ಸಿಗರೇಟ್ ಹಚ್ಚಿದ ತೃಪ್ತಿ, ಗಾಯಗೊಂಡ ಪ್ರಭಾಸ್! 'ಸ್ಪಿರಿಟ್' ಫಸ್ಟ್ ಲುಕ್ ರಿವೀಲ್
ಪೋಸ್ಟರ್ನಲ್ಲಿ ಪ್ರಭಾಸ್ ಉದ್ದನೆಯ ಕೂದಲು, ಗಾಯಗೊಂಡ ಮೈಕಟ್ಟು ಮತ್ತು ಕೈಯಲ್ಲಿ ಮದ್ಯದ ಲೋಟ ಹಿಡಿದು ಅತ್ಯಂತ ತೀವ್ರವಾಗಿ ಕಾಣಿಸಿಕೊಂಡಿದ್ದಾರೆ. ಇದು 'ಅನಿಮಲ್' ಚಿತ್ರದ ರಣಬೀರ್ ಕಪೂರ್ ಪಾತ್ರವನ್ನು ನೆನಪಿಸುತ್ತಿದೆ.
ಹೊಸ ವರ್ಷದ ಸಂಭ್ರಮದ ನಡುವೆಯೇ ರೆಬೆಲ್ ಸ್ಟಾರ್ ಪ್ರಭಾಸ್ ಅಭಿಮಾನಿಗಳಿಗೆ ನಿರ್ದೇಶಕ ಸಂದೀಪ್ ರೆಡ್ಡಿ ವಂಗ ಭರ್ಜರಿ ಉಡುಗೊರೆ ನೀಡಿದ್ದಾರೆ. ಬಹುನಿರೀಕ್ಷಿತ 'ಸ್ಪಿರಿಟ್' ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಇಂದು ಮಧ್ಯರಾತ್ರಿ ಬಿಡುಗಡೆಯಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಸೃಷ್ಟಿಸಿದೆ.
ಅನಿಮಲ್ ಶೈಲಿಯಲ್ಲೇ ರಗಡ್ ಲುಕ್
ಬಿಡುಗಡೆಯಾಗಿರುವ ಪೋಸ್ಟರ್ನಲ್ಲಿ ಸಂದೀಪ್ ರೆಡ್ಡಿ ವಂಗ ಅವರ ವಿಶಿಷ್ಟ ಶೈಲಿ ಎದ್ದು ಕಾಣುತ್ತಿದೆ. ಗಾಯಗೊಂಡ ಮೈಕಟ್ಟು, ಉದ್ದನೆಯ ಕೂದಲು ಮತ್ತು ಕಣ್ಣಿಗೆ ಸನ್ ಗ್ಲಾಸ್ ಧರಿಸಿರುವ ಪ್ರಭಾಸ್ ಕೈಯಲ್ಲಿ ಮದ್ಯದ ಲೋಟ ಹಿಡಿದು ಕಿಟಕಿಯ ಬಳಿ ನಿಂತಿದ್ದಾರೆ. ವಿಶೇಷವೆಂದರೆ, ಚಿತ್ರದ ನಾಯಕಿ ತೃಪ್ತಿ ಡಿಮ್ರಿ ಅವರು ಪ್ರಭಾಸ್ ತುಟಿಯಲ್ಲಿದ್ದ ಸಿಗರೇಟಿಗೆ ಬೆಂಕಿ ಹಚ್ಚುತ್ತಿರುವ ದೃಶ್ಯ ಪೋಸ್ಟರ್ನಲ್ಲಿದೆ. ಈ ಲುಕ್ ನೋಡಿದ ಅಭಿಮಾನಿಗಳು 'ಅನಿಮಲ್' ಚಿತ್ರದ ರಣಬೀರ್ ಕಪೂರ್ ಪಾತ್ರಕ್ಕೆ ಹೋಲಿಸುತ್ತಿದ್ದರೆ, ಇನ್ನು ಕೆಲವರು ವಂಗ ಅವರ ಸಿನಿಮಾಗಳಲ್ಲಿನ ತೀವ್ರತೆಯನ್ನು ಕಂಡು ಆಶ್ಚರ್ಯ ವ್ಯಕ್ತಪಡಿಸುತ್ತಿದ್ದಾರೆ.
ಚಿತ್ರೀಕರಣವು ನವೆಂಬರ್ 2025 ರಲ್ಲಿ ಅಧಿಕೃತವಾಗಿ ಆರಂಭವಾಗಿದ್ದು, ಇದಕ್ಕೂ ಮುನ್ನ ಬಿಡುಗಡೆಯಾದ 'ಸೌಂಡ್ ಸ್ಟೋರಿ' ಚಿತ್ರದ ಮೇಲಿನ ಕುತೂಹಲವನ್ನು ಹೆಚ್ಚಿಸಿದೆ. ಈ ಆಡಿಯೋ ಟೀಸರ್ನಲ್ಲಿ ಪ್ರಭಾಸ್ ಒಬ್ಬ ಐಪಿಎಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದು, "ಚಿಕ್ಕಂದಿನಿಂದಲೂ ನನಗೆ ಒಂದು ಕೆಟ್ಟ ಅಭ್ಯಾಸವಿದೆ" ಎನ್ನುವ ಡೈಲಾಗ್ ಅವರ ಬಂಡಾಯದ ಗುಣವನ್ನು ಬಿಂಬಿಸುತ್ತದೆ.
ಚಿತ್ರದಲ್ಲಿ ಪ್ರಭಾಸ್ ಮತ್ತು ತೃಪ್ತಿ ಡಿಮ್ರಿ ಜೊತೆಗೆ ವಿವೇಕ್ ಒಬೆರಾಯ್, ಪ್ರಕಾಶ್ ರಾಜ್ ಮತ್ತು ಕಾಂಚನಾ ಅವರಂತಹ ದಿಗ್ಗಜ ಕಲಾವಿದರು ನಟಿಸುತ್ತಿದ್ದಾರೆ. ಪ್ರಕಾಶ್ ರಾಜ್ ಇಲ್ಲಿ ಕಟ್ಟುನಿಟ್ಟಿನ ಜೈಲರ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಆಡಿಯೋ ಮೂಲಕ ದೃಢಪಟ್ಟಿದೆ.
ಅನಿಮಲ್ ತಂಡದ ಪುನರ್ಮಿಲನ
'ಅನಿಮಲ್' ಚಿತ್ರಕ್ಕೆ ಸಂಗೀತ ನೀಡಿದ್ದ ಹರ್ಷವರ್ಧನ್ ರಾಮೇಶ್ವರ್ 'ಸ್ಪಿರಿಟ್' ಚಿತ್ರಕ್ಕೂ ಮ್ಯೂಸಿಕ್ ಕಂಪೋಸ್ ಮಾಡುತ್ತಿದ್ದಾರೆ. 'ಅರ್ಜುನ್ ರೆಡ್ಡಿ' ಮೂಲಕ ಖ್ಯಾತಿ ಗಳಿಸಿದ ರಾಜ್ ತೋತಾ ಅವರ ಛಾಯಾಗ್ರಹಣ ಈ ಚಿತ್ರಕ್ಕಿದೆ. ತೃಪ್ತಿ ಡಿಮ್ರಿ ಅವರು ಈ ಹಿಂದೆ 'ಅನಿಮಲ್'ನಲ್ಲಿ ಸಣ್ಣ ಪಾತ್ರ ಮಾಡಿದ್ದರೂ, ಇಲ್ಲಿ ಅವರು ಪ್ರಬಲ ನಾಯಕಿ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ ಎನ್ನಲಾಗಿದೆ.
ಪ್ರಭಾಸ್ ಅವರ ಮುಂದಿನ ಸಾಲಿನ ಸಿನಿಮಾಗಳಾದ 'ದಿ ರಾಜಾ ಸಾಬ್' ಮತ್ತು 'ಫೌಜಿ' ಚಿತ್ರಗಳ ನಡುವೆ 'ಸ್ಪಿರಿಟ್' ಅತಿ ಹೆಚ್ಚು ಹೈಪ್ ಸೃಷ್ಟಿಸಿರುವ ಚಿತ್ರವಾಗಿದೆ. 2026ರಲ್ಲಿ ಈ ಚಿತ್ರ ತೆರೆಕಾಣುವ ಸಾಧ್ಯತೆಯಿದೆ.
