ರಾಷ್ಟ್ರೀಯತೆ ಬೇರೆ, ರಾಷ್ಟ್ರೀಯವಾದ ಬೇರೆ; ಭಾರತದಲ್ಲಿ ರಾಷ್ಟ್ರೀಯವಾದ ಸಮಸ್ಯೆಯಲ್ಲ: ಮೋಹನ್ ಭಾಗವತ್

ಭಾರತೀಯರ 'ರಾಷ್ಟ್ರ' ಪರಿಕಲ್ಪನೆ ಪಾಶ್ಚಿಮಾತ್ಯರ ಕಲ್ಪನೆಗಿಂತ ಸಂಪೂರ್ಣ ಭಿನ್ನ. ಭಾರತದಲ್ಲಿ 'ರಾಷ್ಟ್ರೀಯವಾದ' ಒಂದು ಸಮಸ್ಯೆಯೇ ಅಲ್ಲ. ನಾವು ನಂಬುವುದು 'ರಾಷ್ಟ್ರೀಯತೆ'ಯನ್ನೇ ಹೊರತು 'ರಾಷ್ಟ್ರೀಯವಾದ'ವನ್ನಲ್ಲ," ಎಂದು ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಹೇಳಿದ್ದಾರೆ.

ನಾಗ್ಪುರದಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ಪಾಶ್ಚಿಮಾತ್ಯ ರಾಷ್ಟ್ರಗಳು ಮತ್ತು ಭಾರತದ ನಡುವಿನ ಸಾಂಸ್ಕೃತಿಕ ಮತ್ತು ತಾತ್ವಿಕ ಭಿನ್ನಾಭಿಪ್ರಾಯಗಳನ್ನು ಅವರು ಇದೇ ಸಂದರ್ಭದಲ್ಲಿ ಹೇಳಿದರು.

"ನಮಗೆ ಯಾರೊಂದಿಗೂ ತಕರಾರು ಇಲ್ಲ. ನಾವು ವಿವಾದಗಳಿಂದ ದೂರವಿರುತ್ತೇವೆ. ಜಗಳ ಅಥವಾ ವಿವಾದ ಮಾಡುವುದು ಭಾರತೀಯರ ಸ್ವಭಾವವಲ್ಲ. ನಾವೆಲ್ಲರೂ ಒಟ್ಟಾಗಿ ಪ್ರಗತಿ ಹೊಂದುವುದು ನಮ್ಮ ಸಂಸ್ಕೃತಿ," ಎಂದು ಭಾಗವತ್ ಹೇಳಿದರು. ಪಾಶ್ಚಿಮಾತ್ಯ ರಾಷ್ಟ್ರಗಳ ಇತಿಹಾಸ ಸಂಘರ್ಷಗಳಿಂದ ಕೂಡಿದೆ, ಆದರೆ ಭಾರತದ ಇತಿಹಾಸ ಸಹಬಾಳ್ವೆ ಮತ್ತು ಭ್ರಾತೃತ್ವದ ತಳಹದಿಯ ಮೇಲೆ ನಿಂತಿದೆ ಎಂದು ಅವರು ಅಭಿಪ್ರಾಯಪಟ್ಟರು.

'ರಾಷ್ಟ್ರ' ಮತ್ತು 'ನೇಷನ್' ನಡುವಿನ ವ್ಯತ್ಯಾಸ

ಪಾಶ್ಚಿಮಾತ್ಯರಿಗೆ ನಮ್ಮ 'ರಾಷ್ಟ್ರ'ದ ಪರಿಕಲ್ಪನೆ ಅರ್ಥವಾಗುವುದಿಲ್ಲ. ಅವರು ಅದನ್ನು 'ನ್ಯಾಷನಲಿಸಂ' ಎಂದು ಕರೆಯುತ್ತಾರೆ. ಆದರೆ ನಮ್ಮದು ಪುರಾತನ ಕಾಲದಿಂದಲೂ ಅಸ್ತಿತ್ವದಲ್ಲಿರುವ 'ರಾಷ್ಟ್ರ'. ಇಲ್ಲಿ ರಾಷ್ಟ್ರದ ಬಗ್ಗೆ ಯಾರಿಗೂ ಭಿನ್ನಾಭಿಪ್ರಾಯವಿಲ್ಲ. ಅತಿಯಾದ ರಾಷ್ಟ್ರದ ಬಗೆಗಿನ ಹೆಮ್ಮೆ (ಅಹಂಕಾರ) ಎರಡು ಮಹಾಯುದ್ಧಗಳಿಗೆ ಕಾರಣವಾಯಿತು. ಇದೇ ಕಾರಣಕ್ಕೆ ಕೆಲವರು 'ನ್ಯಾಷನಲಿಸಂ' ಎಂಬ ಪದಕ್ಕೆ ಹೆದರುತ್ತಾರೆ. ಆದರೆ ನಮ್ಮದು ಅಹಂಕಾರದಿಂದ ಹುಟ್ಟಿದ ರಾಷ್ಟ್ರವಲ್ಲ, ಬದಲಿಗೆ ತ್ಯಾಗ ಮತ್ತು ಸಹಬಾಳ್ವೆಯಿಂದ ರೂಪುಗೊಂಡ ರಾಷ್ಟ್ರ ಎಂದು ಭಾಗವತ್ ವಿಶ್ಲೇಷಿಸಿದರು.

'ಇಸಂ'ಗಳ ಹಣೆಪಟ್ಟಿ

"ಪಾಶ್ಚಿಮಾತ್ಯರು ಒಮ್ಮೆ ಒಂದು ಅಭಿಪ್ರಾಯಕ್ಕೆ ಬಂದರೆ, ಅದಕ್ಕೆ ಹೊರತಾದ ಬೇರೆ ಯಾವುದೇ ಆಲೋಚನೆಗಳನ್ನು ಒಪ್ಪಿಕೊಳ್ಳುವುದಿಲ್ಲ. ಅವರು ಬೇರೆ ಆಲೋಚನೆಗಳಿಗೆ ಬಾಗಿಲು ಮುಚ್ಚುತ್ತಾರೆ ಮತ್ತು ಅದಕ್ಕೊಂದು 'ಇಸಂ' (ವಾದ) ಎಂಬ ಹಣೆಪಟ್ಟಿ ಕಟ್ಟುತ್ತಾರೆ. ಆದರೆ ಭಾರತೀಯ ಸಂಸ್ಕೃತಿ ಹಾಗಲ್ಲ, ನಾವು ಎಲ್ಲವನ್ನೂ ಸ್ವೀಕರಿಸುತ್ತೇವೆ," ಎಂದು ಅವರು ಪಾಶ್ಚಿಮಾತ್ಯ ಚಿಂತನಾ ಕ್ರಮವನ್ನು ಟೀಕಿಸಿದರು.

ಜ್ಞಾನ ಮತ್ತು ವಿವೇಕ ಮುಖ್ಯ

ಮಾಹಿತಿಗಿಂತ (Information) ವಿವೇಕ (Wisdom) ಮತ್ತು ಪ್ರಾಯೋಗಿಕ ಜ್ಞಾನ ಮುಖ್ಯ. ತಾತ್ಕಾಲಿಕ ಯಶಸ್ಸಿಗಿಂತ, ಇತರರಿಗೆ ಸಹಾಯ ಮಾಡುವುದರಿಂದ ಸಿಗುವ ತೃಪ್ತಿ ಶಾಶ್ವತ ಎಂದು ಭಾಗವತ್ ಯುವಜನತೆಗೆ ಕಿವಿಮಾತು ಹೇಳಿದರು.