ಇಂದು ದೇಶಾದ್ಯಂತ ಓಲಾ, ಉಬರ್, ರ‍್ಯಾಪಿಡೋ ಬಂದ್; 'ಆಲ್ ಇಂಡಿಯಾ ಬ್ರೇಕ್‌ಡೌನ್'ಗೆ ಕರೆ!

ಓಲಾ, ಉಬರ್ ಮತ್ತು ರ‍್ಯಾಪಿಡೋ ಅಪ್ಲಿಕೇಶನ್‌ಗಳ ಮೂಲಕ ಸೇವೆ ಸಲ್ಲಿಸುವ ಗಿಗ್ ಕಾರ್ಮಿಕರು ಫೆಬ್ರವರಿ 7, ಶನಿವಾರದಂದು ದೇಶಾದ್ಯಂತ ಪ್ರತಿಭಟನೆಗೆ ಕರೆ ನೀಡಿದ್ದಾರೆ. ಚಾಲಕರು ಆರು ಗಂಟೆಗಳ ಕಾಲ ಆನ್‌ಲೈನ್‌ನಿಂದ ಹೊರಗುಳಿಯುವ ಮೂಲಕ 'ಆಲ್ ಇಂಡಿಯಾ ಬ್ರೇಕ್‌ಡೌನ್' ಚಳುವಳಿ ನಡೆಸಲು ಯೋಜಿಸಿದ್ದಾರೆ.

ಪ್ರತಿಭಟನೆಗೆ ಮುಖ್ಯ ಕಾರಣಗಳೇನು?

ಕನಿಷ್ಠ ಪ್ರಯಾಣ ದರ ನಿಗದಿಪಡಿಸುವಲ್ಲಿ ಸರ್ಕಾರದ ಮಧ್ಯಸ್ಥಿಕೆ ಮತ್ತು ವಾಣಿಜ್ಯ ಉದ್ದೇಶಗಳಿಗಾಗಿ ಖಾಸಗಿ ವಾಹನಗಳ ಬಳಕೆಯನ್ನು ತಡೆಯಲು ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತರಬೇಕು ಎಂಬುದು ಚಾಲಕರ ಪ್ರಮುಖ ಬೇಡಿಕೆಯಾಗಿದೆ.

ತೆಲಂಗಾಣ ಗಿಗ್ ಮತ್ತು ಪ್ಲಾಟ್‌ಫಾರ್ಮ್ ವರ್ಕರ್ಸ್ ಯೂನಿಯನ್ (TGPWU) ಈ ಮುಷ್ಕರಕ್ಕೆ ಕರೆ ನೀಡಿದೆ. ಈ ಒಕ್ಕೂಟವು ಓಲಾ, ಉಬರ್ ಮತ್ತು ರ‍್ಯಾಪಿಡೋ ಸಂಸ್ಥೆಗಳಲ್ಲಿ ಕೆಲಸ ಮಾಡುವ ಸಾರಿಗೆ ಕಾರ್ಮಿಕರನ್ನು ಪ್ರತಿನಿಧಿಸುತ್ತದೆ.

ಚಾಲಕರ ಪ್ರಮುಖ ಬೇಡಿಕೆಗಳು

ಕನಿಷ್ಠ ಮೂಲ ದರ ನಿಗದಿ: ಆಟೋ, ಕ್ಯಾಬ್ ಮತ್ತು ಬೈಕ್ ಟ್ಯಾಕ್ಸಿಗಳಿಗೆ ಸರ್ಕಾರವೇ ಕನಿಷ್ಠ ಮೂಲ ದರವನ್ನು ನಿಗದಿಪಡಿಸಬೇಕು. 'ಮೋಟಾರು ವಾಹನ ಅಗ್ರಿಗೇಟರ್ ಮಾರ್ಗಸೂಚಿಗಳು, 2025' ಜಾರಿಯಲ್ಲಿದ್ದರೂ, ಕಂಪನಿಗಳು ತಮಗೆ ಇಚ್ಛೆ ಬಂದಂತೆ ದರ ನಿಗದಿಪಡಿಸಿ ಶೋಷಣೆ ಮಾಡುತ್ತಿವೆ ಎಂಬುದು ಚಾಲಕರ ದೂರು.

ಖಾಸಗಿ ವಾಹನಗಳ ಬಳಕೆಗೆ ನಿಷೇಧ: ವಾಣಿಜ್ಯ ಉದ್ದೇಶಕ್ಕಾಗಿ ಬಿಳಿ ಬೋರ್ಡ್ (ಖಾಸಗಿ) ವಾಹನಗಳನ್ನು ಬಳಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಬೇಕು. ಇದರಿಂದ ಪರವಾನಗಿ ಪಡೆದ ವಾಣಿಜ್ಯ ಚಾಲಕರ ಆದಾಯಕ್ಕೆ ಧಕ್ಕೆ ಉಂಟಾಗುತ್ತಿದೆ ಎಂದು ಒಕ್ಕೂಟ ಹೇಳಿದೆ.

'ಆಲ್ ಇಂಡಿಯಾ ಬ್ರೇಕ್‌ಡೌನ್' ಘೋಷಣೆ

ಸಾಮಾಜಿಕ ಜಾಲತಾಣವಾದ 'X' ನಲ್ಲಿ ಪ್ರತಿಭಟನೆಯ ಬಗ್ಗೆ ಮಾಹಿತಿ ಹಂಚಿಕೊಂಡಿರುವ ಒಕ್ಕೂಟವು, "ಫೆಬ್ರವರಿ 7 ರಂದು ಭಾರತದಾದ್ಯಂತ ಅಪ್ಲಿಕೇಶನ್ ಆಧಾರಿತ ಸಾರಿಗೆ ಕಾರ್ಮಿಕರು 'ಆಲ್ ಇಂಡಿಯಾ ಬ್ರೇಕ್‌ಡೌನ್' ಆಚರಿಸಲಿದ್ದಾರೆ. ಕನಿಷ್ಠ ದರವಿಲ್ಲ, ನಿಯಂತ್ರಣವಿಲ್ಲ, ನಿರಂತರ ಶೋಷಣೆ ನಡೆಯುತ್ತಿದೆ. ಅಗ್ರಿಗೇಟರ್ ಕಂಪನಿಗಳು ಲಾಭ ಗಳಿಸುತ್ತಿದ್ದರೆ, ಲಕ್ಷಾಂತರ ಚಾಲಕರು ಬಡತನಕ್ಕೆ ತಳ್ಳಲ್ಪಡುತ್ತಿದ್ದಾರೆ," ಎಂದು ಆಕ್ರೋಶ ವ್ಯಕ್ತಪಡಿಸಿದೆ.

ಗಿಗ್ ಕಾರ್ಮಿಕರ ಸ್ಥಿತಿ ಬಗ್ಗೆ ಆರ್ಥಿಕ ಸಮೀಕ್ಷೆ ಹೇಳಿದ್ದೇನು?

ಜನವರಿ 30 ರಂದು ಬಿಡುಗಡೆಯಾದ 2025-26ರ ಆರ್ಥಿಕ ಸಮೀಕ್ಷೆಯು ಗಿಗ್ ಕಾರ್ಮಿಕರ ಆದಾಯದ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. ಭಾರತದ ಗಿಗ್ ಆರ್ಥಿಕತೆಯು ವೇಗವಾಗಿ ಬೆಳೆಯುತ್ತಿದ್ದರೂ, ಆದಾಯದ ಅಸ್ಥಿರತೆ ದೊಡ್ಡ ಸಮಸ್ಯೆಯಾಗಿದೆ. ಸುಮಾರು ಶೇ. 40 ರಷ್ಟು ಗಿಗ್ ಕಾರ್ಮಿಕರು ತಿಂಗಳಿಗೆ 15,000 ರೂ.ಗಿಂತ ಕಡಿಮೆ ಆದಾಯ ಗಳಿಸುತ್ತಿದ್ದಾರೆ. ಗಿಗ್ ಕಾರ್ಮಿಕರ ಸಂಖ್ಯೆಯು 2021ರಲ್ಲಿ 77 ಲಕ್ಷ ಇದ್ದದ್ದು, 2025ರಲ್ಲಿ 1.2 ಕೋಟಿಗೆ ಏರಿಕೆಯಾಗಿದೆ. ಇದು ಭಾರತದ ಒಟ್ಟು ಕಾರ್ಯಪಡೆಯ ಶೇ. 2 ಕ್ಕಿಂತ ಹೆಚ್ಚಿದೆ.

ಶನಿವಾರದಂದು ಚಾಲಕರು ಆರು ಗಂಟೆಗಳ ಕಾಲ ಲಾಗ್-ಔಟ್ ಆಗಲಿರುವುದರಿಂದ ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಓಲಾ, ಉಬರ್ ಮತ್ತು ರ‍್ಯಾಪಿಡೋ ಸೇವೆಗಳಲ್ಲಿ ವ್ಯತ್ಯಯ ಉಂಟಾಗುವ ಸಾಧ್ಯತೆಯಿದೆ. ಪ್ರಯಾಣಿಕರು ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗಬಹುದು.