ್ಯತೆಯಾಗಿದ್ದು, ಅಗತ್ಯ ವಸ್ತುಗಳನ್ನು ಹಡಗಿನ ಮೂಲಕ ಇರಾನ್ಗೆ ಕಳುಹಿಸಿಕೊಡಲಾಗುತ್ತಿದೆ.
ವೈಯಕ್ತಿಕ ದೇಣಿಗೆ ಮತ್ತು ಅಲಿಪುರ ಗ್ರಾಮದ ಕೊಡುಗೆ
ಈ ಮಹತ್ಕಾರ್ಯಕ್ಕೆ ದೇಶದ ವಿವಿಧೆಡೆಯ ವ್ಯವಹಾರಸ್ಥರು ಮತ್ತು ಉದ್ಯಮಿಗಳು ವೈಯಕ್ತಿಕವಾಗಿ ದೊಡ್ಡ ಮಟ್ಟದ ದೇಣಿಗೆ ನೀಡುತ್ತಿದ್ದಾರೆ. ಕರ್ನಾಟಕದ ಗೌರಿಬಿದನೂರು ತಾಲ್ಲೂಕಿನ ಅಲಿಪುರ ಗ್ರಾಮದಿಂದಲೂ ಅನೇಕರು ವೈಯಕ್ತಿಕವಾಗಿ ಮತ್ತು ಸಾಮುದಾಯಿಕವಾಗಿ ನೆರವು ನೀಡುತ್ತಿದ್ದಾರೆ.
ಈ ಕುರಿತು ಮಾಹಿತಿ ನೀಡಿರುವ ಅಲಿಪುರ ಗ್ರಾಮಸ್ಥರಾದ ಮಿರ್ ತಸ್ವೀರ್ ಅಬ್ಬಾಸ್, "ಯುದ್ಧದಿಂದ ಇರಾನ್ನಲ್ಲಿ ಅಪಾರ ಸಾವು-ನೋವುಗಳು ಸಂಭವಿಸುತ್ತಿವೆ. ಇದನ್ನು ನೋಡಿ ಸುಮ್ಮನಿರಲಾಗದೆ ನಮ್ಮ ಸಮುದಾಯದವರು ಆಹಾರ, ಔಷಧ ಮತ್ತು ಇತರ ಅಗತ್ಯ ವಸ್ತುಗಳನ್ನು ಸಂಗ್ರಹಿಸಿ ಹಡಗಿನ ಮೂಲಕ ಕಳುಹಿಸುತ್ತಿದ್ದೇವೆ. ಅಲಿಪುರದಿಂದಲೂ ಅನೇಕರು ತಮ್ಮ ಕೈಲಾದ ಆರ್ಥಿಕ ನೆರವು ನೀಡುತ್ತಿದ್ದಾರೆ" ಎಂದು 'ದ ಫೆಡರಲ್ ಕರ್ನಾಟಕ'ಕ್ಕೆ ತಿಳಿಸಿದರು.
ಸಹಾಯದ ಸ್ವರೂಪ
ಇರಾನ್ ಸಂತ್ರಸ್ತರಿಗೆ ನೀಡಲಾಗುತ್ತಿರುವ ಸಹಾಯದ ಸ್ವರೂಪವು ಅತ್ಯಂತ ವ್ಯವಸ್ಥಿತವಾಗಿದ್ದು, ಪ್ರಮುಖವಾಗಿ ಧಾನ್ಯಗಳು ಮತ್ತು ದೀರ್ಘಕಾಲ ಬಾಳಿಕೆ ಬರುವ ಆಹಾರ ಪದಾರ್ಥಗಳನ್ನು ಒಳಗೊಂಡ ಆಹಾರ ಸಾಮಗ್ರಿಗಳನ್ನು ಪೂರೈಸಲಾಗುತ್ತಿದೆ; ಇದರೊಂದಿಗೆ ತುರ್ತು ಚಿಕಿತ್ಸೆಗೆ ಅಗತ್ಯವಿರುವ ಔಷಧಗಳು ಮತ್ತು ವೈದ್ಯಕೀಯ ಕಿಟ್ಗಳಂತಹ ವೈದ್ಯಕೀಯ ನೆರವನ್ನು ಕೂಡ ಒದಗಿಸಲಾಗುತ್ತಿದೆ. ಈ ಎಲ್ಲಾ ಅಗತ್ಯ ವಸ್ತುಗಳನ್ನು ಸುರಕ್ಷಿತವಾಗಿ ತಲುಪಿಸಲು ಸಮುದ್ರ ಮಾರ್ಗವನ್ನು ಆಯ್ದುಕೊಳ್ಳಲಾಗಿದ್ದು, ಬೃಹತ್ ಹಡಗುಗಳ ಮೂಲಕ ಇರಾನ್ಗೆ ಯಶಸ್ವಿಯಾಗಿ ರವಾನಿಸಲಾಗುತ್ತಿದೆ.
ಇರಾನ್ನ ಸರ್ವೋಚ್ಚ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಅವರ ಹತ್ಯೆಯ ಹಿನ್ನೆಲೆಯಲ್ಲಿ ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು ತಾಲೂಕಿನ ಅಲಿಪುರದಲ್ಲಿ ಇತ್ತೀಚೆಗೆ 'ಫಾತಿಮಯೂನ್ ಯುವಕರ ಬಳಗ'ದ ವತಿಯಿಂದ ಬೃಹತ್ ಶೋಕಾಚರಣೆ ಮೆರವಣಿಗೆ ಆಯೋಜಿಸಲಾಗಿದ್ದು, ಸುಮಾರು 20 ಸಾವಿರಕ್ಕೂ ಅಧಿಕ ಸಂಖ್ಯೆಯಲ್ಲಿರುವ ಸ್ಥಳೀಯ ಶಿಯಾ ಮುಸ್ಲಿಂ ಅನುಯಾಯಿಗಳು ಇದರಲ್ಲಿ ಭಾಗಿಯಾಗಲಿದ್ದರು.
1986ರಲ್ಲಿ ಅಲಿಪುರಕ್ಕೆ ಭೇಟಿ ನೀಡಿದ್ದ ಖಮೇನಿ
ವಿಶೇಷವೆಂದರೆ, 1986ರಲ್ಲಿ ಅಲಿಪುರಕ್ಕೆ ಭೇಟಿ ನೀಡಿದ್ದ ಖಮೇನಿ ಅವರು ಇಲ್ಲಿನ ಮಸೀದಿಯಲ್ಲಿ ಪ್ರಾರ್ಥನೆ ಸಲ್ಲಿಸಿದ್ದರು ಹಾಗೂ ಅವರ ಭೇಟಿಯ ಸ್ಮರಣಾರ್ಥ ಗ್ರಾಮದಲ್ಲಿ ಅವರ ಗುರುಗಳಾದ ಬೊಮೇನಿ ಹೆಸರಿನಲ್ಲಿ ಆಸ್ಪತ್ರೆಯನ್ನು ಸಹ ನಿರ್ಮಿಸಲಾಗಿದೆ; ಈ ಐತಿಹಾಸಿಕ ಸಂಬಂಧದಿಂದಾಗಿ ಗ್ರಾಮಸ್ಥರು ಮೂರು ದಿನಗಳ ಕಾಲ ವ್ಯಾಪಾರ ವಹಿವಾಟು ಸ್ಥಗಿತಗೊಳಿಸಿ ಶೋಕಾಚರಣೆ ಆಚರಿಸಲು ನಿರ್ಧರಿಸಿದ್ದರು. ಇನ್ನು ಮಧ್ಯಪ್ರಾಚ್ಯ ದೇಶಗಳಲ್ಲಿ ನೆಲೆಸಿರುವ ಅಲಿಪುರದ ನಿವಾಸಿಗಳು ಸದ್ಯಕ್ಕೆ ಸುರಕ್ಷಿತವಾಗಿದ್ದರೂ, ಯುದ್ಧದ ಭೀತಿಯಿಂದಾಗಿ ತಮ್ಮ ತಾಯ್ನಾಡಿಗೆ ಮರಳಲು ಸಿದ್ಧತೆ ನಡೆಸುತ್ತಿದ್ದಾರೆ ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.
ಕಾಶ್ಮೀರದ ಶಿಯಾ ಮುಸ್ಲಿಮರಿಂದಲೂ ಸಹಾಯಹಸ್ತ
ಈದ್-ಉಲ್-ಫಿತರ್ ಹಬ್ಬದ ನಂತರ, ಕಾಶ್ಮೀರದ ಬುದ್ಗಾಮ್ ಮತ್ತು ಬಾರಾಮುಲ್ಲಾ ಜಿಲ್ಲೆಗಳ ಶಿಯಾ ಮುಸ್ಲಿಂ ಸಮುದಾಯದವರು ಈ ಅಭಿಯಾನವನ್ನು ಸಂಘಟಿಸಿದರು. ಸ್ವಯಂಸೇವಕರು ಮನೆ ಮನೆಗೆ ತೆರಳಿ 'ಇರಾನ್ ಪರಿಹಾರ ನಿಧಿ'ಗಾಗಿ ದೇಣಿಗೆ ಸಂಗ್ರಹಿಸಿದರು. ಇದು ಕೇವಲ ಒಂದು ಧಾರ್ಮಿಕ ಕಾರ್ಯವಾಗದೆ, ಸಂಕಷ್ಟದಲ್ಲಿರುವ ನೆರೆಯ ರಾಷ್ಟ್ರದ ಜನರ ಪರವಾಗಿ ನಿಲ್ಲುವ ಮಾನವೀಯ ನಡೆಯಾಗಿ ಬದಲಾಯಿತು.
ವಿಶಿಷ್ಟ ದೇಣಿಗೆಗಳ ಮಹಾಪೂರ
ಸಾಮಾನ್ಯವಾಗಿ ದೇಣಿಗೆ ಎಂದರೆ ಹಣ ಎಂದು ಭಾವಿಸಲಾಗುತ್ತದೆ. ಆದರೆ ಇಲ್ಲಿ ಕಾಶ್ಮೀರಿಗರು ತಮ್ಮ ಭಾವನಾತ್ಮಕ ಮತ್ತು ಬೆಲೆಬಾಳುವ ವಸ್ತುಗಳನ್ನು ನೀಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ. ಮಹಿಳೆಯರು ತಮ್ಮ ವೈಯಕ್ತಿಕ ಚಿನ್ನ ಮತ್ತು ಬೆಳ್ಳಿಯ ಒಡವೆಗಳನ್ನು ನೀಡಿದರೆ, ಹಳ್ಳಿಗಳ ನಿವಾಸಿಗಳು ತಮ್ಮ ಜೀವನೋಪಾಯದ ಮೂಲವಾದ ಕುರಿ ಮತ್ತು ಆಡುಗಳಂತಹ ಜಾನುವಾರುಗಳನ್ನು ದಾನ ಮಾಡಿದ್ದಾರೆ; ಇದರೊಂದಿಗೆ ಕಾಶ್ಮೀರಿ ಸಂಸ್ಕೃತಿಯ ಭಾಗವಾದ ಬೆಲೆಬಾಳುವ ತಾಮ್ರದ ಪಾತ್ರೆಗಳನ್ನು ಸಹ ಅಭಿಯಾನಕ್ಕೆ ಒಪ್ಪಿಸಲಾಗಿದೆ. ವಿಶೇಷವಾಗಿ ಮಕ್ಕಳು ಕೂಡ ಈ ಕಾರ್ಯದಲ್ಲಿ ಕೈಜೋಡಿಸಿದ್ದು, ಹಬ್ಬದ ಸಂದರ್ಭದಲ್ಲಿ ತಮಗೆ ಸಿಕ್ಕ 'ಈದಿ' ಹಣ ಮತ್ತು ತಮ್ಮ ಪುಟ್ಟ ಉಳಿತಾಯದ ಡಬ್ಬಿಗಳನ್ನು (Piggy banks) ಸಂತ್ರಸ್ತರಿಗಾಗಿ ನೀಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
