ED Raid: ಎಂಪುರಾನ್ ನಿರ್ಮಾಪಕ ಗೋಕುಲಂ ಗೋಪಾಲನ್‌ರ ಮನೆ, ಕಚೇರಿ ಮೇಲೆ ಇಡಿ ದಾಳಿ
ಈ ಶೋಧವು ಚೆನ್ನೈ (ತಮಿಳುನಾಡು) ಮತ್ತು ಕೊಚ್ಚಿ (ಕೇರಳ) ಸೇರಿದಂತೆ ವಿವಿಧ ರಾಜ್ಯಗಳ ಐದು ಸ್ಥಳಗಳಲ್ಲಿ ವಿದೇಶಿ ವಿನಿಮಯ ನಿರ್ವಹಣಾ ಕಾಯಿದೆ (FEMA) ಅಡಿಯಲ್ಲಿ ನಡೆಯುತ್ತಿದೆ.
ಕೇರಳ ಮೂಲದ ಉದ್ಯಮಿ ಮತ್ತು 'L2: ಎಂಪುರಾನ್' ಚಿತ್ರದ ನಿರ್ಮಾಪಕರಲ್ಲಿ ಒಬ್ಬರಾದ ಗೋಕುಲಂ ಗೋಪಾಲನ್ ಅವರಿಗೆ ಸೇರಿರುವ ಚಿಟ್ ಫಂಡ್ ಕಂಪನಿಯಲ್ಲಿ ಶುಕ್ರವಾರ (ಏಪ್ರಿಲ್ 4, 2025) ಜಾರಿ ನಿರ್ದೇಶನಾಲಯ (ಇಡಿ) ಶೋಧ ಕಾರ್ಯಾಚರಣೆ ನಡೆಸಿದೆ. ಈ ದಾಳಿಯು ಸುಮಾರು ₹1,000 ಕೋಟಿ ಮೌಲ್ಯದ ವಿದೇಶಿ ವಿನಿಮಯ ಕಾಯಿದೆ (FEMA) ಉಲ್ಲಂಘನೆ ಪ್ರಕರಣಕ್ಕೆ ಸಂಬಂಧಿಸಿದೆ ಎಂದು ಮೂಲಗಳು ತಿಳಿಸಿವೆ.
ಈ ಶೋಧವು ಚೆನ್ನೈ (ತಮಿಳುನಾಡು) ಮತ್ತು ಕೊಚ್ಚಿ (ಕೇರಳ) ಸೇರಿದಂತೆ ವಿವಿಧ ರಾಜ್ಯಗಳ ಐದು ಸ್ಥಳಗಳಲ್ಲಿ ವಿದೇಶಿ ವಿನಿಮಯ ನಿರ್ವಹಣಾ ಕಾಯಿದೆ (FEMA) ಅಡಿಯಲ್ಲಿ ನಡೆಯುತ್ತಿದೆ. ಗೋಪಾಲನ್ ಮತ್ತು ಅವರ 'ಶ್ರೀ ಗೋಪಾಲನ್ ಚಿಟ್ ಆಂಡ್ ಫೈನಾನ್ಸ್ ಕಂ. ಲಿಮಿಟೆಡ್' ವಿರುದ್ಧ ಕೆಲವು ಎನ್‌ಆರ್‌ಐಗಳು ₹1,000 ಕೋಟಿ ರೂಪಾಯಿ ಅಕ್ರಮಗಳ ವಹಿವಾಟು ನಡೆಸಿರುವ ಆರೋಪವಿದೆ. ಕಂಪನಿಯ ವಿರುದ್ಧದ ಕೆಲವು ವಂಚನೆ ಪ್ರಕರಣಗಳನ್ನೂ ದಾಖಲಿಸಲಾಗಿದೆ.
ಚಿತ್ರದ ಮರು-ಬಿಡುಗಡೆ ಮತ್ತು 24 ಎಡಿಟ್
'ಎಂಪುರಾನ್* ಚಿತ್ರವು ಬಿಡುಗಡೆಯಾದ ನಂತರ ಬಲಪಂಥೀಯ ಸಂಘಟನೆಗಳ ವಿರೋಧಕ್ಕೆ ಕಾರಣವಾಗಿತ್ತು. ಈ ಹಿನ್ನೆಲೆಯಲ್ಲಿ, ಚಿತ್ರದಿಂದ 24 ದೃಶ್ಯಗಳನ್ನು ತೆಗೆದುಹಾಕಲಾಗಿದೆ. ಪ್ರಮುಖ ಖಳನಾಯಕನ ಹೆಸರನ್ನು 'ಬಲರಾಜ್ ಬಜರಂಗಿ' ಎಂಬುದನ್ನು "ಬಲದೇವ್" ಎಂದು ಬದಲಾಯಿಸಲಾಗಿದೆ. ಕೇಂದ್ರ ಸಚಿವ ಸುರೇಶ್ ಗೋಪಿ ಅವರ ಹೆಸರನ್ನು ಸಿನಿಮಾದ 'ಧನ್ಯವಾದ' ವಿಭಾಗದಿಂದ ತೆಗೆದು ಹಾಕಲಾಗಿದೆ.
ಕತ್ತರಿ ಹಾಕಿರುವ ದೃಶ್ಯಗಳಲ್ಲಿ ದೃಶ್ಯಗಳಲ್ಲಿ ಧಾರ್ಮಿಕ ಗುರುತು ಹೊಂದಿರುವ ವಾಹನ ಸಾಗುವ ದೃಶ್ಯ, ಇಬ್ಬರು ಪ್ರಮುಖ ಖಳನಾಯಕರ ನಡುವಿನ ಸಂಭಾಷಣೆಗಳು, ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಉಲ್ಲೇಖಗಳು ಮತ್ತು ಚಿತ್ರದ ಆರಂಭದಲ್ಲಿ ಮಹಿಳೆಯರ ಮೇಲಿನ ಹಿಂಸೆ, ಶವಗಳು ಮತ್ತು ಸಂಘರ್ಷದ ದೃಶ್ಯಗಳು ಸೇರಿವೆ. ಪೃಥ್ವಿರಾಜ್‌ನ ಬಾಲ್ಯದ ಪಾತ್ರವನ್ನು ಚಿತ್ರಿಸುವ ಮಕ್ಕಳ ನಟನ ದೃಶ್ಯ ಮತ್ತು ಆತನ ತಂದೆಯೊಂದಿಗಿನ ಸಂಭಾಷಣೆಯನ್ನೂ ಕತ್ತರಿಸಲಾಗಿದೆ. ಸಚಿವನ ಪಾತ್ರದಲ್ಲಿ ನಟಿಸಿರುವ ನಂದು ಅವರ ಕೆಲವು ಸಂಭಾಷಣೆಗಳನ್ನೂ ತೆಗೆದುಹಾಕಲಾಗಿದೆ.
ನಿರ್ಮಾಪಕರ ಹೇಳಿಕೆ
'ಎಂಪುರಾನ್' ನಿರ್ಮಾಪಕರಾದ ಆಂಟೊನಿ ಪೆರುಂಬಾವೂರ್ ಅವರು ಏಪ್ರಿಲ್ ೧ರಂದು ಕೊಚ್ಚಿಯಲ್ಲಿ ಪತ್ರಕರ್ತರೊಂದಿಗೆ ಮಾತನಾಡಿ, ''ಚಿತ್ರದಿಂದ ಎರಡು ನಿಮಿಷ ಮತ್ತು ಕೆಲವು ಸೆಕೆಂಡ್‌ಗಳಷ್ಟು ದೃಶ್ಯಗಳನ್ನು ತೆಗೆದುಹಾಕಲಾಗಿದೆ. ಹಾಗೆಂದು ಯಾರಿಗೂ ಭಯಪಡುವ ಪ್ರಶ್ನೆಯೇ ಇಲ್ಲ. ನಾವು ಸಮಾಜದಲ್ಲಿ ಬದುಕುತ್ತೇವೆ. ಯಾರ ಭಾವನೆಗಳಿಗೂ ಧಕ್ಕೆ ತರುವ ಉದ್ದೇಶ ನಮಗಿರಲಿಲ್ಲ. ಯಾರಿಗಾದರೂ ಚಿತ್ರದ ಬಗ್ಗೆ ಅಸಮಾಧಾನವಿದ್ದರೆ, ನಿರ್ಮಾಪಕರು, ನಿರ್ದೇಶಕರು ಮತ್ತು ನಟರಾದ ನಾವೆಲ್ಲರೂ ಕಾಳಜಿ ಪರಿಹರಿಸುವ ಜವಾಬ್ದಾರಿ ಹೊಂದಿದ್ದೇವೆ,'' ಎಂದು ಹೇಳಿದ್ದರು.
ಗೋಕುಲಂ ಗೋಪಾಲನ್ ಅವರ ಶ್ರೀ ಗೋಪಾಲನ್ ಚಿಟ್ ಆಂಡ್ ಫೈನಾನ್ಸ್ ಕಂಪನಿಯು ತಮಿಳುನಾಡು, ಕೇರಳ, ತೆಲಂಗಾಣ, ಪುದುಚೇರಿ, ಮಹಾರಾಷ್ಟ್ರ, ದೆಹಲಿ, ಆಂಧ್ರಪ್ರದೇಶ ಮತ್ತು ಹರಿಯಾಣದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಇದಕ್ಕೂ ಮೊದಲು 2017ರಲ್ಲಿ ಆದಾಯ ತೆರಿಗೆ ಇಲಾಖೆಯು ಕಂಪನಿಯ ಮೇಲೆ ತೆರಿಗೆ ವಂಚನೆ ಆರೋಪದಲ್ಲಿ ದಾಳಿ ನಡೆಸಿತ್ತು, ಆಗ ಕಂಪನಿಯು ₹1,107 ಕೋಟಿ ಆದಾಯ ಮರೆಮಾಚಿದೆ ಎಂದು ವರದಿಯಾಗಿತ್ತು.
*ಎಂಪುರಾನ್* ಚಿತ್ರವು ಪೃಥ್ವಿರಾಜ್-ಮೋಹನಲಾಲ್ ತಂಡದ *ಲೂಸಿಫರ್* ಚಿತ್ರದ ಎರಡನೇ ಭಾಗವಾಗಿದ್ದು, ಬಲಪಂಥೀಯ ರಾಜಕೀಯ ಟೀಕೆ ಮತ್ತು 2002ರ ಗುಜರಾತ್ ಗಲಭೆ ಉಲ್ಲೇಖಗಳಿಂದ ವಿವಾದಕ್ಕೆ ಸಿಲುಕಿತ್ತು. ಈ ದಾಳಿಗಳು ಚಿತ್ರದ ವಿವಾದದೊಂದಿಗೆ ಸಂಬಂಧಿಸಿಲ್ಲ ಎಂದು ಇಡಿ ಸ್ಪಷ್ಟಪಡಿಸಿದರೂ, ರಾಜಕೀಯ ಮತ್ತು ಸಾಮಾಜಿಕ ವಲಯಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.
