ಡಿ.ಕೆ. ಶಿವಕುಮಾರ್ ಮುಂದಿರುವ 3 ಮಹಾ ಸವಾಲುಗಳು

ರಾಜ್ಯದ ರಾಜಕೀಯದ ಇತಿಹಾಸದಲ್ಲೇ ಅತ್ಯಂತ ರೋಚಕ ಮತ್ತು ಕುತೂಹಲಕಾರಿ ರಾಜಕೀಯ ಬೆಳವಣಿಗೆಯೊಂದಕ್ಕೆ ಸಿಲಿಕಾನ್ ಸಿಟಿ ಸಾಕ್ಷಿಯಾಗಲು ಕ್ಷಣಗಣನೆ ಆರಂಭವಾಗಿದೆ. ಸುಮಾರು ಮೂರು ದಶಕಗಳ ಸುದೀರ್ಘ ರಾಜಕೀಯ ಪಯಣ, ತಳಮಟ್ಟದಿಂದ ಪಕ್ಷ ಸಂಘಟನೆ, ಜೈಲು ವಾಸ, ತನಿಖಾ ಸಂಸ್ಥೆಗಳ ನಿರಂತರ ವಿಚಾರಣೆ ಹಾಗೂ ಹೈಕಮಾಂಡ್ ಜೊತೆಗಿನ ಅಚಲ ವಿಶ್ವಾಸ... ಇವೆಲ್ಲದರ ಯಶಸ್ವಿ ಹೋರಾಟದ ನಂತರ ಕಾಂಗ್ರೆಸ್‌ನ ʻಟ್ರಬಲ್ ಶೂಟರ್ʼ ಡಿ.ಕೆ. ಶಿವಕುಮಾರ್ ಅವರು ಕೊನೆಗೂ ಕರ್ನಾಟಕದ ಮುಖ್ಯಮಂತ್ರಿಯಾಗಿ ಜೂನ್ 3ರಂದು ಪ್ರಮಾಣವಚನ ಸ್ವೀಕರಿಸಲು ಸಜ್ಜಾಗಿದ್ದಾರೆ.

ಮುಖ್ಯಮಂತ್ರಿ ಕುರ್ಚಿ ಡಿಕೆಶಿಗೆ ಒಲಿದಿರುವುದು ನಿಜವಾದರೂ, ಆ ಮುಳ್ಳಿನ ಹಾಸಿನ ಪೀಠವನ್ನು ಕಾಯ್ದುಕೊಳ್ಳುವುದು ಅಷ್ಟು ಸುಲಭವಲ್ಲ. ಸಿಎಂ ಸ್ಥಾನ ಎನ್ನುವುದು ಕೇವಲ ಅಧಿಕಾರವಲ್ಲ; ಅದು ರಾಜಕೀಯ ಸಮತೋಲನ, ಆಡಳಿತಾತ್ಮಕ ಸಾಮರ್ಥ್ಯ, ಆರ್ಥಿಕ ನಿರ್ವಹಣೆ ಮತ್ತು ಚುನಾವಣಾ ತಂತ್ರಗಳ ಮಹಾ ಸಮ್ಮಿಲನ. ಹಾಗಾದರೆ, ನೂತನ ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಳ್ಳಲಿರುವ ಡಿ.ಕೆ. ಶಿವಕುಮಾರ್ ಅವರ ಮುಂದೆ ನಿಂತಿರುವ ಆ 3 ಮಹಾ ಸವಾಲುಗಳು ಯಾವುವು?

'ಸಕ್ರಿಯ' ಸಿದ್ದರಾಮಯ್ಯ ಮತ್ತು ಅಹಿಂದ ಮತಬ್ಯಾಂಕ್‌ನ ಹಿಡಿತ

ಡಿ.ಕೆ. ಶಿವಕುಮಾರ್ ಎದುರಿಸಲಿರುವ ಅತ್ಯಂತ ಸೂಕ್ಷ್ಮ ಹಾಗೂ ತಕ್ಷಣದ ಸವಾಲೆಂದರೆ ಅದು ನಿರ್ಗಮಿತ ಮುಖ್ಯಮಂತ್ರಿ ಸಿದ್ದರಾಮಯ್ಯ. ಹೈಕಮಾಂಡ್ ಸೂಚನೆಗೆ ಗೌರವ ನೀಡಿ ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿದಿದ್ದಾರಾದರೂ, "ನಾನು ಸಕ್ರಿಯ ರಾಜಕಾರಣದಲ್ಲಿ ಮುಂದುವರಿಯುತ್ತೇನೆ" ಎಂದು ಘೋಷಿಸಿರುವುದು ಹೊಸ ರಾಜಕೀಯ ಚರ್ಚೆಗೆ ನಾಂದಿ ಹಾಡಿದೆ.

ಅಹಿಂದ ಮತಬ್ಯಾಂಕ್ ರಕ್ಷಣೆ

ಸಿದ್ದರಾಮಯ್ಯ ಅವರು ಸಕ್ರಿಯರಾಗಿದ್ದಾರೆ ಎಂದರೆ, ಕರ್ನಾಟಕದ ಬಲಿಷ್ಠ ಮತಬ್ಯಾಂಕ್ ಆಗಿರುವ 'ಅಹಿಂದ' (ಅಲ್ಪಸಂಖ್ಯಾತ, ಹಿಂದುಳಿದ ವರ್ಗ ಮತ್ತು ದಲಿತ) ಸಮುದಾಯಗಳ ಮೇಲಿನ ಅವರ ಹಿಡಿತ ಹಾಗೇ ಇರಲಿದೆ. ಡಿಕೆಶಿ ಅವರು ಸಿದ್ದರಾಮಯ್ಯ ಬಣವನ್ನು ಕಡೆಗಣಿಸಿದರೆ ಈ ಬೃಹತ್ ಮತಬ್ಯಾಂಕ್‌ನ ಅಸಮಾಧಾನ ಎದುರಿಸಬೇಕಾಗುತ್ತದೆ.

ಸಂಪುಟದಲ್ಲಿ ಸಿದ್ದರಾಮಯ್ಯ ಬಣದ ಪ್ರಭಾವ

ಪ್ರಸ್ತುತ ಸಚಿವ ಸಂಪುಟದಲ್ಲಿ ಡಿ.ಕೆ. ಶಿವಕುಮಾರ್ ಬೆಂಬಲಿಗರಷ್ಟೇ ಸಿದ್ದರಾಮಯ್ಯ ಅವರ ಪರಮಾಪ್ತ ಸಚಿವರೂ ಇದ್ದಾರೆ. ಹೀಗಾಗಿ, ಸರ್ಕಾರದಲ್ಲಿ ಯಾವುದೇ ಪ್ರಮುಖ ನೀತಿ ನಿರ್ಧಾರ ಅಥವಾ ಕಡತಗಳಿಗೆ ಅನುಮೋದನೆ ಪಡೆಯಬೇಕಾದರೂ ಸಿದ್ದರಾಮಯ್ಯ ಅವರ ವಿಶ್ವಾಸ ಮತ್ತು ಸಹಮತಿ ಡಿಕೆಶಿ ಅವರಿಗೆ ಅನಿವಾರ್ಯ. ಮುಂಬರುವ ಸಂಪುಟ ಪುನಾರಚನೆ ಅಥವಾ ಪ್ರಮುಖ ಖಾತೆಗಳ ಹಂಚಿಕೆ ವೇಳೆ ಸಿದ್ದರಾಮಯ್ಯ ಬಣವನ್ನು ಅಲಕ್ಷಿಸಿದರೆ ಆಂತರಿಕ ಭಿನ್ನಮತ ಸ್ಫೋಟಗೊಳ್ಳುವ ನೇರ ಅಪಾಯವಿದೆ.

ಜಾತಿಗಣತಿ ವರದಿ

ಸಿದ್ದರಾಮಯ್ಯ ಅವರು ತಾವು ಸಿಎಂ ಕುರ್ಚಿಯಿಂದ ನಿರ್ಗಮಿಸುವ ಕೇವಲ ಒಂದು ದಿನ ಮುಂಚಿತವಾಗಿ 'ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷಾ ವರದಿ'ಯನ್ನು (ಜಾತಿಗಣತಿ) ಅಧಿಕೃತವಾಗಿ ಸ್ವೀಕರಿಸುವ ಮೂಲಕ ಡಿಕೆಶಿ ಮುಂದೆ ದೊಡ್ಡ ಸವಾಲನ್ನೇ ಇಟ್ಟಿದ್ದಾರೆ. ಡಿ.ಕೆ. ಶಿವಕುಮಾರ್ ಪ್ರತಿನಿಧಿಸುವ ಪ್ರಭಾವಿ ಒಕ್ಕಲಿಗ ಸಮುದಾಯವು ಈ ವರದಿಯ ಅಂಕಿ-ಅಂಶಗಳ ಬಗ್ಗೆ ಮೊದಲಿನಿಂದಲೂ ತೀವ್ರ ಅಸಮಾಧಾನ ಹೊಂದಿದ್ದು, ಯಾವುದೇ ಕಾರಣಕ್ಕೂ ಇದನ್ನು ಜಾರಿ ಮಾಡಬಾರದು ಎಂದು ಪಟ್ಟು ಹಿಡಿದಿದೆ.ಒಂದು ವೇಳೆ ನೂತನ ಸಿಎಂ ಆಗಿ ಡಿ.ಕೆ. ಶಿವಕುಮಾರ್ ಈ ವರದಿಯನ್ನು ಜಾರಿಗೊಳಿಸಲು ಮುಂದಾದರೆ ಸ್ವಂತ ಸಮುದಾಯ ಹಾಗೂ ಮಠಾಧೀಶರ ಕೆಂಗಣ್ಣಿಗೆ ಗುರಿಯಾಗಬೇಕಾಗುತ್ತದೆ. ಜಾರಿ ಮಾಡದಿದ್ದರೆ 'ಹಿಂದುಳಿದ ವರ್ಗಗಳ ವಿರೋಧಿ' ಎಂಬ ಹಣೆಪಟ್ಟಿ ಕಟ್ಟಿಕೊಳ್ಳಬೇಕಾಗುತ್ತದೆ. ವರದಿ ಕುರಿತು ಅಸಮಾಧಾನ ಹೊರಹಾಕಿರುವ ಒಕ್ಕಲಿಗ ನಾಯಕರನ್ನು ಸಿದ್ದರಾಮಯ್ಯ ಅವರು ತಮ್ಮ ತಂತ್ರಗಾರಿಕೆಯ ಮೂಲಕ ತಮ್ಮತ್ತ ಸೆಳೆದುಕೊಂಡು, ಆ ಮೂಲಕ ಮುಖ್ಯಮಂತ್ರಿ ಪೀಠದಲ್ಲಿರುವ ಡಿ.ಕೆ. ಶಿವಕುಮಾರ್ ಅವರನ್ನು ಪರೋಕ್ಷವಾಗಿ ನಿಯಂತ್ರಿಸುವ ಸಾಧ್ಯತೆಯನ್ನೂ ತಳ್ಳಿಹಾಕುವಂತಿಲ್ಲ.

2028ರ ಚುನಾವಣೆಯ ರಣತಂತ್ರ

ಡಿ.ಕೆ. ಶಿವಕುಮಾರ್ ಅವರ ರಾಜಕೀಯ ಭವಿಷ್ಯ ಮತ್ತು ಕರ್ನಾಟಕ ಕಾಂಗ್ರೆಸ್ ಸರ್ಕಾರದ ಸುಭದ್ರತೆಯನ್ನು ನಿರ್ಧರಿಸುವ ಎರಡನೇ ಅತಿ ದೊಡ್ಡ ಸವಾಲು ಎಂದರೆ ಅದು 2028ರ ವಿಧಾನಸಭೆ ಚುನಾವಣೆ. ಆಡಳಿತ ವಿರೋಧಿ ಅಲೆಯನ್ನು ಮೀರಿ, ಕಾಂಗ್ರೆಸ್ ಪಕ್ಷವನ್ನು ಸತತ ಎರಡನೇ ಬಾರಿಗೆ ಪೂರ್ಣ ಬಹುಮತದೊಂದಿಗೆ ಅಧಿಕಾರಕ್ಕೆ ತರುವ ಮಹತ್ತರ ಜವಾಬ್ದಾರಿ ಅವರ ಹೆಗಲ ಮೇಲಿದೆ. ಮುಂಬರುವ ಎರಡು ವರ್ಷಗಳು ಡಿ.ಕೆ. ಶಿವಕುಮಾರ್ ಅವರ ಸಾಂಸ್ಥಿಕ ಸಾಮರ್ಥ್ಯ ಮತ್ತು ಚುನಾವಣಾ ಚಾಣಾಕ್ಷತನಕ್ಕೆ ಅತಿ ದೊಡ್ಡ ಪರೀಕ್ಷೆಯಾಗಲಿವೆ.

ಸಾಂಪ್ರದಾಯಿಕ ಮತಬ್ಯಾಂಕ್ ರಕ್ಷಣೆ

ಚುನಾವಣಾ ರಾಜಕೀಯದಲ್ಲಿ ವಿಜಯಯಾತ್ರೆ ಮುಂದುವರಿಸಬೇಕಾದರೆ ಕಾಂಗ್ರೆಸ್ ತನ್ನ ಸಾಂಪ್ರದಾಯಿಕ ಮತಗಳು ಕೈತಪ್ಪಿ ಹೋಗದಂತೆ ನೋಡಿಕೊಳ್ಳಬೇಕಾಗಿದೆ. ಏಕೆಂದರೆ ಬಿಜೆಪಿ ದೇಶಾದ್ಯಂತ ಪ್ರತಿಪಕ್ಷಗಳ ಓಟುಗಳ ಪ್ರಮಾಣ ಕಡಿಮೆ ಮಾಡಲು ವಿಶೇಷ ತಂತ್ರಗಳನ್ನು ಬಳಸುತ್ತಿದ್ದು, ಅದನ್ನೇ ಕರ್ನಾಟಕದಲ್ಲೂ ಬಳಸಲು ಮುಂದಾಗಿದೆ. ಇತ್ತೀಚೆಗೆ ಬೆಂಗಳೂರಿಗೆ ಬಂದಿದ್ದ ಬಿಜೆಪಿ ರಾಷ್ಟ್ರಾಧ್ಯಕ್ಷ ನಿತಿನ್ ನಬಿನ್ ಅವರು "ಬೆಂಗಾಳ್ ಮಾದರಿಯಲ್ಲಿ ಮುಂದಿನ ಚುನಾವಣೆ ಎದುರಿಸಿ" ಎಂದು ಹೇಳಿರುವುದು ಇದರ ಪರೋಕ್ಷ ಸೂಚನೆಯಾಗಿದೆ. ಹೀಗಾಗಿ ಹಿಂದುಳಿದ ಹಾಗೂ ಮುಸ್ಲಿಮ್ ಮತಗಳನ್ನು ಸಂಪೂರ್ಣವಾಗಿ ಉಳಿಸಿಕೊಳ್ಳುವುದು ಡಿಕೆಶಿ ಮುಂದಿರುವ ಪ್ರಮುಖ ಸವಾಲು.

ಸ್ಥಳೀಯ ಸಂಸ್ಥೆಗಳ ಚುನಾವಣೆ

2028ರ ವಿಧಾನಸಭಾ ಚುನಾವಣೆಗೆ ಮುನ್ನ ಡಿಕೆಶಿ ಎದುರಿಸಬೇಕಿರುವ ಪ್ರಮುಖ ರಾಜಕೀಯ ಪರೀಕ್ಷೆ ಎಂದರೆ ಅದು 'ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ' (ಬಿಬಿಎಂಪಿ/ನಗರ ಸ್ಥಳೀಯ ಸಂಸ್ಥೆ) ಚುನಾವಣೆ. ಬೆಂಗಳೂರಿನ ಆಡಳಿತವನ್ನು ಕಾಂಗ್ರೆಸ್ ತೆಕ್ಕೆಗೆ ತೆಗೆದುಕೊಳ್ಳುವುದು ಬೆಂಗಳೂರು ನಗರಾಭಿವೃದ್ಧಿ ಸಚಿವರೂ ಆಗಿರುವ ಡಿಕೆಶಿಗೆ ವೈಯಕ್ತಿಕ ಹಾಗೂ ರಾಜಕೀಯ ಪ್ರತಿಷ್ಠೆಯ ಪ್ರಶ್ನೆಯಾಗಿದೆ. ಇದರ ಜೊತೆಗೆ ಗ್ರಾಮ ಪಂಚಾಯಿತಿಗಳಿಂದ ಹಿಡಿದು ನಗರ ಸ್ಥಳೀಯ ಸಂಸ್ಥೆಗಳವರೆಗೆ ನಡೆಯುವ ಚುನಾವಣೆಗಳು ಸರ್ಕಾರದ ಸದ್ಯದ ಜನಪ್ರಿಯತೆಯನ್ನು ಅಳೆಯುವ ಪ್ರಮುಖ ಮಾಪಕಗಳಾಗಲಿವೆ.

ಕೇಂದ್ರೀಯ ತನಿಖಾ ಸಂಸ್ಥೆಗಳ ಕಾನೂನು ಪ್ರಕರಣಗಳ ಜಾಲ

ಡಿ.ಕೆ. ಶಿವಕುಮಾರ್ ಅವರಿಗೆ ಮೂರನೇ ಅತಿ ದೊಡ್ಡ ಸವಾಲು ಎಂದರೆ ಅವರ ಮೇಲಿರುವ ವಿವಿಧ ತನಿಖಾ ಸಂಸ್ಥೆಗಳ ಕಾನೂನು ಪ್ರಕರಣಗಳನ್ನು ನಿಭಾಯಿಸುವುದು. ಈ ಕಾನೂನು ಹೋರಾಟಗಳು ಕೇವಲ ವೈಯಕ್ತಿಕವಲ್ಲ, ಬದಲಿಗೆ ಇಡೀ ಸರ್ಕಾರದ ಸುಭದ್ರತೆಯ ಮೇಲೆ ಪ್ರಭಾವ ಬೀರಬಲ್ಲವು.ತನಿಖಾ ಸಂಸ್ಥೆ / ಪ್ರಕರಣಪ್ರಸ್ತುತ ಸ್ಥಿತಿ ಮತ್ತು ಸವಾಲುಆದಾಯ ತೆರಿಗೆ (IT) ಇಲಾಖೆ (2017ರ ಪ್ರಕರಣ)2017ರ ರೆಸಾರ್ಟ್ ರಾಜಕಾರಣದ ವೇಳೆ ನಡೆದ ದಾಳಿಗೆ ಸಂಬಂಧಿಸಿದ ಕ್ರಿಮಿನಲ್ ಮೊಕದ್ದಮೆಯಿಂದ ಬೆಂಗಳೂರಿನ ವಿಶೇಷ ನ್ಯಾಯಾಲಯ ಮತ್ತು ಹೈಕೋರ್ಟ್ ಡಿಕೆಶಿ ಅವರನ್ನು ಮುಕ್ತಗೊಳಿಸಿವೆ.

ಇದರಿಂದ ದೊಡ್ಡ ರಿಲೀಫ್ ಸಿಕ್ಕಿದೆ.ಜಾರಿ ನಿರ್ದೇಶನಾಲಯ (ED) ಪ್ರಕರಣಐಟಿ ಪ್ರಕರಣದ ಆಧಾರದ ಮೇಲೆ ದಾಖಲಾಗಿದ್ದ ಅಕ್ರಮ ಹಣ ವರ್ಗಾವಣೆ ಪ್ರಕರಣವನ್ನು 2024ರ ಮಾರ್ಚ್‌ನಲ್ಲಿ ಸುಪ್ರೀಂ ಕೋರ್ಟ್ ಸಂಪೂರ್ಣವಾಗಿ ವಜಾಗೊಳಿಸಿದೆ.ಸಿಬಿಐ (CBI) ಅಕ್ರಮ ಆಸ್ತಿ ಗಳಿಕೆ ಪ್ರಕರಣಸದ್ಯ ಡಿಕೆಶಿಗೆ ದೊಡ್ಡ ಸವಾಲಾಗಿರುವುದು ಈ ಪ್ರಕರಣವೇ. ಹಿಂದಿನ ಬಿಜೆಪಿ ಸರ್ಕಾರ ನೀಡಿದ್ದ ಸಿಬಿಐ ತನಿಖೆಯ ಒಪ್ಪಿಗೆಯನ್ನು ಕಾಂಗ್ರೆಸ್ ಸರ್ಕಾರ ಹಿಂಪಡೆದು ಲೋಕಾಯುಕ್ತಕ್ಕೆ ವಹಿಸಿದೆ. ಆದರೆ ಇದನ್ನು ಪ್ರಶ್ನಿಸಿ ಸಿಬಿಐ ಹಾಗೂ ಬಿಜೆಪಿ ನಾಯಕರು ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದು, ವಿಚಾರಣೆ ಚಾಲ್ತಿಯಲ್ಲಿದೆ. ದೆಹಲಿ ಹೈಕೋರ್ಟ್ ಸದ್ಯಕ್ಕೆ ಬಂಧನದಿಂದ ಮಧ್ಯಂತರ ರಕ್ಷಣೆ ನೀಡಿದೆ.ಐಟಿಎಟಿ (ITAT) ಸಿವಿಲ್ ಜಟಾಪಟಿಕ್ರಿಮಿನಲ್ ಮೊಕದ್ದಮೆಗಳಿಂದ ರಿಲೀಫ್ ಸಿಕ್ಕಿದ್ದರೂ, ಐಟಿ ಇಲಾಖೆ ವಿಧಿಸಿದ್ದ ಬೃಹತ್ ಪ್ರಮಾಣದ ತೆರಿಗೆ ಮೌಲ್ಯಮಾಪನ ಮತ್ತು ದಂಡದ ಆದೇಶಗಳ ವಿರುದ್ಧದ ಸಿವಿಲ್ ಹೋರಾಟಗಳು ಐಟಿಎಟಿಯ ಬೆಂಗಳೂರು ಪೀಠದ ಮುಂದೆ ಇನ್ನು ಪ್ರಕ್ರಿಯೆಯಲ್ಲಿವೆ.

ನ್ಯಾಷನಲ್ ಹೆರಾಲ್ಡ್ ಪ್ರಕರಣ'ಯಂಗ್ ಇಂಡಿಯನ್' ಸಂಸ್ಥೆಗೆ ಆರ್ಥಿಕ ನೆರವು ನೀಡಿದ ಪ್ರಕರಣದಲ್ಲೂ ಡಿ.ಕೆ. ಶಿವಕುಮಾರ್ ಮತ್ತು ಅವರ ಸಹೋದರ ಡಿ.ಕೆ. ಸುರೇಶ್ ಅವರು ಇಡಿ (ED) ವಿಚಾರಣೆಯನ್ನು ಎದುರಿಸುತ್ತಿದ್ದಾರೆ.ಮುಖ್ಯಮಂತ್ರಿಯಾದ ತಕ್ಷಣ ಈ ಕಾನೂನು ಹೋರಾಟಗಳು ಮುಗಿಯುವುದಿಲ್ಲ. ಉನ್ನತ ಹುದ್ದೆಯಲ್ಲಿದ್ದಾಗ ಪದೇ ಪದೇ ತನಿಖಾ ಸಂಸ್ಥೆಗಳ ನೋಟೀಸ್‌ಗಳು, ದೆಹಲಿ ಅಥವಾ ನ್ಯಾಯಾಲಯಗಳಿಗೆ ಅಲೆಯುವುದು ರಾಜ್ಯದ ದೈನಂದಿನ ಆಡಳಿತದ ಗಮನವನ್ನು ಬೇರೆಡೆಗೆ ಸೆಳೆಯಬಹುದು ಹಾಗೂ ಅಧಿಕಾರಿ ಶಾಹಿಯ ಮೇಲಿನ ಹಿಡಿತ ಸಡಿಲವಾಗಬಹುದು.