Karnataka Politics| ಸಂಪುಟ ಪುನರ್‌ ರಚನೆಗಾಗಿ ದೆಹಲಿಯಲ್ಲಿ 30 ಶಾಸಕರ ಬೀಡು; ನಾಯಕತ್ವ ಬದಲಾವಣೆಗೆ ಡಿಕೆಶಿ ಬಣ ಪಟ್ಟು!

ಕರ್ನಾಟಕ ಕಾಂಗ್ರೆಸ್ ಸರ್ಕಾರದಲ್ಲಿ ಎರಡೂವರೆ ವರ್ಷದ ಅವಧಿ ಪೂರೈಸುತ್ತಿದ್ದಂತೆಯೇ ಸಚಿವ ಸಂಪುಟ ಪುನರ್‌ ರಚನೆಯ ಕೂಗು ತಾರಕಕ್ಕೇರಿದೆ. ಸಂಪುಟದಲ್ಲಿ ಸ್ಥಾನ ಪಡೆಯಲು ಹಪಹಪಿಸುತ್ತಿರುವ ಸುಮಾರು 30ಕ್ಕೂ ಹೆಚ್ಚು ಶಾಸಕರು ಇದೀಗ ದೆಹಲಿಯಲ್ಲಿ ಬೀಡು ಬಿಟ್ಟಿದ್ದು, ಹೈಕಮಾಂಡ್ ಮೇಲೆ ಒತ್ತಡ ಹೇರಲು ಮುಂದಾಗಿದ್ದಾರೆ.

ಹೈಕಮಾಂಡ್ ಭೇಟಿಗೆ ಕಾಯುತ್ತಿರುವ ಶಾಸಕರು

ದೆಹಲಿಯಲ್ಲಿರುವ ಕಾಂಗ್ರೆಸ್ ಶಾಸಕರು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ರಾಹುಲ್ ಗಾಂಧಿ ಮತ್ತು ರಾಜ್ಯ ಉಸ್ತುವಾರಿ ರಣದೀಪ್ ಸಿಂಗ್ ಸುರ್ಜೆವಾಲಾ ಅವರನ್ನು ಭೇಟಿ ಮಾಡಲು ಸಮಯ ಕೋರಿದ್ದಾರೆ. ಆದರೆ, ಮೂಲಗಳ ಪ್ರಕಾರ ಈವರೆಗೆ ಯಾವುದೇ ನಾಯಕರ ಭೇಟಿಗೆ ಶಾಸಕರಿಗೆ ಅವಕಾಶ ಸಿಕ್ಕಿಲ್ಲ. ಹೈಕಮಾಂಡ್‌ನಿಂದ ಕರೆ ಬಂದ ತಕ್ಷಣವೇ ಭೇಟಿ ಮಾಡಿ ತಮ್ಮ ಬೇಡಿಕೆಗಳನ್ನು ಮುಂದಿಡಲು ಶಾಸಕರು ಸಿದ್ಧತೆ ನಡೆಸಿದ್ದಾರೆ.

20 ಸಚಿವರನ್ನು ಕೈಬಿಡಲು ಆಗ್ರಹ?

ಸಂಪುಟ ಪುನರ್‌ ರಚನೆಗೆ ಪಟ್ಟು ಹಿಡಿದಿರುವ ಶಾಸಕರು, ಪ್ರಸ್ತುತ ಸಂಪುಟದಲ್ಲಿರುವ 20ಕ್ಕೂ ಹೆಚ್ಚು ಸಚಿವರನ್ನು ಕೈಬಿಟ್ಟು ಹೊಸಬರಿಗೆ ಅವಕಾಶ ನೀಡಬೇಕೆಂದು ಒತ್ತಾಯಿಸುತ್ತಿದ್ದಾರೆ. ಸಚಿವರ ನಿಷ್ಕ್ರಿಯತೆ ಮತ್ತು ಶಾಸಕರ ಕೆಲಸಗಳಿಗೆ ಸ್ಪಂದಿಸದ ಕುರಿತು ಹೈಕಮಾಂಡ್ ನಾಯಕರಿಗೆ ದೂರು ನೀಡಲು ಶಾಸಕರು ನಿರ್ಧರಿಸಿದ್ದಾರೆ. "ಎರಡೂವರೆ ವರ್ಷದ ಬಳಿಕ ಸಂಪುಟ ಪುನರ್‌ ರಚನೆ ಮಾಡಲಾಗುವುದು" ಎಂದು ಕೆ.ಸಿ. ವೇಣುಗೋಪಾಲ್ ನೀಡಿದ್ದ ಹಳೆಯ ಭರವಸೆಯನ್ನು ಶಾಸಕರು ಇದೀಗ ಅಸ್ತ್ರವಾಗಿ ಬಳಸುತ್ತಿದ್ದಾರೆ.

ಡಿಕೆಶಿ ಬಣದ ಪ್ರತಿತಂತ್ರ: ನಾಯಕತ್ವ ಬದಲಾವಣೆಗೆ ಒತ್ತಾಯ!

ಇತ್ತ ಒಂದು ಬಣ ಸಂಪುಟ ಪುನರ್‌ ರಚನೆಗಾಗಿ ದೆಹಲಿಯಲ್ಲಿ ಓಡಾಟ ನಡೆಸುತ್ತಿದ್ದರೆ, ಇತ್ತ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ಬಣದ ಶಾಸಕರು ಕೂಡ ದೆಹಲಿ ಯಾತ್ರೆಗೆ ಸಜ್ಜಾಗುತ್ತಿದ್ದಾರೆ. ಇವರ ಬೇಡಿಕೆ ಮಾತ್ರ ಭಿನ್ನವಾಗಿದೆ. "ಸಂಪುಟ ಪುನರ್‌ ರಚನೆಯ ಬದಲು ನಾಯಕತ್ವ ಬದಲಾವಣೆ (ಮುಖ್ಯಮಂತ್ರಿ ಬದಲಾವಣೆ) ಮಾಡಿ" ಎಂದು ಆಗ್ರಹಿಸಲು ಡಿಕೆಶಿ ಬಣ ಚಿಂತನೆ ನಡೆಸಿದೆ. ಸಂಪುಟ ಪುನರ್‌ ರಚನೆಯ ಶಾಸಕರಿಗೆ ಭೇಟಿಗೆ ಅವಕಾಶ ನೀಡಿದರೆ, ನಮಗೂ ಅವಕಾಶ ನೀಡಲೇಬೇಕು ಎಂದು ಹೈಕಮಾಂಡ್‌ಗೆ ಪಟ್ಟು ಹಿಡಿಯಲು ಇವರು ಸಿದ್ಧತೆ ನಡೆಸಿದ್ದಾರೆ.

ಇಂದು ದೆಹಲಿಯಲ್ಲಿ ಹೈಡ್ರಾಮಾ?

ದೆಹಲಿಯಲ್ಲಿ ಇಂದು ನಡೆಯುವ ರಾಜಕೀಯ ಬೆಳವಣಿಗೆಗಳ ಮೇಲೆ ಡಿಕೆಶಿ ಬಣದ ದೆಹಲಿ ಯಾತ್ರೆಯ ನಿರ್ಧಾರ ಅವಲಂಬಿತವಾಗಿದೆ. ಒಂದು ವೇಳೆ ಹೈಕಮಾಂಡ್ ಸಂಪುಟ ಪುನರ್‌ ರಚನೆಯ ಬೇಡಿಕೆಯ ಶಾಸಕರನ್ನು ಭೇಟಿ ಮಾಡಿದರೆ, ಕೆಪಿಸಿಸಿ ಅಧ್ಯಕ್ಷರ ಬಣ ಕೂಡ ದೆಹಲಿಗೆ ಹಾರಲಿದೆ. ಒಟ್ಟಿನಲ್ಲಿ ಕರ್ನಾಟಕದ ಕಾಂಗ್ರೆಸ್ ರಾಜಕೀಯ ಹಗ್ಗಜಗ್ಗಾಟ ಈಗ ರಾಷ್ಟ್ರ ರಾಜಧಾನಿಯ ಅಂಗಳಕ್ಕೆ ತಲುಪಿದ್ದು, ಹೈಕಮಾಂಡ್ ಯಾರ ಪರವಾಗಿ ನಿಲ್ಲಲಿದೆ ಎಂಬುದು ಕುತೂಹಲ ಮೂಡಿಸಿದೆ.