Chinese CCTV Camera| ಚೀನಾ ಸಿಸಿಟಿವಿ ಕ್ಯಾಮೆರಾಗಳಿಗೆ ಭಾರತದಲ್ಲಿ ಬ್ರೇಕ್: ಏಪ್ರಿಲ್ 1 ರಿಂದ ಹೊಸ ನಿಯಮ ಜಾರಿ!

ಭಾರತದ ಭದ್ರತೆ ಮತ್ತು ದತ್ತಾಂಶ ರಕ್ಷಣೆಯ ದೃಷ್ಟಿಯಿಂದ ಕೇಂದ್ರ ಸರ್ಕಾರವು ಒಂದು ಮಹತ್ವದ ಹೆಜ್ಜೆ ಇರಿಸಿದೆ. ಏಪ್ರಿಲ್ 1 ರಿಂದ ಜಾರಿಗೆ ಬರಲಿರುವ ಹೊಸ ಪ್ರಮಾಣೀಕರಣ ನಿಯಮಗಳ ಅಡಿಯಲ್ಲಿ, ಚೀನಾ ಮೂಲದ ಸಿಸಿಟಿವಿ ಕ್ಯಾಮೆರಾಗಳು ಮತ್ತು ಚೀನೀ ಚಿಪ್‌ಸೆಟ್ ಬಳಸುವ ಉಪಕರಣಗಳ ಮಾರಾಟಕ್ಕೆ ಭಾರತದಲ್ಲಿ ತೆರೆ ಬೀಳಲಿದೆ.

ಏನಿದು ಹೊಸ ನಿಯಮ?

ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು (MeitY) 2024 ರಲ್ಲಿ ಜಾರಿಗೆ ತಂದ 'ಅಗತ್ಯ ಅವಶ್ಯಕತೆಗಳ' (ER) ಮಾನದಂಡಗಳ ಅನ್ವಯ ಈ ಕ್ರಮ ಕೈಗೊಳ್ಳಲಾಗಿದೆ.

• ಸಿಸಿಟಿವಿ ತಯಾರಕರು ತಮ್ಮ ಉತ್ಪನ್ನಗಳಲ್ಲಿ ಬಳಸುವ 'ಸಿಸ್ಟಮ್-ಆನ್-ಚಿಪ್' (SoC) ಮೂಲವನ್ನು ಬಹಿರಂಗಪಡಿಸುವುದು ಇನ್ನು ಮುಂದೆ ಕಡ್ಡಾಯ.

• ಉತ್ಪನ್ನಗಳನ್ನು ಎಸ್‌ಟಿಕ್ಯೂಸಿ (STQC) ಚೌಕಟ್ಟಿನಡಿಯಲ್ಲಿ ಗೊತ್ತುಪಡಿಸಿದ ಪ್ರಯೋಗಾಲಯಗಳಲ್ಲಿ ಕಟ್ಟುನಿಟ್ಟಿನ ತಪಾಸಣೆಗೆ ಒಳಪಡಿಸಿ ಪ್ರಮಾಣಪತ್ರ ಪಡೆಯಬೇಕು.

• ಅನಧಿಕೃತ ರಿಮೋಟ್ ಪ್ರವೇಶ ಅಥವಾ ಹ್ಯಾಕಿಂಗ್ ತಡೆಗಟ್ಟಲು ಈ ಪರೀಕ್ಷೆಗಳು ಅತ್ಯಗತ್ಯ.

ಚೀನಾ ಕಂಪನಿಗಳಿಗೆ ಹಿನ್ನಡೆ

ಕಳೆದ ವರ್ಷದವರೆಗೆ ಭಾರತದ ಸಿಸಿಟಿವಿ ಮಾರುಕಟ್ಟೆಯಲ್ಲಿ ಮೂರನೇ ಒಂದು ಭಾಗದಷ್ಟು ಪಾಲನ್ನು ಚೀನಾ ಕಂಪನಿಗಳೇ ಹೊಂದಿದ್ದವು. ಆದರೆ ಈಗ ಸರ್ಕಾರವು ಚೀನೀ ಮೂಲದ ಉತ್ಪನ್ನಗಳಿಗೆ ಪ್ರಮಾಣಪತ್ರ ನೀಡಲು ನಿರಾಕರಿಸುತ್ತಿರುವುದರಿಂದ ಆ ಕಂಪನಿಗಳಿಗೆ ಭಾರತದ ಮಾರುಕಟ್ಟೆ ಬಹುತೇಕ ಬಂದ್ ಆಗಿದೆ.

ದೈತ್ಯ ಕಂಪನಿ ಹಿಕ್ವಿಷನ್ ನಂತಹ ಸಂಸ್ಥೆಗಳು ಈಗ ಭಾರತೀಯ ಪಾಲುದಾರರೊಂದಿಗೆ ಜಂಟಿ ಉದ್ಯಮ ಆರಂಭಿಸಿ, ಚೀನಾ ಲಿಂಕ್ ಇಲ್ಲದ ಪೂರೈಕೆ ಸರಪಳಿ ನಿರ್ಮಿಸಲು ಮುಂದಾಗಿವೆ. ಮತ್ತೊಂದು ದೊಡ್ಡ ಕಂಪನಿ ದಾಹುವಾ ತನ್ನ ವಹಿವಾಟನ್ನು ಶೇ. 80 ರಷ್ಟು ಕಳೆದುಕೊಂಡಿದ್ದು, ಮಾರುಕಟ್ಟೆಯಿಂದ ಹೊರಬೀಳುವ ಹಂತದಲ್ಲಿದೆ.

ಭಾರತೀಯ ಬ್ರಾಂಡ್‌ಗಳ ಅಬ್ಬರ

ಚೀನಾ ಕಂಪನಿಗಳ ನಿರ್ಗಮನದಿಂದ ಭಾರತೀಯ ಕಂಪನಿಗಳಿಗೆ ಭರ್ಜರಿ ಲಾಭವಾಗಿದೆ. ಪ್ರಸ್ತುತ ಭಾರತದ ಸಿಸಿಟಿವಿ ಮಾರುಕಟ್ಟೆಯಲ್ಲಿ ಶೇ. 80 ಕ್ಕೂ ಹೆಚ್ಚು ಪಾಲು ದೇಶೀಯ ಕಂಪನಿಗಳ ಕೈಯಲ್ಲಿದೆ.

• ಸಿಪಿ ಪ್ಲಸ್ (CP Plus): ಮಾರುಕಟ್ಟೆಯಲ್ಲಿ ಶೇ. 45-50 ರಷ್ಟು ಪಾಲನ್ನು ಹೊಂದುವ ಮೂಲಕ ಅಗ್ರಸ್ಥಾನಕ್ಕೇರಿದೆ.

• ಇತರ ಪ್ರಮುಖ ಕಂಪನಿಗಳು: ಕ್ಯೂಬೊ, ಪ್ರಮಾ, ಮ್ಯಾಟ್ರಿಕ್ಸ್ ಮತ್ತು ಸ್ಪರ್ಶ್ ಈ ಕಂಪನಿಗಳು ಈಗ ತೈವಾನ್ ಚಿಪ್‌ಸೆಟ್ ಮತ್ತು ಸ್ಥಳೀಯ ಫರ್ಮ್‌ವೇರ್ ಬಳಸುತ್ತಿವೆ. ಪ್ರೀಮಿಯಂ ವಿಭಾಗದಲ್ಲಿ ಅಮೆರಿಕದ ಬಾಷ್ ಮತ್ತು ಹನಿವೆಲ್ ಕಂಪನಿಗಳು ತಮ್ಮ ಸ್ಥಾನ ಉಳಿಸಿಕೊಂಡಿವೆ.

ಬೆಲೆ ಏರಿಕೆಯ ಭೀತಿ

ಚೀನಾ ಮೂಲದ ಅಗ್ಗದ ಬಿಡಿಭಾಗಗಳನ್ನು ಕೈಬಿಟ್ಟು ತೈವಾನ್ ಅಥವಾ ಅಮೆರಿಕದ ಚಿಪ್‌ಸೆಟ್‌ಗಳನ್ನು ಬಳಸುತ್ತಿರುವುದರಿಂದ ಉತ್ಪಾದನಾ ವೆಚ್ಚ ಹೆಚ್ಚಾಗಿದೆ. ಸಿಸಿಟಿವಿ ಕ್ಯಾಮೆರಾಗಳ ತಯಾರಿಕಾ ವೆಚ್ಚವು ಶೇ. 15 ರಿಂದ 20 ರಷ್ಟು ಏರಿಕೆಯಾಗಿದೆ ಎಂದು ಅಂದಾಜಿಸಲಾಗಿದೆ. ಆರಂಭಿಕ ಹಂತದ ಕ್ಯಾಮೆರಾಗಳ ಬೆಲೆ ಸ್ಥಿರವಾಗಿದ್ದರೂ, ಮಧ್ಯಮ ಮತ್ತು ಹೈ-ಎಂಡ್ ಕ್ಯಾಮೆರಾಗಳ ಬೆಲೆಯಲ್ಲಿ ಗಣನೀಯ ಏರಿಕೆಯಾಗುವ ಸಾಧ್ಯತೆಯಿದೆ.