NextGenGST : ಸಾಮಾನ್ಯರ ಮೇಲಿನ ಕರ ಭಾರ ಇಳಿಕೆ; ಆರೋಗ್ಯ, ಶಿಕ್ಷಣಕ್ಕೆ ವಿನಾಯಿತಿ; ಕಾರು, ಸಿಮೆಂಟ್, ಎಸಿ ಅಗ್ಗ

ದೇಶದ ತೆರಿಗೆ ವ್ಯವಸ್ಥೆಯಲ್ಲಿ ಮಹತ್ವದ ಸುಧಾರಣೆಗಳಿಗೆ ನಾಂದಿ ಹಾಡಿರುವ ಕೇಂದ್ರ ಸರ್ಕಾರ, 56ನೇ ಜಿಎಸ್‌ಟಿ ಕೌನ್ಸಿಲ್ ಸಭೆಯಲ್ಲಿ ಸಾಮಾನ್ಯ ನಾಗರಿಕರು, ರೈತರು, ಮತ್ತು ಮಧ್ಯಮ ವರ್ಗದವರನ್ನು ಗಮನದಲ್ಲಿಟ್ಟುಕೊಂಡು ಐತಿಹಾಸಿಕ ತೀರ್ಮಾನಗಳನ್ನು ಕೈಗೊಂಡಿದೆ. ಪ್ರಸ್ತುತ ಇರುವ ನಾಲ್ಕು ಹಂತದ ಜಿಎಸ್‌ಟಿ ವ್ಯವಸ್ಥೆಯನ್ನು (5%, 12%, 18%, 28%) ಸರಳೀಕರಿಸಿ, ಕೇವಲ ಎರಡು ಹಂತದ ತೆರಿಗೆ ರಚನೆಗೆ ಅನುಮೋದನೆ ನೀಡಲಾಗಿದೆ. ಈ ಮೂಲಕ, ಜನಸಾಮಾನ್ಯರ ದೈನಂದಿನ ಬಳಕೆಯ ವಸ್ತುಗಳ ಮೇಲಿನ ತೆರಿಗೆ ಭಾರವನ್ನು ಗಣನೀಯವಾಗಿ ಇಳಿಸಲಾಗಿದೆ.

ಹೊಸ ವ್ಯವಸ್ಥೆಯು ಸೆಪ್ಟೆಂಬರ್ 22, 2025 ರಿಂದ ಜಾರಿಗೆ ಬರಲಿದ್ದು, ಇದು ಪ್ರಧಾನಿ ನರೇಂದ್ರ ಮೋದಿ ಘೋಷಿಸಿದ್ದ "ಮುಂದಿನ ಪೀಳಿಗೆಯ ಜಿಎಸ್‌ಟಿ ಸುಧಾರಣೆ"ಯ ಭಾಗವಾಗಿದೆ.

ಹೊಸ ತೆರಿಗೆ ರಚನೆ: ಸರಳ ತೆರಿಗೆ ವ್ಯವಸ್ಥೆ

ಜಿಎಸ್‌ಟಿ ಕೌನ್ಸಿಲ್, ಪ್ರಸ್ತುತ ಇರುವ ನಾಲ್ಕು ಹಂತದ ತೆರಿಗೆ ವ್ಯವಸ್ಥೆಯನ್ನು ರದ್ದುಪಡಿಸಿ, ನಾಗರಿಕ-ಸ್ನೇಹಿ 'ಸರಳ ತೆರಿಗೆ' ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಇದರ ಅಡಿಯಲ್ಲಿ, ಮೂರು ಪ್ರಮುಖ ದರಗಳು ಇರಲಿವೆ:

1. ಅರ್ಹತಾ ದರ (Merit Rate): 5%

2. ಪ್ರಮಾಣಿತ ದರ (Standard Rate): 18%

3. ಅನರ್ಹತೆಯ ದರ (De-merit Rate): 40% (ಪಾನ್ ಮಸಾಲ, ತಂಪು ಪಾನೀಯಗಳಂತಹ ಆಯ್ದ ವಸ್ತುಗಳಿಗೆ)

ಈ ಬದಲಾವಣೆಯು ತೆರಿಗೆ ವ್ಯವಸ್ಥೆಯನ್ನು ಸರಳಗೊಳಿಸುವುದಲ್ಲದೆ, ದೇಶದ ಆರ್ಥಿಕತೆಗೆ ಹೊಸ ಚೈತನ್ಯ ನೀಡುವ ಗುರಿಯನ್ನು ಹೊಂದಿದೆ.

ಸಾಮಾನ್ಯರಿಗೆ ಸಿಕ್ಕಿದ್ದೇನು? ಯಾವ ವಸ್ತುಗಳು ಅಗ್ಗ, ಯಾವುದು ದುಬಾರಿ?

1. ವಿಮೆ ಮತ್ತು ಆರೋಗ್ಯ ಕ್ಷೇತ್ರ: ಸಂಪೂರ್ಣ ತೆರಿಗೆ ವಿನಾಯಿತಿ

ಸಾರ್ವಜನಿಕರ ಆರೋಗ್ಯ ಮತ್ತು ಆರ್ಥಿಕ ಭದ್ರತೆಗೆ ಹೆಚ್ಚಿನ ಒತ್ತು ನೀಡಿರುವ ಸರ್ಕಾರ, ಎಲ್ಲಾ ರೀತಿಯ ವೈಯಕ್ತಿಕ ಜೀವ ವಿಮೆ (ಟರ್ಮ್, ಯುಲಿಪ್, ಎಂಡೋಮೆಂಟ್) ಮತ್ತು ಆರೋಗ್ಯ ವಿಮೆ (ಫ್ಯಾಮಿಲಿ ಫ್ಲೋಟರ್ ಸೇರಿದಂತೆ) ಪಾಲಿಸಿಗಳಿಗೆ ಸಂಪೂರ್ಣ ಜಿಎಸ್‌ಟಿ ವಿನಾಯಿತಿ ನೀಡಿದೆ. ಇದರಿಂದ ವಿಮಾ ಕಂತುಗಳು ಅಗ್ಗವಾಗಲಿದ್ದು, ದೇಶದಲ್ಲಿ ವಿಮಾ ವ್ಯಾಪ್ತಿಯು ಹೆಚ್ಚಾಗುವ ನಿರೀಕ್ಷೆಯಿದೆ.

ಕ್ಯಾನ್ಸರ್, ಅಪರೂಪದ ಕಾಯಿಲೆಗಳು ಮತ್ತು ಇತರ ಗಂಭೀರ ಕಾಯಿಲೆಗಳ ಚಿಕಿತ್ಸೆಗೆ ಬಳಸುವ 33 ಜೀವರಕ್ಷಕ ಔಷಧಿಗಳ ಮೇಲಿನ ಜಿಎಸ್‌ಟಿಯನ್ನು 12% ರಿಂದ ಶೂನ್ಯಕ್ಕೆ ಇಳಿಸಲಾಗಿದೆ. ಮತ್ತೊಂದು 3 ಔಷಧಿಗಳ ಮೇಲಿನ ತೆರಿಗೆಯನ್ನು 5% ರಿಂದ ಶೂನ್ಯಕ್ಕೆ ಇಳಿಸಲಾಗಿದೆ.

ಉಳಿದ ಎಲ್ಲಾ ಔಷಧಿಗಳ ಮೇಲಿನ ಜಿಎಸ್‌ಟಿಯನ್ನು 12% ರಿಂದ 5%ಕ್ಕೆ ಇಳಿಸಲಾಗಿದೆ.ಅದೇ ರೀತಿ ಗ್ಲುಕೋಮೀಟರ್, ಬ್ಯಾಂಡೇಜ್, ಡಯಾಗ್ನೋಸ್ಟಿಕ್ ಕಿಟ್‌ಗಳು, ಮತ್ತು ಇತರ ವೈದ್ಯಕೀಯ, ಶಸ್ತ್ರಚಿಕಿತ್ಸಾ ಉಪಕರಣಗಳ ಮೇಲಿನ ಜಿಎಸ್‌ಟಿಯನ್ನು 18% ಅಥವಾ 12% ರಿಂದ 5%ಕ್ಕೆ ಇಳಿಸಲಾಗಿದೆ.

2. ದಿನಬಳಕೆಯ ಮತ್ತು ಆಹಾರ ವಸ್ತುಗಳು: ಗಣನೀಯ ಇಳಿಕೆ

ಮಧ್ಯಮ ವರ್ಗದವರ ದೈನಂದಿನ ಜೀವನದ ಮೇಲಿನ ಆರ್ಥಿಕ ಹೊರೆಯನ್ನು ಕಡಿಮೆ ಮಾಡಲು, ಹಲವಾರು ವಸ್ತುಗಳ ಮೇಲಿನ ಜಿಎಸ್‌ಟಿಯನ್ನು 18% ಅಥವಾ 12% ರಿಂದ 5%ಕ್ಕೆ ಇಳಿಸಲಾಗಿದೆ.

ದಿನಬಳಕೆ ವಸ್ತುಗಳಾದ ಹೇರ್ ಆಯಿಲ್, ಟಾಯ್ಲೆಟ್ ಸೋಪ್, ಶಾಂಪೂ, ಟೂತ್‌ಬ್ರಷ್, ಟೂತ್‌ಪೇಸ್ಟ್, ಸೈಕಲ್, ಟೇಬಲ್‌ವೇರ್, ಮತ್ತು ಕಿಚನ್‌ವೇರ್. ಆಹಾರ ಪದಾರ್ಥಗಳಾಗಿರುವ ಪ್ಯಾಕೇಜ್ ಮಾಡಿದ ನಮ್ಕೀನ್, ಭುಜಿಯಾ, ಸಾಸ್, ಪಾಸ್ತಾ, ನೂಡಲ್ಸ್, ಚಾಕೊಲೇಟ್, ಕಾಫಿ, ಬೆಣ್ಣೆ, ತುಪ್ಪ, ಮತ್ತು ಕಾರ್ನ್‌ಫ್ಲೇಕ್ಸ್​ಗಳಿಗೆ 5 ಶೇಕಡಾ ಜಿಎಸ್​ಟಿ ವಿಧಿಸಲಾಗಿದೆ.

ಯುಎಚ್‌ಟಿ ಹಾಲು (UHT milk), ಪ್ಯಾಕ್ ಮಾಡಿದ ಪನೀರ್, ಮತ್ತು ಎಲ್ಲಾ ರೀತಿಯ ಭಾರತೀಯ ಬ್ರೆಡ್‌ಗಳಾದ ಚಪಾತಿ, ರೋಟಿ, ಮತ್ತು ಪರೋಟಗಳ ಮೇಲೆ ಇನ್ನು ಮುಂದೆ ಯಾವುದೇ ಜಿಎಸ್‌ಟಿ ಇರುವುದಿಲ್ಲ.

3. ಶಿಕ್ಷಣ ಕ್ಷೇತ್ರ: ಕಲಿಕೋಪಕರಣಗಳು ಅಗ್ಗ

ವಿದ್ಯಾರ್ಥಿಗಳ ಮೇಲಿನ ಹೊರೆ ಕಡಿಮೆ ಮಾಡಲು, ಶಿಕ್ಷಣಕ್ಕೆ ಸಂಬಂಧಿಸಿದ ಹಲವಾರು ವಸ್ತುಗಳ ಮೇಲಿನ ಜಿಎಸ್‌ಟಿಯನ್ನು ರದ್ದುಪಡಿಸಲಾಗಿದೆ. ಎರೇಸರ್‌ಗಳು, ಪೆನ್ಸಿಲ್ ಶಾರ್ಪನರ್‌ಗಳು, ಪೆನ್ಸಿಲ್‌ಗಳು, ಕ್ರೆಯಾನ್ಸ್, ನೋಟ್‌ಬುಕ್‌ಗಳು ಮತ್ತು ನಕ್ಷೆಗಳ ಮೇಲೆ ಇನ್ನು ಮುಂದೆ ಯಾವುದೇ ಜಿಎಸ್‌ಟಿ ಇರುವುದಿಲ್ಲ. ಅದೇ ರೀತಿ ಮ್ಯಾಥಮೆಟಿಕಲ್ ಬಾಕ್ಸ್ ಮತ್ತು ಜಿಯೊಮೆಟ್ರಿ ಬಾಕ್ಸ್‌ಗಳ ಮೇಲಿನ ತೆರಿಗೆಯನ್ನು 5%ಕ್ಕೆ ಇಳಿಸಲಾಗಿದೆ.

ಆರ್ಥಿಕತೆಗೆ ಉತ್ತೇಜನ: ಪ್ರಮುಖ ವಲಯಗಳಿಗೆ ಬೆಂಬಲ

1. ವಾಹನ ಉದ್ಯಮ (Automobile Sector)

1200cc ವರೆಗಿನ ಪೆಟ್ರೋಲ್ ಕಾರುಗಳು, 1500cc ವರೆಗಿನ ಡೀಸೆಲ್ ಕಾರುಗಳು, ಮತ್ತು 350cc ವರೆಗಿನ ಮೋಟಾರ್‌ಸೈಕಲ್‌ಗಳ ಮೇಲಿನ ಜಿಎಸ್‌ಟಿಯನ್ನು 28% ರಿಂದ 18%ಕ್ಕೆ ಇಳಿಸಲಾಗಿದೆ. ಬಸ್‌ಗಳು, ಟ್ರಕ್‌ಗಳು, ಮತ್ತು ಆಂಬುಲೆನ್ಸ್‌ಗಳ ಮೇಲಿನ ತೆರಿಗೆಯನ್ನೂ 28% ರಿಂದ 18%ಕ್ಕೆ ಇಳಿಸಲಾಗಿದೆ.

ಎಲ್ಲಾ ರೀತಿಯ ಆಟೋಮೊಬೈಲ್​ ಬಿಡಿಭಾಗಗಳ ಮೇಲೆ ಏಕರೂಪವಾಗಿ 18% ಜಿಎಸ್‌ಟಿ ವಿಧಿಸಲಾಗಿದೆ. ಇದೇ ವೇಳೆ 350cc ಗಿಂತ ಹೆಚ್ಚಿನ ಸಾಮರ್ಥ್ಯದ ಮೋಟಾರ್‌ಸೈಕಲ್‌ಗಳು, ದೊಡ್ಡ ಕಾರುಗಳು, ಮತ್ತು ಯಾಚ್‌ಗಳಂತಹ ಐಷಾರಾಮಿ ವಾಹನಗಳನ್ನು 40% ತೆರಿಗೆ ವ್ಯಾಪ್ತಿಗೆ ತರಲಾಗಿದೆ.

2. ನಿರ್ಮಾಣ ಕ್ಷೇತ್ರ (Construction Sector)

ಮನೆ ನಿರ್ಮಾಣದ ಪ್ರಮುಖ ವಸ್ತುವಾದ ಸಿಮೆಂಟ್ ಮೇಲಿನ ಜಿಎಸ್‌ಟಿಯನ್ನು 28% ರಿಂದ 18%ಕ್ಕೆ ಇಳಿಸಿರುವುದು, ನಿರ್ಮಾಣ ವೆಚ್ಚವನ್ನು ಕಡಿಮೆ ಮಾಡಲಿದೆ.

ಕೃಷಿ ಯಂತ್ರೋಪಕರಣಗಳಾದ ಟ್ರ್ಯಾಕ್ಟರ್‌ಗಳು, ಕೃಷಿ, ತೋಟಗಾರಿಕೆ, ಮತ್ತು ಕೊಯ್ಲು ಯಂತ್ರಗಳ ಮೇಲಿನ ಜಿಎಸ್‌ಟಿಯನ್ನು 12% ರಿಂದ 5%ಕ್ಕೆ ಇಳಿಸಲಾಗಿದೆ.

ನವೀಕರಿಸಬಹುದಾದ ಇಂಧನವಾಗಿರುವ ಸೋಲಾರ್ ವಾಟರ್ ಹೀಟರ್, ಸೋಲಾರ್ ಪವರ್ ಜನರೇಟರ್, ಮತ್ತು ಬಯೋ-ಗ್ಯಾಸ್ ಪ್ಲಾಂಟ್‌ಗಳಂತಹ ನವೀಕರಿಸಬಹುದಾದ ಇಂಧನ ಸಾಧನಗಳ ಮೇಲಿನ ತೆರಿಗೆಯನ್ನು 12% ರಿಂದ 5%ಕ್ಕೆ ಇಳಿಸಲಾಗಿದೆ.

3. ಜವಳಿ ಕ್ಷೇತ್ರ (Textile Sector)

ಜವಳಿ ಕ್ಷೇತ್ರದಲ್ಲಿನ ದೀರ್ಘಕಾಲದ ಸಮಸ್ಯೆಯಾಗಿದ್ದ 'ಇನ್ವರ್ಟೆಡ್ ಡ್ಯೂಟಿ ಸ್ಟ್ರಕ್ಚರ್' ಅನ್ನು ಸರಿಪಡಿಸಲು, ಮಾನವ ನಿರ್ಮಿತ ನೂಲು ಮತ್ತು ಫೈಬರ್ ಮೇಲಿನ ಜಿಎಸ್‌ಟಿಯನ್ನು 18% ಮತ್ತು 12% ರಿಂದ 5%ಕ್ಕೆ ಇಳಿಸಲಾಗಿದೆ.

ಸೇವಾ ವಲಯ (Services Sector)

ಹೋಟೆಲ್ ಮತ್ತು ಸೌಂದರ್ಯ ಸೇವೆಗಳಲ್ಲಿ 7,500 ರೂ. ವರೆಗಿನ ಹೋಟೆಲ್ ವಸತಿ ಮತ್ತು ಜಿಮ್, ಸಲೂನ್, ಯೋಗ ಕೇಂದ್ರಗಳಂತಹ ಸೇವೆಗಳ ಮೇಲಿನ ಜಿಎಸ್‌ಟಿಯನ್ನು 18% ರಿಂದ 5%ಕ್ಕೆ ಇಳಿಸಲಾಗಿದೆ.

ಗೂಡ್ಸ್ ಟ್ರಾನ್ಸ್‌ಪೋರ್ಟ್ ಏಜೆನ್ಸಿ (GTA) ಮತ್ತು ಇತರ ಸರಕು ಸಾಗಣೆ ಸೇವೆಗಳ ತೆರಿಗೆ ದರಗಳಲ್ಲೂ ಬದಲಾವಣೆ ಮಾಡಲಾಗಿದೆ.

ವ್ಯಾಪಾರಕ್ಕೆ ಅನುಕೂಲವಾಗುವ ಕ್ರಮಗಳು

ಜಿಎಸ್‌ಟಿ ಮೇಲ್ಮನವಿ ನ್ಯಾಯಮಂಡಳಿ (GSTAT): ವ್ಯಾಪಾರಿಗಳ ದೂರುಗಳನ್ನು ತ್ವರಿತವಾಗಿ ಪರಿಹರಿಸಲು, ಜಿಎಸ್‌ಟಿ ಮೇಲ್ಮನವಿ ನ್ಯಾಯಮಂಡಳಿಯು ಸೆಪ್ಟೆಂಬರ್ ಅಂತ್ಯದೊಳಗೆ ಕಾರ್ಯಾರಂಭ ಮಾಡಲಿದೆ.

ಸರಳೀಕೃತ ನೋಂದಣಿ: ಸಣ್ಣ ಮತ್ತು ಕಡಿಮೆ ಅಪಾಯದ ವ್ಯಾಪಾರಗಳಿಗೆ, ಕೇವಲ ಮೂರು ದಿನಗಳಲ್ಲಿ ಸ್ವಯಂಚಾಲಿತವಾಗಿ ಜಿಎಸ್‌ಟಿ ನೋಂದಣಿ ನೀಡುವ ಹೊಸ ಯೋಜನೆಯನ್ನು ಜಾರಿಗೆ ತರಲಾಗಿದೆ.