ಜಿಬಿಎ 5 ಪಾಲಿಕೆಗಳ 369 ವಾರ್ಡ್‌ಗಳ ಅಂತಿಮ ಮೀಸಲಾತಿ ಪಟ್ಟಿ ಪ್ರಕಟ: ಚುನಾವಣೆ ಪ್ರಕ್ರಿಯೆಗೆ ಚಾಲನೆ!

ಬೆಂಗಳೂರು ಮಹಾನಗರದ ರಾಜಕೀಯ ಮತ್ತು ಆಡಳಿತಾತ್ಮಕ ಚಿತ್ರಣವನ್ನು ಬದಲಿಸಲಿರುವ 'ಗ್ರೇಟರ್ ಬೆಂಗಳೂರು' (ಜಿಬಿಎ) ನೂತನ ವ್ಯವಸ್ಥೆಯ ಅಂತಿಮ ಕಸರತ್ತು ಪೂರ್ಣಗೊಂಡಿದೆ. ರಾಜ್ಯ ಸರ್ಕಾರವು ಐದು ಹೊಸ ನಗರ ಪಾಲಿಕೆಗಳ ಒಟ್ಟು 369 ವಾರ್ಡ್‌ಗಳ ಅಂತಿಮ ಮೀಸಲಾತಿ ಪಟ್ಟಿಯನ್ನು ಹೊರಡಿಸುವುದರೊಂದಿಗೆ, ಬಹುದಿನಗಳಿಂದ ಬಾಕಿ ಉಳಿದಿದ್ದ ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಅಧಿಕೃತವಾಗಿ ಮುನ್ನುಡಿ ಬರೆದಿದೆ.

ಈ ಅಧಿಸೂಚನೆಯು ಬೆಂಗಳೂರು ನಗರದ ಆಡಳಿತಾತ್ಮಕ ಸ್ವರೂಪದಲ್ಲಿ ದೊಡ್ಡ ಬದಲಾವಣೆಯನ್ನು ತರಲಿದ್ದು, ವಾರ್ಡ್‌ವಾರು ಕ್ಷೇತ್ರಗಳನ್ನು ಮರು ವಿಂಗಡಿಸಿ, ವರ್ಗವಾರು ಮೀಸಲಾತಿಯನ್ನು ಅಂತಿಮಗೊಳಿಸಲಾಗಿದೆ. ಈ ಪ್ರಕ್ರಿಯೆಯು 2011ರ ಜನಗಣತಿಯ ಆಧಾರದ ಮೇಲೆ ನಡೆದಿದ್ದು, ನಿಯಮಾನುಸಾರ ಈ ಹಿಂದೆಯೇ ಕರಡು ಮೀಸಲಾತಿ ಪಟ್ಟಿಯನ್ನು ಸಾರ್ವಜನಿಕರ ಮಾಹಿತಿಗಾಗಿ ಪ್ರಕಟಿಸಲಾಗಿತ್ತು.

ಜನವರಿ 23 ರವರೆಗೆ ಆಕ್ಷೇಪಣೆ ಸಲ್ಲಿಸಲು ಸಾರ್ವಜನಿಕರಿಗೆ ಕಾಲಾವಕಾಶ ನೀಡಲಾಗಿತ್ತು. ಸ್ವೀಕೃತವಾದ ಸಾವಿರಾರು ಸಲಹೆ ಮತ್ತು ಆಕ್ಷೇಪಣೆಗಳನ್ನು ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿಗಳ ನೇತೃತ್ವದ ಪರಿಶೀಲನಾ ಸಮಿತಿಯು ಕೂಲಂಕಷವಾಗಿ ಪರಿಶೀಲಿಸಿದೆ. ಫೆಬ್ರವರಿ 17 ರಂದು ನಡೆದ ಸಭೆಯಲ್ಲಿ ಆಕ್ಷೇಪಣೆಗಳನ್ನು ಪುರಸ್ಕರಿಸಿ, ಮೀಸಲಾತಿ ಪಟ್ಟಿಯಲ್ಲಿ ಅಗತ್ಯ ಬದಲಾವಣೆಗಳನ್ನು ಮಾಡಿ ಸಮಿತಿಯು ಸರ್ಕಾರಕ್ಕೆ ಶಿಫಾರಸು ಮಾಡಿತ್ತು. ಈ ಶಿಫಾರಸುಗಳನ್ನು ಸರ್ಕಾರವು ಒಪ್ಪಿಕೊಂಡಿದ್ದು, ಈಗ ಅಂತಿಮ ಅಧಿಸೂಚನೆಯನ್ನು ಹೊರಡಿಸಿದೆ.

ಹೇಗಿದೆ ಮೀಸಲಾತಿ ವಿವರಗಳು?

ಬೆಂಗಳೂರು ದಕ್ಷಿಣ ನಗರ ಪಾಲಿಕೆಯ ಒಟ್ಟು 72 ವಾರ್ಡ್‌ಗಳ ಪೈಕಿ 40 ಸ್ಥಾನಗಳನ್ನು ಸಾಮಾನ್ಯ ವರ್ಗಕ್ಕೆ ಮೀಸಲಿಡಲಾಗಿದ್ದು, ಅದರಲ್ಲಿ 20 ಸ್ಥಾನಗಳನ್ನು ಮಹಿಳೆಯರಿಗೆ ನೀಡಲಾಗಿದೆ. ಉಳಿದಂತೆ ಅನುಸೂಚಿತ ಜಾತಿಗೆ 7, ಅನುಸೂಚಿತ ಪಂಗಡಕ್ಕೆ 1, ಹಿಂದುಳಿದ ವರ್ಗ 'ಎ' ಗೆ 19 ಮತ್ತು ಹಿಂದುಳಿದ ವರ್ಗ 'ಬಿ' ಗೆ 5 ಸ್ಥಾನಗಳನ್ನು ಹಂಚಿಕೆ ಮಾಡಲಾಗಿದೆ.

ಬೆಂಗಳೂರು ಉತ್ತರ ನಗರ ಪಾಲಿಕೆಯಲ್ಲೂ 72 ವಾರ್ಡ್‌ಗಳಿದ್ದು, ಇಲ್ಲಿ 37 ಸ್ಥಾನಗಳು ಸಾಮಾನ್ಯ ವರ್ಗಕ್ಕೆ ದೊರೆತಿವೆ. ಅನುಸೂಚಿತ ಜಾತಿಗೆ 9 ಮತ್ತು ಹಿಂದುಳಿದ ವರ್ಗ 'ಎ' ಗೆ 19 ಸ್ಥಾನಗಳನ್ನು ನಿಗದಿಪಡಿಸಲಾಗಿದೆ.ಬೆಂಗಳೂರು ಪೂರ್ವ ನಗರ ಪಾಲಿಕೆಯ 50 ವಾರ್ಡ್‌ಗಳಲ್ಲಿ 25 ಸಾಮಾನ್ಯ ವರ್ಗಕ್ಕೆ, 14 ಅನುಸೂಚಿತ ಜಾತಿಗೆ ಮತ್ತು 7 ಹಿಂದುಳಿದ ವರ್ಗ 'ಎ' ಪ್ರವರ್ಗಕ್ಕೆ ಲಭಿಸಿವೆ.

ಬೆಂಗಳೂರು ಪಶ್ಚಿಮ ನಗರ ಪಾಲಿಕೆಯು ಅತಿ ಹೆಚ್ಚು ಅಂದರೆ 112 ವಾರ್ಡ್‌ಗಳನ್ನು ಹೊಂದಿದ್ದು, ಇಲ್ಲಿ 64 ಸ್ಥಾನಗಳು ಸಾಮಾನ್ಯ ವರ್ಗಕ್ಕೆ ಲಭ್ಯವಾಗಿವೆ. ಈ ಪಾಲಿಕೆಯಲ್ಲಿ ಹಿಂದುಳಿದ ವರ್ಗ 'ಎ' ಗೆ 30 ಮತ್ತು ಅನುಸೂಚಿತ ಜಾತಿಗೆ 9 ಸ್ಥಾನಗಳನ್ನು ಮೀಸಲಿರಿಸಲಾಗಿದೆ.

ಬೆಂಗಳೂರು ಪೂರ್ವ ನಗರ ಪಾಲಿಕೆಯ 50 ವಾರ್ಡ್‌ಗಳಲ್ಲಿ 25 ಸಾಮಾನ್ಯ ವರ್ಗಕ್ಕೆ, 14 ಅನುಸೂಚಿತ ಜಾತಿಗೆ ಮತ್ತು 7 ಹಿಂದುಳಿದ ವರ್ಗ 'ಎ' ಪ್ರವರ್ಗಕ್ಕೆ ಲಭಿಸಿವೆ.

ಇನ್ನು ಬೆಂಗಳೂರು ಕೇಂದ್ರ ನಗರ ಪಾಲಿಕೆಯ 63 ವಾರ್ಡ್‌ಗಳ ಪೈಕಿ 32 ಸಾಮಾನ್ಯ ವರ್ಗಕ್ಕೆ ಹಾಗೂ 15 ಹಿಂದುಳಿದ ವರ್ಗ 'ಎ' ಗೆ ಮೀಸಲಾಗಿವೆ.

ಪ್ರತಿಯೊಂದು ಪಾಲಿಕೆಯಲ್ಲೂ ಮಹಿಳಾ ಮೀಸಲಾತಿಯನ್ನು ಕಟ್ಟುನಿಟ್ಟಾಗಿ ಪಾಲಿಸಲಾಗಿದ್ದು, ಒಟ್ಟು ಸ್ಥಾನಗಳಲ್ಲಿ ಸರಿಸುಮಾರು ಶೇ. 50ರಷ್ಟು ಸ್ಥಾನಗಳನ್ನು ಮಹಿಳೆಯರಿಗಾಗಿ ಕಾಯ್ದಿರಿಸಲಾಗಿದೆ. ಈ ಹೊಸ ವ್ಯವಸ್ಥೆಯು ಬೆಂಗಳೂರು ನಗರದ ವಿವಿಧ ವಿಧಾನಸಭಾ ಕ್ಷೇತ್ರಗಳಾದ ಪದ್ಮನಾಭನಗರ, ಬಿ.ಟಿ.ಎಂ ಲೇಔಟ್, ಯಲಹಂಕ, ಕೆ.ಆರ್. ಪುರಂ ಮತ್ತು ದಾಸರಹಳ್ಳಿ ಸೇರಿದಂತೆ ಇಡೀ ಮಹಾನಗರದ ಆಡಳಿತವನ್ನು ಮತ್ತಷ್ಟು ವಿಕೇಂದ್ರೀಕರಣಗೊಳಿಸಲು ನೆರವಾಗಲಿದೆ.

ಸರ್ಕಾರದ ಈ ಅಂತಿಮ ನಿರ್ಧಾರದೊಂದಿಗೆ, ನಗರದ ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಮಾರ್ಗ ಸುಗಮವಾದಂತಾಗಿದ್ದು, ನಾಗರಿಕರು ತಮ್ಮ ವಾರ್ಡ್‌ಗಳ ಹೊಸ ಮೀಸಲಾತಿಯನ್ನು ಕರ್ನಾಟಕ ರಾಜ್ಯಪತ್ರದ ವಿಶೇಷ ಸಂಚಿಕೆಗಳ ಮೂಲಕ ಪರಿಶೀಲಿಸಬಹುದಾಗಿದೆ.

ಪಶ್ಚಿಮದಲ್ಲೇ ಹೆಚ್ಚು

ಅತಿದೊಡ್ಡ ರಾಜಕೀಯ ಕಣವಾಗಿ ಪಶ್ಚಿಮ ಪಾಲಿಕೆ: ಬೆಂಗಳೂರು ಪಶ್ಚಿಮ ನಗರ ಪಾಲಿಕೆಯು ಒಟ್ಟು 112 ವಾರ್ಡ್‌ಗಳನ್ನು ಹೊಂದುವ ಮೂಲಕ ಚುನಾವಣಾ ಅಖಾಡದಲ್ಲಿ ಅತೀ ಹೆಚ್ಚು ಪ್ರಾಮುಖ್ಯತೆ ಪಡೆದಿದೆ. ಇಲ್ಲಿ 64 ಸಾಮಾನ್ಯ ವರ್ಗದ (General) ಸ್ಥಾನಗಳಿರುವುದು ಆಕಾಂಕ್ಷಿಗಳ ನಡುವೆ ಭಾರಿ ಪೈಪೋಟಿಗೆ ಕಾರಣವಾಗಲಿದೆ. ರಾಜಕೀಯ ಪಕ್ಷಗಳು ಈ ಪಾಲಿಕೆಯನ್ನು ವಶಪಡಿಸಿಕೊಳ್ಳಲು ವಿಶೇಷ ತಂತ್ರಗಾರಿಕೆ ರೂಪಿಸುವುದು ಅನಿವಾರ್ಯವಾಗಿದೆ.

ಮಹಿಳೆಯರೇ ಹೆಚ್ಚು

ಐದು ಪಾಲಿಕೆಗಳಲ್ಲಿ ಸುಮಾರು ಶೇ. 50ರಷ್ಟು ಸ್ಥಾನಗಳನ್ನು ಮಹಿಳೆಯರಿಗೆ ಮೀಸಲಿಡಲಾಗಿದೆ. ಬೆಂಗಳೂರು ದಕ್ಷಿಣದ 72ರಲ್ಲಿ 36 ಮಹಿಳಾ ಮೀಸಲು ಸ್ಥಾನಗಳು, ಬೆಂಗಳೂರು ಉತ್ತರದಲ್ಲಿ 72ರಲ್ಲಿ 34 ಮಹಿಳಾ ಮೀಸಲು ಸ್ಥಾನಗಳಿವೆ. ಬೆಂಗಳೂರು ಪಶ್ಚಿಮದ 112ರಲ್ಲಿ 55 ಮಹಿಳಾ ಮೀಸಲು ಸ್ಥಾನಗಳಿದ್ದು, ಬೆಂಗಳೂರು ಪೂರ್ವದ 50ರಲ್ಲಿ 23 ಮಹಿಳಾ ಮೀಸಲು ಸ್ಥಾನಗಳಿವೆ. ಬೆಂಗಳೂರು ಕೇಂದ್ರದ 63ರಲ್ಲಿ 30 ಮಹಿಳಾ ಮೀಸಲು ಸ್ಥಾನಗಳಿದ್ದು, ಈ ಬೃಹತ್ ಮಹಿಳಾ ಪ್ರಾತಿನಿಧ್ಯವು ಚುನಾವಣಾ ಫಲಿತಾಂಶದ ಮೇಲೆ ದೊಡ್ಡ ಪ್ರಭಾವ ಬೀರಲಿದೆ.

ಸಾಮಾಜಿಕ ವರ್ಗೀಕರಣ ಮತ್ತು ಅಭ್ಯರ್ಥಿಗಳ ಆಯ್ಕೆ

ಹಿಂದುಳಿದ ವರ್ಗಗಳ (OBC) ಮೀಸಲಾತಿಯು ಈ ಬಾರಿ ಅತ್ಯಂತ ವ್ಯವಸ್ಥಿತವಾಗಿ ಹಂಚಿಕೆಯಾಗಿದೆ. ಐದೂ ಪಾಲಿಕೆಗಳ ಒಟ್ಟು 369 ವಾರ್ಡ್‌ಗಳ ಪೈಕಿ ಹಿಂದುಳಿದ ವರ್ಗ 'ಎ' (BC-A) ಪ್ರವರ್ಗಕ್ಕೆ 108 ಸ್ಥಾನಗಳನ್ನು ಮತ್ತು ಹಿಂದುಳಿದ ವರ್ಗ 'ಬಿ' (BC-B) ಪ್ರವರ್ಗಕ್ಕೆ 24 ಸ್ಥಾನಗಳನ್ನು ನೀಡಲಾಗಿದೆ. ಅನುಸೂಚಿತ ಜಾತಿಗೆ (SC) ಒಟ್ಟು 44 ಮತ್ತು ಅನುಸೂಚಿತ ಪಂಗಡಕ್ಕೆ (ST) 7 ಸ್ಥಾನಗಳನ್ನು ಮೀಸಲಿರಿಸಲಾಗಿದೆ. ಪಕ್ಷಗಳು ಈ ಮೀಸಲಾತಿಗನುಗುಣವಾಗಿ ಆಯಾ ಸಮುದಾಯದ ಪ್ರಭಾವಿ ನಾಯಕರನ್ನು ಕಣಕ್ಕಿಳಿಸಲು ಈಗಿನಿಂದಲೇ ತಯಾರಿ ನಡೆಸುತ್ತಿವೆ.

ಹಳೆಯ ವಾರ್ಡ್‌ಗಳ ಸ್ವರೂಪ ಬದಲಾಗಿರುವುದರಿಂದ, ಪ್ರಭಾವಿ ನಾಯಕರು ತಮ್ಮ ಮತದಾರರ ಹಿಡಿತವನ್ನು ಮರುಪರಿಶೀಲಿಸಿಕೊಳ್ಳಬೇಕಾದ ಪರಿಸ್ಥಿತಿ ಬಂದಿದೆ. ಈ ಕ್ಷೇತ್ರ ಪುನರ್ ವಿಂಗಡಣೆಯು ಹೊಸ ಮುಖಗಳಿಗೆ ಚುನಾವಣೆಯಲ್ಲಿ ಅವಕಾಶ ಕಲ್ಪಿಸಿಕೊಡುವ ಸಾಧ್ಯತೆಯಿದೆ. ಜತೆಗೆ ಅಂತಿಮ ಪಟ್ಟಿ ಪ್ರಕಟವಾಗಿರುವುದರಿಂದ, ರಾಜ್ಯ ಚುನಾವಣಾ ಆಯೋಗವು ಯಾವುದೇ ಕ್ಷಣದಲ್ಲಿ ವೇಳಾಪಟ್ಟಿ ಘೋಷಿಸುವ ನಿರೀಕ್ಷೆಯಿದೆ.