ಎನ್‌ಎಸ್‌ಎ ಅಡಿಯಲ್ಲಿ ಸೋನಂ ವಾಂಗ್ಚುಕ್ ಬಂಧನ: ಸುಪ್ರೀಂ ಮೊರೆ ಹೋದ ಪತ್ನಿ ಗೀತಾಂಜಲಿ

ಖ್ಯಾತ ಪರಿಸರ ಹೋರಾಟಗಾರ ಸೋನಂ ವಾಂಗ್ಚುಕ್ ಅವರನ್ನು ರಾಷ್ಟ್ರೀಯ ಭದ್ರತಾ ಕಾಯ್ದೆ (NSA) ಅಡಿಯಲ್ಲಿ ಬಂಧಿಸಿರುವುದನ್ನು ಪ್ರಶ್ನಿಸಿ ಅವರ ಪತ್ನಿ ಗೀತಾಂಜಲಿ ಜೆ ಆಂಗ್ಮೋ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದಾರೆ. ತಮ್ಮ ಪತಿಯ ಬಂಧನವು ಲಡಾಖ್‌ಗೆ ಆರನೇ ಶೆಡ್ಯೂಲ್ ಸ್ಥಾನಮಾನ ನೀಡಬೇಕೆಂಬ ಬೇಡಿಕೆಯನ್ನು ಹತ್ತಿಕ್ಕುವ 'ರಾಜಕೀಯ ಸೇಡಿನ' ಕ್ರಮವಾಗಿದೆ ಎಂದು ಅವರು ಆರೋಪಿಸಿದ್ದಾರೆ.

ವಾಂಗ್ಚುಕ್ ಅವರಿಗೆ ಪಾಕಿಸ್ತಾನಿ ಗುಪ್ತಚರ ಅಧಿಕಾರಿಯೊಂದಿಗೆ ಸಂಪರ್ಕವಿದೆ ಎಂಬ ಆರೋಪಗಳನ್ನು ಬಲವಾಗಿ ನಿರಾಕರಿಸಿರುವ ಗೀತಾಂಜಲಿ, ಲಡಾಖ್ ಪೊಲೀಸರು ರಾಜಕೀಯ ಪ್ರೇರಿತ ಅಜೆಂಡಾದೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ದೂರಿದ್ದಾರೆ. "ಲಡಾಖ್ ಡಿಜಿಪಿ ಹೇಳುತ್ತಿರುವುದೆಲ್ಲವೂ ಒಂದು ಅಜೆಂಡಾದ ಭಾಗವಾಗಿದೆ. ಅವರು ಆರನೇ ಶೆಡ್ಯೂಲ್ ಅನ್ನು ಜಾರಿಗೊಳಿಸದಿರಲು ನಿರ್ಧರಿಸಿದ್ದಾರೆ ಮತ್ತು ಅದಕ್ಕಾಗಿ ಯಾರನ್ನಾದರೂ ಬಲಿಪಶು ಮಾಡಲು ನೋಡುತ್ತಿದ್ದಾರೆ," ಎಂದು ಅವರು ಹೇಳಿದ್ದಾರೆ.

ಈ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ, ರಾಷ್ಟ್ರಪತಿ ದ್ರೌಪದಿ ಮುರ್ಮು, ಗೃಹ ಸಚಿವ ಅಮಿತ್ ಶಾ, ಲಡಾಖ್ ಲೆಫ್ಟಿನೆಂಟ್ ಗವರ್ನರ್ ಕವಿಂದರ್ ಗುಪ್ತಾ ಮತ್ತು ಇತರರಿಗೆ ಪತ್ರ ಬರೆದಿರುವ ಗೀತಾಂಜಲಿ, ಕಳೆದ ಒಂದು ತಿಂಗಳಿನಿಂದ ವಾಂಗ್ಚುಕ್ ಅವರ ಸ್ಥೈರ್ಯ ಕುಗ್ಗಿಸಲು "ಪೂರ್ಣ ಪ್ರಮಾಣದ ರಾಜಕೀಯ ಸೇಡಿನ ಬೇಟೆ" ನಡೆಯುತ್ತಿದೆ ಎಂದು ಆರೋಪಿಸಿದ್ದಾರೆ. "ಸೋನಂ ವಾಂಗ್ಚುಕ್ ಅವರು ಯಾರಿಗೂ, ಅದರಲ್ಲೂ ವಿಶೇಷವಾಗಿ ತಮ್ಮ ದೇಶಕ್ಕೆ ಯಾವುದೇ ಅಪಾಯವನ್ನುಂಟು ಮಾಡುವುದಿಲ್ಲ," ಎಂದು ಅವರು ಪ್ರತಿಪಾದಿಸಿದ್ದಾರೆ.

ಪಾರದರ್ಶಕತೆಯ ಕೊರತೆ

ತಮ್ಮ ಪತಿಯ ಬಂಧನದ ಬಗ್ಗೆ ಪಾರದರ್ಶಕತೆಯ ಕೊರತೆ ಪ್ರಶ್ನಿಸಿರುವ ಗೀತಾಂಜಲಿ, "ನನ್ನ ಪತಿಯನ್ನು ಭೇಟಿಯಾಗಲು ಅಥವಾ ಫೋನ್‌ನಲ್ಲಿ ಮಾತನಾಡಲು ನನಗೆ ಹಕ್ಕಿಲ್ಲವೇ? ಬಂಧನದ ಕಾರಣಗಳನ್ನು ತಿಳಿದುಕೊಂಡು ಕಾನೂನು ಹೋರಾಟ ನಡೆಸಲು ಅವರಿಗೆ ಸಹಾಯ ಮಾಡುವ ಹಕ್ಕು ನನಗಿಲ್ಲವೇ? ಸೆಪ್ಟೆಂಬರ್ 26 ರಿಂದ ಬಂಧನದಲ್ಲಿರುವ ನನ್ನ ಪತಿಯ ಸ್ಥಿತಿಗತಿ ತಿಳಿಯುವ ಹಕ್ಕು ನನಗಿಲ್ಲವೇ? ಭಾರತದ ಜವಾಬ್ದಾರಿಯುತ ಪ್ರಜೆಗಳಾಗಿ ನಮಗೆ ಶಾಂತಿಯುತವಾಗಿ ನಮ್ಮ ಅಭಿಪ್ರಾಯ ವ್ಯಕ್ತಪಡಿಸುವ ಮತ್ತು ಸಂಚರಿಸುವ ಸ್ವಾತಂತ್ರ್ಯವಿಲ್ಲವೇ?" ಎಂದು ಅವರು ಪ್ರಶ್ನಿಸಿದ್ದಾರೆ.

ವಾಂಗ್ಚುಕ್ ಬಂಧನದ ಹಿನ್ನೆಲೆ

ಸೆಪ್ಟೆಂಬರ್ 26 ರಂದು ಎನ್‌ಎಸ್‌ಎ ಅಡಿಯಲ್ಲಿ ಬಂಧಿಸಲ್ಪಟ್ಟ ಸೋನಂ ವಾಂಗ್ಚುಕ್ ಅವರನ್ನು ಜೋಧ್‌ಪುರ ಜೈಲಿಗೆ ಸ್ಥಳಾಂತರಿಸಲಾಗಿದೆ. ಲಡಾಖ್‌ಗೆ ಸಂವಿಧಾನದ ಆರನೇ ಶೆಡ್ಯೂಲ್ ಅಡಿಯಲ್ಲಿ ಸ್ಥಾನಮಾನ ನೀಡಬೇಕೆಂದು ಒತ್ತಾಯಿಸಿ ಲೇಹ್‌ನಲ್ಲಿ ನಡೆದ ಹಿಂಸಾತ್ಮಕ ಪ್ರತಿಭಟನೆಗಳ ನಂತರ ಅವರನ್ನು ಬಂಧಿಸಲಾಗಿದೆ. ಈ ಪ್ರತಿಭಟನೆಗಳಲ್ಲಿ ಕನಿಷ್ಠ ನಾಲ್ಕು ಮಂದಿ ಮೃತಪಟ್ಟಿದ್ದು ಈ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಇದುವರೆಗೆ 44 ಜನರನ್ನು ಬಂಧಿಸಲಾಗಿದೆ.