ಚಿನ್ನಸ್ವಾಮಿ ಕ್ರೀಡಾಂಗಣದ ಸುರಕ್ಷತೆಗೆ ಮುಂದಾದ ಸರ್ಕಾರ; ವರದಿ ನೀಡಲು ತಾಕೀತು

ಬೆಂಗಳೂರಿನ ಎಂ.ಜಿ. ರಸ್ತೆಯಲ್ಲಿರುವ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣ ಕೇವಲ ಕ್ರಿಕೆಟ್ ಮೈದಾನವಲ್ಲ, ಅದು ಕನ್ನಡಿಗರ ಪಾಲಿನ ಭಾವನಾತ್ಮಕ ತಾಣ. ಕ್ರೀಡಾಂಗಣವು ಕಳೆದ ಐದು ದಶಕಗಳಿಂದ ಅಸಂಖ್ಯಾತ ಐತಿಹಾಸಿಕ ಕ್ರಿಕೆಟ್ ಪಂದ್ಯಗಳಿಗೆ ಸಾಕ್ಷಿಯಾಗಿದೆ. ಅಂತಾರಾಷ್ಟ್ರೀಯ ಮಟ್ಟದ ಪಂದ್ಯಗಳಿಗೆ ಸಾಕ್ಷಿಯಾಗುವ ಈ ಐತಿಹಾಸಿಕ ಕ್ರೀಡಾಂಗಣದ ಕಟ್ಟಡಗಳ ಸುರಕ್ಷತೆಯ ಬಗ್ಗೆ ಈಗ ಗಂಭೀರ ಪ್ರಶ್ನೆಗಳು ಎದ್ದಿವೆ. ಲೋಕೋಪಯೋಗಿ ಇಲಾಖೆಯು ಕರ್ನಾಟಕ ರಾಜ್ಯ ಕ್ರಿಕೆಟ್ ಅಸೋಸಿಯೇಷನ್‌ಗೆ (ಕೆಎಸ್‌ಸಿಎ) ನೋಟಿಸ್ ಜಾರಿ ಮಾಡಿ, ಕಟ್ಟಡದ ಸಾಮರ್ಥ್ಯ ಪರೀಕ್ಷೆ ನಡೆಸುವಂತೆ ಸೂಚಿಸಿರುವುದು ಆಡಳಿತಾತ್ಮಕವಾಗಿ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ಮಹತ್ವದ ಬೆಳವಣಿಗೆಯಾಗಿದೆ.

ಯಾವುದೇ ಭೌತಿಕ ನಿರ್ಮಾಣಕ್ಕೆ ಒಂದು ನಿರ್ದಿಷ್ಟ ಆಯಸ್ಸು ಮತ್ತು ನಿರ್ವಹಣಾ ಮಿತಿಗಳಿರುತ್ತವೆ. ಇತ್ತೀಚೆಗೆ ಲೋಕೋಪಯೋಗಿ ಇಲಾಖೆಯು ಕೆಎಸ್‌ಸಿಎಗೆ ಬರೆದ ಪತ್ರದಲ್ಲಿ ಕ್ರೀಡಾಂಗಣದ ಸುರಕ್ಷತೆಯ ಬಗ್ಗೆ ಮಹತ್ವದ ಪ್ರಶ್ನೆಗಳನ್ನು ಎತ್ತಿದೆ. ಹಳೆಯದಾದ ಕಟ್ಟಡಗಳ ಸಾಮರ್ಥ್ಯವನ್ನು ಎನ್‌ಎಬಿಎಲ್ ಮಾನ್ಯತೆ ಪಡೆದ ತಜ್ಞರಿಂದ ಪರೀಕ್ಷಿಸಿ ವರದಿ ನೀಡುವಂತೆ ಸರ್ಕಾರ ತಾಕೀತು ಮಾಡಿರುವುದು, ಸಂಭವನೀಯ ದುರಂತಗಳನ್ನು ತಡೆಯುವ ನಿಟ್ಟಿನಲ್ಲಿ ಇಟ್ಟಿರುವ ದಿಟ್ಟ ಹೆಜ್ಜೆಯಾಗಿದೆ.

ಎನ್‌ಎಬಿಎಲ್‌ ಮಾನ್ಯತೆ ಯಾಕೆ?

ಚಿನ್ನಸ್ವಾಮಿ ಕ್ರೀಡಾಂಗಣ ನಿರ್ಮಾಣವಾಗಿ ದಶಕಗಳು ಕಳೆದಿವೆ. ಪಿಡಬ್ಲ್ಯೂಡಿ ಕೇವಲ ವರದಿ ಕೇಳಿಲ್ಲ, ಬದಲಿಗೆ ಎನ್‌ಎಬಿಎಲ್‌ (ಪರೀಕ್ಷೆ ಮತ್ತು ಮಾಪನಾಂಕ ನಿರ್ಣಯ ಪ್ರಯೋಗಾಲಯಗಳ ರಾಷ್ಟ್ರೀಯ ಮಾನ್ಯತೆ ಮಂಡಳಿ) ಮಾನ್ಯತೆ ಪಡೆದ ತಜ್ಞರಿಂದಲೇ ವರದಿ ಕೇಳಿದೆ. ಇದರರ್ಥ, ಪರೀಕ್ಷೆಯು ಅತ್ಯಂತ ನಿಖರವಾಗಿರಬೇಕು ಮತ್ತು ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ಅನುಗುಣವಾಗಿರಬೇಕು. ಕೇವಲ ಕಣ್ಣಾರೆ ನೋಡಿ ನೀಡುವ ವರದಿಗೆ ಇಲ್ಲಿ ಮೌಲ್ಯವಿಲ್ಲ. ಕಾಂಕ್ರೀಟ್‌ನ ಗುಣಮಟ್ಟ, ಕಂಬಗಳ ಭಾರ ತಡೆಯುವ ಶಕ್ತಿ ಮತ್ತು ತುಕ್ಕು ಹಿಡಿದಿರುವ ಸಾಧ್ಯತೆಗಳನ್ನು ವೈಜ್ಞಾನಿಕವಾಗಿ ದೃಢೀಕರಿಸಬೇಕಿದೆ.

ಭೋಗ್ಯದ ಭೂಮಿ ಮತ್ತು ಸರ್ಕಾರದ ಹಕ್ಕು

ಪಿಡಬ್ಯೂಡಿ ನೋಟಿಸ್ ನೀಡಲು ಸರ್ಕಾರಕ್ಕೆ ಇರುವ ನೈತಿಕ ಮತ್ತು ಕಾನೂನಾತ್ಮಕ ಹಕ್ಕನ್ನು ಭೂಮಿಯ ಒಡೆತನದ ಇತಿಹಾಸದಲ್ಲಿ ಕಾಣಬಹುದು. ಚಿನ್ನಸ್ವಾಮಿ ಕ್ರೀಡಾಂಗಣ ನಿಂತಿರುವುದು ಸಂಪೂರ್ಣವಾಗಿ ಸರ್ಕಾರದ ಜಾಗದಲ್ಲಿ ಆಗಿದೆ. 1969ರಲ್ಲಿ ಸರ್ಕಾರವು 16 ಎಕರೆ 13 ಗುಂಟೆ ಜಮೀನನ್ನು 99 ವರ್ಷಗಳ ಅವಧಿಗೆ ಕೆಎಸ್‌ಸಿಎಗೆ ನೀಡಿತ್ತು. ಅಂದು ನಿಗದಿಪಡಿಸಿದ ವಾರ್ಷಿಕ ಬಾಡಿಗೆ ಕೇವಲ ಒಂದು ಸಾವಿರ ರೂ. ಮಾತ್ರವಾಗಿದೆ. ನಂತರ 1996ರಲ್ಲಿ ಹೆಚ್ಚುವರಿಯಾಗಿ 23 ಗುಂಟೆ ಜಮೀನನ್ನು ನೀಡಿ, ಒಟ್ಟು 17 ಎಕರೆ 11 ಗುಂಟೆ ಜಾಗಕ್ಕೆ ವಾರ್ಷಿಕ 19 ಸಾವಿರ ರೂ. ಬಾಡಿಗೆ ನಿಗದಿಪಡಿಸಲಾಯಿತು.

ಬೆಂಗಳೂರಿನ ಹೃದಯಭಾಗದಲ್ಲಿರುವ ಈ ಜಾಗದ ಪ್ರಸ್ತುತ ಮಾರುಕಟ್ಟೆ ಮೌಲ್ಯ ಸಾವಿರಾರು ಕೋಟಿ ರೂಪಾಯಿಗಳಾಗಿದೆ. ಇಷ್ಟು ಬೆಲೆಬಾಳುವ ಜಾಗವನ್ನು ಸರ್ಕಾರ ಅತ್ಯಲ್ಪ ದರದಲ್ಲಿ ಕ್ರೀಡೆಗೆ ಉತ್ತೇಜನ ನೀಡಲು ನೀಡಿದೆ. ಭೂಮಿಯ ಮಾಲೀಕನಾಗಿ, ಆ ಜಾಗದಲ್ಲಿರುವ ಕಟ್ಟಡಗಳು ಸಾರ್ವಜನಿಕರಿಗೆ ಸುರಕ್ಷಿತವಾಗಿವೆಯೇ ಎಂದು ಖಚಿತಪಡಿಸಿಕೊಳ್ಳುವ ಜವಾಬ್ದಾರಿ ಸರ್ಕಾರದ ಮೇಲಿದೆ. ಹೀಗಾಗಿಯೇ ಪಿಡಬ್ಲ್ಯೂಡಿ ಈ ನೋಟಿಸ್ ನೀಡಿದೆ.

ಸುರಕ್ಷತೆಯ ಅನಿವಾರ್ಯತೆ : ತಾಂತ್ರಿಕ ನೋಟ

ಪಿಡಬ್ಲ್ಯೂಡಿ ತನ್ನ ಪತ್ರದಲ್ಲಿ ಕಟ್ಟಡದ ಸುರಕ್ಷತಾ ಪರೀಕ್ಷೆಗೆ ಒತ್ತು ನೀಡಲು ಪ್ರಮುಖ ಕಾರಣ ಕಟ್ಟಡದ ವಯಸ್ಸು ಮತ್ತು ಜನಸಂದಣಿಯಾಗಿದೆ. ಕ್ರೀಡಾಂಗಣದ ಸುರಕ್ಷತೆ ಎಂಬುದು ಸಾಮಾನ್ಯ ಮನೆಯ ಸುರಕ್ಷತೆಗಿಂತ ಭಿನ್ನ ಮತ್ತು ಸಂಕೀರ್ಣವಾಗಿದೆ. ಈ ನಿಟ್ಟಿನಲ್ಲಿ ಸುರಕ್ಷತೆಯ ಅನಿವಾರ್ಯತೆಯಿಂದಾಗಿ ನಿಯಮಗಳ ಪಾಲನೆ ಅತ್ಯಗತ್ಯ ಎಂದು ಹೇಳಲಾಗಿದೆ.

ರಚನಾತ್ಮಕ ವಯಸ್ಸು

ಕ್ರೀಡಾಂಗಣದ ಕೆಲವು ಭಾಗಗಳನ್ನು 1970ರ ದಶಕದಲ್ಲಿ ನಿರ್ಮಿಸಲಾಗಿದೆ. ಕಾಂಕ್ರೀಟ್ ಮತ್ತು ಉಕ್ಕಿನ ಸರಳುಗಳು ಕಾಲಕ್ರಮೇಣ ತಮ್ಮ ಬಲವನ್ನು ಕಳೆದುಕೊಳ್ಳುತ್ತವೆ. ಇದನ್ನು 'ಕಾರ್ಬೊನೇಷನ್' ಮತ್ತು 'ತುಕ್ಕು ಹಿಡಿಯುವಿಕೆ' ಎನ್ನಲಾಗುತ್ತದೆ. ಬೆಂಗಳೂರಿನ ಹವಾಮಾನ, ಮಳೆ ಮತ್ತು ಮಾಲಿನ್ಯವು ಕಟ್ಟಡದ ಆಯಸ್ಸಿನ ಮೇಲೆ ಪರಿಣಾಮ ಬೀರಿರುತ್ತದೆ. 50 ವರ್ಷಗಳಿಗಿಂತ ಹಳೆಯದಾದ ಯಾವುದೇ ಸಾರ್ವಜನಿಕ ಕಟ್ಟಡಕ್ಕೆ 'ಸ್ಟೆಬಿಲಿಟಿ ಆಡಿಟ್' ನಡೆಸುವುದು ಸಿವಿಲ್ ಇಂಜಿನಿಯರಿಂಗ್ ನಿಯಮಾವಳಿಗಳ ಪ್ರಕಾರ ಕಡ್ಡಾಯವಾಗಿದೆ.

ಅತಿಯಾದ ಭಾರ ಬೀಳುವ ಅಪಾಯ

ಸಾಮಾನ್ಯ ಕಟ್ಟಡಗಳಿಗಿಂತ ಕ್ರೀಡಾಂಗಣದ ಮೇಲಿನ ಒತ್ತಡ ಭಿನ್ನವಾಗಿರುತ್ತದೆ. ಐಪಿಎಲ್ ಅಥವಾ ಅಂತಾರಾಷ್ಟ್ರೀಯ ಪಂದ್ಯಗಳಿದ್ದಾಗ ಸುಮಾರು 30ಸಾವಿರ ದಿಂದ 40 ಸಾವಿರ ಪ್ರೇಕ್ಷಕರು ಸೇರುತ್ತಾರೆ. ಫೋರ್ ಅಥವಾ ಸಿಕ್ಸರ್ ಬಂದಾಗ ಸಾವಿರಾರು ಜನ ಏಕಕಾಲಕ್ಕೆ ಕುಣಿದು ಕುಪ್ಪಳಿಸುತ್ತಾರೆ. ಇದರಿಂದ ಉಂಟಾಗುವ ಕಂಪನಗಳನ್ನು ತಡೆದುಕೊಳ್ಳುವ ಶಕ್ತಿ ಹಳೆಯ ಸ್ಲಾಬ್‌ಗಳಿಗೆ ಮತ್ತು ಪಿಲ್ಲರ್‌ಗಳಿಗೆ ಇದೆಯೇ ಎಂಬುದನ್ನು ಪರೀಕ್ಷಿಸಬೇಕಿದೆ. ಗ್ಯಾಲರಿಗಳಲ್ಲಿ ಅತಿಯಾದ ಭಾರ ಬಿದ್ದಾಗ ಹಳೆಯ ಕಾಂಕ್ರೀಟ್ ಕುಸಿಯುವ ಅಪಾಯವನ್ನು ತಳ್ಳಿಹಾಕುವಂತಿಲ್ಲ. ಇತ್ತೀಚಿನ ದಿನಗಳಲ್ಲಿ ದೇಶದ ವಿವಿಧೆಡೆ ಹಳೆಯ ಸೇತುವೆಗಳು ಅಥವಾ ಕಟ್ಟಡಗಳು ಕುಸಿದ ಉದಾಹರಣೆಗಳಿವೆ. ಸಾವಿರಾರು ಜೀವಗಳ ಪ್ರಶ್ನೆ ಬಂದಾಗ, ಅನಾಹುತ ಸಂಭವಿಸಿದ ನಂತರ ಎಚ್ಚೆತ್ತುಕೊಳ್ಳುವುದಕ್ಕಿಂತ, ಸಂಭವಿಸುವ ಮುನ್ನವೇ ತಡೆಯುವುದು ಜಾಣತನ. ಸಹಾಯಕ ಕಾರ್ಯಪಾಲಕ ಇಂಜಿನಿಯರ್ ಅವರ ಶಿಫಾರಸು ಈ ನಿಟ್ಟಿನಲ್ಲಿ ಸರಿಯಾದ ಕ್ರಮವಾಗಿದೆ ಎಂದು ಹೇಳಲಾಗಿದೆ.

ಎನ್‌ಎಬಿಎಲ್ ಮಾನ್ಯತೆಯ ಮಹತ್ವ

ಲೋಕೋಪಯೋಗಿ ಇಲಾಖೆಯು ಕೇವಲ ಯಾವುದಾದರೂ ಇಂಜಿನಿಯರ್ ವರದಿ ಕೇಳಿಲ್ಲ, ಬದಲಿಗೆ ಎನ್‌ಎಬಿಎಲ್ ಮಾನ್ಯತೆ ಪಡೆದ ತಜ್ಞರ ವರದಿಯನ್ನೇ ಕೇಳಿದೆ. ಇದರರ್ಥ, ಪರೀಕ್ಷೆಯು ಅತ್ಯಾಧುನಿಕ ತಂತ್ರಜ್ಞಾನಗಳಾದ 'ಅಲ್ಟ್ರಾಸಾನಿಕ್ ಪಲ್ಸ್ ವೆಲಾಸಿಟಿ ಟೆಸ್ಟ್' , 'ರಿಬೌಂಡ್ ಹ್ಯಾಮರ್ ಟೆಸ್ಟ್' ಮತ್ತು 'ಕೋರ್ ಕಟಿಂಗ್' ವಿಧಾನಗಳನ್ನು ಒಳಗೊಂಡಿರಬೇಕು. ಇದು ವರದಿಯ ನಿಖರತೆ ಮತ್ತು ವಿಶ್ವಾಸಾರ್ಹತೆಯನ್ನು ಹೆಚ್ಚಿಸುತ್ತದೆ.

ಆರ್ಥಿಕ ಮತ್ತು ಆಡಳಿತಾತ್ಮಕ ಹೊಣೆಗಾರಿಕೆ

ಕೆಎಸ್‌ಸಿಎ ಭಾರತದ ಶ್ರೀಮಂತ ಕ್ರಿಕೆಟ್ ಸಂಸ್ಥೆಗಳಲ್ಲಿ ಒಂದಾಗಿದೆ. ಬಿಸಿಸಿಐನಿಂದ ಬರುವ ಅನುದಾನ, ಐಪಿಎಲ್ ಪಂದ್ಯಗಳ ಟಿಕೆಟ್ ಸಂಗ್ರಹ, ಜಾಹೀರಾತು ಮತ್ತು ಸದಸ್ಯತ್ವ ಶುಲ್ಕಗಳಿಂದ ಸಂಸ್ಥೆ ಕೋಟ್ಯಂತರ ರೂಪಾಯಿ ಆದಾಯ ಗಳಿಸುತ್ತದೆ. ಸರ್ಕಾರಕ್ಕೆ ಕೇವಲ 19 ಸಾವಿರ ರೂ. ಬಾಡಿಗೆ ನೀಡುವ ಸಂಸ್ಥೆಗೆ, ಕಟ್ಟಡದ ನಿರ್ವಹಣೆಗೆ ಕೋಟ್ಯಂತರ ರೂ. ಖರ್ಚು ಮಾಡುವುದು ಕಷ್ಟದ ವಿಷಯವಲ್ಲ. ಕೆಲವೊಮ್ಮೆ ಸೌಂದರೀಕರಣಕ್ಕೆ ನೀಡುವ ಆದ್ಯತೆಯನ್ನು ಕಟ್ಟಡದ ಮೂಲಭೂತ ಸುರಕ್ಷತೆಗೆ ನೀಡಲಾಗುತ್ತಿಲ್ಲ ಎಂಬ ಆರೋಪಗಳು ಕೇಳಿಬರುವುದು ಸಹಜ. ಪಿಡಬ್ಲ್ಯೂಡಿ ನೋಟಿಸ್ ಈಗ ಕೆಎಸ್‌ಸಿಎಗೆ ಎಚ್ಚರಿಕೆಯ ಗಂಟೆಯಾಗಿದ್ದು, ಸುರಕ್ಷತೆಗೆ ಮೊದಲ ಆದ್ಯತೆ ನೀಡುವಂತೆ ಒತ್ತಾಯಿಸಿದೆ.

ಸಹಾಯಕ ಕಾರ್ಯಪಾಲಕ ಇಂಜಿನಿಯರ್ ಅವರು ಶಿಫಾರಸು ಮಾಡಿ, ಕಾರ್ಯಪಾಲಕ ಅಭಿಯಂತರರು ನೋಟಿಸ್ ನೀಡಿರುವುದು ಸರ್ಕಾರದ ಜಾಣತನದ ನಡೆಯಾಗಿದೆ. ಭವಿಷ್ಯದಲ್ಲಿ ಯಾವುದೇ ಅನಾಹುತ ನಡೆದರೆ, ನಾವು ಮೊದಲೇ ಎಚ್ಚರಿಸಿದ್ದೆವು, ಕ್ರಮ ಕೈಗೊಳ್ಳದಿದ್ದು ಸಂಸ್ಥೆಯ ತಪ್ಪು ಎಂದು ಸಾಬೀತುಪಡಿಸಲು ಈ ಪತ್ರ ದಾಖಲೆಯಾಗಿ ಉಳಿಯುತ್ತದೆ ಎನ್ನಲಾಗಿದೆ.

ಕ್ರೀಡಾಂಗಣದಲ್ಲಿ ಅವಘಡ ಸಂಭವಿಸಿದರೆ ಆಗುವ ನಷ್ಟವನ್ನು ಕೇವಲ ಹಣದಲ್ಲಿ ಅಳೆಯಲಾಗದು. ಸಾವಿರಾರು ಜನ ಸೇರುವ ಜಾಗದಲ್ಲಿ ಸಣ್ಣದೊಂದು ಬಿರುಕು ಅಥವಾ ಕುಸಿತವು ದೊಡ್ಡ ನೂಕುನುಗ್ಗಲಿಗೆ ಕಾರಣವಾಗಬಹುದು. ಹಳೆಯ ಕಟ್ಟಡಗಳಲ್ಲಿ ವಿದ್ಯುತ್ ವೈರಿಂಗ್ ಕೂಡ ಹಳೆಯದಾಗಿರುತ್ತದೆ. ಶಾರ್ಟ್ ಸರ್ಕ್ಯೂಟ್ ಅಪಾಯಗಳನ್ನೂ ಈ ಸಂದರ್ಭದಲ್ಲಿ ಪರಿಶೀಲಿಸಬೇಕಾಗುತ್ತದೆ. ಜಗತ್ತಿನಾದ್ಯಂತ ಹಳೆಯ ಕ್ರೀಡಾಂಗಣಗಳನ್ನು ಕಾಲಕಾಲಕ್ಕೆ ನವೀಕರಿಸಲಾಗುತ್ತದೆ ಅಥವಾ ಕೆಡವಿ ಹೊಸದಾಗಿ ಕಟ್ಟಲಾಗುತ್ತದೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲೂ ಅಂತಹ ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಮಯ ಬಂದಿದೆ ಎಂಬುದು ಪಿಡಬ್ಲ್ಯೂಡಿ ಇಲಾಖೆಯ ಮೂಲಗಳು ಹೇಳಿವೆ.

ಕೆಎಸ್‌ಸಿಎ ಮುಂದಿರುವ ಪರಿಹಾರಗಳು

ಪಿಡಬ್ಲ್ಯೂಡಿ ನೋಟಿಸ್‌ಗೆ ಕೆಎಸ್‌ಸಿಎ ಕೇವಲ ಉತ್ತರ ಬರೆಯುವುದಷ್ಟೇ ಅಲ್ಲ, ವಾಸ್ತವಿಕ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ತಜ್ಞರು ನೀಡುವ ವರದಿಯನ್ನು ಸಾರ್ವಜನಿಕವಾಗಿ ಅಥವಾ ಕನಿಷ್ಠ ಸರ್ಕಾರದ ಮುಂದಿಡಬೇಕು. ಕಟ್ಟಡದ ಯಾವ ಭಾಗ ದುರ್ಬಲವಾಗಿದೆ ಎಂಬುದನ್ನು ಮುಚ್ಚಿಡಬಾರದು. ವರದಿಯ ಆಧಾರದ ಮೇಲೆ, ಕಟ್ಟಡವನ್ನು ಬಲಪಡಿಸಲು 'ರೆಟ್ರೋಫಿಟ್ಟಿಂಗ್' ತಂತ್ರಜ್ಞಾನ ಬಳಸಬೇಕೇ ಅಥವಾ ಕೆಲವು ಹಳೆಯ ಸ್ಟ್ಯಾಂಡ್‌ಗಳನ್ನು ಕೆಡವಿ ಹೊಸದಾಗಿ ಕಟ್ಟಬೇಕೇ ಎಂಬ ನಿರ್ಧಾರ ತೆಗೆದುಕೊಳ್ಳಬೇಕು. ಇದು ಕೇವಲ ಒಂದು ಬಾರಿಯ ಪ್ರಕ್ರಿಯೆಯಾಗಬಾರದು. ಪ್ರತಿ 5 ವರ್ಷಕ್ಕೊಮ್ಮೆ ಇಂತಹ ಆಡಿಟ್ ನಡೆಯುವ ವ್ಯವಸ್ಥೆ ಜಾರಿಗೆ ಬರಬೇಕು. ವರದಿ ಬಂದ ನಂತರ, ಅದರಲ್ಲಿ ಸೂಚಿಸಲಾದ ದುರಸ್ತಿ ಕಾರ್ಯಗಳು ನಡೆದಿವೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಲೋಕೋಪಯೋಗಿ ಇಲಾಖೆ ಒಂದು ತಾಂತ್ರಿಕ ಸಮಿತಿಯನ್ನು ರಚಿಸಬೇಕಾಗಿದೆ ಎಂದು ಹೇಳಲಾಗಿದೆ.

ಚಿನ್ನಸ್ವಾಮಿ ಕ್ರೀಡಾಂಗಣದ ಕಾಲ್ತುಳಿತ ದುರ್ಘಟನೆಯಿಂದ ಎಚ್ಚೆತ್ತ ಸರ್ಕಾರ

ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡವು 2025ರ ಐಪಿಎಲ್ ಟ್ರೋಫಿಯನ್ನು ಗೆದ್ದ ಸಂತಸದಲ್ಲಿ ಏರ್ಪಡಿಸಲಾಗಿದ್ದ ವಿಜಯೋತ್ಸವವು, ಕ್ರೀಡಾಂಗಣದ ಹೊರಭಾಗದಲ್ಲಿ ನಡೆದ ಭೀಕರ ಕಾಲ್ತುಳಿತದಿಂದಾಗಿ ಶೋಕಸಾಗರದಲ್ಲಿ ಮುಳುಗಿದ ಘಟನೆ ಇನ್ನೂ ಹಸಿರಾಗಿದೆ. ಈ ವರ್ಷದ ಜೂ.4 ರಂದು ನಡೆದ ಈ ದುರಂತವು ಆಡಳಿತ ವ್ಯವಸ್ಥೆಯ ವೈಫಲ್ಯ ಮತ್ತು ಜನಸಂದಣಿ ನಿರ್ವಹಣೆಯ ಕೊರತೆಗೆ ಜ್ವಲಂತ ಸಾಕ್ಷಿಯಾಗಿದೆ. ಸುಮಾರು 18 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ಆರ್‌ಸಿಬಿ ತಂಡವು ಐಪಿಎಲ್ ಟ್ರೋಫಿ ಗೆದ್ದಿತ್ತು. ಅಹಮದಾಬಾದ್‌ನಲ್ಲಿ ನಡೆದ ಫೈನಲ್ ಪಂದ್ಯದ ನಂತರ, ತಂಡವು ಬೆಂಗಳೂರಿಗೆ ಮರಳಿದಾಗ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಅದ್ಧೂರಿ ಅಭಿನಂದನಾ ಸಮಾರಂಭವನ್ನು ಆಯೋಜಿಸಲಾಗಿತ್ತು,

ಚಿನ್ನಸ್ವಾಮಿ ಕ್ರೀಡಾಂಗಣದ ಆಸನ ಸಾಮರ್ಥ್ಯ ಕೇವಲ 35ಸಾವಿರ. ಆದರೆ, ಅಂದು ಸುಮಾರು 2 ರಿಂದ 3 ಲಕ್ಷ ಅಭಿಮಾನಿಗಳು ಕ್ರೀಡಾಂಗಣದ ಸುತ್ತಮುತ್ತ ಜಮಾಯಿಸಿದ್ದರು. ಪೊಲೀಸರ ನಿರೀಕ್ಷೆಗೂ ಮೀರಿ ಜನಸಾಗರ ಹರಿದು ಬಂದಿದ್ದು ನಿಯಂತ್ರಣ ತಪ್ಪಲು ಪ್ರಮುಖ ಕಾರಣವಾಯಿತು. ವಿಜಯೋತ್ಸವ ವೀಕ್ಷಣೆಗೆ ನೂಕುನುಗ್ಗಲು ಉಂಟಾದ ಹಿನ್ನೆಲೆಯಲ್ಲಿ ನಡೆದ ಕಾಲ್ತುಳಿತ ದುರ್ಘಟನೆಯಲ್ಲಿ ಕನಿಷ್ಠ 11 ಜನರು ಮೃತಪಟ್ಟರು. ಸುಮಾರು 50ಕ್ಕೂ ಹೆಚ್ಚು ಜನರು ಗಂಭೀರವಾಗಿ ಗಾಯಗೊಂಡು ಬೌರಿಂಗ್ ಮತ್ತು ಮಲ್ಯ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದರು. ಈ ಘಟನೆಗೆ ಬಳಿಕ ಎಚ್ಚೆತ್ತುಕೊಳ್ಳಲಾಗಿದ್ದು, ಗೇಟ್ ಹೊರಗೆ ನಡೆದ ದುರಂತ, ನಾಳೆ ಹಳೆಯ ಕಟ್ಟಡದ ಒಳಗೆ ನಡೆಯಬಾರದು ಎಂಬ ಎಚ್ಚರಿಕೆಯ ಕ್ರಮವಾಗಿ ಸರ್ಕಾರ ಈಗ ಕಠಿಣ ನಿಲುವು ತಳೆದಿರುವುದು ಸ್ಪಷ್ಟವಾಗಿದೆ ಎನ್ನಲಾಗಿದೆ.

ಲೋಕೋಪಯೋಗಿ ಇಲಾಖೆಯು ಸರಿಯಾದ ಸಮಯದಲ್ಲಿ ಸರಿಯಾದ ಪ್ರಶ್ನೆಯನ್ನು ಎತ್ತಿದೆ. 1969ರಿಂದ ಇಂದಿನವರೆಗೆ ಅತ್ಯಲ್ಪ ಬಾಡಿಗೆಯಲ್ಲಿ ಸರ್ಕಾರದ ಬೆಲೆಬಾಳುವ ಜಾಗವನ್ನು ಬಳಸಿಕೊಳ್ಳುತ್ತಿರುವ ಕೆಎಸ್‌ಸಿಎ, ಈಗ ಸಾರ್ವಜನಿಕ ಸುರಕ್ಷತೆಯ ವಿಷಯದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳಬಾರದು. ಈ ನೋಟಿಸ್ ಅನ್ನು ಒಂದು ಆಡಳಿತಾತ್ಮಕ ಅಡ್ಡಿ ಎಂದು ಭಾವಿಸದೆ, ಇದನ್ನು ಸುಧಾರಣೆಗೆ ಸಿಕ್ಕ ಅವಕಾಶ ಎಂಬುದಾಗಿ ಕೆಎಸ್‌ಸಿಎ ಪರಿಗಣಿಸಬೇಕು ಎಂಬ ಒತ್ತಾಯಗಳು ಕೇಳಿಬಂದಿವೆ.