Rishabh Pant: ಲೀಡ್ಸ್‌ನಲ್ಲಿ ಪಂತ್ ಮಿಂಚು: ಧೋನಿ ಶತಕ ದಾಖಲೆ ಮುರಿದ ರಿಷಭ್, ಭಾರತಕ್ಕೆ ತ್ರಿಶತಕ ಸಂಭ್ರಮ!
ಭಾರತದ ಮಾಜಿ ನಾಯಕ ಮತ್ತು ಶ್ರೇಷ್ಠ ವಿಕೆಟ್‌ಕೀಪರ್ ಎಂ.ಎಸ್. ಧೋನಿ ಅವರ ದಾಖಲೆಯನ್ನು (6 ಶತಕಗಳು) ಹಿಂದಿಕ್ಕಿ ಒಟ್ಟು 7 ಶತಕಗಳನ್ನು ಪೂರೈಸಿದ್ದಾರೆ.
ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಎರಡನೇ ದಿನದಾಟದಲ್ಲಿ ಭಾರತದ ಸ್ಫೋಟಕ ವಿಕೆಟ್‌ಕೀಪರ್-ಬ್ಯಾಟ್ಸ್‌ಮನ್ 'ರಿಷಭ್ ಪಂತ್' ಮತ್ತೊಂದು ಐತಿಹಾಸಿಕ ದಾಖಲೆ ನಿರ್ಮಿಸಿದ್ದಾರೆ. ಮೊದಲ ದಿನದ 65 ರನ್‌ಗಳಿಂದ ಬ್ಯಾಟಿಂಗ್ ಮುಂದುವರೆಸಿದ ಪಂತ್, ಮನಮೋಹಕ ಶತಕ ಸಿಡಿಸುವ ಮೂಲಕ ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತದ ಪರ ಅತಿ ಹೆಚ್ಚು ಶತಕಗಳನ್ನು ಬಾರಿಸಿದ ವಿಕೆಟ್‌ಕೀಪರ್ ಎನಿಸಿಕೊಂಡರು. ಶತಕಕ್ಕೆ ಕೇವಲ ಒಂದು ರನ್ ಬಾಕಿಯಿದ್ದಾಗ ಒನ್‌ ಹ್ಯಾಂಡೆಡ್ ಸಿಕ್ಸರ್ ಮೂಲಕ ತಮ್ಮ ಸಾಧನೆಯನ್ನು ಸ್ಮರಣೀಯವಾಗಿಸಿದರು!
ಈ ಮೂಲಕ ಪಂತ್, ಭಾರತದ ಮಾಜಿ ನಾಯಕ ಮತ್ತು ಶ್ರೇಷ್ಠ ವಿಕೆಟ್‌ಕೀಪರ್ ಎಂ.ಎಸ್. ಧೋನಿ ಅವರ ದಾಖಲೆಯನ್ನು (6 ಶತಕಗಳು) ಹಿಂದಿಕ್ಕಿ ಒಟ್ಟು 7 ಶತಕಗಳನ್ನು ಪೂರೈಸಿದ್ದಾರೆ. ಈ ಮೊದಲು, ಸೆನಾ (SENA - ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ನ್ಯೂಜಿಲೆಂಡ್, ಆಸ್ಟ್ರೇಲಿಯಾ) ರಾಷ್ಟ್ರಗಳಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಏಷ್ಯನ್ ವಿಕೆಟ್‌ಕೀಪರ್ ಎಂಬ ದಾಖಲೆಯನ್ನು ಸಹ ಪಂತ್ ಧೋನಿಯನ್ನು ಹಿಂದಿಕ್ಕಿ ನಿರ್ಮಿಸಿದ್ದರು.
ಭಾರತ ಪರ ವಿಕೆಟ್‌ಕೀಪರ್ ಆಗಿ ಅತಿ ಹೆಚ್ಚು ಟೆಸ್ಟ್ ಶತಕಗಳು:
- 'ರಿಷಭ್ ಪಂತ್ - 7 ಶತಕಗಳು'
- ಎಂ.ಎಸ್. ಧೋನಿ - 6 ಶತಕಗಳು
- ವೃದ್ಧಿಮಾನ್ ಸಾಹಾ - 3 ಶತಕಗಳು
'23 ವರ್ಷಗಳ ನಂತರ ಲೀಡ್ಸ್‌ನಲ್ಲಿ ತ್ರಿಶತಕ ಸಾಧನೆ ಪುನರಾವರ್ತನೆ!'
ಲೀಡ್ಸ್‌ನ ಐತಿಹಾಸಿಕ ಕ್ರೀಡಾಂಗಣದಲ್ಲಿ 23 ವರ್ಷಗಳ ನಂತರ ಭಾರತೀಯ ಆಟಗಾರರಿಂದ ಒಂದೇ ಪಂದ್ಯದಲ್ಲಿ ಮೂರು ಶತಕಗಳು ದಾಖಲಾಗಿವೆ. ಈ ಪಂದ್ಯದಲ್ಲಿ ಗಿಲ್, ಜೈಸ್ವಾಲ್ ಮತ್ತು ಪಂತ್ ಶತಕಗಳನ್ನು ಸಿಡಿಸಿ ತಂಡಕ್ಕೆ ಬೃಹತ್ ಮೊತ್ತ ಗಳಿಸಲು ನೆರವಾದರು. ಇದಕ್ಕೂ ಮೊದಲು, 2002ರಲ್ಲಿ ಭಾರತ ಲೀಡ್ಸ್‌ನಲ್ಲಿ ಆಡಿದಾಗ, ಕನ್ನಡಿಗ 'ರಾಹುಲ್ ದ್ರಾವಿಡ್ (148)', 'ಸಚಿನ್ ತೆಂಡೂಲ್ಕರ್ (193)', ಮತ್ತು ನಾಯಕ 'ಸೌರವ್ ಗಂಗೂಲಿ (128)' ಶತಕಗಳನ್ನು ಬಾರಿಸಿ ಮಿಂಚಿದ್ದರು. ಆ ಪಂದ್ಯದಲ್ಲಿ ಭಾರತ ಇನ್ನಿಂಗ್ಸ್ ಹಾಗೂ 46 ರನ್‌ಗಳಿಂದ ಇಂಗ್ಲೆಂಡ್ ವಿರುದ್ಧ ಭರ್ಜರಿ ಜಯ ಸಾಧಿಸಿತ್ತು.
2002ರ ಪಂದ್ಯದಲ್ಲಿ ಭಾರತ ತ್ರಿವಳಿ ಶತಕಗಳ ನೆರವಿನಿಂದ 628 ರನ್ ಗಳಿಸಿ ಡಿಕ್ಲೇರ್ ಮಾಡಿತ್ತು. ಇಂಗ್ಲೆಂಡ್ 273ಕ್ಕೆ ಆಲೌಟ್ ಆಗಿ ಫಾಲೋಆನ್‌ಗೆ ಸಿಲುಕಿ, ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ಕಳಪೆ ಬ್ಯಾಟಿಂಗ್ ಪ್ರದರ್ಶಿಸಿ ಹೀನಾಯ ಸೋಲು ಕಂಡಿತ್ತು. ಈ ಬಾರಿಯ ಪಂದ್ಯದ ಲಕ್ಷಣಗಳನ್ನು ನೋಡಿದಾಗ, 2002ರ ಪಂದ್ಯದಂತೆಯೇ ಭಾರತಕ್ಕೆ ಭರ್ಜರಿ ಗೆಲುವು ಸಿಗುವ ಸಾಧ್ಯತೆ ಇದೆ ಎಂದು ಕ್ರಿಕೆಟ್ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.
