ಇಂಡಿಗೋ ಹೊಸ FDTL ನಿಯಮ ಜಾರಿ: ಪೈಲಟ್‌ಗಳ ಸಂಖ್ಯೆ ಹೆಚ್ಚಳ-ಇನ್ನು ವಿಮಾನ ರದ್ದತಿ ಆತಂಕವಿಲ್ಲ!

ಹೊಸ ಫ್ಲೈಟ್ ಡ್ಯೂಟಿ ಟೈಮ್ ಲಿಮಿಟೇಶನ್ (FDTL) ನಿಯಮಗಳ ಅನುಸರಣೆಗೆ ನೀಡಲಾಗಿದ್ದ ವಿನಾಯಿತಿ ಫೆಬ್ರವರಿ 10ಕ್ಕೆ ಮುಕ್ತಾಯಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ, ಇಂಡಿಗೋ ತನ್ನ ಕಾರ್ಯಾಚರಣೆಯನ್ನು ಬಲಪಡಿಸಿದೆ. ಕಳೆದ ಡಿಸೆಂಬರ್‌ನಲ್ಲಿ ಎದುರಾದ ಕಾರ್ಯಾಚರಣೆಯ ಕುಸಿತ ಮತ್ತು ವಿಮಾನ ರದ್ದತಿಯಂತಹ ಘಟನೆಗಳು ಮರುಕಳಿಸದಂತೆ ಸಂಸ್ಥೆ ಮುನ್ನೆಚ್ಚರಿಕೆ ವಹಿಸಿದೆ.

ಪೈಲಟ್‌ಗಳ ಸಂಖ್ಯೆಯಲ್ಲಿ ಹೆಚ್ಚಳ

ನಾಗರಿಕ ವಿಮಾನಯಾನ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, ಇಂಡಿಗೋ ಸಂಸ್ಥೆಯು ತನ್ನ ಕಾರ್ಯಾಚರಣೆಯನ್ನು ಬಲಪಡಿಸಲು ಪ್ರತಿ ವಿಮಾನಕ್ಕೆ ಇರುವ ಪೈಲಟ್ ತಂಡಗಳ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸಿದೆ. 2025ರ ಡಿಸೆಂಬರ್‌ನಲ್ಲಿ ಪ್ರತಿ ವಿಮಾನಕ್ಕೆ 6ಕ್ಕಿಂತ ಕಡಿಮೆ ಪೈಲಟ್ ತಂಡಗಳಿದ್ದರೆ, 2026ರ ಫೆಬ್ರವರಿ ವೇಳೆಗೆ ಈ ಪ್ರಮಾಣವನ್ನು 7.2 ಸೆಟ್‌ಗಳಿಗೆ ಏರಿಸಲಾಗಿದೆ. ಇದರೊಂದಿಗೆ, ಡಿಸೆಂಬರ್‌ನಲ್ಲಿ ಶೂನ್ಯವಾಗಿದ್ದ ಕ್ರೂ ಬಫರ್ (ಹೆಚ್ಚುವರಿ ಪೈಲಟ್ ಸಾಮರ್ಥ್ಯ) ಪ್ರಮಾಣವನ್ನು ಫೆಬ್ರವರಿಯಲ್ಲಿ ಶೇಕಡಾ 3ಕ್ಕೆ ಹೆಚ್ಚಿಸಲಾಗಿದ್ದು, ಇದು ವಿಮಾನಯಾನ ಸಂಸ್ಥೆಯು ಹೊಸ ನಿಯಮಗಳನ್ನು ಪಾಲಿಸಲು ಮತ್ತು ವಿಮಾನ ರದ್ದತಿಯನ್ನು ತಡೆಯಲು ಸಹಕಾರಿಯಾಗಲಿದೆ.

ಬಿಕ್ಕಟ್ಟು ಮತ್ತು ದಂಡ

ಕಳೆದ ಡಿಸೆಂಬರ್‌ನಲ್ಲಿ ನಿಯಮಗಳ ಉಲ್ಲಂಘನೆಯಿಂದಾಗಿ ಇಂಡಿಗೋ ಸುಮಾರು 5,000ಕ್ಕೂ ಹೆಚ್ಚು ವಿಮಾನಗಳನ್ನು ರದ್ದುಗೊಳಿಸಿತ್ತು. ಇದರಿಂದಾಗಿ ವಿಮಾನಯಾನ ಪ್ರಾಧಿಕಾರವು ಸಂಸ್ಥೆಗೆ 22.2 ಕೋಟಿ ರೂ. ದಂಡ ವಿಧಿಸಿತ್ತು. ಈಗ ಹೊಸ ನೇಮಕಾತಿ ಮತ್ತು ತರಬೇತಿಯ ಮೂಲಕ ಈ ಬಿಕ್ಕಟ್ಟನ್ನು ನೀಗಿಸಲು ಸಂಸ್ಥೆ ಮುಂದಾಗಿದೆ. ಈ ಕಹಿ ಘಟನೆಯಿಂದ ಪಾಠ ಕಲಿತಿರುವ ಇಂಡಿಗೋ, ಜನವರಿಯಲ್ಲಿ 100 ಹೊಸ ಪೈಲಟ್‌ಗಳನ್ನು ನೇಮಿಸಿಕೊಂಡಿದೆ ಮತ್ತು ಪ್ರತಿ ತಿಂಗಳು ಹೊಸ ತಂಡಗಳಿಗೆ ತರಬೇತಿ ನೀಡುವ ಪ್ರಕ್ರಿಯೆಯನ್ನು ಮುಂದುವರಿಸಿದೆ.

ಕ್ರೂ ಬಫರ್ ಮತ್ತು ಮೀಸಲು ಸಾಮರ್ಥ್ಯ

ಕಳೆದ ಡಿಸೆಂಬರ್‌ನಲ್ಲಿ ಇಂಡಿಗೋ ಸಂಸ್ಥೆಯಲ್ಲಿ 'ಕ್ರೂ ಬಫರ್' (ಹೆಚ್ಚುವರಿ ಪೈಲಟ್‌ಗಳ ಲಭ್ಯತೆ) ಶೂನ್ಯವಾಗಿತ್ತು. ಇದರಿಂದಾಗಿ ಸಣ್ಣ ಸಮಸ್ಯೆಯಾದರೂ ವಿಮಾನಗಳನ್ನು ರದ್ದುಗೊಳಿಸಬೇಕಾದ ಅನಿವಾರ್ಯತೆ ಇತ್ತು. ಆದರೆ ಈಗ ಫೆಬ್ರವರಿಯಲ್ಲಿ ಇದನ್ನು ಶೇ. 3ಕ್ಕೆ ಹೆಚ್ಚಿಸಲಾಗಿದೆ. ಅಷ್ಟೇ ಅಲ್ಲದೆ, ತುರ್ತು ಸಂದರ್ಭಗಳಿಗಾಗಿ ಇರುವ 'ಸ್ಟ್ಯಾಂಡ್‌ಬೈ' ಪೈಲಟ್‌ಗಳ ಪ್ರಮಾಣವನ್ನು ಕನಿಷ್ಠ ಶೇ. 15ಕ್ಕೆ ಏರಿಸಲಾಗಿದೆ. ಇದರಿಂದಾಗಿ ಪೈಲಟ್‌ಗಳಿಗೆ ಹುಷಾರಿಲ್ಲದಿದ್ದರೂ ಅಥವಾ ಕೊನೆಯ ಕ್ಷಣದ ಬದಲಾವಣೆಗಳಿದ್ದರೂ ವಿಮಾನ ಹಾರಾಟಕ್ಕೆ ತೊಂದರೆಯಾಗುವುದಿಲ್ಲ.