Starlink: ಮಣಿಪುರದಲ್ಲಿ ಮೈತೇಯಿ ಗುಂಪಿನಿಂದ ಎಲಾನ್​ ಮಸ್ಕ್​ ಕಂಪನಿಯ ಸ್ಟಾರ್​ಲಿಂಕ್ ಇಂಟರ್ನೆಟ್ ಅಕ್ರಮ ಬಳಕೆ?​

ಮಣಿಪುರದ ನಡೆಯುತ್ತಿರುವ ದಂಗೆಯಲ್ಲಿ ಬುಡಕಟ್ಟು ಕುಕಿಗಳ ವಿರುದ್ಧ ತಿರುಗಿ ಬಿದ್ದಿರುವ ಮೈತೇಯಿ ಗುಂಪು ಎಲಾನ್​ ಮಸ್ಕ್​ ಒಡೆತನದ ಸ್ಟಾರ್​ಲಿಂಕ್​ ಇಂಟರ್ನೆಟ್ ಬಳಸುತ್ತಿದ್ದರು ಎಂಬ ಆತಂಕಕಾರಿ ಮಾಹಿತಿ ಹೊರಗೆ ಬಿದ್ದಿದೆ. ಈ ಇಂಟರ್ನೆಟ್​ ಬಳಕೆಗೆ ಭಾರತದಲ್ಲಿ ಅವಕಾಶ ಇಲ್ಲ. ಆದಾಗ್ಯೂ ಆ ಕಂಪನಿಗೆ ಸೇರಿದ ರೌಟರ್​, ಡಿಶ್​ ಮತ್ತಿತರರ ಡಿವೈಸ್​​ಗಳು ಬಂದಿದ್ದು ಹೇಗೆ ಎಂಬ ಚರ್ಚೆ ಶುರವಾಗಿದೆ. ಈ ಬಗ್ಗೆ ನೆಟ್ಟಿಗರೊಬ್ಬರು ಕೇಳಿದ ಪ್ರಶ್ನೆಗೆ ಸ್ವತಃ ಎಲಾನ್​ ಮಸ್ಕ್​ ಉತ್ತರ ನೀಡಿದ್ದು ಭಾರತದಲ್ಲಿ ಅದು ಬಳಕೆಯಲ್ಲಿ ಇಲ್ಲ ಎಂದು ಹೇಳಿದ್ದಾರೆ.

ಗಲಭೆ ಪೀಡಿತ ಪ್ರದೇಶಗಳಲ್ಲಿ ಕೇಂದ್ರ ಸರ್ಕಾರ ಇಂಟರ್ನೆಟ್ ಸೇವೆಗಳನ್ನು ಸ್ಥಗಿತ ಮಾಡಿದೆ. ಆದಾಗ್ಯೂ ಈ ಗುಂಪು ಅದ್ಹೇಗೆ ಬಳಸಿಕೊಂಡಿದೆ ಎಂಬ ಅನುಮಾನ ವ್ಯಕ್ತವಾಗಿದೆ. ಸ್ಟಾರ್​ಲಿಂಕ್​ ಸಾಧನಗಳನ್ನು ದಾಳಿಗಳನ್ನು ಸಂಘಟಿಸಲು ಮತ್ತು ಯುದ್ಧತಂತ್ರದ ಮಾಹಿತಿ ಸಂವಹನ ಮಾಡಲು ಬಳಸುತ್ತಿದ್ದರು ಎನ್ನಲಾಗಿದೆ.

ಬಿಲಿಯನೇರ್ ಎಲಾನ್​ ಮಸ್ಕ್ ಅವರ ಏರೋಸ್ಪೇಸ್ ಕಂಪನಿ ಸ್ಪೇಸ್ಎಕ್ಸ್ ಒಡೆತನದ ಸ್ಟಾರ್​ಲಿಂಗ್​, ಭೂಮಿಯ ಕೆಳ ಕಕ್ಷೆ ಬಳಸಿಕೊಂಡು ವಿಶ್ವದ ಯಾವುದೇ ಭಾಗದಲ್ಲಿ ಬ್ರಾಡ್​ಬಾಂಡ್​ ಬಳಸಲು ಅನುವು ಮಾಡುತ್ತದೆ. ಇದು ವಿಶ್ವದ ಅತ್ಯಂತ ದೊಡ್ಡ ಇಂಟರ್ನೆಟ್ ನೆಟ್​​ವರ್ಕ್ ಆಗಿದೆ. ಅಮೆರಿಕಾದ ಕಂಪನಿಯು ಭಾರತದಲ್ಲಿ ಇದರ ಪ್ರಸರಣಕ್ಕೆ ಅನುಮತಿ ಕೋರಿದೆ. ಆದರೆ ಅವಕಾಶ ಸಿಕ್ಕಿಲ್ಲ.

ಎಲಾನ್​ ಮಸ್ಕ್ ಉತ್ತರವೇನು?

ಸ್ಟಾರ್ ಲಿಂಕ್ ಭಾರತದಲ್ಲಿ ಕಾರ್ಯನಿರ್ವಹಿಸುವುದಿಲ್ಲ ಎಂದು ಎಲಾನ್​ ಮಸ್ಕ್ ಎಕ್ಸ್ ನಲ್ಲಿ ಪೋಸ್ಟ್ ನಲ್ಲಿ ತಿಳಿಸಿದ್ದಾರೆ. "ಇದು ಸುಳ್ಳು. ಸ್ಟಾರ್​ಲಿಂಗ್​ ಉಪಗ್ರಹ ಸೇವೆಗಳನ್ನು ಭಾರತದಲ್ಲಿ ಸ್ಥಗತಿ ಮಾಡಲಾಗಿದೆ" ಎಂದು ಅವರು ಹೇಳಿದ್ದಾರೆ.

ಭದ್ರತಾ ಪಡೆಗಳ ಜಂಟಿ ತಂಡವು ಡಿಸೆಂಬರ್ 13 ರಂದು ಇಂಫಾಲ್ ಪೂರ್ವ ಜಿಲ್ಲೆಯ ಖುನೌನಿಂದ ಸ್ಟಾರ್ಲಿಂಕ್ ಡಿಶ್ ಮತ್ತು ರೂಟರ್ ಜೊತೆಗೆ ಎಂಎ 4 ಅಸಾಲ್ಟ್ ರೈಫಲ್, ಗ್ರೆನೇಡ್​​ಗಳನ್ನು ಗುಂಡುಗಳನ್ನು ವಶಪಡಿಸಿಕೊಂಡಿದ್ದವು.

ಆರಂಭದಲ್ಲಿ ಪೊಲೀಸರಿಗೆ ಇದು ಏನು ಎಂಬುದು ಗೊತ್ತಾಗಿರಲಿಲ್ಲ. ಅವರು ಸಾಧನವನ್ನು "ಇಂಟರ್ನೆಟ್ ಉಪಗ್ರಹ ಆಂಟೆನಾ ಮತ್ತು ರೂಟರ್" ಎಂದು ದಾಖಲಿಸಿದ್ದರು. ಆದರೆ, ನೆಟ್ಟಿಗರೊಬ್ಬರು ಪೊಲೀಸರು ಪ್ರಕಟಿಸಿದ ಚಿತ್ರಗಳನ್ನು ಹತ್ತಿರದಿಂದ ಗಮನಿಸಿದ ಎಲಾನ್​ ಮಸ್ಕ್​ ಗಮನ ಸೆಳೆದಿದ್ದಾರೆ. ನಿಮ್ಮ ಇಂಟರ್ನಟ್​ ದುರುಪಯೋಗವಾಗದಂತೆ ತಡೆಯಬೇಕು ಎಂದು ಮವನಿ ಮಾಡಿದ್ದರು. ಅದಕ್ಕೆ ಮಸ್ಕ್​ ಪ್ರತಿಕ್ರಿಯೆ ನೀಡಿದ್ದಾರೆ.

ಚುರಾಚಂದ್ಪುರ, ಚಂದೇಲ್, ಇಂಫಾಲ್ ಪೂರ್ವ ಮತ್ತು ಕಾಂಗ್ಪೋಕ್ಪಿಯ ಬೆಟ್ಟ ಮತ್ತು ಕಣಿವೆ ಪ್ರದೇಶಗಳಲ್ಲಿ ಈ ಸಾಧನಗಳು ಪತ್ತೆಯಾಗಿದ್ದವು.