ಇರಾನ್ ಯುದ್ಧದ ವಿರುದ್ಧ ದೇಶಾದ್ಯಂತ ಶಿಯಾ ಮುಸ್ಲಿಮರ ಈದ್‌ ಪ್ರತಿಭಟನೆ

ಈದ್‌ ಉಲ್‌ ಫಿತ್ರ್ ಹಬ್ಬದ ಸಂಭ್ರಮದ ನಡುವೆ ದೇಶದ ಹಲವು ಭಾಗಗಳಲ್ಲಿ ಶನಿವಾರ ವಿಭಿನ್ನ ಚಿತ್ರಣ ಮೂಡಿಬಂದಿತು. ಒಂದೆಡೆ ಸುನ್ನಿ ಮುಸ್ಲಿಮರು ಸಂಭ್ರಮ, ಸಡಗರದೊಂದಿಗೆ ಈದ್‌ ಆಚರಿಸಿದರೆ, ಮತ್ತೊಂದೆಡೆ ಶಿಯಾ ಮುಸ್ಲಿಮರು ಇರಾನ್ ಯುದ್ಧ ಮತ್ತು ಅಯತೊಲ್ಲಾ ಅಲಿ ಖಾಮೆನೇಯಿ ಹತ್ಯೆಯನ್ನು ಖಂಡಿಸಿ ಮೌನ, ಶೋಕ ಮತ್ತು ಪ್ರತಿಭಟನೆಗಳ ಮೂಲಕ ಹಬ್ಬವನ್ನು ಗುರುತಿಸಿದರು.

ಅಮೆರಿಕ–ಇಸ್ರೇಲ್ ದಾಳಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ಶಿಯಾ ಸಮುದಾಯದವರು ಹಲವು ರಾಜ್ಯಗಳಲ್ಲಿ ಶಾಂತಿಯುತ ಪ್ರತಿಭಟನೆ ನಡೆಸಿ, ಯುದ್ಧ ವಿರೋಧಿ ಘೋಷಣೆಗಳನ್ನು ಕೂಗಿದರು.

ಮಧ್ಯ ಕಾಶ್ಮೀರದ ಬುಡ್ಗಾಂನಲ್ಲಿ ಅಂಜುಮನ್-ಎ-ಶರಿಯೇ-ಶಿಯಾನ್ ಮುಖ್ಯಸ್ಥ ಆಗಾ ಸಯೀದ್ ಹಸನ್ ಅವರ ನೇತೃತ್ವದಲ್ಲಿ ಈದ್‌ ನಮಾಜಿನ ಬಳಿಕ ಐಕ್ಯತಾ ಮೆರವಣಿಗೆ ನಡೆಯಿತು. ಪ್ರತಿಭಟನಾಕಾರರು ಇರಾನ್ ಧ್ವಜಗಳು ಹಾಗೂ ಖಮೇನಿ ಅವರ ಭಾವಚಿತ್ರಗಳನ್ನು ಹಿಡಿದು ಅಮೆರಿಕ–ಇಸ್ರೇಲ್ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಬಂಡಿಪೋರಾದ ಶಾದಿಪೋರಾ ಮತ್ತು ನಗರದ ಹಸನಾಬಾದ್ ಪ್ರದೇಶಗಳಲ್ಲಿಯೂ ಸಮಾನ ಸ್ವರೂಪದ ಪ್ರತಿಭಟನೆಗಳು ನಡೆದಿದ್ದು, ಎಲ್ಲವೂ ಶಾಂತಿಯುತವಾಗಿ ಅಂತ್ಯಗೊಂಡಿರುವುದಾಗಿ ತಿಳಿದುಬಂದಿದೆ.

ಇದರಿಂದ ಕಾಶ್ಮೀರ ಕಣಿವೆಯ ಸೂಕ್ಷ್ಮ ಪ್ರದೇಶಗಳಲ್ಲಿ ಕಾನೂನು ಸುವ್ಯವಸ್ಥೆ ಕಾಪಾಡಲು ಭದ್ರತಾ ಪಡೆಗಳನ್ನು ಹೆಚ್ಚಿನ ಸಂಖ್ಯೆಯಲ್ಲಿ ನಿಯೋಜಿಸಲಾಗಿತ್ತು. ಜಮ್ಮು–ಕಾಶ್ಮೀರ ಮುಖ್ಯಮಂತ್ರಿ ಒಮರ್ ಅಬ್ದುಲ್ಲಾ ಕೂಡ ಈ ಯುದ್ಧಕ್ಕೆ ತಕ್ಷಣ ಅಂತ್ಯವಾಗಬೇಕು ಎಂದು ಆಗ್ರಹಿಸಿದ್ದಾರೆ. ಹಜ್ರತ್ಬಲ್ ದರ್ಗಾದಲ್ಲಿ ಈದ್‌ ನಮಾಜಿನ ಬಳಿಕ ಮಾತನಾಡಿದ ಅವರು, ಈ ಯುದ್ಧದ ಪರಿಣಾಮ ಇಡೀ ಮುಸ್ಲಿಂ ಜಗತ್ತಿನ ಮೇಲೂ, ಭಾರತದ ಇಂಧನ ಅವಶ್ಯಕತೆಗಳ ಮೇಲೂ ಬಿದ್ದಿದೆ ಎಂದು ಹೇಳಿದ್ದಾರೆ.

ಭೋಪಾಲ್‌ನಲ್ಲಿ ಕಪ್ಪುಪಟ್ಟಿ ಧರಿಸಿ ಆಕ್ರೋಶ

ಮಧ್ಯಪ್ರದೇಶದ ಭೋಪಾಲ್ ಸೇರಿದಂತೆ ಹಲವು ನಗರಗಳಲ್ಲಿ ಶಿಯಾ ಸಮುದಾಯದವರು ಕಪ್ಪುಪಟ್ಟಿ ಧರಿಸಿ, ಸರಳ ಹಾಗೂ ಹಳೆಯ ಬಟ್ಟೆಗಳಲ್ಲಿ ಪ್ರಾರ್ಥನಾ ಸ್ಥಳಗಳಿಗೆ ಆಗಮಿಸುವ ಮೂಲಕ ಶೋಕ ವ್ಯಕ್ತಪಡಿಸಿದರು. ಮಕ್ಕಳೂ ಸಹ ಕಪ್ಪುಪಟ್ಟಿ ಧರಿಸಿದ್ದ ದೃಶ್ಯ ಕಂಡುಬಂದಿತು. ರಾಜ್ಯ ರಾಜಧಾನಿಯ ಇಮಾಮ್ಬಾರದಲ್ಲಿ ಖಾಮೆನೇಯಿ ಅವರ ಭಾವಚಿತ್ರವನ್ನು ಇರಿಸಲಾಗಿದ್ದು, ಸಭೆಯಲ್ಲಿ ಮೌಲಾನಾ ರಾಜೀ-ಉಲ್-ಹಸನ್ ಅನ್ಯಾಯದ ವಿರುದ್ಧ ಧ್ವನಿ ಎತ್ತುವ ಅಗತ್ಯವನ್ನು ಉಲ್ಲೇಖಿಸಿದರು.

ಆಲ್ ಇಂಡಿಯಾ ಶಿಯಾ ಸಮಾಜ್‌ನ ರಾಜ್ಯಾಧ್ಯಕ್ಷ ಇಫ್ತಿಖಾರ್ ಅಲಿ ಅka ಜಾನಿ ಪಹಲ್ವಾನ್ ಮಾತನಾಡಿ, ಅಮೆರಿಕ–ಇಸ್ರೇಲ್ ಕ್ರಮಗಳನ್ನು ಖಂಡಿಸಿ ತಮ್ಮ ಸಮುದಾಯ ಈ ಬಾರಿ ಈದ್‌ ಸಂಭ್ರಮದಿಂದ ಆಚರಿಸುತ್ತಿಲ್ಲ ಎಂದು ಹೇಳಿದರು. ಅವರ ಮಾಹಿತಿಯಂತೆ, ರಾಜ್ಯದಲ್ಲಿ ಸುಮಾರು 4,000 ಶಿಯಾ ಕುಟುಂಬಗಳು ಭೋಪಾಲ್, ಜಬಲ್‌ಪುರ, ಇಂದೋರ್, ವಿಧಿಶಾ, ಉಜ್ಜಯಿನಿ, ಬುರ್‌ಹಾನ್‌ಪುರ, ನರಮದಾಪುರಂ ಜಿಲ್ಲೆಯ ಇಟಾರ್ಸಿ ಹಾಗೂ ರತ್ಲಾಂ ಜಿಲ್ಲೆಯ ಜಾವೋರಾ ಪ್ರದೇಶಗಳಲ್ಲಿ ನೆಲೆಸಿವೆ.

ರಾಜಸ್ಥಾನದಲ್ಲೂ ಶೋಕದ ಈದ್‌

ರಾಜಸ್ಥಾನದ ಜೈಪುರ, ಸಿಕರ್, ಅಜ್ಮೇರ್ ಸೇರಿದಂತೆ ಹಲವು ಪ್ರದೇಶಗಳಲ್ಲಿಯೂ ಶಿಯಾ ಮತ್ತು ಸುನ್ನಿ ಸಮುದಾಯದ ಕೆಲವರು ಸೇರಿ ಯುದ್ಧ ವಿರೋಧಿ ಪ್ರತಿಭಟನೆ ನಡೆಸಿದರು. ಜೈಪುರದ ಆಮೇರ್ ಪ್ರದೇಶದಲ್ಲಿ ಮಹಿಳೆಯರು ಹಾಗೂ ಮಕ್ಕಳು ಮೆರವಣಿಗೆ ನಡೆಸಿ ಅಮೆರಿಕ–ಇಸ್ರೇಲ್ ವಿರುದ್ಧ ಘೋಷಣೆಗಳನ್ನು ಕೂಗಿ, ಇರಾನ್‌ನಲ್ಲಿ ಸಂಭವಿಸಿದ ಸಾವುಗಳ ಬಗ್ಗೆ ದುಃಖ ವ್ಯಕ್ತಪಡಿಸಿದರು. “ಹಬ್ಬದ ದಿನವೇ ಶೋಕದ ದಿನವಾಗಿದೆ” ಎಂಬ ಸಂದೇಶ ಹೊತ್ತ ಫಲಕಗಳನ್ನು ಹಿಡಿದ ಪ್ರತಿಭಟನಾಕಾರರು ಅಮೇರ್ ಕೋಟೆ ಸಮೀಪ ಜಮಾಯಿಸಿದ್ದರು.

ಅಜ್ಮೇರ್‌ನಲ್ಲಿ ಇಮಾಮ್-ಎ-ಜುಮಾ ಮೌಲಾನಾ ಸಯೀದ್ ತಾಕಿ ಜಾಫರ್, ಖಾಮೆನೇಯಿ ಅವರ ಸಾವಿನ ವರದಿಯ ಹಿನ್ನೆಲೆ ಸಮುದಾಯ ಶೋಕಾಚರಣೆಯಲ್ಲಿ ತೊಡಗಿದೆ ಎಂದು ಹೇಳಿದರು. ಸಿಕರ್ ಮತ್ತು ಅಜ್ಮೇರ್ ಭಾಗಗಳಲ್ಲಿ ಈದ್‌ ನಮಾಜಿಗೆ ಬಂದ ಹಲವರು ಕಪ್ಪುಪಟ್ಟಿ ಧರಿಸಿದ್ದರೆ, ಕೆಲವು ಮಸೀದಿಗಳಲ್ಲಿ ಕಪ್ಪು ಧ್ವಜಗಳನ್ನು ಹಾರಿಸಲಾಯಿತು. ಇದರ ನಡುವೆಯೂ ರಾಜ್ಯದಾದ್ಯಂತ ಈದ್‌ ಪ್ರಾರ್ಥನೆಗಳು ಶಾಂತಿಯುತವಾಗಿ ನಡೆದಿದ್ದು, ಕೆಲವೆಡೆ ಹಿಂದೂ ಸಮುದಾಯದವರು ಹೂವಿನ ಮಳೆ ಸುರಿದು ಭಕ್ತರನ್ನು ಸ್ವಾಗತಿಸಿದ ಚಿತ್ರಣವೂ ಕಂಡುಬಂದಿತು.

ಬಿಗಿ ಭದ್ರತೆ ನಡುವೆ ಶಾಂತಿಯುತ ಆಚರಣೆ

ಪ್ರತಿಭಟನೆಗಳ ನಡುವೆಯೂ ವಿವಿಧ ರಾಜ್ಯಗಳಲ್ಲಿ ಆಡಳಿತವು ಬಿಗಿ ಭದ್ರತೆ ಕೈಗೊಂಡಿತ್ತು. ವಿಶೇಷವಾಗಿ ಜೈಪುರದಲ್ಲಿ ಈದ್ಗಾ, ಜಾಮಾ ಮಸೀದಿ ಸೇರಿದಂತೆ ಪ್ರಮುಖ ಪ್ರಾರ್ಥನಾ ಸ್ಥಳಗಳ ಸುತ್ತ ಪೊಲೀಸ್ ಮತ್ತು ರ್ಯಾಪಿಡ್ ಆಕ್ಷನ್ ಫೋರ್ಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು. ಡ್ರೋನ್ ನಿಗಾವಳಿ ಮತ್ತು ಫ್ಲ್ಯಾಗ್ ಮಾರ್ಚ್ ಮೂಲಕ ಎಚ್ಚರಿಕೆ ಕ್ರಮಗಳನ್ನು ಅನುಸರಿಸಿದ್ದರಿಂದ ಯಾವುದೇ ಅಹಿತಕರ ಘಟನೆಗಳಿಲ್ಲದೆ ದಿನ ಶಾಂತಿಯುತವಾಗಿ ಕಳೆಯಿತು.

ಈ ಬಾರಿ ಈದ್‌ ಹಬ್ಬ ದೇಶದ ವಿವಿಧ ಭಾಗಗಳಲ್ಲಿ ಎರಡು ಭಿನ್ನ ಮನೋಭಾವಗಳನ್ನು ಹೊರಹಾಕಿತು. ಒಂದು ಕಡೆ ಧಾರ್ಮಿಕ ಸಂಭ್ರಮ, ಮತ್ತೊಂದು ಕಡೆ ಯುದ್ಧದ ವಿರುದ್ಧ ಕಳವಳ ಮತ್ತು ಶೋಕ—ಈ ಎರಡೂ ಭಾವನೆಗಳು ಶನಿವಾರದ ಆಚರಣೆಗಳಲ್ಲಿ ಸ್ಪಷ್ಟವಾಗಿ ವ್ಯಕ್ತವಾದವು.