ಬೆಂಗಳೂರಿನ ಮೇಖ್ರಿ ವೃತ್ತದಲ್ಲಿ ಸಂಚಾರ ದಟ್ಟಣೆ ನಿವಾರಣೆಗೆ 420 ಕೋಟಿ ರೂ. ವೆಚ್ಚದ ಮೇಲ್ಸೇತುವೆ
ಇತ್ತೀಚೆಗಷ್ಟೇ ಹೆಬ್ಬಾಳ ಮೇಲ್ಸೇತುವೆಯಲ್ಲಿ ಹೊಸ ರ್ಯಾಂಪ್ಗಳನ್ನು ಸಂಚಾರಕ್ಕೆ ಮುಕ್ತಗೊಳಿಸಿದ ಪರಿಣಾಮ, ಮೇಖ್ರಿ ವೃತ್ತದ ಕಡೆಗೆ ಹರಿದುಬರುವ ವಾಹನಗಳ ಸಂಖ್ಯೆ ದಿಢೀರ್ ಏರಿಕೆಯಾಗಿ ಸಂಚಾರ ದಟ್ಟಣೆ ವಿಪರೀತವಾಗಿದೆ.
ರಾಜಧಾನಿಯ ಪ್ರಮುಖ ಮತ್ತು ಸದಾ ವಾಹನ ದಟ್ಟಣೆಯಿಂದ ಕೂಡಿರುವ ಮೇಖ್ರಿ ವೃತ್ತದಲ್ಲಿ ಸಂಚಾರ ದಟ್ಟಣೆಗೆ ಮುಕ್ತಿ ಹಾಡಲು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (BDA) ಮುಂದಾಗಿದೆ. ಸುಮಾರು 420 ಕೋಟಿ ರೂ. ವೆಚ್ಚದಲ್ಲಿ 1.6 ಕಿ.ಮೀ ಉದ್ದದ ನಾಲ್ಕು ಪಥಗಳ (ಫೋರ್ ಲೇನ್) ಮೇಲ್ಸೇತುವೆ (Elevated Flyover) ಹಾಗೂ ರೋಟರಿ ನಿರ್ಮಾಣಕ್ಕಾಗಿ ಬಿಡಿಎ ಟೆಂಡರ್ ಆಹ್ವಾನಿಸಿದೆ. ಮುಂಬರುವ 18 ತಿಂಗಳಲ್ಲಿ ಕಾಮಗಾರಿ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆ.
ಈ ಉದ್ದೇಶಿತ 1.6 ಕಿ.ಮೀ ಮೇಲ್ಸೇತುವೆಯು ಪಶುವೈದ್ಯಕೀಯ ಕಾಲೇಜು ಎದುರಿನ ಕೃಷಿ ವಿಜ್ಞಾನ ವಿಶ್ವವಿದ್ಯಾಲಯದ (UAS) ಸಿಬ್ಬಂದಿ ವಸತಿಗೃಹಗಳ ಬಳಿ ಆರಂಭಗೊಂಡು ಮೇಖ್ರಿ ವೃತ್ತದವರೆಗೆ ಸಾಗಲಿದೆ. ಮೇಖ್ರಿ ವೃತ್ತದಲ್ಲಿ ಎಲಿವೇಟೆಡ್ ರೋಟರಿ ಜಂಕ್ಷನ್ ನಿರ್ಮಾಣವಾಗಲಿದ್ದು, ಇಲ್ಲಿಂದ ಎರಡು 'ಡೌನ್-ರ್ಯಾಂಪ್' ಗಳು ಇರಲಿವೆ. ಒಂದು ರ್ಯಾಂಪ್ ಸಿ.ವಿ. ರಾಮನ್ ರಸ್ತೆಯ ಮೂಲಕ ಯಶವಂತಪುರದ ಕಡೆಗೆ ಹಾಗೂ ಮತ್ತೊಂದು ಜಯಮಹಲ್ ಕಡೆಗೆ ಇಳಿಯಲಿದೆ. ರಮಣ್ ಸಂಶೋಧನಾ ಸಂಸ್ಥೆಯ (RRI) ಗೇಟ್ ಬಳಿ ಸಂಚಾರ ದಟ್ಟಣೆ ಉಂಟಾಗುವ ಆತಂಕ ವ್ಯಕ್ತವಾಗಿದ್ದರಿಂದ, ಯಶವಂತಪುರದ ಕಡೆಗಿನ ಡೌನ್-ರ್ಯಾಂಪ್ ಉದ್ದವನ್ನು ಹೆಚ್ಚಿಸುವ ಮೂಲಕ ವಿನ್ಯಾಸದಲ್ಲಿ ಕೊಂಚ ಬದಲಾವಣೆ ಮಾಡಲಾಗಿದೆ.
ಯೋಜನೆಯ ಅವಶ್ಯಕತೆ ಬಗ್ಗೆ ಚರ್ಚೆ
ಇತ್ತೀಚೆಗಷ್ಟೇ ಹೆಬ್ಬಾಳ ಮೇಲ್ಸೇತುವೆಯಲ್ಲಿ ಹೊಸ ರ್ಯಾಂಪ್ಗಳನ್ನು ಸಂಚಾರಕ್ಕೆ ಮುಕ್ತಗೊಳಿಸಿದ ಪರಿಣಾಮ, ಮೇಖ್ರಿ ವೃತ್ತದ ಕಡೆಗೆ ಹರಿದುಬರುವ ವಾಹನಗಳ ಸಂಖ್ಯೆ ದಿಢೀರ್ ಏರಿಕೆಯಾಗಿ ಸಂಚಾರ ದಟ್ಟಣೆ ವಿಪರೀತವಾಗಿದೆ. ಈ ಸಮಸ್ಯೆಗೆ ಪರಿಹಾರವಾಗಿ ಹಾಗೂ ಭವಿಷ್ಯದಲ್ಲಿ ನಿರ್ಮಾಣವಾಗಲಿರುವ ಹೆಬ್ಬಾಳದಿಂದ ಮೇಖ್ರಿ ವೃತ್ತದವರೆಗಿನ ಟೆನೆಲ್ (ಸುರಂಗ ಮಾರ್ಗ) ಯೋಜನೆಗೆ ಪೂರಕವಾಗಿ ಈ ಮೇಲ್ಸೇತುವೆಯನ್ನು ವಿನ್ಯಾಸಗೊಳಿಸಲಾಗಿದೆ. ಅಲ್ಲದೆ, ಮುಂಬರುವ ಪೂರ್ವ-ಪಶ್ಚಿಮ ಎಲಿವೇಟೆಡ್ ಕಾರಿಡಾರ್ಗೂ ಇದು ಸಂಪರ್ಕ ಕಲ್ಪಿಸುವ ನಿರೀಕ್ಷೆಯಿದೆ.
ಉತ್ತರ ಬೆಂಗಳೂರಿನಲ್ಲಿ ಭವಿಷ್ಯದಲ್ಲಿ ಹೆಚ್ಚಾಗಲಿರುವ ವಿಪರೀತ ವಾಹನ ದಟ್ಟಣೆ ಹಾಗೂ ವಿಮಾನ ನಿಲ್ದಾಣಕ್ಕೆ ಹೋಗುವ ವಾಹನಗಳ ಸಂಖ್ಯೆಯನ್ನು ಗಮನಿಸಿದರೆ, ಕೇವಲ ನಾಲ್ಕು ಪಥದ ಮೇಲ್ಸೇತುವೆ ದೀರ್ಘಕಾಲಿಕ ಪರಿಹಾರ ಒದಗಿಸದಿರಬಹುದು. ಹೀಗಾಗಿ ಇದನ್ನು ಆರು ಪಥಗಳಿಗೆ (ಸಿಕ್ಸ್-ಲೇನ್) ವಿಸ್ತರಿಸುವುದು ಸೂಕ್ತ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
