ಪುರಿ ಜಗನ್ನಾಥ ರಥಯಾತ್ರೆ ದುರಂತ: ಜನಸಂದಣಿಯಲ್ಲಿ ಸಿಲುಕಿ ಮೂವರು ಸಾವು, ಹಲವರಿಗೆ ಗಾಯ

ಒಡಿಶಾದ ಪುರಿಯಲ್ಲಿ ಜಗನ್ನಾಥ ರಥಯಾತ್ರೆಯ ಸಂಭ್ರಮದ ವೇಳೆ ಹೃದಯ ವಿದ್ರಾವಕ ಘಟನೆ ಸಂಭವಿಸಿದೆ. ಜೂನ್ 29ರಂದು ಬೆಳಗಿನ ಜಾವ 4 ಗಂಟೆ ಸುಮಾರಿಗೆ ಶ್ರೀ ಗುಂಡಿಚಾ ದೇವಸ್ಥಾನದ ಬಳಿ ಜನಸಂದಣಿಯಲ್ಲಿ ಸಿಲುಕಿ ಮೂವರು ಭಕ್ತರು ಸಾವನ್ನಪ್ಪಿದ್ದಾರೆ. ಈ ದುರಂತದಲ್ಲಿ 50ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದು, ಅವರಲ್ಲಿ ಆರು ಜನರ ಸ್ಥಿತಿ ಗಂಭೀರವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪುರಿ ಜಿಲ್ಲಾಧಿಕಾರಿ ಸಿದ್ಧಾರ್ಥ್ ಎಸ್. ಸ್ವೈನ್ ನೀಡಿರುವ ಮಾಹಿತಿ ಪ್ರಕಾರ, ಶ್ರೀ ಜಗನ್ನಾಥ, ಶ್ರೀ ಬಲಭದ್ರ ಮತ್ತು ದೇವಿ ಸುಭದ್ರಾ ದೇವರ ರಥಗಳು ಗುಂಡಿಚಾ ದೇವಸ್ಥಾನದ ಬಳಿ ನಿಂತಿದ್ದಾಗ ಸಾವಿರಾರು ಭಕ್ತರು ಜಮಾಯಿಸಿದ್ದರು. ರಥಯಾತ್ರೆಯು ಶ್ರೀ ಜಗನ್ನಾಥ ದೇವಸ್ಥಾನದಿಂದ ಗುಂಡಿಚಾ ದೇವಸ್ಥಾನಕ್ಕೆ ದೇವತೆಗಳನ್ನು ಕೊಂಡೊಯ್ಯುವ ಪ್ರಮುಖ ಆಚರಣೆಯಾಗಿದೆ, ದೇವರು ಅಲ್ಲಿ ಅವರು ಏಳು ದಿನಗಳ ಕಾಲ ನೆಲೆಸುತ್ತಾರೆ.

ನೂಕುನುಗ್ಗಲಿನಲ್ಲಿ ಗಾಯಗೊಂಡವರನ್ನು ತಕ್ಷಣ ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸಾವನ್ನಪ್ಪಿದವರನ್ನು ಬೋಲಗಢದ ಬಸಂತಿ ಸಾಹು, ಬಾಲಿಪಟ್ನಾದ ಪ್ರೇಮಕಾಂತ್ ಮೊಹಂತಿ ಮತ್ತು ಪ್ರವತಿ ದಾಸ್ ಎಂದು ಗುರುತಿಸಲಾಗಿದೆ. ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಘಟನೆಗೆ ಸಂಬಂಧಿಸಿದಂತೆ ತನಿಖೆ ನಡೆಯುತ್ತಿದೆ.

ಆರೋಪಗಳು

ಸ್ಥಳೀಯ ಮಾಧ್ಯಮಗಳ ವರದಿಗಳ ಪ್ರಕಾರ, ಭಕ್ತರು ರಥಗಳ ಸುತ್ತಲೂ ನೆರೆದಿದ್ದಾಗ, 'ಚರಮಾಲ' (ದೇವರನ್ನು ರಥಕ್ಕೆ ಒಯ್ಯಲು ಬಳಸುವ ಮರದ ಮೆಟ್ಟಿಲುಗಳು) ಹೊತ್ತುಕೊಂಡು ಎರಡು ಟ್ರಕ್‌ಗಳು ಆಗಮಿಸಿವೆ. ಇದು ಜನರಲ್ಲಿ ಗೊಂದಲ ಮತ್ತು ಭೀತಿಗೆ ಕಾರಣವಾಗಿದೆ. 'ಪಾಹುಡ' ಆಚರಣೆಯು ಬೆಳಗಿನ 12:30ಕ್ಕೆ ಕೊನೆಗೊಂಡ ನಂತರ, ದೇವರ ದರ್ಶನವು 3:45ಕ್ಕೆ ಪುನರಾರಂಭವಾಯಿತು. ಈ ಸಮಯದಲ್ಲಿ ಜನಸಂದಣಿ ಅನಿರೀಕ್ಷಿತವಾಗಿ ಹೆಚ್ಚಾಗಿ, ಈ ದುರಂತಕ್ಕೆ ಕಾರಣವಾಯಿತು ಎನ್ನಲಾಗಿದೆ.

ಕೆಲವು ಪ್ರತ್ಯಕ್ಷದರ್ಶಿಗಳು ಘಟನಾ ಸ್ಥಳದಲ್ಲಿ ಜನಸಂದಣಿಯನ್ನು ನಿಯಂತ್ರಿಸಲು ಯಾವುದೇ ಸೂಕ್ತ ಪೊಲೀಸ್ ವ್ಯವಸ್ಥೆ ಇರಲಿಲ್ಲ ಎಂದು ಆರೋಪಿಸಿದ್ದಾರೆ. ಈ ಕುರಿತು ಹೆಚ್ಚಿನ ತನಿಖೆ ನಡೆಯುತ್ತಿದೆ.