ಟ್ರಂಪ್ ಯುದ್ಧ ವಿರಾಮ ವಾಪಸ್: ಅಮೆರಿಕದ ನಡೆಯನ್ನು ಲೇವಡಿ ಮಾಡಿದ ಇರಾನ್ ಮಾಧ್ಯಮಗಳು

ಇರಾನ್ ವಿದ್ಯುತ್ ಸ್ಥಾವರಗಳ ಮೇಲಿನ ದಾಳಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಐದು ದಿನಗಳ ತಡೆ ನೀಡಿದ ನಿರ್ಧಾರವನ್ನು ಇರಾನ್ ಮಾಧ್ಯಮಗಳು ತೀವ್ರವಾಗಿ ಲೇವಡಿ ಮಾಡಿವೆ. ಅಮೆರಿಕದ ಈ ನಡೆಯು ಕೇವಲ 'ಬೆದರಿಕೆಯ ತಂತ್ರ' (ಬ್ಲಫ್) ಎಂದು ಬಣ್ಣಿಸಿರುವ ಇರಾನಿಯನ್ ಮಾಧ್ಯಮಗಳು, ಟೆಹ್ರಾನ್‌ನ ಪ್ರಬಲ ಪ್ರತಿದಾಳಿಯ ಸಾಮರ್ಥ್ಯಕ್ಕೆ ಹೆದರಿಯೇ ಟ್ರಂಪ್ ಯೂ-ಟರ್ನ್ ಹೊಡೆದಿದ್ದಾರೆ ಎಂದು ವ್ಯಂಗ್ಯವಾಡಿವೆ.

ಕಳೆದ ವಾರವಷ್ಟೇ ಇರಾನ್‌ನ ನೂತನ ಪರಮೋಚ್ಚ ನಾಯಕ ಮೊಜ್ತಬಾ ಖಮೇನಿ ಅವರು ಸಲಿಂಗಕಾಮಿಯಾಗಿರಬಹುದು ಎಂಬ ವರದಿ ಕೇಳಿ ಡೊನಾಲ್ಡ್ ಟ್ರಂಪ್ ಜೋರಾಗಿ ನಕ್ಕಿದ್ದರು ಎಂಬ ಅಮೆರಿಕದ ಮಾಧ್ಯಮಗಳ ವರದಿಗೆ, ಈಗ ಇರಾನ್ ಮಾಧ್ಯಮಗಳು ತಮ್ಮದೇ ಶೈಲಿಯಲ್ಲಿ ತಿರುಗೇಟು ನೀಡಲು ಶುರುಮಾಡಿವೆ.

48 ಗಂಟೆಗಳ ಗಡುವು ಮತ್ತು ಬದಲಾದ ನಿಲುವು

ಕಳೆದ ಶನಿವಾರ (ಮಾರ್ಚ್ 21) ಡೊನಾಲ್ಡ್ ಟ್ರಂಪ್ ಅವರು, ಇರಾನ್ ತಕ್ಷಣವೇ ಹಾರ್ಮುಜ್ ಜಲಸಂಧಿಯನ್ನು ಮರುತೆರೆಯಬೇಕು, ಇಲ್ಲವಾದಲ್ಲಿ ಇರಾನ್‌ನ ವಿದ್ಯುತ್ ಮೂಲಸೌಕರ್ಯಗಳನ್ನು ಗುರಿಯಾಗಿಸಿ ದಾಳಿ ಮಾಡಲಾಗುವುದು ಎಂದು ಕೇವಲ 48 ಗಂಟೆಗಳ ಕಠಿಣ ಗಡುವು ನೀಡಿದ್ದರು. ಆದರೆ, ಕೇವಲ ಎರಡು ದಿನಗಳ ಬಳಿಕ ಸೋಮವಾರ ತಮ್ಮ ನಿಲುವನ್ನು ಬದಲಿಸಿದ ಟ್ರಂಪ್, ಕಳೆದ ಎರಡು ದಿನಗಳಿಂದ ಎರಡೂ ದೇಶಗಳ ನಡುವೆ "ಬಹಳ ಉತ್ತಮ ಮತ್ತು ಫಲಪ್ರದ ಮಾತುಕತೆಗಳು" ನಡೆದಿವೆ ಎಂದು ಉಲ್ಲೇಖಿಸಿ, ಇರಾನ್ ಮೇಲಿನ ಸೇನಾ ದಾಳಿಗಳನ್ನು ಐದು ದಿನಗಳ ಕಾಲ ಮುಂದೂಡುವಂತೆ ರಕ್ಷಣಾ ಇಲಾಖೆಗೆ ಸೂಚಿಸಿದ್ದರು.

ಬ್ಲಫ್ ಎಂದ ಇರಾನ್ ಮಾಧ್ಯಮ

ಟ್ರಂಪ್ ಅವರ ಈ ದಿಢೀರ್ ಬದಲಾವಣೆಗೆ ಇರಾನ್‌ನ ಸರ್ಕಾರಿ-ಸಂಯೋಜಿತ ಮಾಧ್ಯಮಗಳು ಅಣಕ ಮತ್ತು ಸಂಭ್ರಮದ ಮಿಶ್ರ ಪ್ರತಿಕ್ರಿಯೆ ನೀಡಿವೆ. ಈ ನಡೆಯು ಅಮೆರಿಕದ ಹಿಂದೇಟು ಮತ್ತು ಹಿಂಜರಿಕೆಯನ್ನು ಸ್ಪಷ್ಟವಾಗಿ ತೋರಿಸುತ್ತದೆ ಎಂದು ವಿಶ್ಲೇಷಿಸಿವೆ. ಪ್ರಮುಖ ಸುದ್ದಿ ಸಂಸ್ಥೆ 'ಮೆಹರ್ ನ್ಯೂಸ್' , ತಮ್ಮ ಇಂಧನ ನೆಲೆಗಳ ಮೇಲಿನ ದಾಳಿಗೆ ಪ್ರತಿಯಾಗಿ ಇರಾನ್ ನಡೆಸಿದ ಪ್ರತಿದಾಳಿಗಳು ವಾಷಿಂಗ್ಟನ್ ತನ್ನ ನಿಲುವನ್ನು ಮರುಪರಿಶೀಲಿಸಲು "ಒತ್ತಾಯಿಸಿವೆ" ಎಂದು ವರದಿ ಮಾಡಿದೆ. ಟ್ರಂಪ್ ಅವರ ಬೆದರಿಕೆಗಳು ಕೇವಲ 'ಬ್ಲಫ್' ಆಗಿದ್ದವು ಎಂಬುದನ್ನು ದಾಳಿಯ ಮುಂದೂಡಿಕೆ ಸ್ಪಷ್ಟಪಡಿಸಿದೆ ಎಂದು ಟೀಕಿಸಿದೆ. ಮತ್ತೊಂದು ಪ್ರಸಿದ್ಧ ಮಾಧ್ಯಮವಾದ 'ಪ್ರೆಸ್ ಟಿವಿ', ಎರಡೂ ದೇಶಗಳ ನಡುವೆ ಯಾವುದೇ ನೇರ ಅಥವಾ ಪರೋಕ್ಷ ಮಾತುಕತೆಗಳು ನಡೆದಿಲ್ಲ ಎಂದು ವಾದಿಸಿದೆ. ಪ್ರತಿಷ್ಠಿತ 'ಟೆಹ್ರಾನ್ ಟೈಮ್ಸ್' (Tehran Times) ಅಂತರ್ಜಾಲ ತಾಣವು, ಟ್ರಂಪ್ ಅವರ ಈ ನಡೆಯನ್ನು 'ರಾಜತಾಂತ್ರಿಕತೆಯ ಸೋಗಿನಲ್ಲಿ ಮಾಡಿದ ಹಿಮ್ಮೆಟ್ಟುವಿಕೆ' ಎಂದು ಬಣ್ಣಿಸಿದೆ.

ಪ್ರತಿದಾಳಿಯ ಭಯವೇ ಯೂ-ಟರ್ನ್‌ಗೆ ಕಾರಣ

ಅಮೆರಿಕದ ಅಧ್ಯಕ್ಷರು ಒಳ್ಳೆಯ ಉದ್ದೇಶದಿಂದ ತಮ್ಮ ದಾಳಿಯ ಯೋಜನೆಯನ್ನು ತಡೆಹಿಡಿದಿಲ್ಲ, ಬದಲಾಗಿ ಪ್ರಾದೇಶಿಕ ವಿದ್ಯುತ್ ಗ್ರಿಡ್‌ಗಳನ್ನು ಗುರಿಯಾಗಿಸುವ ಇರಾನ್‌ನ ಬೆದರಿಕೆ ಮತ್ತು ಭೀಕರ ಪ್ರತಿದಾಳಿಯ ಭಯದಿಂದಾಗಿ ಈ ನಿರ್ಧಾರ ಕೈಗೊಂಡಿದ್ದಾರೆ ಎಂದು 'ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಇರಾನ್ ಬ್ರಾಡ್‌ಕಾಸ್ಟಿಂಗ್' ಹೇಳಿದೆ. ಇರಾನ್‌ನ ರಾಷ್ಟ್ರೀಯ ಭದ್ರತೆ ಮತ್ತು ವಿದೇಶಾಂಗ ನೀತಿ ಆಯೋಗದ ವಕ್ತಾರ ಇಬ್ರಾಹಿಂ ರೆಜಾಯಿ ಅವರು 'ಎಕ್ಸ್' (X) ವೇದಿಕೆಯಲ್ಲಿ ಪ್ರತಿಕ್ರಿಯಿಸಿ, "ಟ್ರಂಪ್ ಮತ್ತು ಅಮೆರಿಕ ಮತ್ತೊಮ್ಮೆ ಹಿಂದೆ ಸರಿದಿವೆ. ನಮ್ಮ ಹೋರಾಟವು ಇನ್ನೂ ಮುನ್ನುಗ್ಗುತ್ತಿದೆ. ಇದು ದುಷ್ಟ ಶಕ್ತಿಗೆ (ಡೆವಿಲ್) ಆದ ಮತ್ತೊಂದು ಸೋಲು" ಎಂದು ಟ್ವೀಟ್ ಮಾಡಿದ್ದಾರೆ. ಇವೆಲ್ಲದರ ನಡುವೆ, ಟ್ರಂಪ್ ಅವರ ಈ ಘೋಷಣೆಯ ನಂತರ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಕಚೇರಿಯಿಂದ ಯಾವುದೇ ತಕ್ಷಣದ ಪ್ರತಿಕ್ರಿಯೆ ಬಂದಿಲ್ಲ ಎಂದು 'ಟೈಮ್ಸ್ ಆಫ್ ಇಸ್ರೇಲ್' ವರದಿ ಮಾಡಿದೆ. ಆದರೆ, ಬ್ರಿಟನ್ ಪ್ರಧಾನಿ ಕೀರ್ ಸ್ಟಾರ್ಮರ್ ನೇತೃತ್ವದ ಯುಕೆ ಸರ್ಕಾರವು ಟ್ರಂಪ್ ನಡೆಯನ್ನು ಸ್ವಾಗತಿಸಿದೆ.