ಗ್ರಾಸ್ರೂಟ್ ಪ್ರಯೋಗಕ್ಕಾಗಿ ಏಮ್ಸ್ ದೆಹಲಿ ರಾಷ್ಟ್ರೀಯ ಸಮನ್ವಯ ಕೇಂದ್ರ ಮತ್ತು ಪ್ರಮುಖ ದಾಖಲಾತಿ ತಾಣವಾಗಿತ್ತು.
ಪಾರ್ಶ್ವವಾಯು ಚಿಕಿತ್ಸೆಗೆ ದೇಶೀಯ 'ಸೂಪರ್ನೋವಾ' ಸ್ಟೆಂಟ್ ಯಶಸ್ವಿ; ರೋಗಿಗಳಿಗೆ ವರದಾನ
ಗ್ರಾಸ್ರೂಟ್' (GRASSROOT) ಎಂದು ಹೆಸರಿಸಲಾದ ಈ ಪರೀಕ್ಷೆಯಲ್ಲಿ, ದೇಶೀಯವಾಗಿ ತಯಾರಾದ 'ಸೂಪರ್ನೋವಾ' (Supernova) ಸ್ಟೆಂಟ್ ಅಂತರರಾಷ್ಟ್ರೀಯ ಗುಣಮಟ್ಟದಷ್ಟೇ ಸುರಕ್ಷಿತ ಮತ್ತು ಪರಿಣಾಮಕಾರಿ ಎಂಬುದು ಸಾಬೀತಾಗಿದೆ.
ಭಾರತೀಯ ವೈದ್ಯಕೀಯ ವಿಜ್ಞಾನ ಸಂಸ್ಥೆ (ಏಮ್ಸ್) ನವದೆಹಲಿಯು ದೇಶದ ವೈದ್ಯಕೀಯ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲೊಂದನ್ನು ಸ್ಥಾಪಿಸಿದೆ. ತೀವ್ರ ಸ್ವರೂಪದ ಪಾರ್ಶ್ವವಾಯು (Stroke) ಚಿಕಿತ್ಸೆಗಾಗಿ ಭಾರತದಲ್ಲೇ ಅಭಿವೃದ್ಧಿಪಡಿಸಲಾದ ಅತ್ಯಾಧುನಿಕ ಮೆದುಳಿನ ಸ್ಟೆಂಟ್ ಒಂದರ ಪ್ರಥಮ ಕ್ಲಿನಿಕಲ್ ಟ್ರಯಲ್ ಅನ್ನು ಏಮ್ಸ್ ಯಶಸ್ವಿಯಾಗಿ ಪೂರೈಸಿದೆ. '
ಗ್ರಾಸ್ರೂಟ್' (GRASSROOT) ಎಂದು ಹೆಸರಿಸಲಾದ ಈ ಪರೀಕ್ಷೆಯಲ್ಲಿ, ದೇಶೀಯವಾಗಿ ತಯಾರಾದ 'ಸೂಪರ್ನೋವಾ' (Supernova) ಸ್ಟೆಂಟ್ ಅಂತರರಾಷ್ಟ್ರೀಯ ಗುಣಮಟ್ಟದಷ್ಟೇ ಸುರಕ್ಷಿತ ಮತ್ತು ಪರಿಣಾಮಕಾರಿ ಎಂಬುದು ಸಾಬೀತಾಗಿದೆ. ಈ ಬೆಳವಣಿಗೆಯಿಂದಾಗಿ ಲಕ್ಷಾಂತರ ಭಾರತೀಯ ರೋಗಿಗಳಿಗೆ ಕಡಿಮೆ ವೆಚ್ಚದಲ್ಲಿ ಗುಣಮಟ್ಟದ ಚಿಕಿತ್ಸೆ ಲಭ್ಯವಾಗುವ ಭರವಸೆ ಮೂಡಿದೆ.
ಈ ಕುರಿತು ಮಾಹಿತಿ ನೀಡಿರುವ ಏಮ್ಸ್ ಅಧಿಕಾರಿಗಳು, ಈ ಪ್ರಯೋಗದ ಫಲಿತಾಂಶಗಳನ್ನು ಪ್ರತಿಷ್ಠಿತ ಬ್ರಿಟಿಷ್ ಮೆಡಿಕಲ್ ಜರ್ನಲ್ ಸಮೂಹದ 'ಜರ್ನಲ್ ಆಫ್ ನ್ಯೂರೋಇಂಟರ್ವೆನ್ಷನಲ್ ಸರ್ಜರಿ'ಯಲ್ಲಿ (JNIS) ಪ್ರಕಟಿಸಲಾಗಿದೆ ಎಂದು ತಿಳಿಸಿದ್ದಾರೆ. ಏಮ್ಸ್ ನವದೆಹಲಿಯು ಈ ಮಹತ್ವದ ಟ್ರಯಲ್ನ ರಾಷ್ಟ್ರೀಯ ಸಂಯೋಜನಾ ಕೇಂದ್ರವಾಗಿ ಕಾರ್ಯನಿರ್ವಹಿಸಿದೆ. ಈ ಬಗ್ಗೆ ಹರ್ಷ ವ್ಯಕ್ತಪಡಿಸಿರುವ ಏಮ್ಸ್ನ ನ್ಯೂರೋಇಮೇಜಿಂಗ್ ಮತ್ತು ಇಂಟರ್ವೆನ್ಷನಲ್ ನ್ಯೂರೋರೇಡಿಯಾಲಜಿ ವಿಭಾಗದ ಮುಖ್ಯಸ್ಥ ಡಾ. ಶೈಲೇಶ್ ಬಿ. ಗಾಯಕ್ವಾಡ್, "ಇದು ಭಾರತದ ಪಾರ್ಶ್ವವಾಯು ಚಿಕಿತ್ಸಾ ಕ್ಷೇತ್ರದಲ್ಲಿ ಒಂದು ನಿರ್ಣಾಯಕ ತಿರುವು. ದೇಶೀಯ ಕ್ಲಿನಿಕಲ್ ಟ್ರಯಲ್ ಆಧಾರದ ಮೇಲೆ ಅನುಮೋದನೆ ಪಡೆದ ಭಾರತದ ಮೊದಲ ಸ್ಟ್ರೋಕ್ ಚಿಕಿತ್ಸಾ ಸಾಧನ ಇದಾಗಿದೆ," ಎಂದು ಬಣ್ಣಿಸಿದ್ದಾರೆ.
ಮೇಕ್ ಇನ್ ಇಂಡಿಯಾ ಪರಿಕಲ್ಪನೆ
ಈಗಾಗಲೇ 'ಗ್ರಾಸ್ರೂಟ್' ಟ್ರಯಲ್ನ ದತ್ತಾಂಶಗಳನ್ನು ಪರಿಶೀಲಿಸಿದ ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ (CDSCO), ಈ ವರ್ಷದ ಆರಂಭದಲ್ಲಿಯೇ 'ಸೂಪರ್ನೋವಾ' ಸ್ಟೆಂಟ್ ಬಳಕೆಗೆ ಹಸಿರು ನಿಶಾನೆ ತೋರಿದೆ. 'ಗ್ರಾವಿಟಿ ಮೆಡಿಕಲ್ ಟೆಕ್ನಾಲಜಿ' ಸಂಸ್ಥೆ ಅಭಿವೃದ್ಧಿಪಡಿಸಿರುವ ಈ ಸ್ಟೆಂಟ್, ಪ್ರಧಾನಿ ನರೇಂದ್ರ ಮೋದಿಯವರ 'ಮೇಕ್ ಇನ್ ಇಂಡಿಯಾ' ಪರಿಕಲ್ಪನೆಗೆ ಬಲ ತುಂಬಿದೆ. ಎಂಟು ಕೇಂದ್ರಗಳಲ್ಲಿ ನಡೆದ ಈ ಪರೀಕ್ಷೆಯು ಭಾರತವು ಜಾಗತಿಕ ಮಟ್ಟದ ವೈದ್ಯಕೀಯ ಪ್ರಯೋಗಗಳನ್ನು ವಿನ್ಯಾಸಗೊಳಿಸಿ, ನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ ಎಂಬುದನ್ನು ಜಗತ್ತಿಗೆ ತೋರಿಸಿಕೊಟ್ಟಿದೆ ಎಂದು ಗ್ರಾವಿಟಿ ಮೆಡಿಕಲ್ ಟೆಕ್ನಾಲಜಿಯ ಮುಖ್ಯ ತಾಂತ್ರಿಕ ಅಧಿಕಾರಿ ಡಾ. ಶಾಶ್ವತ್ ಎಂ. ದೇಸಾಯಿ ಅಭಿಪ್ರಾಯಪಟ್ಟಿದ್ದಾರೆ.
ಪಾಶ್ಚಿಮಾತ್ಯ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಚಿಕ್ಕ ವಯಸ್ಸಿನವರಲ್ಲಿಯೇ ಪಾರ್ಶ್ವವಾಯು ಕಾಣಿಸಿಕೊಳ್ಳುವುದು ಹೆಚ್ಚು ಎಂಬ ಆಘಾತಕಾರಿ ಅಂಶವಿದೆ. ಇದನ್ನು ಗಮನದಲ್ಲಿಟ್ಟುಕೊಂಡು, ಭಾರತೀಯ ರೋಗಿಗಳ ದೇಹದಾರ್ಢ್ಯ ಮತ್ತು ಅಗತ್ಯಗಳಿಗೆ ತಕ್ಕಂತೆ ವಿಶೇಷವಾಗಿ ಈ 'ಸೂಪರ್ನೋವಾ' ಸ್ಟೆಂಟ್ ಅನ್ನು ವಿನ್ಯಾಸಗೊಳಿಸಲಾಗಿದೆ. ಈಗಾಗಲೇ ಆಗ್ನೇಯ ಏಷ್ಯಾದಲ್ಲಿ 300ಕ್ಕೂ ಹೆಚ್ಚು ರೋಗಿಗಳಿಗೆ ಈ ಸಾಧನವನ್ನು ಬಳಸಿ ಯಶಸ್ವಿಯಾಗಿ ಚಿಕಿತ್ಸೆ ನೀಡಲಾಗಿದೆ. ಭಾರತದಲ್ಲಿ ಪ್ರತಿ ವರ್ಷ ಸುಮಾರು 1.7 ದಶಲಕ್ಷ (17 ಲಕ್ಷ) ಜನರು ಪಾರ್ಶ್ವವಾಯುವಿಗೆ ತುತ್ತಾಗುತ್ತಿದ್ದು, ಈ ದೇಶೀಯ ಸ್ಟೆಂಟ್ ಲಭ್ಯತೆಯಿಂದಾಗಿ ಅವರಿಗೆ ಕೈಗೆಟುಕುವ ದರದಲ್ಲಿ ಜೀವ ಉಳಿಸುವ ಚಿಕಿತ್ಸೆ ಸಿಗಲಿದೆ ಎಂದು ಜಾಗತಿಕ ಪ್ರಧಾನ ತನಿಖಾಧಿಕಾರಿ ಡಾ. ದಿಲೀಪ್ ಯಾವಗಲ್ ತಿಳಿಸಿದ್ದಾರೆ.
