'ಟಾಕ್ಸಿಕ್' ಬಿಡುಗಡೆಗೆ ಇನ್ನು ಕೇವಲ 28 ದಿನ ಬಾಕಿ ಇದೆ.
ಟಾಕ್ಸಿಕ್|ವಿವಾದಗಳ ನಡುವೆಯೂ 100 ಮಿಲಿಯನ್ ವೀಕ್ಷಣೆ ಕಂಡ ಟೀಸರ್!
ರಾಕಿಂಗ್ ಸ್ಟಾರ್ ಯಶ್ ಅಭಿನಯದ 'ಟಾಕ್ಸಿಕ್' ಚಿತ್ರದ ಅಸಲಿ ಕಥೆ ಬಹಿರಂಗವಾಗಿದೆ. 1940ರ ದಶಕದ ಗೋವಾದ ಭೂಗತ ಲೋಕದಲ್ಲಿ 'ರಾಯ'ನ ಸಾಮ್ರಾಜ್ಯದ ರೋಚಕ ಕಥೆ ಈ ಸಿನಿಮಾದಲ್ಲಿದೆ.
ರಾಕಿಂಗ್ಸ್ಟಾರ್ ನಟ ಯಶ್ ಅಭಿನಯದ ಬಹುನಿರೀಕ್ಷಿತ ಚಿತ್ರ 'ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್' ಬಿಡುಗಡೆಗೆ ಕ್ಷಣಗಣನೆ ಶುರುವಾಗಿದೆ. ಕೆಜಿಎಫ್ ಚಾಪ್ಟರ್ 2 ರ ಭರ್ಜರಿ ಯಶಸ್ಸಿನ ನಾಲ್ಕು ವರ್ಷಗಳ ನಂತರ 'ರಾಕಿಂಗ್ ಸ್ಟಾರ್' ಬೆಳ್ಳಿ ಪರದೆಗೆ ಮರಳುತ್ತಿದ್ದು, ಅಭಿಮಾನಿಗಳಲ್ಲಿ ಕುತೂಹಲ ಮೂಡಿದೆ. ಇನ್ನು ಕೇವಲ 28 ದಿನಗಳಲ್ಲಿ, ಮಾರ್ಚ್ 19ರಂದು ಈದ್ ಮತ್ತು ಯುಗಾದಿ ಹಬ್ಬದ ಸಂಭ್ರಮದ ನಡುವೆ ಈ ಸಿನಿಮಾ ವಿಶ್ವದಾದ್ಯಂತ ತೆರೆಕಾಣಲಿದೆ.
ಕಳೆದ ವರ್ಷ, ಯಶ್ ಅವರ ಹುಟ್ಟುಹಬ್ಬದಂದು ಬಿಡುಗಡೆಯಾದ ಚಿತ್ರದ ಟೀಸರ್ ವ್ಯಾಪಕ ವಿವಾದಕ್ಕೆ ಕಾರಣವಾಗಿತ್ತು. ಅದರ ಅಶ್ಲೀಲತೆಯ ಬಗ್ಗೆ ಕರ್ನಾಟಕ ಮಹಿಳಾ ಆಯೋಗಕ್ಕೂ ದೂರು ದಾಖಲಾಗಿತ್ತು. ಆದರೆ ಇದೀಗ ಟಾಕ್ಸಿಕ್ ಸಿನಿಮಾದ ಟ್ರೇಲರ್ 100 ಮಿಲಿಯನ್ಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ.
ಟಾಕ್ಸಿಕ್ ಟ್ರೇಲರ್
ಗೋವಾದ ಭೂಗತ ಲೋಕದ ಅನಾವರಣ
ಚಿತ್ರದ ಕಥೆಯ ಬಗ್ಗೆ ನಿರ್ದೇಶಕಿ ಗೀತು ಮೋಹನ್ ದಾಸ್ ಇದುವರೆಗೆ ಗೌಪ್ಯತೆ ಕಾಯ್ದುಕೊಂಡಿದ್ದರು. ಆದರೆ ಇತ್ತೀಚೆಗೆ ಯುಎಇ ವಿತರಕರಾದ 'ಫಾರ್ಸ್ ಫಿಲ್ಮ್' ಬಿಡುಗಡೆ ಮಾಡಿರುವ ಸಾರಾಂಶದ ಪ್ರಕಾರ, ಚಿತ್ರದ ಕಥಾಹಂದರ ಬಹಿರಂಗವಾಗಿದೆ. ಈ ಚಿತ್ರವು 1940 ರಿಂದ 1970 ರ ದಶಕದ ಅವಧಿಯಲ್ಲಿ ನಡೆಯುವ ಕಥೆಯಾಗಿದ್ದು, ಗೋವಾ ನಗರ ಇದರ ಕೇಂದ್ರಬಿಂದುವಾಗಿದೆ. ವಸಾಹತುಶಾಹಿ ನೆರಳು ಮರೆಯಾಗುತ್ತಿರುವ ಮತ್ತು ಕ್ರೈಮ್ ಸಿಂಡಿಕೇಟ್ಗಳು ತಲೆಯೆತ್ತುತ್ತಿರುವ ಕಾಲಘಟ್ಟದಲ್ಲಿ, ಯಶ್ ನಿರ್ವಹಿಸುತ್ತಿರುವ 'ರಾಯ' ಎಂಬ ಪಾತ್ರವು ರಕ್ತ, ಭಯ ಮತ್ತು ದ್ರೋಹದ ಮೂಲಕ ತನ್ನದೇ ಆದ ಸಾಮ್ರಾಜ್ಯವನ್ನು ಹೇಗೆ ನಿರ್ಮಿಸುತ್ತಾನೆ ಎಂಬುದು ಚಿತ್ರದ ಮುಖ್ಯ ಎಳೆಯಾಗಿದೆ ಎಂದು ಬಹಿರಂಗವಾಗಿದೆ.
ಈ ಚಿತ್ರಕ್ಕೆ ಸ್ವತಃ ಯಶ್ ಮತ್ತು ಗೀತು ಮೋಹನ್ ದಾಸ್ ಜಂಟಿಯಾಗಿ ಕಥೆ ಬರೆದಿದ್ದಾರೆ. ಕೆವಿಎನ್ ಪ್ರೊಡಕ್ಷನ್ಸ್ ಮತ್ತು ಯಶ್ ಅವರ ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಅಡಿಯಲ್ಲಿ ಚಿತ್ರ ನಿರ್ಮಾಣವಾಗಿದೆ. ಸುಮಾರು 600 ಕೋಟಿ ರೂಪಾಯಿಗಳ ಬೃಹತ್ ಬಜೆಟ್ನಲ್ಲಿ ಈ ಚಿತ್ರ ಸಿದ್ಧವಾಗಿದ್ದು, ಬಾಕ್ಸ್ ಆಫೀಸ್ನಲ್ಲಿ 700 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡುವ ನಿರೀಕ್ಷೆಯಿದೆ. ಟೀಸರ್ನಲ್ಲಿನ ಹಿಂಸೆ ಮತ್ತು ಬೋಲ್ಡ್ ದೃಶ್ಯಗಳಿಂದಾಗಿ ಚಿತ್ರಕ್ಕೆ ಈಗಾಗಲೇ ಯುಎಇನಲ್ಲಿ '18+' (ವಯಸ್ಕರಿಗೆ ಮಾತ್ರ) ರೇಟಿಂಗ್ ನೀಡಲಾಗಿದ್ದು, ಭಾರತದಲ್ಲೂ 'A' ಸರ್ಟಿಫಿಕೇಟ್ ಸಿಗುವ ಸಾಧ್ಯತೆಯಿದೆ.
ಐದು ನಾಯಕಿಯರೊಂದಿಗೆ ಯಶ್
ಯಶ್ ಅವರ ಚಿತ್ರವು ಅದರ ತಾರಾಗಣಕ್ಕಾಗಿಯೂ ಸುದ್ದಿಯಲ್ಲಿದೆ. ಅವರು ಐದು ನಾಯಕಿಯರ ಜೊತೆಗೆ ನಟಿಸಿದ್ದಾರೆ. ತಯಾರಕರು ಅವರ ಲುಕ್ಗಳನ್ನು ಒಂದೊಂದಾಗಿ ಬಿಡುಗಡೆ ಮಾಡಿದ್ದಾರೆ. 'ಟಾಕ್ಸಿಕ್' ಚಿತ್ರದಲ್ಲಿ ಕಿಯಾರಾ ಅಡ್ವಾಣಿ, ನಯನತಾರಾ, ಹುಮಾ ಖುರೇಷಿ, ತಾರಾ ಸುತಾರಿಯಾ, ರುಕ್ಮಿಣಿ ವಸಂತ್, ಟೋವಿನೋ ಥಾಮಸ್, ಅಕ್ಷಯ್ ಒಬೆರಾಯ್, ಡ್ಯಾರೆಲ್ ಡಿ'ಸಿಲ್ವಾ ಮತ್ತು ಸುದೇವ್ ನಾಯರ್ ಕೂಡ ನಟಿಸಿದ್ದಾರೆ.
ಟಾಕ್ಸಿಕ್ Vs ಧುರಂಧರ್ 2
ಮಾರ್ಚ್ 19 ರಂದು ಕೇವಲ 'ಟಾಕ್ಸಿಕ್' ಮಾತ್ರವಲ್ಲದೆ, ಬಾಲಿವುಡ್ನ ರಣವೀರ್ ಸಿಂಗ್ ಅಭಿನಯದ 'ಧುರಂಧರ್ 2: ದ ರಿವೆಂಜ್' ಕೂಡ ತೆರೆಕಾಣುತ್ತಿದೆ. ಆದಿತ್ಯ ಧರ್ ನಿರ್ದೇಶನದ ಈ ಚಿತ್ರವೂ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ 5 ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದ್ದು, ಎರಡು ಬಿಗ್ ಬಜೆಟ್ ಸಿನಿಮಾಗಳ ನಡುವೆ ಭರ್ಜರಿ ಪೈಪೋಟಿ ನಡೆಯಲಿದೆ.
ಮಾರ್ಚ್ 19 ರಂದು ಕೇವಲ 'ಟಾಕ್ಸಿಕ್' ಮಾತ್ರವಲ್ಲದೆ, ಬಾಲಿವುಡ್ನ ರಣವೀರ್ ಸಿಂಗ್ ಅಭಿನಯದ 'ಧುರಂಧರ್ 2: ದ ರಿವೆಂಜ್' ಕೂಡ ತೆರೆಕಾಣುತ್ತಿದೆ.
ಗೀತು ಮೋಹನ್ ದಾಸ್ ಯಾರು?
ಮೂಲತಃ ನಟಿಯಾಗಿ ಮಲಯಾಳಂ ಚಿತ್ರರಂಗ ಪ್ರವೇಶಿಸಿದ ಗೀತು ಮೋಹನ್ ದಾಸ್, ನಂತರ ನಿರ್ದೇಶಕಿಯಾಗಿ ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡವರು. ಅವರ ಮೊದಲ ಚಿತ್ರ 'ಲೈಯರ್ಸ್ ಡೈಸ್' ಆಸ್ಕರ್ಗೆ ಭಾರತದ ಅಧಿಕೃತ ಪ್ರವೇಶ ಪಡೆದಿತ್ತು. ಅವರ ಮತ್ತೊಂದು ಚಿತ್ರ 'ಮೂತೋನ್' ಅಂತರಾಷ್ಟ್ರೀಯ ಮಟ್ಟದಲ್ಲಿ ಪ್ರಶಂಸೆ ಗಳಿಸಿತ್ತು. ಈಗ 'ಟಾಕ್ಸಿಕ್' ಮೂಲಕ ಅವರು ಮೊದಲ ಬಾರಿಗೆ ಇಷ್ಟು ದೊಡ್ಡ ಮಟ್ಟದ ಕಮರ್ಷಿಯಲ್ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ.
