ಬೆಂಗಳೂರು ಟನೆಲ್ ರೋಡ್ ವಿರುದ್ಧ ಭಾನುವಾರ ಜನಸಮಾವೇಶ: ಪರಿಸರ ತಜ್ಞರು, ಹೋರಾಟಗಾರರು ಭಾಗಿ
ಕಳೆದ ಹಲವು ದಶಕಗಳಿಂದ ಬೆಂಗಳೂರಿನಲ್ಲಿ ಜಾರಿಗೆ ತರಲಾದ ಸ್ಟೀಲ್ ಫ್ಲೈಓವರ್‌ನಂತಹ ಜನವಿರೋಧಿ ಯೋಜನೆಗಳ ವಿರುದ್ಧ ಹೋರಾಟ ನಡೆಸುತ್ತಾ ಬಂದಿರುವ ‘ಬೆಂಗಳೂರು ಉಳಿಸಿ ಸಮಿತಿ’ಯು, ಸುರಂಗ ರಸ್ತೆ ಪ್ರಸ್ತಾಪದ ವಿರುದ್ಧವೂ ಸಿಡಿದೆದ್ದಿದೆ.
ರಾಜ್ಯ ರಾಜಧಾನಿಯ ಸಂಚಾರ ದಟ್ಟಣೆ ಸಮಸ್ಯೆಗೆ ಪರಿಹಾರ ಎಂಬಂತೆ ಸರ್ಕಾರವು ಮುಂದಿಟ್ಟಿರುವ ‘ಅವಳಿ ಸುರಂಗ ರಸ್ತೆ’ ಯೋಜನೆಯು ಇದೀಗ ವ್ಯಾಪಕ ವಿರೋಧಕ್ಕೆ ಗುರಿಯಾಗಿದೆ. ಈ ಯೋಜನೆಯು ಅವೈಜ್ಞಾನಿಕ ಹಾಗೂ ಪರಿಸರಕ್ಕೆ ಮಾರಕ ಎಂದು ಆರೋಪಿಸಿರುವ ‘ಬೆಂಗಳೂರು ಉಳಿಸಿ ಸಮಿತಿ’ಯು, ಇದರ ಸಾಧಕ-ಬಾಧಕಗಳ ಬಗ್ಗೆ ಚರ್ಚಿಸಲು ನವೆಂಬರ್ 30ರ ಭಾನುವಾರ ನಗರದಲ್ಲಿ ಬೃಹತ್ ಜನಸಮಾವೇಶ ಹಮ್ಮಿಕೊಂಡಿದೆ.
ನಗರದ ಸಂಪಂಗಿರಾಮನಗರದಲ್ಲಿರುವ ಮಿಷನ್ ರಸ್ತೆಯ ಎಸ್‌ಸಿಎಂ ಹಾಲ್ನಲ್ಲಿ ಬೆಳಗ್ಗೆ 11 ಗಂಟೆಗೆ ಈ ಸಭೆ ನಡೆಯಲಿದ್ದು, ಪರಿಸರ ತಜ್ಞರು, ಭೂವಿಜ್ಞಾನಿಗಳು ಮತ್ತು ಸಾರಿಗೆ ತಜ್ಞರು ಒಂದೇ ವೇದಿಕೆಯಲ್ಲಿ ಸೇರಿ ಯೋಜನೆಯ ಬಗ್ಗೆ ಸಾರ್ವಜನಿಕರಿಗೆ ಅರಿವು ಮೂಡಿಸಲಿದ್ದಾರೆ.
ಕಳೆದ ಹಲವು ದಶಕಗಳಿಂದ ಬೆಂಗಳೂರಿನಲ್ಲಿ ಜಾರಿಗೆ ತರಲಾದ ಸ್ಟೀಲ್ ಫ್ಲೈಓವರ್‌ನಂತಹ ವಿವಿಧ ಜನವಿರೋಧಿ ಯೋಜನೆಗಳ ವಿರುದ್ಧ ಹೋರಾಟ ನಡೆಸುತ್ತಾ ಬಂದಿರುವ ‘ಬೆಂಗಳೂರು ಉಳಿಸಿ ಸಮಿತಿ’ಯು, ಈಗ ಸರ್ಕಾರದ ಸುರಂಗ ರಸ್ತೆ ಪ್ರಸ್ತಾಪದ ವಿರುದ್ಧವೂ ಸಿಡಿದೆದ್ದಿದೆ. ಸಾರ್ವಜನಿಕ ಹಣದ ದುಂದುವೆಚ್ಚಕ್ಕೆ ಕಾರಣವಾಗುವ ಮತ್ತು ನಗರದ ಪರಿಸರ ಸಮತೋಲನವನ್ನು ಏರುಪೇರು ಮಾಡಬಲ್ಲ ಈ ಯೋಜನೆಯನ್ನು ಕೈಬಿಡಬೇಕು ಎಂಬುದು ಸಮಿತಿಯ ಆಗ್ರಹವಾಗಿದೆ. ಈ ನಿಟ್ಟಿನಲ್ಲಿ ಸಾರ್ವಜನಿಕ ಅಭಿಪ್ರಾಯ ರೂಪಿಸಲು ಈ ಸಮಾವೇಶ ವೇದಿಕೆಯಾಗಲಿದೆ.
ತಜ್ಞರಿಂದ ಯೋಜನೆಯ ಮೌಲ್ಯಮಾಪನ
ಯೋಜನೆಯ ಬಗ್ಗೆ ಕೇವಲ ಭಾವನಾತ್ಮಕ ವಿರೋಧವಲ್ಲದೆ, ವೈಜ್ಞಾನಿಕವಾಗಿ ವಿಷಯ ಮಂಡಿಸಲು ಸಮಿತಿ ನಿರ್ಧರಿಸಿದೆ. ಇದಕ್ಕಾಗಿ ನಾಡಿನ ಪ್ರಖ್ಯಾತ ತಜ್ಞರು ಈ ಸಮಾವೇಶದಲ್ಲಿ ವಿಷಯ ಮಂಡಿಸಲಿದ್ದಾರೆ. ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಅಡ್ವಾನ್ಸ್‌ಡ್ ಸ್ಟಡೀಸ್ನ ಹಿರಿಯ ಪ್ರಾಧ್ಯಾಪಕ ಪ್ರೊ. ಸಿ.ಪಿ. ರಾಜೇಂದ್ರನ್, ಭಾರತೀಯ ವಿಜ್ಞಾನ ಸಂಸ್ಥೆಯ ಖ್ಯಾತ ಪರಿಸರ ವಿಜ್ಞಾನಿ ಡಾ. ಟಿ.ವಿ. ರಾಮಚಂದ್ರ, ಮತ್ತು ಸ್ವತಂತ್ರ ನಗರ ಸಾರಿಗೆ ಯೋಜನಾ ತಜ್ಞ ಪ್ರೊ. ಎಂ.ಎನ್. ಶ್ರೀಹರಿ ಅವರು ಯೋಜನೆಯ ವಿವಿಧ ಆಯಾಮಗಳ ಬಗ್ಗೆ ಮಾತನಾಡಲಿದ್ದಾರೆ.
ಬೆಂಗಳೂರು ವಿಶ್ವವಿದ್ಯಾಲಯದ ಭೂವಿಜ್ಞಾನ ವಿಭಾಗದ ನಿಕಟಪೂರ್ವ ಮುಖ್ಯಸ್ಥ ಪ್ರೊ. ರೇಣುಕಾ ಪ್ರಸಾದ್ ಅವರು ಸುರಂಗ ಕೊರೆಯುವುದರಿಂದ ನಗರದ ಭೂಗರ್ಭ ಮತ್ತು ಅಂತರ್ಜಲದ ಮೇಲಾಗುವ ಪರಿಣಾಮಗಳನ್ನು ವಿವರಿಸಿದರೆ, ಪ್ಲಾಸ್ಟಿಕ್ ಸರ್ಜನ್ ಹಾಗೂ ಸಾಮಾಜಿಕ ಹೋರಾಟಗಾರ್ತಿ ಡಾ. ಸುಧಾ ಕಾಮತ್ ಅವರು ಯೋಜನೆಯ ಸಾಮಾಜಿಕ ಪರಿಣಾಮಗಳ ಬಗ್ಗೆ ಬೆಳಕು ಚೆಲ್ಲಲಿದ್ದಾರೆ.
ಸರ್ಕಾರದ ಟನಲ್‌ ರಸ್ತೆ ಯೋಜನೆಯ ಸಾಧಕ-ಬಾಧಕಗಳ ಕುರಿತಾದ ವಿಸ್ತೃತ ಸರಣಿ ಲೇಖನಗಳನ್ನು ʼದ ಫೆಡರಲ್‌ ಕರ್ನಾಟಕʼ ಪ್ರಕಟಿಸಿತ್ತು.
ಬೆಂಗಳೂರಿಗೆ ಸುರಂಗ: Part-1| ಡಿಪಿಆರ್‌ನಲ್ಲಿವೆ 121 ಲೋಪ; ಯೋಜನೆ ವಿರೋಧಿಸಿದರೆ ಸರ್ಕಾರಕ್ಕೆ ಕೋಪ!
ಬೆಂಗಳೂರಿಗೆ ಸುರಂಗ: Part-2| ಸುರಂಗ ರಸ್ತೆ 16.7 ಕಿ.ಮೀ., ರ‍್ಯಾಂಪ್ ಉದ್ದ 18 ಕಿ.ಮೀ; ಐಟಿ ನಗರಿಗೆ ಶಾಪವೇ?
ಬೆಂಗಳೂರಿಗೆ ಸುರಂಗ: Part-3| ಉದ್ಯಾನ ನಗರಿಯ ಅಂತರ್ಜಲ ಕುಸಿಯುವ ಆತಂಕ : ವಿಸ್ತೃತ ಅಧ್ಯಯನಕ್ಕೆ ಒತ್ತಾಯ
ಬೆಂಗಳೂರಿಗೆ ಸುರಂಗ: Part-4| 'ಪಂಚ ಕೆರೆ'ಗಳ ಜಲಮೂಲಕ್ಕೇ ಧಕ್ಕೆ! ಎದುರಾಗಲಿದೆ ʼಜಲ ಬರʼ
ಬೆಂಗಳೂರಿಗೆ ಸುರಂಗ: Part-5| ಹೂಡಿಕೆದಾರರ ಸೆಳೆಯುವ ಪ್ಲಾನ್; ಹಸಿರು ವಲಯದಲ್ಲಿ ಕಟ್ಟಡ ನಿರ್ಮಾಣ ನಿಯಮ ಸಡಿಲಿಕೆ
