ನೇಪಾಳದಲ್ಲಿ ಚೀನಾ ಪ್ರಜೆಗಳ 'ವಧು ಮಾರಾಟ' ದಂಧೆ: ಅಕ್ರಮ ಮದುವೆ ಜಾಲ ಬಯಲಿಗೆ

ನೇಪಾಳದ ಯುವತಿಯರನ್ನು ಚೀನಾ ಪ್ರಜೆಗಳಿಗೆ ವಧುಗಳನ್ನಾಗಿ ಮಾರಾಟ ಮಾಡುತ್ತಿರುವ ಅಕ್ರಮ ಅಂತರ್‌ರಾಷ್ಟ್ರ ಮದುವೆ ದಂಧೆಯ ವಿರುದ್ಧ ನೇಪಾಳ ಸರ್ಕಾರ ಸಮರ ಸಾರಿದೆ. ಆನ್‌ಲೈನ್ ಮಧ್ಯವರ್ತಿಗಳು ಮತ್ತು ಬ್ರೋಕರ್‌ಗಳು ನೇಪಾಳಿ ಯುವತಿಯರನ್ನು ಗುರಿಯಾಗಿಸಿಕೊಂಡು ಈ ಜಾಲ ನಡೆಸುತ್ತಿರುವುದು ಬೆಳಕಿಗೆ ಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.

ದಂಧೆ ಬೆಳಕಿಗೆ ಬಂದದ್ದು ಹೇಗೆ?

ಕಳೆದ ನವೆಂಬರ್‌ನಲ್ಲಿ ನೇಪಾಳದ ರಾಜಧಾನಿ ಕಾಠ್ಮಂಡುವಿನಲ್ಲಿ ಅನೇಕ ನೇಪಾಳಿ ಯುವತಿಯರು ಚೀನಾ ಪ್ರಜೆಗಳೊಂದಿಗೆ ಬಾಡಿಗೆ ಮನೆಗಳಲ್ಲಿ ವಾಸಿಸುತ್ತಿರುವುದನ್ನು ವಲಸೆ ಅಧಿಕಾರಿಗಳು ಪತ್ತೆಹಚ್ಚಿದ್ದರು. ಚೀನಾ ಪುರುಷರು ಈ ಯುವತಿಯರ ವಿಡಿಯೋ ಚಿತ್ರೀಕರಿಸಿ ಚೀನಾದಲ್ಲಿರುವ ತಮ್ಮ ಪರಿಚಯಸ್ಥರಿಗೆ ಮತ್ತು ಸೋಶಿಯಲ್ ಮೀಡಿಯಾಗಳಿಗೆ ಕಳುಹಿಸುತ್ತಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ವೀಸಾ ನಿಯಮ ಉಲ್ಲಂಘಿಸಿದ ಆರೋಪದ ಮೇಲೆ ನಾಲ್ವರು ಚೀನಾ ಪ್ರಜೆಗಳನ್ನು ನೇಪಾಳ ಸರ್ಕಾರ ಗಡಿಪಾರು ಮಾಡಿದೆ.

ಚೀನಾ ರಾಯಭಾರ ಕಚೇರಿಯ ಎಚ್ಚರಿಕೆ

ನೇಪಾಳದಲ್ಲಿರುವ ಚೀನಾ ರಾಯಭಾರ ಕಚೇರಿಯು ತನ್ನ ಪ್ರಜೆಗಳಿಗೆ ಹೊಸ ವರ್ಷದ ಪ್ರಯಾಣ ಮಾರ್ಗಸೂಚಿಯನ್ನು (Travel Advisory) ಬಿಡುಗಡೆ ಮಾಡಿದೆ. "ವಧು ಮಾರಾಟ" ಜಾಲದಿಂದ ದೂರವಿರಿ ಮತ್ತು ಮದುವೆ ಬ್ರೋಕರ್‌ಗಳನ್ನು ಕುರುಡಾಗಿ ನಂಬಬೇಡಿ ಎಂದು ಎಚ್ಚರಿಸಿದೆ. ಲಾಭದ ಉದ್ದೇಶದ ಅಂತರ್ದೇಶೀಯ ಮದುವೆ ದಂಧೆಯು ಚೀನಾದಲ್ಲಿ ಕಾನೂನುಬಾಹಿರವಾಗಿದೆ ಎಂದು ರಾಯಭಾರ ಕಚೇರಿ ಒತ್ತಿಹೇಳಿದೆ.

ದಂಧೆಯ ಹಿಂದಿನ ಕಾರಣ ಮತ್ತು ಅಪಾಯಗಳು

ಲಿಂಗಾನುಪಾತದ ವ್ಯತ್ಯಾಸ: ಚೀನಾದಲ್ಲಿ 100 ಮಹಿಳೆಯರಿಗೆ ಎದುರಾಗಿ 104 ಪುರುಷರಿದ್ದಾರೆ. ಈ ಅಸಮತೋಲನದಿಂದಾಗಿ ಮದುವೆಗೆ ಹುಡುಗಿಯರು ಸಿಗದೆ, ಚೀನಾ ಪುರುಷರು ವಿದೇಶಿ ವಧುಗಳ ಮೊರೆ ಹೋಗುತ್ತಿದ್ದಾರೆ.

ಬಡತನದ ದುರುಪಯೋಗ: ಬಡ ರಾಷ್ಟ್ರಗಳ ಯುವತಿಯರಿಗೆ ಹಣದ ಆಮಿಷವೊಡ್ಡಿ, ಮದುವೆಯ ನಂತರ ಸುಂದರ ಜೀವನ ನೀಡುವುದಾಗಿ ನಂಬಿಸಿ ಚೀನಾಕ್ಕೆ ಸಾಗಿಸಲಾಗುತ್ತಿದೆ. ಈ ಹಿಂದೆ ಲಾವೋಸ್, ಮ್ಯಾನ್ಮಾರ್ ಮತ್ತು ವಿಯೆಟ್ನಾಂ ಯುವತಿಯರು ಕೂಡ ಇಂತಹ ಮಾನವ ಕಳ್ಳಸಾಗಣೆಗೆ ಬಲಿಯಾಗಿದ್ದರು.

ಭಾರಿ ದರ: ಮದುವೆ ಏಜೆನ್ಸಿಗಳು ಈ ಪ್ರಕ್ರಿಯೆಗಾಗಿ ಸುಮಾರು 5,000 ಯುವಾನ್‌ನಿಂದ (₹58,000) 1.88 ಲಕ್ಷ ಯುವಾನ್‌ವರೆಗೆ (₹22 ಲಕ್ಷ) ಹಣ ವಸೂಲಿ ಮಾಡುತ್ತಿವೆ.