Animal Attack: "ನಾನು ನಗಬೇಕೆಂದರೆ ಪಶುವೈದ್ಯರಿಗೆ ಭದ್ರತೆ ನೀಡಿ": ಖಂಡ್ರೆ ಮುಂದೆ ಕಣ್ಣೀರಿಟ್ಟ ವೈದ್ಯೆ ಸಮೀಕ್ಷಾ ತಾಯಿ

ಶಿವಮೊಗ್ಗದ ತಾವರೆಕೊಪ್ಪ ಮೃಗಾಲಯದಲ್ಲಿ ನೀರಾನೆ ದಾಳಿಯಿಂದ ಮೃತಪಟ್ಟ ಪಶುವೈದ್ಯೆ ಡಾ. ಸಮೀಕ್ಷಾ ರೆಡ್ಡಿ ಅವರ ತಾಯಿ, ಸಾಂತ್ವನ ಹೇಳಲು ಬಂದ ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರ ಮುಂದೆ ಇತರ ಪಶುವೈದ್ಯರಿಗೆ ಭದ್ರತೆ ಕಲ್ಪಿಸುವಂತೆ ಕಣ್ಣೀರಿಡುತ್ತಾ ಮನವಿ ಮಾಡಿದ್ದಾರೆ. ಮಗಳ ಸಾವಿನ ದುಃಖದ ನಡುವೆಯೂ ಅವರು ತೋರಿದ ಈ ಕಳಕಳಿಗೆ ಸ್ಪಂದಿಸಿದ ಸಚಿವರು, ಅಗತ್ಯ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳುವ ಭರವಸೆ ನೀಡಿದ್ದಾರೆ.

ಶಿವಮೊಗ್ಗ ಜಿಲ್ಲೆಯ ತಾವರೆಕೊಪ್ಪ ಮೃಗಾಲಯದಲ್ಲಿ ನೀರಾನೆ ದಾಳಿಗೆ ತುತ್ತಾಗಿ ಕರ್ತವ್ಯನಿರತ ಪಶುವೈದ್ಯೆ ಡಾ. ಸಮೀಕ್ಷಾ ರೆಡ್ಡಿ ಅವರು ಅಕಾಲಿಕವಾಗಿ ಮೃತಟ್ಟ ಘಟನೆಯು ಜನರನ್ನು ಆಘಾತಕ್ಕೆ ಈಡು ಮಾಡಿದೆ. ಮಗಳ ಅಗಲಿಕೆಯ ಅತೀವ ದುಃಖದಲ್ಲಿದ್ದರೂ, ಡಾ. ಸಮೀಕ್ಷಾ ಅವರ ತಾಯಿ ತೋರಿದ ನಿಸ್ವಾರ್ಥ ಕಾಳಜಿ ಎಲ್ಲರ ಗಮನ ಸೆಳೆದಿದೆ. ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರು ಮೃತಳ ಕುಟುಂಬಕ್ಕೆ ಸಾಂತ್ವನ ಹೇಳಲು ಭೇಟಿ ನೀಡಿದ್ದ ಸಂದರ್ಭದಲ್ಲಿ, ಸಮೀಕ್ಷಾ ಅವರ ತಾಯಿಯು ತಮ್ಮ ವೈಯಕ್ತಿಕ ನೋವನ್ನು ಬದಿಗಿಟ್ಟು ರಾಜ್ಯದ ಇತರ ಪಶುವೈದ್ಯರ ವೃತ್ತಿಪರ ಸುರಕ್ಷತೆಯ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದರು.

ಸಚಿವರ ಮುಂದೆ ಭಾವುಕ ಮನವಿ

ಸಚಿವರ ಬಳಿ ಕಣ್ಣೀರಿಡುತ್ತಲೇ ತಮ್ಮ ಅಳಲನ್ನು ತೋಡಿಕೊಂಡ ಸಮೀಕ್ಷಾ ಅವರ ತಾಯಿ, "ನಾನು ಮತ್ತೆ ನಗಬೇಕೆಂದರೆ, ಮೊದಲು ಉಳಿದ ಪಶುವೈದ್ಯರಿಗೆ ಸೂಕ್ತ ಭದ್ರತೆ ಒದಗಿಸಿ" ಎಂದು ಭಾವುಕವಾಗಿ ಮನವಿ ಮಾಡಿದರು. ಕರ್ತವ್ಯದ ಮೇಲಿರುವ ವೈದ್ಯರಿಗೆ ಇಂತಹ ಘೋರ ದುರ್ಘಟನೆಗಳು ಭವಿಷ್ಯದಲ್ಲಿ ಮರುಕಳಿಸದಂತೆ ಎಚ್ಚರಿಕೆ ವಹಿಸಬೇಕು ಹಾಗೂ ಕಟ್ಟುನಿಟ್ಟಿನ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಅವರು ಆಗ್ರಹಿಸಿದರು. ಮಗಳ ಸಾವಿನ ನೋವಿನಲ್ಲೂ ಇತರರ ಜೀವದ ಬಗ್ಗೆ ಅವರು ತೋರಿದ ಈ ತಾಯ್ತನದ ಕಾಳಜಿಯು ಅಲ್ಲಿ ಸೇರಿದ್ದ ಪ್ರತಿಯೊಬ್ಬರ ಕಣ್ಣಾಲಿಗಳನ್ನು ಒದ್ದೆಯಾಗಿಸಿತು.

ಸರ್ಕಾರದ ಸ್ಪಂದನೆ ಮತ್ತು ಭರವಸೆ

ಸಮೀಕ್ಷಾ ಅವರ ತಾಯಿಯ ಈ ಅರ್ಥಪೂರ್ಣ ಮನವಿಗೆ ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ. ಮೃಗಾಲಯಗಳಲ್ಲಿ ಮತ್ತು ವನ್ಯಜೀವಿ ವಿಭಾಗದಲ್ಲಿ ಕಾರ್ಯನಿರ್ವಹಿಸುವ ಎಲ್ಲಾ ಪಶುವೈದ್ಯರ ಸುರಕ್ಷತೆಗಾಗಿ ಅಗತ್ಯವಿರುವ ಕಟ್ಟುನಿಟ್ಟಿನ ಕ್ರಮಗಳನ್ನು ತಕ್ಷಣವೇ ತೆಗೆದುಕೊಳ್ಳಲಾಗುವುದು ಎಂದು ಅವರು ಭರವಸೆ ನೀಡಿದರು. ಈ ದುರಂತವು ವನ್ಯಜೀವಿ ಪಶುವೈದ್ಯರು ಕರ್ತವ್ಯದ ವೇಳೆ ಎದುರಿಸುವ ಜೀವಬೆದರಿಕೆಗಳನ್ನು ಮತ್ತೊಮ್ಮೆ ಜಗಜ್ಜಾಹೀರು ಮಾಡಿದ್ದು, ಭವಿಷ್ಯದಲ್ಲಿ ಇಂತಹ ಅನಾಹುತಗಳನ್ನು ತಡೆಯಲು ಸರ್ಕಾರ ಗಂಭೀರ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಸಾರ್ವಜನಿಕ ವಲಯದಿಂದಲೂ ತೀವ್ರ ಆಗ್ರಹ ವ್ಯಕ್ತವಾಗಿದೆ.