ನ್ಯೂಯಾರ್ಕ್‌ನ ಮೊದಲ ಮುಸ್ಲಿಂ ಮೇಯರ್ ಜೋಹ್ರಾನ್ ಮಮ್ದಾನಿ; ಕುರಾನ್‌ ಮೇಲೆ ಕೈ ಇಟ್ಟು ಪ್ರಮಾಣ ವಚನ

ಅಮೆರಿಕದ ಎಡಪಂಥೀಯ ಯುವ ನಾಯಕ ಜೋಹ್ರಾನ್ ಮಮ್ದಾನಿ (Zohran Mamdani) ಅವರು ಗುರುವಾರ ಮುಂಜಾನೆ ನ್ಯೂಯಾರ್ಕ್ ನಗರದ ನೂತನ ಮೇಯರ್ ಆಗಿ ಅಧಿಕಾರ ಸ್ವೀಕರಿಸಿದ್ದಾರೆ. ಈ ಮೂಲಕ ಅವರು ಅಮೆರಿಕದ ಅತಿದೊಡ್ಡ ನಗರವಾದ ನ್ಯೂಯಾರ್ಕ್‌ನ ಚುಕ್ಕಾಣಿ ಹಿಡಿದ ಮೊದಲ ಮುಸ್ಲಿಂ ಮೇಯರ್ ಎಂಬ ಇತಿಹಾಸ ಬರೆದಿದ್ದಾರೆ.

ವಿಶಿಷ್ಟ ಸ್ಥಳದಲ್ಲಿ ಪ್ರಮಾಣ ವಚನ

34 ವರ್ಷದ ಡೆಮೋಕ್ರಾಟ್ ನಾಯಕ ಮಮ್ದಾನಿ ಅವರು ಮಧ್ಯರಾತ್ರಿ 12 ಗಂಟೆಯ ನಂತರ ಸಿಟಿ ಹಾಲ್‌ನಲ್ಲಿ ಪ್ರಮಾಣ ವಚನ ಸ್ವೀಕರಿಸುವ ಮೂಲಕ ಗಮನ ಸೆಳೆದರು. ನಾಲ್ಕು ವರ್ಷಗಳ ಅವಧಿಗೆ ಅವರು ಈ ಜವಾಬ್ದಾರಿಯನ್ನು ನಿರ್ವಹಿಸಲಿದ್ದಾರೆ.

ಅಧಿಕಾರ ಸ್ವೀಕಾರದ ವಿಶಿಷ್ಟತೆ

ಸಾಮಾನ್ಯವಾಗಿ ಅದ್ದೂರಿಯಾಗಿ ನಡೆಯುವ ಪ್ರಮಾಣ ವಚನ ಕಾರ್ಯಕ್ರಮದ ಬದಲು, ಮಮ್ದಾನಿ ಅವರು ಮಧ್ಯರಾತ್ರಿ ಹಳೆಯ ಸಬ್‌ವೇ ನಿಲ್ದಾಣದಲ್ಲಿ ಪ್ರಮಾಣ ವಚನ ಸ್ವೀಕರಿಸುವ ಮೂಲಕ ತಾವು "ಸಾಮಾನ್ಯ ಜನರ ಮತ್ತು ಸಾರ್ವಜನಿಕ ಸಾರಿಗೆಯ ಪರ" ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಇನ್ನು ಕೈಯಲ್ಲಿ ಕುರಾನ್‌ ಹಿಡಿದೇ ಅವರು ಪ್ರಮಾಣ ವಚನ ಸ್ವೀಕರಿಸಿರುವುದು ಮತ್ತಷ್ಟು ವಿಶೇಷ.

ಟ್ರಂಪ್ ವಿರುದ್ಧದ ಸಂಘರ್ಷದ ಮುನ್ಸೂಚನೆ?

ಜೋಹ್ರಾನ್ ಮಮ್ದಾನಿ ಅವರು ನ್ಯೂಯಾರ್ಕ್‌ ಮೇಜರ್‌ ಆಗಿ ನೇಮಕಗೊಂಡಿರುವುದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ನೇರ ರಾಜಕೀಯ ಸಂಘರ್ಷಕ್ಕೆ ಸಾಕ್ಷಿಯಾಗುವ ಸಾಧ್ಯತೆಯಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಪ್ರಗತಿಪರ ವಿಚಾರಧಾರೆಗಳನ್ನು ಹೊಂದಿರುವ ಮಮ್ದಾನಿ, ಟ್ರಂಪ್ ಅವರ ಹಲವು ನೀತಿಗಳನ್ನು ತೀವ್ರವಾಗಿ ವಿರೋಧಿಸುತ್ತಾ ಬಂದಿದ್ದಾರೆ.

ಯಾರು ಈ ಜೋಹ್ರಾನ್ ಮಮ್ದಾನಿ?

ಜೋಹ್ರಾನ್ ಮಮ್ದಾನಿ ಅವರು ಅಮೆರಿಕದ ಒಬ್ಬ ಪ್ರಭಾವಿ ಯುವ ರಾಜಕಾರಣಿ ಮತ್ತು ಡೆಮೋಕ್ರಾಟಿಕ್ ಸೋಶಿಯಲಿಸ್ಟ್ ಚಳವಳಿಯ ಪ್ರಮುಖ ನಾಯಕ. ಇವರು 1991ರಲ್ಲಿ ಉಗಾಂಡಾದಲ್ಲಿ ಜನಿಸಿದರು. ಇವರು ವಿಶ್ವವಿಖ್ಯಾತ ಭಾರತೀಯ ಮೂಲದ ಚಿತ್ರನಿರ್ದೇಶಕಿ ಮೀರಾ ನಾಯರ್ (ಮೂಲತಃ ಒಡಿಶಾ) ಮತ್ತು ಸುಪ್ರಸಿದ್ಧ ಶೈಕ್ಷಣಿಕ ತಜ್ಞ ಮಹಮೂದ್ ಮಮ್ದಾನಿ ಅವರ ಪುತ್ರ.

ಇವರ ಪೂರ್ವಜರು ಗುಜರಾತಿ ಮೂಲದವರಾಗಿದ್ದು, ನಂತರ ಉಗಾಂಡಾಕ್ಕೆ ವಲಸೆ ಹೋಗಿದ್ದರು. 7ನೇ ವಯಸ್ಸಿನಲ್ಲಿ ಇವರು ತಮ್ಮ ಪೋಷಕರೊಂದಿಗೆ ನ್ಯೂಯಾರ್ಕ್‌ಗೆ ಬಂದು ನೆಲೆಸಿದರು. ರಾಜಕೀಯಕ್ಕೆ ಬರುವ ಮುನ್ನ ಇವರು 'Young Zaff' ಎಂಬ ಹೆಸರಿನಲ್ಲಿ ಹಿಪ್-ಹಾಪ್ ಮತ್ತು ರಾಪ್ ಸಂಗೀತಗಾರನಾಗಿ ಗುರುತಿಸಿಕೊಂಡಿದ್ದರು.

ರಾಜಕೀಯ ಸಾಧನೆಗಳು:

ಮೊದಲ ಮುಸ್ಲಿಂ ಮೇಯರ್: ನ್ಯೂಯಾರ್ಕ್ ನಗರದ ಇತಿಹಾಸದಲ್ಲೇ ಮೇಯರ್ ಪಟ್ಟ ಅಲಂಕರಿಸಿದ ಮೊದಲ ಮುಸ್ಲಿಂ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಶಾಸಕರಾಗಿ ಸೇವೆ: ಈ ಹಿಂದೆ ಇವರು ನ್ಯೂಯಾರ್ಕ್ ರಾಜ್ಯ ವಿಧಾನಸಭೆಯಲ್ಲಿ ಅಸ್ಟೋರಿಯಾ ಕ್ಷೇತ್ರವನ್ನು ಪ್ರತಿನಿಧಿಸಿದ್ದರು.

ಸಮಾಜಮುಖಿ ಹೋರಾಟ: ಮನೆ ಬಾಡಿಗೆ ನಿಯಂತ್ರಣ, ಉಚಿತ ಬಸ್ ಸೇವೆ ಮತ್ತು ಕಾರ್ಮಿಕರ ಹಕ್ಕುಗಳಿಗಾಗಿ ಹೋರಾಟ ನಡೆಸಿ ಜನಪ್ರಿಯತೆ ಗಳಿಸಿದರು.

ಪ್ರಗತಿಪರ ನಾಯಕ: ಇವರು ನ್ಯೂಯಾರ್ಕ್‌ನ ಅತ್ಯಂತ ಎಡಪಂಥೀಯ (Left-wing) ನಾಯಕರಲ್ಲಿ ಒಬ್ಬರು. ಶ್ರೀಮಂತರ ಮೇಲೆ ಹೆಚ್ಚಿನ ತೆರಿಗೆ ಮತ್ತು ಜನಸಾಮಾನ್ಯರಿಗೆ ಉಚಿತ ಸೌಲಭ್ಯಗಳನ್ನು ನೀಡಬೇಕು ಎಂಬುದು ಇವರ ಪ್ರಮುಖ ವಾದ.

ಟ್ರಂಪ್ ವಿರೋಧಿ: ಡೊನಾಲ್ಡ್ ಟ್ರಂಪ್ ಅವರ ಕಟ್ಟುನಿಟ್ಟಿನ ವಲಸೆ ನೀತಿಗಳು ಮತ್ತು ಆಡಳಿತ ವೈಖರಿಯನ್ನು ಇವರು ಮೊದಲಿನಿಂದಲೂ ತೀವ್ರವಾಗಿ ವಿರೋಧಿಸುತ್ತಾ ಬಂದಿದ್ದಾರೆ.