ಫಾಸ್ಟ್‌ಟ್ಯಾಗ್ ವಾರ್ಷಿಕ ಪಾಸ್‌ಗೆ ಭರ್ಜರಿ ಡಿಮ್ಯಾಂಡ್; 6 ತಿಂಗಳಲ್ಲಿ 50 ಲಕ್ಷ ದಾಟಿದ ಬಳಕೆದಾರರು

ಹೆದ್ದಾರಿ ಪ್ರಯಾಣವನ್ನು ಮತ್ತಷ್ಟು ಸುಗಮ ಮತ್ತು ಆರ್ಥಿಕವಾಗಿಸುವ ಉದ್ದೇಶದಿಂದ ಜಾರಿಗೆ ತರಲಾದ 'ಫಾಸ್ಟ್‌ಟ್ಯಾಗ್ ವಾರ್ಷಿಕ ಪಾಸ್' ಯೋಜನೆಗೆ ವಾಹನ ಸವಾರರಿಂದ ಅಭೂತಪೂರ್ವ ಬೆಂಬಲ ವ್ಯಕ್ತವಾಗಿದೆ. ಯೋಜನೆ ಜಾರಿಯಾದ ಕೇವಲ 6 ತಿಂಗಳಲ್ಲಿ ಬರೋಬ್ಬರಿ 50 ಲಕ್ಷಕ್ಕೂ ಹೆಚ್ಚು ಬಳಕೆದಾರರು ಈ ಪಾಸ್ ಪಡೆದುಕೊಳ್ಳುವ ಮೂಲಕ ಹೊಸ ಮೈಲಿಗಲ್ಲನ್ನು ಸ್ಥಾಪಿಸಿದ್ದಾರೆ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ತಿಳಿಸಿದೆ.

ಫಾಸ್ಟ್‌ಟ್ಯಾಗ್ ವಾರ್ಷಿಕ ಪಾಸ್: ಏನಿದು ಹೊಸ ಕ್ರೇಜ್?

ರಾಷ್ಟ್ರೀಯ ಹೆದ್ದಾರಿ ಮತ್ತು ಎಕ್ಸ್‌ಪ್ರೆಸ್‌ವೇಗಳಲ್ಲಿ ಆಗಾಗ ಸಂಚರಿಸುವ ಖಾಸಗಿ ವಾಹನ ಮಾಲೀಕರಿಗೆ ಈ ವಾರ್ಷಿಕ ಪಾಸ್ ವರದಾನವಾಗಿ ಪರಿಣಮಿಸಿದೆ. ಕೇವಲ3,000 ಪಾವತಿಸಿ ಒಂದು ವರ್ಷದ ಅವಧಿಗೆ ಪಾಸ್ ಪಡೆಯಬಹುದು. ಈ ಪಾಸ್ ಮೂಲಕ ವರ್ಷಕ್ಕೆ ಗರಿಷ್ಠ 200 ಬಾರಿ ಟೋಲ್ ಪ್ಲಾಜಾಗಳಲ್ಲಿ ಶುಲ್ಕವಿಲ್ಲದೆ ಉಚಿತವಾಗಿ ಸಂಚರಿಸಬಹುದು. ದೇಶಾದ್ಯಂತ ಇರುವ ಸುಮಾರು 1,150 ರಾಷ್ಟ್ರೀಯ ಹೆದ್ದಾರಿ ಮತ್ತು ಎಕ್ಸ್‌ಪ್ರೆಸ್‌ವೇ ಟೋಲ್ ಪ್ಲಾಜಾಗಳಲ್ಲಿ ಇದು ಮಾನ್ಯವಾಗಿರುತ್ತದೆ.

ಪ್ರತಿಶತ 28 ರಷ್ಟು ವಹಿವಾಟು ಪಾಸ್ ಮೂಲಕವೇ!

ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸಂಚರಿಸುವ ಒಟ್ಟು ಕಾರುಗಳ ಪೈಕಿ, ಶೇ. 28 ರಷ್ಟು ವಹಿವಾಟುಗಳು ಈಗ ಈ ವಾರ್ಷಿಕ ಪಾಸ್ ಮೂಲಕವೇ ನಡೆಯುತ್ತಿವೆ. ಇದು ಜನರು ಈ ಹೊಸ ವ್ಯವಸ್ಥೆಯನ್ನು ಎಷ್ಟು ವೇಗವಾಗಿ ಒಪ್ಪಿಕೊಂಡಿದ್ದಾರೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಆಗಸ್ಟ್ 15 ರಂದು ಸ್ವಾತಂತ್ರ್ಯ ದಿನಾಚರಣೆಯಂದು ಆರಂಭವಾದ ಈ ಯೋಜನೆ, ಅಲ್ಪಾವಧಿಯಲ್ಲೇ ಇಷ್ಟು ದೊಡ್ಡ ಯಶಸ್ಸು ಕಂಡಿರುವುದು ವಿಶೇಷ.

ಚಂಡೀಗಢ, ತಮಿಳುನಾಡು ಮುಂಚೂಣಿಯಲ್ಲಿ

ವಾರ್ಷಿಕ ಪಾಸ್ ಬಳಕೆಯಲ್ಲಿ ಚಂಡೀಗಢ (ಶೇ.14) ಮೊದಲ ಸ್ಥಾನದಲ್ಲಿದ್ದರೆ, ತಮಿಳುನಾಡು (ಶೇ.12.3) ಮತ್ತು ದೆಹಲಿ (ಶೇ.11.5) ನಂತರದ ಸ್ಥಾನಗಳಲ್ಲಿವೆ. ದೆಹಲಿ ಎನ್‌ಸಿಆರ್‌ನ ಬಿಜ್ವಾಸನ್ ಟೋಲ್ ಪ್ಲಾಜಾದಲ್ಲಿ ಅತಿ ಹೆಚ್ಚು (ಶೇ.57) ವಾಹನಗಳು ಈ ಪಾಸ್ ಬಳಸುತ್ತಿವೆ.

ಪಾಸ್ ಪಡೆಯುವುದು ಹೇಗೆ?

'ರಾಜಮಾರ್ಗ ಯಾತ್ರಾ' ಆ್ಯಪ್ ಅಥವಾ ಎನ್‌ಎಚ್‌ಎಐ (NHAI) ವೆಬ್‌ಸೈಟ್ ಮೂಲಕ ಸುಲಭವಾಗಿ ಈ ಪಾಸ್ ಖರೀದಿಸಬಹುದು. ಹಣ ಪಾವತಿಸಿದ 2 ಗಂಟೆಯೊಳಗೆ ಪಾಸ್ ಸಕ್ರಿಯಗೊಳ್ಳುತ್ತದೆ.