ಶಬರಿಮಲೆ ಅಯ್ಯಪ್ಪನ ದರ್ಶನ ಪಡೆದ ರಾಷ್ಟ್ರಪತಿ ದ್ರೌಪದಿ ಮುರ್ಮು

ರಾಷ್ಟ್ರಪತಿ ದ್ರೌಪದಿ ಮುರ್ಮು ಬುಧವಾರ (ಅಕ್ಟೋಬರ್ 22) ಕೇರಳದ ಶಬರಿಮಲೆಯಲ್ಲಿರುವ ಅಯ್ಯಪ್ಪ ಸ್ವಾಮಿ ದೇವಸ್ಥಾನದಲ್ಲಿ ಪ್ರಾರ್ಥನೆ ಸಲ್ಲಿಸಿದರು, ಈ ಮೂಲಕ ಶಬರಿಮಲೆ ದೇವಾಲಯಕ್ಕೆ ಭೇಟಿ ನೀಡಿದ ಮೊದಲ ಮಹಿಳಾ ರಾಷ್ಟ್ರಪತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಅವರು ದೇವಾಲಯಕ್ಕೆ ಭೇಟಿ ನೀಡಿದ ಎರಡನೇ ರಾಷ್ಟ್ರಪತಿ, ಈ ಮೊದಲು 1970 ರ ದಶಕದಲ್ಲಿ ವಿ. ವಿ. ಗಿರಿ ಭೇಟಿ ನೀಡಿ ಬೆಟ್ಟದ ಮೇಲಿರುವ ದೇವಾಲಯಕ್ಕೆ ಡೋಲಿ (ವಯೋವೃದ್ಧರು, ಅಂಗವಿಕಲರು ಬಿದಿರಿನ ಬೊಂಬುಗಳಿಂದ ವಿಶೇಷವಾಗಿ ಸಿದ್ಧಪಡಿಸಲಾಗಿರುವ ಆಸನ. ಆ ಡೋಲಿಯನ್ನು ನಾಲ್ವರು ಹೊತ್ತು ಬೆಟ್ಟವೇರುತ್ತಾರೆ)ಯಲ್ಲಿ ಪ್ರಯಾಣಿಸಿದ್ದರು.

ಮುರ್ಮು ಅವರ ಇರುಮುಡಿ ಕಟ್ಟು

ರಾಷ್ಟ್ರಪತಿ ಬುಧವಾರ ಬೆಳಿಗ್ಗೆ 11 ಗಂಟೆ ಸುಮಾರಿಗೆ ವಿಶೇಷ ಬೆಂಗಾವಲು ಪಡೆಯಲ್ಲಿ ಪಂಪಾ ನದಿ ತೀರಕ್ಕೆ ಆಗಮಿಸಿದರು, ಅಲ್ಲಿ ಅವರು ಪಂಪಾ ನದಿಯಲ್ಲಿ ತಮ್ಮ ಪಾದಗಳನ್ನು ತೊಳೆದು ಗಣಪತಿ ದೇವಾಲಯ ಸೇರಿದಂತೆ ಹತ್ತಿರದ ದೇವಾಲಯಗಳಲ್ಲಿ ಪ್ರಾರ್ಥನೆ ಸಲ್ಲಿಸಿದರು.

ಕೆತ್ತುನೀರ ಮಂಟಪದಲ್ಲಿ, ಗಣಪತಿ ದೇವಾಲಯದ ಮುಖ್ಯ ಅರ್ಚಕ ವಿಷ್ಣು ನಂಬೂದಿರಿ ಅವರು 'ಕೆತ್ತುನೀರ ಮಂಟಪ'ದಲ್ಲಿ ತಮ್ಮ ಪವಿತ್ರ ಕಟ್ಟು ಅಥವಾ ಇರುಮುಡಿಕಟ್ಟು ತುಂಬಿದರು.

ಕಪ್ಪು ಸೀರೆಯನ್ನು ಧರಿಸಿದ್ದ ರಾಷ್ಟ್ರಪತಿಗಳು, ಅವರ ಎಡಿಸಿ ಸೌರಭ್ ಎಸ್ ನಾಯರ್, ಪಿಎಸ್ಒ ವಿನಯ್ ಮಾಥುರ್ ಮತ್ತು ಗಣೇಶ್ ಚಂದ್ರ ಹೊಂಬ್ರಾಮ್ ಕೂಡ ಇದ್ದರು, ಅವರೆಲ್ಲರೂ ತಮ್ಮ ಪವಿತ್ರ ಕಟ್ಟುಗಳನ್ನು ಸ್ವೀಕರಿಸಿದರು ಎಂದು ಜಿಲ್ಲಾ ಅಧಿಕಾರಿಗಳು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ದೇವಾಲಯದ ಬಳಿಯ ಕಲ್ಲಿನ ಗೋಡೆಗೆ ತೆಂಗಿನಕಾಯಿ ಎಸೆಯುವ ಆಚರಣೆಯನ್ನು ಮಾಡಿ 4.5 ಕಿ. ಮೀಟರ್‌ ಉದ್ದದ ಸ್ವಾಮಿ ಅಯ್ಯಪ್ಪ ರಸ್ತೆ ಮತ್ತು ಭಗವಾನ್ ಅಯ್ಯಪ್ಪ ದೇವಾಲಯಕ್ಕೆ ಸಾಂಪ್ರದಾಯಿಕ ಪಾದಯಾತ್ರೆಯ ಮಾರ್ಗದಲ್ಲಿ ಸನ್ನಿಧಾನಕ್ಕೆ ತೆರಳಿದರು.

ಸನ್ನಿಧಾನಂನಲ್ಲಿ ದರ್ಶನ

ಸನ್ನಿಧಾನಂನಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಗರ್ಭಗುಡಿಗೆ ಹೋಗುವ 18 ಪವಿತ್ರ ಮೆಟ್ಟಿಲುಗಳನ್ನು ಹತ್ತಿದರು, ಅಲ್ಲಿ ಅವರನ್ನು ದೇವಸ್ವಂ ಸಚಿವ ವಿ. ಎನ್. ವಾಸವನ್ ಮತ್ತು ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ಅಧ್ಯಕ್ಷ ಪಿ. ಎಸ್. ಪ್ರಶಾಂತ್ ಬರಮಾಡಿಕೊಂಡರು. ದೇವಾಲಯದ ತಂತ್ರಿ ಮಹೇಶ್ ಮೋಹನರು ಅವರನ್ನು ಪೂರ್ಣ ಕುಂಭದೊಂದಿಗೆ ಸ್ವಾಗತಿಸಿದರು.

ದೇವಾಲಯದಲ್ಲಿ, ಅವರು ತಮ್ಮ ತಲೆಯ ಮೇಲೆ ಇರುಮುಡಿಕಟ್ಟು ಹೊತ್ತು ಅಯ್ಯಪ್ಪ ದೇವರ ದರ್ಶನ ಮಾಡಿದರು. ರಾಷ್ಟ್ರಪತಿ ಮತ್ತು ಅವರ ತಂಡವು ತಮ್ಮ ಪವಿತ್ರ ಕಟ್ಟುಗಳನ್ನು ದೇವಾಲಯದ ಮೆಟ್ಟಿಲುಗಳ ಮೇಲೆ ಇರಿಸಿ ನಂತರ ದೇವಾಲಯದ ಮೇಲ್ಶಾಂತಿ ಪೂಜೆಗಾಗಿ ಪವಿತ್ರ ಕಟ್ಟುಗಳನ್ನು ತೆಗೆದುಕೊಂಡರು.

ಮಲಿಕಪ್ಪುರಂ ಸೇರಿದಂತೆ ಪಕ್ಕದ ದೇವಾಲಯಗಳಲ್ಲಿ ಪ್ರಾರ್ಥನೆಗಳನ್ನು ಮುಗಿಸಿದ ನಂತರ, ರಾಷ್ಟ್ರಪತಿ ಊಟ ಮತ್ತು ವಿಶ್ರಾಂತಿಗಾಗಿ ಟಿಡಿಬಿ ಅತಿಥಿಗೃಹಕ್ಕೆ ಮರಳಿದರು. ರಾಷ್ಟ್ರಪತಿ ಭೇಟಿಯ ಸಮಯದಲ್ಲಿ, ಭಕ್ತರ ದರ್ಶನಕ್ಕೆ ನಿರ್ಬಂಧಗಳನ್ನು ವಿಧಿಸಲಾಗಿದೆ ಎಂದು ಟಿಡಿಬಿ ಅಧಿಕಾರಿಗಳು ತಿಳಿಸಿದ್ದಾರೆ.

ಕೇರಳಕ್ಕೆ ನಾಲ್ಕು ದಿನಗಳ ಅಧಿಕೃತ ಭೇಟಿ

ರಾಷ್ಟ್ರಪತಿ ಮುರ್ಮು ಪ್ರಮದಂನಲ್ಲಿರುವ ರಾಜೀವ್ ಗಾಂಧಿ ಒಳಾಂಗಣ ಕ್ರೀಡಾಂಗಣದಿಂದ ರಸ್ತೆ ಮೂಲಕ ಪಂಪಾಗೆ ಆಗಮಿಸಿದರು, ಅಲ್ಲಿ ಅವರ ಹೆಲಿಕಾಪ್ಟರ್ ಬೆಳಿಗ್ಗೆ 8.40 ಕ್ಕೆ ಇಳಿಯಿತು. ಅವರನ್ನು ಸಚಿವ ವಾಸವನ್, ಪಟ್ಟನಂತಿಟ್ಟ ಸಂಸದ ಆಂಟೋ ಆಂಟನಿ ಮತ್ತು ಇತರ ಹಿರಿಯ ಅಧಿಕಾರಿಗಳು ಬರಮಾಡಿಕೊಂಡರು.

ಅವರ ಬೆಂಗಾವಲು ಪಡೆ ತಿರುವನಂತಪುರದ ರಾಜಭವನದಿಂದ ಬೆಳಿಗ್ಗೆ 7.25 ಕ್ಕೆ ವಿಮಾನ ನಿಲ್ದಾಣಕ್ಕೆ ಹೊರಟಿತ್ತು. ಶಬರಿಮಲೆ ಭೇಟಿಯ ನಂತರ, ಅವರು ಸಂಜೆ ಕೇರಳ ರಾಜಧಾನಿಗೆ ಹಿಂತಿರುಗಲಿದ್ದಾರೆ.

ರಾಷ್ಟ್ರಪತಿ ದ್ರೌಪದಿ ಮುರ್ಮು ನಾಲ್ಕು ದಿನಗಳ ಅಧಿಕೃತ ಭೇಟಿಗಾಗಿ ಮಂಗಳವಾರ (ಅಕ್ಟೋಬರ್ 21) ಸಂಜೆ ತಿರುವನಂತಪುರಂಗೆ ಆಗಮಿಸಿದ್ದರು. ವಿಮಾನ ನಿಲ್ದಾಣದಲ್ಲಿ ಅವರನ್ನು ರಾಜ್ಯಪಾಲ ರಾಜೇಂದ್ರ ವಿಶ್ವನಾಥ್ ಅರ್ಲೇಕರ್, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್, ಇತರ ಗಣ್ಯರು ಮತ್ತು ರಾಜ್ಯದ ಹಿರಿಯ ಅಧಿಕಾರಿಗಳು ಸ್ವಾಗತಿಸಿದ್ದರು.

ರಾಷ್ಟ್ರಪತಿಗಳ ಸಾರ್ವಜನಿಕ ಕಾರ್ಯಕ್ರಮಗಳು

ಗುರುವಾರ (ಅ. 23) ರಾಷ್ಟ್ರಪತಿ ಮುರ್ಮು ರಾಜಭವನದಲ್ಲಿ ಮಾಜಿ ರಾಷ್ಟ್ರಪತಿ ಕೆ.ಆರ್. ನಾರಾಯಣನ್ ಅವರ ಪ್ರತಿಮೆಯನ್ನು ಅನಾವರಣಗೊಳಿಸಲಿದ್ದಾರೆ. ನಂತರ, ಅವರು ವರ್ಕಲಾದ ಶಿವಗಿರಿ ಮಠದಲ್ಲಿ ಶ್ರೀ ನಾರಾಯಣ ಗುರುಗಳ ಮಹಾಸಮಾಧಿ ಶತಮಾನೋತ್ಸವ ಆಚರಣೆಯನ್ನು ಉದ್ಘಾಟಿಸಲಿದ್ದಾರೆ ಮತ್ತು ಕೊಟ್ಟಾಯಂ ಜಿಲ್ಲೆಯ ಪಾಲಾದ ಸೇಂಟ್ ಥಾಮಸ್ ಕಾಲೇಜಿನ ಪ್ಲಾಟಿನಂ ಮಹೋತ್ಸವ ಆಚರಣೆಯ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಲಿದ್ದಾರೆ.

ಅ. 24 ರಂದು ಎರ್ನಾಕುಲಂನಲ್ಲಿರುವ ಸೇಂಟ್ ತೆರೇಸಾ ಕಾಲೇಜಿನ ಶತಮಾನೋತ್ಸವ ಸಮಾರಂಭದಲ್ಲಿ ಭಾಗವಹಿಸುವ ಮೂಲಕ ರಾಷ್ಟ್ರಪತಿಗಳು ತಮ್ಮ ಕೇರಳ ಭೇಟಿಯನ್ನು ಮುಕ್ತಾಯಗೊಳಿಸಲಿದ್ದಾರೆ.