ಲೋಕಸಭಾ ಚುನಾವಣೆ ಅಕ್ರಮ; ನಮ್ಮ ಬಳಿ ಪುರಾವೆ ಇದೆ- ರಾಹುಲ್ ಗಾಂಧಿ

ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಕಳೆದ ಲೋಕಸಭಾ ಚುನಾವಣೆಯಲ್ಲಿ "ಅಕ್ರಮ ನಡೆದಿದೆ" ಮತ್ತು "ಅನಧಿಕೃತವಾಗಿ ಮತದಾನ ತಿರುಚಲಾಗಿದೆ" ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಇದನ್ನು ಸಾಬೀತುಪಡಿಸಲು ತಮ್ಮ ಬಳಿ ಸ್ಪಷ್ಟ ಪುರಾವೆಗಳಿದ್ದು, ಕೆಲವೇ ದಿನಗಳಲ್ಲಿ ದೇಶದ ಮುಂದಿಡಲಾಗುವುದು ಎಂದೂ ಅವರು ಘೋಷಿಸಿದ್ದಾರೆ.

ಶನಿವಾರ (ಆಗಸ್ಟ್ 2) ದೆಹಲಿಯಲ್ಲಿ ನಡೆದ 'ವಾರ್ಷಿಕ ಕಾನೂನು ಸಮಾವೇಶ-2025'ರಲ್ಲಿ ಮಾತನಾಡಿದ ಅವರು, "ಚುನಾವ ಣಾ ಆಯೋಗ ಎಂಬ ಸಂಸ್ಥೆಯೇ ಅಸ್ತಿತ್ವದಲ್ಲಿಲ್ಲ ಎಂಬುದನ್ನು ಸಾಬೀತುಪಡಿಸುವ ಸಾಕ್ಷ್ಯಗಳು ಕಾಂಗ್ರೆಸ್ ಪಕ್ಷದ ಬಳಿ ಇವೆ," ಎಂದು ಹೇಳಿದರು. "ಲೋಕಸಭಾ ಚುನಾವಣೆಯಲ್ಲಿ ಹೇಗೆ ಅಕ್ರಮಗಳನ್ನು ನಡೆಸಲಾಗಿದೆ ಮತ್ತು ಮತಗಳನ್ನು ಅನಧಿಕೃತವಾಗಿ ತಿರುಚಲಾಗಿದೆ ಎಂಬುದನ್ನು ನಾವು ಮುಂದಿನ ಕೆಲವು ದಿನಗಳಲ್ಲಿ ನಿಮಗೆ ಸಾಬೀತುಪಡಿಸಲಿದ್ದೇವೆ," ಎಂದು ರಾಹುಲ್ ಗಾಂಧಿ ತಿಳಿಸಿದರು.

ಆರು ತಿಂಗಳ ತನಿಖೆಯ ಫಲಿತಾಂಶ

ಈ ಪುರಾವೆಗಳನ್ನು ಸಂಗ್ರಹಿಸಲು ತಮ್ಮ ಪಕ್ಷವು ಆರು ತಿಂಗಳ ಕಾಲ ನಿರಂತರವಾಗಿ ಶ್ರಮಿಸಿದೆ ಎಂದು ರಾಹುಲ್ ಗಾಂಧಿ ಬಹಿರಂಗಪಡಿಸಿದ್ದಾರೆ. "ಈ ಪುರಾವೆಯನ್ನು ಹುಡುಕಲು ನಮಗೆ ಆರು ತಿಂಗಳ ನಿರಂತರ ಕೆಲಸ ನಡೆಸಬೇಕಾಯಿತು. ಲೋಕಸಭಾ ಚುನಾವಣೆಯಲ್ಲಿ ಹೇಗೆ ಅಕ್ರಮ ನಡೆದಿದೆ ಎಂಬುದನ್ನು ನೀವು ಶೂನ್ಯ ಸಂದೇಹದಿಂದ ನೋಡುತ್ತೀರಿ," ಎಂದು ಅವರು ಹೇಳಿದರು. ಉದಾಹರಣೆಗೆ, "6.5 ಲಕ್ಷ ಮತದಾರರು ಮತ ಚಲಾಯಿಸಿದ್ದರೆ, ಅದರಲ್ಲಿ 1.5 ಲಕ್ಷ ಮತದಾರರು ನಕಲಿ" ಎಂದು ಅವರು ಆರೋಪಿಸಿದರು.

ಮಹಾರಾಷ್ಟ್ರ ಘಟನೆಯಿಂದ ಅನುಮಾನ ದೃಢ

2014ರಿಂದಲೇ ತಮಗೆ ಚುನಾವಣಾ ವ್ಯವಸ್ಥೆಯ ಮೇಲೆ ಅನುಮಾನವಿತ್ತು ಎಂದು ಹೇಳಿದ ರಾಹುಲ್, ಮಹಾರಾಷ್ಟ್ರದಲ್ಲಿ ನಡೆದ ಘಟನೆಗಳು ತಮ್ಮ ಅನುಮಾನವನ್ನು ದೃಢಪಡಿಸಿದವು ಎಂದರು. "ಲೋಕಸಭಾ ಚುನಾವಣೆಯಲ್ಲಿ ನಾವು (ಮಹಾ ವಿಕಾಸ್ ಅಘಾಡಿ) ಉತ್ತಮ ಪ್ರದರ್ಶನ ನೀಡಿದೆವು. ಆದರೆ ಕೇವಲ ನಾಲ್ಕು ತಿಂಗಳ ನಂತರ ನಡೆದ ವಿಧಾನಸಭಾ ಚುನಾವಣೆಯಲ್ಲಿ ನಾವು ಕೇವಲ ಸೋಲಲಿಲ್ಲ, ಸಂಪೂರ್ಣವಾಗಿ ನಾಶವಾದೆವು. ಮೂರು ಪ್ರಬಲ ಪಕ್ಷಗಳು ಇದ್ದಕ್ಕಿದ್ದಂತೆ ಕಣ್ಮರೆಯಾದವು," ಎಂದು ಅವರು ವಿವರಿಸಿದರು. ಲೋಕಸಭೆ ಮತ್ತು ವಿಧಾನಸಭಾ ಚುನಾವಣೆಗಳ ನಡುವೆ 1 ಕೋಟಿ ಹೊಸ ಮತದಾರರು ಸೇರ್ಪಡೆಯಾಗಿದ್ದು, ಹೆಚ್ಚಿನ ಮತಗಳು ಬಿಜೆಪಿಗೆ ಹೋಗಿವೆ ಎಂದು ಅವರು ಆರೋಪಿಸಿದರು.

ಈ ಹಿಂದೆ ರಫೇಲ್ ಒಪ್ಪಂದಕ್ಕೆ ಸಂಬಂಧಿಸಿದಂತೆ ಪ್ರಧಾನ ಮಂತ್ರಿ ಕಚೇರಿ ಮತ್ತು ರಾಷ್ಟ್ರೀಯ ಭದ್ರತಾ ಸಲಹೆಗಾರರು ಮಧ್ಯಪ್ರವೇಶಿಸಿ ಹಾನಿ ಮಾಡಿದ್ದಾರೆ ಎಂಬ ಸ್ಪಷ್ಟ ದಾಖಲೆಗಳಿದ್ದರೂ, ಯಾವುದೇ ಕ್ರಮ ಕೈಗೊಳ್ಳದೆ ಅದನ್ನು ಮುಚ್ಚಿಹಾಕಲಾಯಿತು ಎಂದು ಅವರು ಉಲ್ಲೇಖಿಸಿದರು.