ಹೇಮಂತ್ ಸೊರೆನ್ ಅವರ ಮನವಿ ವಿಲೇವಾರಿ

ಹೊಸದಿಲ್ಲಿ, ಮೇ 10- ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯ ತನ್ನನ್ನು ಬಂಧಿಸಿರುವುದನ್ನು ಪ್ರಶ್ನಿಸಿ ಜಾರ್ಖಂಡ್‌ ನ ಮಾಜಿ ಮುಖ್ಯಮಂತ್ರಿ ಹೇಮಂತ್ ಸೊರೆನ್ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ಶುಕ್ರವಾರ ಇತ್ಯರ್ಥಪಡಿಸಿದೆ.

ಹೈಕೋರ್ಟ್‌ ಮೇ 3 ರಂದು ತೀರ್ಪು ನೀಡಿರುವುದರಿಂದ ಅರ್ಜಿ ನಿರುಪಯುಕ್ತವಾಗಿದೆ ಎಂದು ನ್ಯಾಯಮೂರ್ತಿಗಳಾದ ಸಂಜೀವ್ ಖನ್ನಾ ಮತ್ತು ದೀಪಂಕರ್ ದತ್ತಾ ಅವರ ಪೀಠ ಹೇಳಿದೆ. ಸೊರೆನ್‌ ಅವರು ಬಂಧನವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದಾರೆ. ಬಂಧನ ವಿರುದ್ಧದ ಹೈಕೋರ್ಟ್ ತೀರ್ಪು ನೀಡುವವರೆಗೆ, ಲೋಕಸಭೆ ಚುನಾವಣೆ ಪ್ರಚಾರಕ್ಕೆ ಮಧ್ಯಂತರ ಜಾಮೀನು ಕೋರಿದ್ದರು.

ʻಇದು ನಿರುಪಯುಕ್ತʼ ಎಂದು ಸೊರೆನ್ ಪರ ವಾದ ಮಂಡಿಸಿದ ಹಿರಿಯ ವಕೀಲರಾದ ಕಪಿಲ್ ಸಿಬಲ್ ಮತ್ತು ಅರುಣಾಭ್ ಚೌಧರಿ ಅವರಿಗೆ ಪೀಠ ಹೇಳಿತು. ಹೈಕೋರ್ಟ್‌ನ ಕಳೆದ ವಾರದ ತೀರ್ಪನ್ನು ಪ್ರಶ್ನಿಸಿ ಸೊರೆನ್ ಸಲ್ಲಿಸಿರುವ ವಿಶೇಷ ರಜೆ ಅರ್ಜಿ (ಎಸ್‌ಎಲ್‌ಪಿ) ಮೇ 13 ರಂದು ಸುಪ್ರೀಂ ಮುಂದೆ ವಿಚಾರಣೆಗೆ ಬರಲಿದೆ. ಎರಡೂ ಅರ್ಜಿಗಳನ್ನು ಒಟ್ಟಿಗೆ ವಿಚಾರಣೆ ನಡೆಸಲಾಗುವುದು. ಅಂದು ಸೊರೆನ್ ಅವರ ವಕೀಲರು ಎಲ್ಲ ವಿಚಾರ ಎತ್ತಬಹುದು ಎಂದು ಪೀಠ ಹೇಳಿದೆ.

ʻಅವರು ಮಾಜಿ ಮುಖ್ಯಮಂತ್ರಿ ಎಂಬುದನ್ನು ಮರೆತುಬಿಡಿ. ನಾಗರಿಕನಾಗಿ ನ್ಯಾಯಯುತವಾಗಿ ವ್ಯವಹರಿಸುವ ಹಕ್ಕಿದೆʼ ಎಂದು ಸಿಬಲ್ ಹೇಳಿದರು.

ʻನೀವು ಇನ್ನೊಂದು ಅರ್ಜಿಯಲ್ಲಿ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿದ್ದೀರಿ. ನೀವು ಅಲ್ಲಿ ವಾದಿಸಿʼ ಎಂದ ಪೀಠ, ಮನವಿಯನ್ನು ವಿಲೇವಾರಿ ಮಾಡಿತು.

ಸೊರೆನ್ ಅವರು ಜಾರ್ಖಂಡ್ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಿದ ನಂತರ ಜನವರಿ 31 ರಂದು ಅವರನ್ನು ಬಂಧಿಸಲಾಯಿತು. ಪಕ್ಷದ ನಿಷ್ಠಾವಂತ ಮತ್ತು ರಾಜ್ಯ ಸಾರಿಗೆ ಸಚಿವ ಚಂಪೈ ಸೊರೆನ್ ಅವರು ಮುಖ್ಯಮಂತ್ರಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.