ಚೀನಾಕ್ಕೆ ತೆರಳಬೇಕಿದ್ದ ರಷ್ಯಾ ತೈಲ ಹಡಗು ಇದೀಗ ಭಾರತಕ್ಕೆ: ನವಮಂಗಳೂರು ತಲುಪಿದ 'ಆಕ್ವಾ ಟೈಟಾನ್'

ಇರಾನ್-ಇಸ್ರೇಲ್-ಅಮೆರಿಕ ನಡುವಿನ ಭೀಕರ ಯುದ್ಧದಿಂದಾಗಿ ಭಾರತದಲ್ಲಿ ಇಂಧನ ಕೊರತೆಯ ಭೀತಿ ಎದುರಾಗಿರುವ ಬೆನ್ನಲ್ಲೇ, ಚೀನಾಕ್ಕೆ ತೆರಳಬೇಕಿದ್ದ ರಷ್ಯಾದ ಕಚ್ಚಾ ತೈಲ ಹೊತ್ತ ಹಡಗೊಂದನ್ನು ಭಾರತದತ್ತ ಬಂದಿದೆ. 'ಆಕ್ವಾ ಟೈಟಾನ್' (Aqua Titan) ಹೆಸರಿನ ಈ ಮಧ್ಯಮ ಗಾತ್ರದ ತೈಲ ಟ್ಯಾಂಕರ್ ಶನಿವಾರ ಸಂಜೆ ಕರ್ನಾಟಕದ ನವಮಂಗಳೂರು ಬಂದರಿಗೆ ಯಶಸ್ವಿಯಾಗಿ ಬಂದಿಳಿದಿದೆ. ರಷ್ಯಾದ ತೈಲ ಖರೀದಿಗೆ ವಿಧಿಸಲಾಗಿದ್ದ ನಿರ್ಬಂಧಗಳನ್ನು ಅಮೆರಿಕದ ಟ್ರಂಪ್ ಆಡಳಿತವು ಭಾರತಕ್ಕೆ 30 ದಿನಗಳ ಕಾಲ ತಾತ್ಕಾಲಿಕವಾಗಿ ಸಡಿಲಿಸಿದ (ವಿನಾಯಿತಿ ನೀಡಿದ) ಬೆನ್ನಲ್ಲೇ ಈ ಮಹತ್ವದ ಬೆಳವಣಿಗೆ ನಡೆದಿದೆ.

ಜನವರಿ ಅಂತ್ಯದಲ್ಲಿ ಬಾಲ್ಟಿಕ್ ಸಮುದ್ರ ಬಂದರಿನಲ್ಲಿ ಕಚ್ಚಾ ತೈಲವನ್ನು ತುಂಬಿಸಿಕೊಂಡಿದ್ದ ಆಕ್ವಾ ಟೈಟಾನ್ ಹಡಗು, ಮೂಲತಃ ಚೀನಾದ ರಿಜಾವೊ (Rizhao) ಬಂದರಿಗೆ ತೆರಳಬೇಕಿತ್ತು. ಆದರೆ, ಸಮುದ್ರದಲ್ಲಿ ಸಿಲುಕಿರುವ ನಿರ್ಬಂಧಿತ ರಷ್ಯಾ ತೈಲವನ್ನು ಖರೀದಿಸಲು ಭಾರತವು ಅಮೆರಿಕದಿಂದ ತಾತ್ಕಾಲಿಕ ವಿನಾಯಿತಿ ಪಡೆದ ಕೆಲವೇ ದಿನಗಳಲ್ಲಿ, ಅಂದರೆ ಮಾರ್ಚ್ ಮಧ್ಯಭಾಗದಲ್ಲಿ ಈ ಹಡಗಿನ ಮಾರ್ಗವನ್ನು ಭಾರತದತ್ತ ಬದಲಿಸಲಾಯಿತು. ಇದೇ ರೀತಿ ಚೀನಾಕ್ಕೆ ತೆರಳುತ್ತಿದ್ದ ರಷ್ಯಾ ತೈಲ ಹೊತ್ತ ಇನ್ನೂ ಕನಿಷ್ಠ ಆರು ಹಡಗುಗಳು ಇದೀಗ ಭಾರತದ ಕರಾವಳಿಯತ್ತ ಧಾವಿಸುತ್ತಿವೆ ಎಂದು ಹಡಗು-ನಿಗಾ ಸಂಸ್ಥೆ ವೋರ್ಟೆಕ್ಸಾ (Vortexa) ವರದಿ ಮಾಡಿದೆ. ಈ ಪೈಕಿ 'ಸೂಯೆಜ್‌ಮ್ಯಾಕ್ಸ್ ಜೌಜೌ ಎನ್' ಹೆಸರಿನ ಎರಡನೇ ಹಡಗು ಮಾರ್ಚ್ 25 ರಂದು ಗುಜರಾತ್‌ನ ಸಿಕ್ಕಾ ಬಂದರಿಗೆ ಬಂದಿಳಿಯುವ ನಿರೀಕ್ಷೆಯಿದೆ.

ಹಾರ್ಮುಜ್ ಜಲಸಂಧಿ ಬಿಕ್ಕಟ್ಟು, ಭಾರತದ ಆತಂಕ

ಭಾರತವು ತೈಲಕ್ಕಾಗಿ ಈ ರೀತಿ ದಿಢೀರ್ ಪರ್ಯಾಯ ಮಾರ್ಗಗಳನ್ನು ಹುಡುಕಲು ಪ್ರಮುಖ ಕಾರಣ ಪಶ್ಚಿಮ ಏಷ್ಯಾದ ಯುದ್ಧ. ಇರಾನ್ ಯುದ್ಧದಿಂದಾಗಿ ಜಾಗತಿಕ ಇಂಧನ ಪೂರೈಕೆಯ ಪ್ರಮುಖ ನಾಡಿಮಿಡಿತವಾದ 'ಹಾರ್ಮುಜ್ ಜಲಸಂಧಿ' ಮುಚ್ಚಲಾಗಿದೆ. ಭಾರತದ ಒಟ್ಟು ಕಚ್ಚಾ ತೈಲ ಆಮದಿನ ಶೇ. 40 ರಿಂದ 50 ರಷ್ಟು ಪಾಲು, ಅರ್ಧದಷ್ಟು ಎಲ್‌ಎನ್‌ಜಿ (LNG) ಮತ್ತು ಬಹುಪಾಲು ಎಲ್‌ಪಿಜಿ (LPG) ಹಡಗುಗಳು ಇದೇ ಮಾರ್ಗವಾಗಿ ಹಾದುಬರಬೇಕಿದೆ. 48 ಗಂಟೆಗಳ ಒಳಗೆ ಹಾರ್ಮುಜ್ ಜಲಸಂಧಿಯಲ್ಲಿ ಹಡಗುಗಳ ಮುಕ್ತ ಸಂಚಾರಕ್ಕೆ ಅವಕಾಶ ಮಾಡಿಕೊಡದಿದ್ದರೆ ಇರಾನ್‌ನ ವಿದ್ಯುತ್ ಸ್ಥಾವರಗಳ ಮೇಲೆ ಭೀಕರ ದಾಳಿ ನಡೆಸುವುದಾಗಿ ಅಮೆರಿಕದ ನಿಯೋಜಿತ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ. ಆದರೂ ಕೊಲ್ಲಿ ರಾಷ್ಟ್ರಗಳಿಂದ ವಿಶ್ವದ ಇತರ ಭಾಗಗಳಿಗೆ ನಡೆಯುವ ತೈಲ ಪೂರೈಕೆಗೆ ಈ ಜಲಸಂಧಿಯೇ ಬಹುದೊಡ್ಡ ಅಡಚಣೆಯಾಗಿದೆ.

ಅಡುಗೆ ಅನಿಲ ಬಿಕ್ಕಟ್ಟಿಗೆ ತಾತ್ಕಾಲಿಕ ರಿಲೀಫ್

ರಷ್ಯಾದಿಂದ ಆಗಮಿಸುತ್ತಿರುವ ಈ ಏಳು ತೈಲ ಹಡಗುಗಳು ಭಾರತದ ಕಚ್ಚಾ ತೈಲ ಕೊರತೆಗೆ ತಾತ್ಕಾಲಿಕ ರಿಲೀಫ್ ನೀಡಲಿವೆ. ಇದರ ಜೊತೆಗೆ, ದೇಶದಲ್ಲಿ ತಲೆದೋರಿರುವ ಅಡುಗೆ ಅನಿಲ ಬಿಕ್ಕಟ್ಟನ್ನು ಶಮನಗೊಳಿಸುವ ನಿಟ್ಟಿನಲ್ಲಿ, ಅಮೆರಿಕದ ಟೆಕ್ಸಾಸ್‌ನಿಂದ ಬೃಹತ್ ಪ್ರಮಾಣದ ಎಲ್‌ಪಿಜಿ ಹೊತ್ತು ತಂದಿರುವ 'ಪಿಕ್ಸಿಸ್ ಪಯೋನೀರ್' ಹಡಗು ಭಾನುವಾರ ನವಮಂಗಳೂರು ಬಂದರಿಗೆ ಬಂದಿಳಿದಿದೆ. ಪ್ರಸ್ತುತ ಹಡಗಿನಿಂದ ಅನಿಲವನ್ನು ಅನ್‌ಲೋಡ್ ಮಾಡುವ ಪ್ರಕ್ರಿಯೆ ಭರದಿಂದ ಸಾಗಿದ್ದು, ಇದು ಇಂಧನ ಕೊರತೆಯ ಆತಂಕದಲ್ಲಿರುವ ದೇಶಕ್ಕೆ ಕೊಂಚ ನೆಮ್ಮದಿ ತಂದಿದೆ.