ಅಕ್ರಮವಾಗಿ ನುಸುಳುವವರಿಗೆ ಕೆಂಪು ಹಾಸು ಹಾಸಲಾಗದು: ಸುಪ್ರೀಂ ಕೋರ್ಟ್ ಖಡಕ್ ಮಾತು
ಐವರು ರೋಹಿಂಗ್ಯಾ ನಿರಾಶ್ರಿತರ ಪತ್ತೆ ಕೋರಿ ಸಲ್ಲಿಸಲಾದ ಹೇಬಿಯಸ್ ಕಾರ್ಪಸ್ ಅರ್ಜಿಯನ್ನು ವಿಚಾರಣೆ ನಡೆಸುವಾಗ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರ ನೇತೃತ್ವದ ಪೀಠ ಈ ರೀತಿ ತರಾಟೆಗೆ ತೆಗೆದುಕೊಂಡಿತು .
"ದೇಶದೊಳಗೆ ಅಕ್ರಮವಾಗಿ ನುಸುಳುವವರಿಗೆ ನಾವು ಕೆಂಪು ಹಾಸು (ರೆಡ್ ಕಾರ್ಪೆಟ್) ಹಾಸಿ ಸ್ವಾಗತಿಸಲು ಸಾಧ್ಯವಿಲ್ಲ," ಎಂದು ಸುಪ್ರೀಂ ಕೋರ್ಟ್ ಮಂಗಳವಾರ ಕಟುವಾಗಿ ನುಡಿದಿದೆ. ಐವರು ರೋಹಿಂಗ್ಯಾ ನಿರಾಶ್ರಿತರ ಪತ್ತೆ ಕೋರಿ ಸಲ್ಲಿಸಲಾದ ಹೇಬಿಯಸ್ ಕಾರ್ಪಸ್ ಅರ್ಜಿಯನ್ನು ವಿಚಾರಣೆ ನಡೆಸುವಾಗ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರ ನೇತೃತ್ವದ ಪೀಠ ಈ ರೀತಿ ತರಾಟೆಗೆ ತೆಗೆದುಕೊಂಡಿತು .
"ಬೇಲಿ ಕತ್ತರಿಸಿಯೋ ಅಥವಾ ಸುರಂಗದ ಮೂಲಕವೋ ದೇಶದೊಳಗೆ ಅಕ್ರಮವಾಗಿ ನುಗ್ಗಿ, ನಂತರ ಇಲ್ಲಿಗೆ ಬಂದ ಮೇಲೆ ತಮಗೆ ಆಹಾರ, ಮಕ್ಕಳ ಹಕ್ಕುಗಳು ಸೇರಿದಂತೆ ಎಲ್ಲಾ ಸೌಲಭ್ಯಗಳು ಬೇಕು ಎಂದು ಕೇಳುತ್ತೀರಿ. ನಮ್ಮ ದೇಶದಲ್ಲೂ ಬಡ ಜನರಿದ್ದಾರೆ. ಅವರಿಗೆ ಸಿಗಬೇಕಾದ ಸೌಲಭ್ಯಗಳನ್ನು ನಾವು ಇತರರಿಗೆ ನೀಡಬೇಕೇ?" ಎಂದು ಪೀಠ ಪ್ರಶ್ನಿಸಿತು .
ಏನಿದು ಪ್ರಕರಣ?
ಐವರು ರೋಹಿಂಗ್ಯಾ ನಿರಾಶ್ರಿತರು ಕಸ್ಟಡಿಯಲ್ಲಿದ್ದಾಗ ನಾಪತ್ತೆಯಾಗಿದ್ದಾರೆ ಎಂದು ಆರೋಪಿಸಿ ವಕೀಲ ಜೆ. ಜೋ ಆಂಟನ್ ಬೆನ್ನೊ ಅವರು ಹೇಬಿಯಸ್ ಕಾರ್ಪಸ್ (ಬಂಧಿಖಾನೆ ಹಾಜರಾತಿ) ಅರ್ಜಿ ಸಲ್ಲಿಸಿದ್ದರು. "ನಾವು ಗಡಿಪಾರು ಮಾಡುವುದನ್ನು ವಿರೋಧಿಸುತ್ತಿಲ್ಲ, ಆದರೆ ಅವರು ಕಸ್ಟಡಿಯಲ್ಲಿದ್ದಾಗ ಕಾಣೆಯಾಗಿರುವುದೇ ನಮ್ಮ ಚಿಂತೆ. ಸರಿಯಾದ ಕಾನೂನು ಪ್ರಕ್ರಿಯೆ ಇಲ್ಲದೆ ಅವರನ್ನು ವಾಪಸ್ ಕಳುಹಿಸುವುದು ಸರಿಯಲ್ಲ," ಎಂದು ವಕೀಲರು ವಾದಿಸಿದರು .
ನ್ಯಾಯಾಲಯದ ಆಕ್ಷೇಪ
ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿಗಳು, "ನಿಮಗೆ ಇಲ್ಲಿ ಉಳಿಯಲು ಯಾವುದೇ ಕಾನೂನುಬದ್ಧ ಸ್ಥಾನಮಾನವಿಲ್ಲ. ನಮ್ಮ ಈಶಾನ್ಯ ಗಡಿ ಅತ್ಯಂತ ಸೂಕ್ಷ್ಮವಾಗಿದೆ ಎಂಬುದು ನಿಮಗೂ ತಿಳಿದಿದೆ. ಕಾನೂನಿನ ಅಡಿಯಲ್ಲಿ ಒಬ್ಬ ಒಳನುಸುಳುಕೋರ ಸಿಕ್ಕಿಬಿದ್ದಾಗ, ನಾವು ಅವರಿಗಾಗಿ ವಿಶೇಷ ಆತಿಥ್ಯ ನೀಡಬೇಕೆಂದು ಬಯಸುತ್ತೀರಾ?" ಎಂದು ಕೇಳಿದರು .
"ಕಾನೂನು ಎಲ್ಲರಿಗೂ ಒಂದೇ. ಒಂದು ದೇಶದ ಜನರಿಗೆ ಒಂದು ನಿಯಮ, ಮತ್ತೊಂದು ದೇಶದವರಿಗೆ ಬೇರೆ ನಿಯಮ ಮಾಡಲು ಸಾಧ್ಯವಿಲ್ಲ. ನಾವು ಒಂದು ಗುಂಪಿಗೆ ಅನುಮತಿ ನೀಡಿದರೆ, ಅದು ಇತರರಿಗೂ ಅನ್ವಯವಾಗಬೇಕಾಗುತ್ತದೆ," ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿತು .
ಮುಂದಿನ ನಡೆ
ಸಾಮಾಜಿಕ ಕಳಕಳಿಯ ಹೆಸರಿನಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬರು ಪಿಐಎಲ್ (ಸಾರ್ವಜನಿಕ ಹಿತಾಸಕ್ತಿ ಅರ್ಜಿ) ಸಲ್ಲಿಸಿ, ಗಡಿಪಾರು ಆದೇಶಗಳು ಮತ್ತು ರಾಯಭಾರ ಕಚೇರಿಗಳೊಂದಿಗಿನ ಸಂವಹನದ ಮಾಹಿತಿಯನ್ನು ಕೇಳುತ್ತಿದ್ದಾರೆ ಎಂದು ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಆಕ್ಷೇಪ ವ್ಯಕ್ತಪಡಿಸಿದರು. ಅಂತಿಮವಾಗಿ, ಈ ಅರ್ಜಿಯನ್ನು ಇತರ ಸಂಬಂಧಿತ ಅರ್ಜಿಗಳೊಂದಿಗೆ ಸೇರಿಸಿ ಜನವರಿಯಲ್ಲಿ ವಿಚಾರಣೆ ನಡೆಸುವುದಾಗಿ ನ್ಯಾಯಾಲಯ ತಿಳಿಸಿತು
