ಎರಡನೇ ವಾರದಲ್ಲೂ ನಂಬರ್ 1 ಸ್ಥಾನ ಉಳಿಸಿಕೊಂಡ 'ಓ ರೋಮಿಯೋ

ಶಾಹಿದ್ ಕಪೂರ್ ಅಭಿನಯದ 'ಓ ರೋಮಿಯೋ' ಚಿತ್ರವು ಬಾಕ್ಸ್ ಆಫೀಸ್​ನಲ್ಲಿ ಸದ್ಯ ಮಿಶ್ರ ಪ್ರತಿಕ್ರಿಯೆಯ ನಡುವೆಯೂ ತನ್ನ ಓಟ ಮುಂದುವರಿಸಿದೆ. ಬಿಡುಗಡೆಗೂ ಮುನ್ನವೇ ಸೋಲಿನ ಭೀತಿ ಎದುರಿಸುತ್ತಿದ್ದ ಈ ಚಿತ್ರ, ಈಗ ಎರಡನೇ ವಾರಕ್ಕೆ ಕಾಲಿಟ್ಟಿದ್ದು ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ವಿಶಾಲ್ ಭಾರದ್ವಾಜ್ ನಿರ್ದೇಶನದ ಈ ಚಿತ್ರದಲ್ಲಿ ಶಾಹಿದ್ ಕಪೂರ್ ಮತ್ತು ತೃಪ್ತಿ ಡಿಮ್ರಿ ಅವರ ಆ್ಯಕ್ಷನ್ ಮತ್ತು ಪ್ರೇಮಕಥೆ ಸಿನಿಪ್ರಿಯರಿಗೆ ಇಷ್ಟವಾಗುತ್ತಿದೆ.

ಶಾಹಿದ್ ಕಪೂರ್ ಆಕ್ಷನ್ ಮತ್ತು ಕೆಮಿಸ್ಟ್ರಿ ವಿಶಾಲ್ ಭಾರದ್ವಾಜ್ ಅವರ 'ಕಮೀನೆ', 'ಹೈದರ್' ನಂತಹ ಸಿನಿಮಾಗಳಲ್ಲಿ ಶಾಹಿದ್ ಕಪೂರ್ ಅವರ ನಟನಾ ಕೌಶಲ್ಯ ಈಗಾಗಲೇ ಸಾಬೀತಾಗಿದೆ. 'ಓ ರೋಮಿಯೋ' ಚಿತ್ರದಲ್ಲಿ ಶಾಹಿದ್ ಅವರನ್ನು ಒಬ್ಬ ಕ್ರೂರ ಗ್ಯಾಂಗ್ಸ್ಟರ್ ಮತ್ತು ಅಷ್ಟೇ ತೀವ್ರವಾಗಿ ಪ್ರೀತಿಸುವ ಪ್ರೇಮಿಯಾಗಿ ತೋರಿಸಲಾಗಿದ್ದು, ವಿಮರ್ಶಕರು ಮತ್ತು ಪ್ರೇಕ್ಷಕರಿಂದ ಉತ್ತಮ ಪ್ರಶಂಸೆ ವ್ಯಕ್ತವಾಗಿದೆ. ಚಿತ್ರದಲ್ಲಿ ಶಾಹಿದ್ ಅವರ ಸ್ಟೈಲಿಶ್ ಆಕ್ಷನ್ ಮತ್ತು ತೃಪ್ತಿ ಡಿಮ್ರಿ ಜೊತೆಗಿನ ಕೆಮಿಸ್ಟ್ರಿ ಹೈಲೈಟ್ ಆಗಿದೆ. ತೃಪ್ತಿ ಡಿಮ್ರಿ ಕೂಡ ತಮ್ಮ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದು, ಪೋಷಕ ನಟರ ಅಭಿನಯವು ಚಿತ್ರಕ್ಕೆ ಬಲ ತುಂಬಿದೆ.

ಬಾಕ್ಸ್ ಆಫೀಸ್ ಗಳಿಕೆ ಮತ್ತು ಸವಾಲು ಚಿತ್ರಕ್ಕೆ ಮಿಶ್ರ ವಿಮರ್ಶೆಗಳು ಸಿಕ್ಕಿದ್ದರೂ ಮತ್ತು ಆರಂಭದಲ್ಲಿ ಹೆಚ್ಚಿನ ಹೈಪ್ ಇಲ್ಲದಿದ್ದರೂ, ಮೊದಲ ವಾರಾಂತ್ಯದಲ್ಲಿ ಚಿತ್ರ ಸುಮಾರು 34 ಕೋಟಿ ರೂಪಾಯಿ ಗಳಿಸಿತ್ತು. ಮೊದಲ ವಾರ ಮುಕ್ತಾಯಕ್ಕೆ ಈ ಮೊತ್ತ 52 ಕೋಟಿಯ ಗಡಿ ದಾಟಿತ್ತು. ಆದರೆ ಎರಡನೇ ಸೋಮವಾರ ಚಿತ್ರದ ಗಳಿಕೆಯಲ್ಲಿ ಕೊಂಚ ಕುಸಿತ ಕಂಡುಬಂದಿದೆ. 11ನೇ ದಿನಕ್ಕೆ ಚಿತ್ರದ ಒಟ್ಟು ಗಳಿಕೆ ಅಂದಾಜು 66 ಕೋಟಿ ರೂಪಾಯಿಗೆ ತಲುಪಿದೆ. ಗಮನಾರ್ಹವೆಂದರೆ, ಬುಕ್ ಮೈ ಶೋ ಅಪ್ಲಿಕೇಶನ್ನಲ್ಲಿ ಹೊಸ ಸಿನಿಮಾಗಳಿಗಿಂತ 'ಓ ರೋಮಿಯೋ' ಚಿತ್ರದ ಟಿಕೆಟ್ಗಳೇ ಹೆಚ್ಚು ಮಾರಾಟವಾಗುತ್ತಿವೆ.

ನಿರ್ಮಾಪಕರಿಗೆ ಲಾಭ, ವಿತರಕರಿಗೆ ನಿರಾಸೆ?

ಮುಂದಿನ ದಿನಗಳಲ್ಲಿ ಈ ಚಿತ್ರ 85 ಕೋಟಿ ರೂಪಾಯಿ ಗಳಿಸಬಹುದು ಎಂದು ಅಂದಾಜಿಸಲಾಗಿದೆ. ಚಿತ್ರದ ಒಟಿಟಿ ಮತ್ತು ಸ್ಯಾಟಲೈಟ್ ಹಕ್ಕುಗಳ ಮಾರಾಟದಿಂದ ನಿರ್ಮಾಪಕರಿಗೆ ಲಾಭವಾಗಬಹುದು. ಆದರೆ 130 ಕೋಟಿ ರೂಪಾಯಿಗಳ ಭಾರಿ ಬಜೆಟ್‌ನಲ್ಲಿ ತಯಾರಾದ ಈ ಚಿತ್ರವು ಚಿತ್ರಮಂದಿರಗಳ ಗಳಿಕೆಯ ದೃಷ್ಟಿಯಿಂದ ವಿತರಕರಿಗೆ ಮತ್ತು ಥಿಯೇಟರ್ ಮಾಲೀಕರಿಗೆ ಅಂತಹ ದೊಡ್ಡ ಯಶಸ್ಸನ್ನು ತಂದುಕೊಡುವ ಸಾಧ್ಯತೆ ಕಡಿಮೆ ಎನ್ನಲಾಗುತ್ತಿದೆ.