ಹಣಕಾಸು, ರಿಯಲ್ ಎಸ್ಟೇಟ್, ವೃತ್ತಿಪರ ಸೇವೆಗಳು ಹಾಗೂ ಸಾರ್ವಜನಿಕ ಆಡಳಿತ ಮತ್ತು ರಕ್ಷಣಾ ವಲಯಗಳು ಸ್ಥಿರ ಬೆಲೆಗಳಲ್ಲಿ ಶೇ. 9.9ರಷ್ಟು ಭರ್ಜರಿ ಬೆಳವಣಿಗೆ ಕಾಣುವ ಅಂದಾಜಿದೆ.
ಸೇವೆ, ಉತ್ಪಾದನಾ ವಲಯಕ್ಕೆ ಬಲ; 2026ರ ಆರ್ಥಿಕ ವರ್ಷದಲ್ಲಿ ಜಿಡಿಪಿ ಬೆಳವಣಿಗೆ ಶೇ. 7.4ಕ್ಕೆ ಏರಿಕೆ
ಹಣಕಾಸು, ರಿಯಲ್ ಎಸ್ಟೇಟ್, ವೃತ್ತಿಪರ ಸೇವೆಗಳು ಹಾಗೂ ಸಾರ್ವಜನಿಕ ಆಡಳಿತ ಮತ್ತು ರಕ್ಷಣಾ ವಲಯಗಳು ಸ್ಥಿರ ಬೆಲೆಗಳಲ್ಲಿ ಶೇ. 9.9ರಷ್ಟು ಭರ್ಜರಿ ಬೆಳವಣಿಗೆ ಕಾಣುವ ಅಂದಾಜಿದೆ.
ಉತ್ಪಾದನಾ ಮತ್ತು ಸೇವಾ ವಲಯಗಳ ಚಟುವಟಿಕೆ ಚುರುಕಾಗಿರುವುದರಿಂದ 2025-26ನೇ ಸಾಲಿನಲ್ಲಿ (FY26) ಭಾರತದ ಆರ್ಥಿಕತೆಯು ಶೇ. 7.4ರ ದರದಲ್ಲಿ ಬೆಳವಣಿಗೆ ಕಾಣಲಿದೆ ಎಂದು ಅಂದಾಜಿಸಲಾಗಿದೆ. ಕಳೆದ ಹಣಕಾಸು ವರ್ಷದಲ್ಲಿ ಈ ಪ್ರಮಾಣ ಶೇ. 6.5ರಷ್ಟಿತ್ತು ಎಂದು ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ಬುಧವಾರ (ಜ.7) ಬಿಡುಗಡೆ ಮಾಡಿರುವ ಅಧಿಕೃತ ಅಂಕಿಅಂಶಗಳು ತಿಳಿಸಿವೆ.
ರಾಷ್ಟ್ರೀಯ ಆದಾಯದ ಮೊದಲ ಮುನ್ಸೂಚನೆಗಳ ಪ್ರಕಾರ, ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಉತ್ಪಾದನೆ ಮತ್ತು ನಿರ್ಮಾಣ ವಲಯಗಳೆರಡೂ ಶೇ. 7ರಷ್ಟು ವಿಸ್ತರಣೆಯಾಗುವ ನಿರೀಕ್ಷೆಯಿದೆ. ಒಟ್ಟಾರೆ ಆರ್ಥಿಕ ಪ್ರಗತಿಯಲ್ಲಿ ಸೇವಾ ವಲಯವು ಪ್ರಮುಖ ಚಾಲನಾ ಶಕ್ತಿಯಾಗಿ ಹೊರಹೊಮ್ಮಿದೆ ಎಂದು ಸಚಿವಾಲಯ ಹೇಳಿದೆ. ಒಟ್ಟು ಮೌಲ್ಯವರ್ಧನೆ ಬೆಳವಣಿಗೆ ದರವು ಶೇ. 7.3ರಷ್ಟಿರಲಿದ್ದು, ಇದಕ್ಕೆ ಸೇವಾ ವಲಯದ ಕೊಡುಗೆ ಮಹತ್ವದ್ದಾಗಿದೆ.
ಸೇವಾ ವಲಯದ ಅದ್ಭುತ ಪ್ರಗತಿ
ಹಣಕಾಸು, ರಿಯಲ್ ಎಸ್ಟೇಟ್, ವೃತ್ತಿಪರ ಸೇವೆಗಳು ಹಾಗೂ ಸಾರ್ವಜನಿಕ ಆಡಳಿತ ಮತ್ತು ರಕ್ಷಣಾ ವಲಯಗಳು ಸ್ಥಿರ ಬೆಲೆಗಳಲ್ಲಿ ಶೇ. 9.9ರಷ್ಟು ಭರ್ಜರಿ ಬೆಳವಣಿಗೆ ಕಾಣುವ ಅಂದಾಜಿದೆ. ಇದೇ ವೇಳೆ ವ್ಯಾಪಾರ, ಹೋಟೆಲ್, ಸಾರಿಗೆ, ಸಂವಹನ ಮತ್ತು ಪ್ರಸಾರ ಸೇವೆಗಳು ಶೇ. 7.5ರಷ್ಟು ಪ್ರಗತಿ ದಾಖಲಿಸುವ ನಿರೀಕ್ಷೆಯಿದೆ. ಕೈಗಾರಿಕಾ ಕಾರ್ಯಕ್ಷಮತೆ ಸುಧಾರಿಸಿರುವುದು ಮತ್ತು ಮೂಲಸೌಕರ್ಯಗಳ ಮೇಲಿನ ವೆಚ್ಚ ಮುಂದುವರಿದಿರುವುದರಿಂದ ದ್ವಿತೀಯ ವಲಯವೂ ಆರ್ಥಿಕತೆಗೆ ಅರ್ಥಪೂರ್ಣ ಕೊಡುಗೆ ನೀಡುವ ನಿರೀಕ್ಷೆಯಿದೆ.
ಕೃಷಿ ವಲಯದಲ್ಲಿ ಮಂದಗತಿ
ದ್ವಿತೀಯ ಮತ್ತು ಸೇವಾ ವಲಯಗಳು ವೇಗ ಪಡೆದುಕೊಂಡಿದ್ದರೂ, ಪ್ರಾಥಮಿಕ ವಲಯದ ಬೆಳವಣಿಗೆ ತುಸು ಮಂದಗತಿಯಲ್ಲಿ ಸಾಗುವ ಸಾಧ್ಯತೆಯಿದೆ ಎಂದು ಅಂಕಿಅಂಶಗಳು ಹೇಳುತ್ತಿವೆ. ಕೃಷಿ ಮತ್ತು ಪೂರಕ ಚಟುವಟಿಕೆಗಳು 2025-26ರಲ್ಲಿ ಶೇ. 3.1ರಷ್ಟು ಮಾತ್ರ ವಿಸ್ತರಣೆಯಾಗುವ ಅಂದಾಜಿದೆ. ವಿದ್ಯುತ್, ಅನಿಲ, ನೀರು ಸರಬರಾಜು ಮತ್ತು ಇತರೆ ಉಪಯುಕ್ತ ಸೇವೆಗಳು ಶೇ. 2.1ರಷ್ಟು ಬೆಳವಣಿಗೆ ಕಾಣಲಿವೆ. ಕೈಗಾರಿಕೆ ಮತ್ತು ಸೇವಾ ವಲಯಗಳಿಗೆ ಹೋಲಿಸಿದರೆ ಈ ಕ್ಷೇತ್ರಗಳು ವೇಗವನ್ನು ಕಾಯ್ದುಕೊಳ್ಳುವಲ್ಲಿ ಹಿಂದುಳಿದಿವೆ ಎಂದು ಸಚಿವಾಲಯ ಗಮನಿಸಿದೆ.
ಹೂಡಿಕೆ, ಖಾಸಗಿ ಬಳಕೆಯಲ್ಲಿ ಏರಿಕೆ
ಆರ್ಥಿಕತೆಯ ಬೇಡಿಕೆಯ ವಿಚಾರಕ್ಕೆ ಬರುವುದಾದರೆ, ಖಾಸಗಿ ಬಳಕೆ ಅಥವಾ ಕುಟುಂಬಗಳ ವೆಚ್ಚವು ಸ್ಥಿರವಾಗಿದ್ದು, ಇದು ಆರ್ಥಿಕತೆಗೆ ಬೆಂಬಲ ನೀಡುತ್ತಿದೆ. ನೈಜ ಖಾಸಗಿ ಅಂತಿಮ ಬಳಕೆ ವೆಚ್ಚ ಶೇ. 7ರಷ್ಟು ಹೆಚ್ಚಾಗುವ ಅಂದಾಜಿದೆ. ಹೂಡಿಕೆ ಚಟುವಟಿಕೆಗಳೂ ಕೂಡ ಬಲವಾಗಿದ್ದು, ಒಟ್ಟು ಸ್ಥಿರ ಬಂಡವಾಳ ರಚನೆ ಪ್ರಮಾಣವು ಕಳೆದ ವರ್ಷದ ಶೇ. 7.1ಕ್ಕೆ ಹೋಲಿಸಿದರೆ, ಈ ಬಾರಿ ಶೇ. 7.8ಕ್ಕೆ ಏರಿಕೆಯಾಗುವ ನಿರೀಕ್ಷೆಯಿದೆ.
ಪ್ರಸಕ್ತ ಬೆಲೆಗಳಲ್ಲಿನ ಜಿಡಿಪಿ (ನಾಮಿನಲ್ ಜಿಡಿಪಿ) 2025-26ರಲ್ಲಿ ಶೇ. 8ರಷ್ಟು ಬೆಳವಣಿಗೆಯೊಂದಿಗೆ 357.14 ಲಕ್ಷ ಕೋಟಿ ರೂ.ಗಳಿಗೆ ತಲುಪುವ ಅಂದಾಜಿದೆ. ಕಳೆದ ಆರ್ಥಿಕ ವರ್ಷದಲ್ಲಿ ಇದು 330.68 ಲಕ್ಷ ಕೋಟಿ ರೂ.ಗಳಷ್ಟಿತ್ತು. ಇನ್ನು ತಲಾದಾಯದ (Per capita GDP) ವಿಚಾರದಲ್ಲಿಯೂ ಏರಿಕೆ ಕಂಡುಬಂದಿದ್ದು, ವಾರ್ಷಿಕ ಶೇ. 6.5ರಷ್ಟು ಬೆಳವಣಿಗೆಯೊಂದಿಗೆ ತಲಾದಾಯ 1,42,119 ರೂ.ಗಳಿಗೆ ತಲುಪುವ ಸಾಧ್ಯತೆಯಿದೆ. ರಾಷ್ಟ್ರೀಯ ಖಾತೆಗಳ ಮೂಲ ವರ್ಷವನ್ನು (Base Year) 2011-12ರಿಂದ 2022-23ಕ್ಕೆ ಬದಲಾಯಿಸಲಾಗುತ್ತಿರುವುದರಿಂದ ಈ ಅಂಕಿಅಂಶಗಳಲ್ಲಿ ಪರಿಷ್ಕರಣೆಯಾಗುವ ಸಾಧ್ಯತೆಯಿದೆ ಎಂದು ಸಚಿವಾಲಯ ಎಚ್ಚರಿಸಿದೆ.
