ಬಾಹ್ಯಾಕಾಶ ನಿಲ್ದಾಣ ತಲುಪಿದ ನಾಸಾದ ಕ್ರ್ಯೂ-10; ಗಗನಯಾತ್ರಿಗಳನ್ನು ಸ್ವಾಗತಿಸಿದ ಸುನೀತಾ. ಬುಚ್ ವಿಲ್ಮೋರ್

ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಮತ್ತು ಉದ್ಯಮಿ ಎಲಾನ್ ಮಸ್ಕ್ ಅವರ ಸ್ಪೇಸ್ ಎಕ್ಸ್ ಸಂಸ್ಥೆಯು ಉಡಾವಣೆ ಮಾಡಿದ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆ (ಕ್ರ್ಯೂ-10) ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ಐಎಸ್ಎಸ್)ಗೆ ಯಶಸ್ವಿಯಾಗಿ ತಲುಪಿದೆ. ಭಾರತೀಯ ಸಮಯದ ಪ್ರಕಾರ ಭಾನುವಾರ ಬೆಳಗ್ಗೆ 9:34 ಗಂಟೆಗೆ ಡಾಕಿಂಗ್ ಪ್ರಕ್ರಿಯೆ ಪೂರ್ಣಗೊಂಡಿದೆ. ಸ್ಟಾರ್​ಲೈನರ್ ಕ್ಯಾಪ್ಸೂಲ್​ನ ತಾಂತ್ರಿಕ ಸಮಸ್ಯೆಯಿಂದಾಗಿ ಕಳೆದ 9 ತಿಂಗಳಿಂದ ಬಾಹ್ಯಾಕಾಶದಲ್ಲಿ ಸಿಲುಕಿದ್ದ ಗಗನಯಾತ್ರಿಗಳಾದ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಅವರನ್ನು ಈ ನೌಕೆ ಮರಳಿ ಭೂಮಿಗೆ ಕರೆತರಲಿದೆ.

ಕ್ರ್ಯೂ-10 ನೌಕೆಯಲ್ಲಿ ನಾಲ್ವರು ಗಗನಯಾತ್ರಿಗಳು ಪ್ರಯಾಣಿಸಿದ್ದು, ಇವರು ಕೆಲವು ದಿನಗಳ ಕಾಲ ಐಎಸ್ಎಸ್​​ನಲ್ಲಿ ಇರಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಅವರು ಬಾಹ್ಯಾಕಾಶ ನಿಲ್ದಾಣ ತಲುಪಿದ ನಂತರ, ಅಲ್ಲಿದ್ದ ಸುನೀತಾ ವಿಲಿಯಮ್ಸ್ ಮತ್ತು ಇತರ ಗಗನಯಾತ್ರಿಗಳು ಅವರನ್ನು ಸಂತೋಷದಿಂದ ಸ್ವಾಗತಿಸಿದ್ದಾರೆ.

ನಾಸಾದ ಫ್ಲೋರಿಡಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ಸ್ಪೇಸ್ ಎಕ್ಸ್​ನ ಫಾಲ್ಕನ್ 9 ರಾಕೆಟ್ ನಾಲ್ಕು ಗಗನಯಾತ್ರಿಗಳನ್ನು ಹೊತ್ತು ಶುಕ್ರವಾರ ರಾತ್ರಿ ಆಕಾಶಕ್ಕೆ ಚಿಮ್ಮಿತು. ಮಾರ್ಚ್ 16ರ ಬೆಳಗ್ಗೆ 9:35 ಗಂಟೆಗೆ ಐಎಸ್ಎಸ್​​ನಲ್ಲಿ ಯಶಸ್ವಿಯಾಗಿ ಇಳಿದ ನಂತರ, ನೌಕೆಯ ಸಾಮರ್ಥ್ವವನ್ನು ಪರೀಕ್ಷೆ ಮಾಡಲಾಗಿದೆ. ಭಾರತೀಯ ಸಮಯದ ಪ್ರಕಾರ ಬೆಳಗ್ಗೆ 11:05 ಗಂಟೆಗೆ ನೌಕೆಯ ಬಾಗಿಲನ್ನು ತೆರೆಯಲಾಯಿತು. ನಂತರ ಹೊಸ ಗಗನಯಾತ್ರಿಗಳು ಬಾಹ್ಯಾಕಾಶ ನಿಲ್ದಾಣವನ್ನು ಪ್ರವೇಶಿಸಿ, ಸುನೀತಾ ವಿಲಿಯಮ್ಸ್, ವಿಲ್ಮೋರ್ ಮತ್ತು ಎಕ್ಸ್ಪೆಡಿಷನ್ 72 ತಂಡದ ಇತರ ಸದಸ್ಯರನ್ನು ಭೇಟಿಯಾದರು.

ಸ್ಪೇಸ್ ಎಕ್ಸ್​ನ ಫಾಲ್ಕನ್ 9 ರಾಕೆಟ್​ನಲ್ಲಿ ನಾಲ್ವರು ಗಗನಯಾತ್ರಿಗಳು ಪ್ರಯಾಣಿಸಿದ್ದಾರೆ. ರಷ್ಯಾದ ರೋಸ್ಕೋಸ್ಮೋಸ್​​ನ ಮಿಷನ್ ಸ್ಪೆಷಲಿಸ್ಟ್ ಕಿರಿಲ್ ಪೆಸ್ಕೊವ್, ಅಮೆರಿಕದ ಪೈಲಟ್ ನಿಕೋಲ್ ಅಯರ್ಸ್, ಕಮಾಂಡರ್ ಅನ್ನೆ ಮೆಕ್ಲೈನ್ ಮತ್ತು ಜಪಾನ್​​ ಜಾಕ್ಸಾದ ಮಿಷನ್ ಸ್ಪೆಷಲಿಸ್ಟ್ ಟಕುಯಾ ಒನಿಶಿ ಈ ಗಗನ ಯಾತ್ರಿಗಳು.

ಈಗ ಐಎಸ್ಎಸ್ ತಲುಪಿದ ಅಮೆರಿಕ, ರಷ್ಯಾ ಮತ್ತು ಜಪಾನ್​ನ ನಾಲ್ವರು ಗಗನಯಾತ್ರಿಗಳು ಮುಂದಿನ ಕೆಲವು ದಿನಗಳ ಕಾಲ ಬಾಹ್ಯಾಕಾಶ ನಿಲ್ದಾಣದಲ್ಲಿ ಇದ್ದು ಕಾರ್ಯಾಚರಣೆಗಳನ್ನು ಕಲಿಯಲಿದ್ದಾರೆ. ನಂತರ ಅವರನ್ನು ಭೂಮಿಗೆ ಮರಳಬಹುದು.

ಕ್ರ್ಯೂ-10 ತಂಡವು ಬಾಹ್ಯಾಕಾಶ ನಿಲ್ದಾಣದಲ್ಲಿ ಆರು ತಿಂಗಳ ಕಾಲ ಇರಲಿದೆ ಎಂದು ನಿರೀಕ್ಷಿಸಲಾಗಿದೆ. ಸುನೀತಾ ವಿಲಿಯಮ್ಸ್ ಮತ್ತು ವಿಲ್ಮೋರ್ ಅವರನ್ನು ಸೇರಿಸಿದರೆ, ಐಎಸ್ಎಸ್​ನಲ್ಲಿ ಈಗ ಒಟ್ಟು ಗಗನಯಾತ್ರಿಗಳ ಸಂಖ್ಯೆ 11 ಆಗಿದೆ.

ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಯಾವಾಗ ಭೂಮಿಗೆ ಮರಳುತ್ತಾರೆ?

9 ತಿಂಗಳ ಕಾಲ ಬಾಹ್ಯಾಕಾಶದಲ್ಲಿದ್ದ ಸುನೀತಾ ವಿಲಿಯಮ್ಸ್ ಮತ್ತು ವಿಲ್ಮೋರ್ ಬುಧವಾರ ಮುಂಜಾನೆ 4 ಗಂಟೆಗೆ (ಭಾರತೀಯ ಸಮಯದ ಪ್ರಕಾರ ಮಧ್ಯಾಹ್ನ 1:30 ಗಂಟೆಗೆ) ಐಎಸ್ಎಸ್ನಿಂದ ಹೊರಡಲಿದ್ದಾರೆ. ಅವರೊಂದಿಗೆ ನಾಸಾ ಗಗನಯಾತ್ರಿ ನಿಕ್ ಹೇಗ್ ಮತ್ತು ರಷ್ಯಾದ ಗಗನಯಾತ್ರಿ ಅಲೆಕ್ಸಾಂಡರ್ ಗೋರ್ಬುನೊವ್ ಕೂಡ ಕ್ರ್ಯೂ ಡ್ರ್ಯಾಗನ್ ನೌಕೆಯಲ್ಲಿ ಭೂಮಿಗೆ ಮರಳಲಿದ್ದಾರೆ ಎಂದು ನಾಸಾ ತಿಳಿಸಿದೆ.