'ಓ ರೋಮಿಯೋ' ಬಾಕ್ಸ್ ಆಫೀಸ್ ಗಳಿಕೆ ಎಷ್ಟು?

ಬಾಲಿವುಡ್ ನಟ ಶಾಹಿದ್ ಕಪೂರ್ ಮತ್ತು ತೃಪ್ತಿ ದಿಮ್ರಿ ಅಭಿನಯದ 'ಓ ರೋಮಿಯೋ' ಸಿನಿಮಾ ಕಳೆದ ಶುಕ್ರವಾರ ತೆರೆಕಂಡಿದ್ದು, ಬಾಕ್ಸ್ ಆಫೀಸ್​​ನಲ್ಇ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ವಿಶಾಲ್ ಭಾರದ್ವಾಜ್ ನಿರ್ದೇಶನದ ಈ ಚಿತ್ರವು ಆರಂಭಿಕ ವಾರಾಂತ್ಯದಲ್ಲಿ ಉತ್ತಮ ಗಳಿಕೆ ಕಂಡಿದ್ದರೂ, ಸೋಮವಾರದ ನಂತರ ಕಲೆಕ್ಷನ್ನಲ್ಲಿ ಇಳಿಮುಖವಾಗಿದೆ.

ಐದನೇ ದಿನದ ಕಲೆಕ್ಷನ್

ತೆರೆಕಂಡ ಮೊದಲ ದಿನ 8.5 ಕೋಟಿ ರೂಪಾಯಿ ಗಳಿಸಿದ್ದ ಈ ಚಿತ್ರ, ಮೊದಲ ಮೂರು ದಿನಗಳ ಅಂತ್ಯಕ್ಕೆ 30 ಕೋಟಿ ರೂಪಾಯಿಗಳ ಗಡಿ ದಾಟಿತ್ತು. ಆದರೆ ವಾರದ ಆರಂಭದ ದಿನವಾದ ಸೋಮವಾರ (4ನೇ ದಿನ) ಚಿತ್ರದ ಗಳಿಕೆಯಲ್ಲಿ ಭಾರಿ ಕುಸಿತ ಕಂಡುಬಂದಿತ್ತು. ಸ್ಯಾಕ್ನಿಲ್ಕ್ ವರದಿಯ ಪ್ರಕಾರ, ಐದನೇ ದಿನ ಅಂದರೆ ಮಂಗಳವಾರದಂದು ಈ ಸಿನಿಮಾ 5.1 ಕೋಟಿ ರೂಪಾಯಿಗಳನ್ನು ಗಳಿಸಿದೆ. ಇದರೊಂದಿಗೆ ಭಾರತದಲ್ಲಿ ಚಿತ್ರದ ಒಟ್ಟು ಮೊತ್ತ 40 ಕೋಟಿ ರೂಪಾಯಿಗಳಿಗೆ ತಲುಪಿದೆ.

ವಿಶ್ವದಾದ್ಯಂತದ ಗಳಿಕೆ

ದೇಶೀಯ ಮಾರುಕಟ್ಟೆಯಲ್ಲಿ 40 ಕೋಟಿ ರೂಪಾಯಿ ಗಳಿಸಿರುವ 'ಓ ರೋಮಿಯೋ', ಜಾಗತಿಕ ಮಟ್ಟದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ. ವರದಿಗಳ ಪ್ರಕಾರ, ಸಿನಿಮಾ ಇದುವರೆಗೆ ವಿಶ್ವಾದ್ಯಂತ ಸುಮಾರು 62.5 ಕೋಟಿ ರೂಪಾಯಿಗಳನ್ನು ಕಲೆಕ್ಷನ್ ಮಾಡಿದೆ.

ದಿನವಾರು ಗಳಿಕೆ ಎಷ್ಟು?

• 1ನೇ ದಿನ (ಶುಕ್ರವಾರ): 8.5 ಕೋಟಿ ರೂ.

• 2ನೇ ದಿನ (ಶನಿವಾರ): 12.65 ಕೋಟಿ ರೂ.

• 3ನೇ ದಿನ (ಭಾನುವಾರ): 9.00 ಕೋಟಿ ರೂ.

• 4ನೇ ದಿನ (ಸೋಮವಾರ): 4.75 ಕೋಟಿ ರೂ.

• 5ನೇ ದಿನ (ಮಂಗಳವಾರ): 5.1 ಕೋಟಿ ರೂ.

ಈ ನಡುವೆ ಚಿತ್ರದ ಹೈ-ವೋಲ್ಟೇಜ್ ಹಾಡು 'ಜಲ್ವಾ' ಬಿಡುಗಡೆಯಾಗಿದೆ. ಖ್ಯಾತ ಸಂಗೀತ ನಿರ್ದೇಶಕ ವಿಶಾಲ್ ಭಾರದ್ವಾಜ್ ಸಂಯೋಜನೆಯಲ್ಲಿ ಮೂಡಿಬಂದಿರುವ ಈ ಹಾಡಿಗೆ ದಿಗ್ಗಜ ಸಾಹಿತಿ ಗುಲ್ಜಾರ್ ಸಾಹಿತ್ಯ ಬರೆದಿದ್ದಾರೆ. ಸೋಬಾ ಸಿಂಗ್ ಸಿತಾರಾ ಅವರ ಧ್ವನಿಯು ಹಾಡಿಗೆ ಹೊಸ ಕಳೆ ನೀಡಿದ್ದು, ಈ ಗೀತೆಯು ಟಿ-ಸೀರಿಸ್ ಮೂಲಕ ಹೊರಬಂದಿದೆ. 'ಜಲ್ವಾ' ಹಾಡಿನಲ್ಲಿ ನಟ ಶಾಹಿದ್ ಕಪೂರ್ ಅತ್ಯಂತ ರಗಡ್ ಹಾಗೂ ಆಕ್ಷನ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.

'ಓ ರೋಮಿಯೋ' ಹಾಡು ಬಿಡುಗಡೆ

ವಿಶಾಲ್ ಭಾರದ್ವಾಜ್ ನಿರ್ದೇಶನದ ಈ ಚಿತ್ರದಲ್ಲಿ ಶಾಹಿದ್ ಕಪೂರ್ 'ಉಸ್ತಾರಾ' ಪಾತ್ರದಲ್ಲಿ ಮತ್ತು ತೃಪ್ತಿ ದಿಮ್ರಿ 'ಅಫ್ಶಾ ಖುರೇಷಿ' ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ನಾನಾ ಪಾಟೇಕರ್, ಅವಿನಾಶ್ ತಿವಾರಿ, ತಮನ್ನಾ ಭಾಟಿಯಾ, ದಿಶಾ ಪಟಾನಿ, ವಿಕ್ರಾಂತ್ ಮಾಸ್ಸಿ ಮತ್ತು ಫರಿದಾ ಜಲಾಲ್ ಅವರಂತಹ ದೊಡ್ಡ ತಾರಾಗಣ ಈ ಚಿತ್ರದಲ್ಲಿದೆ. ಈ ಸಿನಿಮಾವನ್ನು ಸಜಿದ್ ನಾಡಿಯಾಡ್ವಾಲಾ ನಿರ್ಮಾಣ ಮಾಡಿದ್ದಾರೆ.