ಬೆಂಗಳೂರಿನ ನೈಜೆಲ್ ಫರ್ನಾಂಡಿಸ್‌ಗೆ ಪೋಪ್‌ರಿಂದ ಪ್ರತಿಷ್ಠಿತ ‘ಷೆವಾಲಿಯರ್’ ಪಾಪಲ್ ನೈಟ್‌ಹುಡ್ ಗೌರವ

ಕ್ರೈಸ್ತ ಧರ್ಮಗುರು ಪೋಪ್ ಫ್ರಾನ್ಸಿಸ್ ಅವರು ಬೆಂಗಳೂರಿನ ನೈಜೆಲ್ ಫರ್ನಾಂಡಿಸ್ ಅವರಿಗೆ ಅತ್ಯುನ್ನತ ‘ಷೆವಾಲಿಯರ್’ (Chevalier) ಪಾಪಲ್ ನೈಟ್‌ಹುಡ್ ಪ್ರಶಸ್ತಿ ನೀಡಿ ಗೌರವಿಸಿದ್ದಾರೆ. ಚರ್ಚ್ ಮತ್ತು ಸಮಾಜಕ್ಕೆ ಸಲ್ಲಿಸಿದ ಅನನ್ಯ ಸೇವೆಯನ್ನು ಗುರುತಿಸಿ ಈ ಅಂತರಾಷ್ಟ್ರೀಯ ಮಟ್ಟದ ಗೌರವವನ್ನು ಅವರಿಗೆ ಅರ್ಪಿಸಲಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಬೆಂಗಳೂರು ಮಹಾಧರ್ಮಪ್ರಾಂತ್ಯದ ಮತ್ಯಾರಿಗೂ ಇಂತಹ ಉನ್ನತ ಗೌರವ ಲಭಿಸಿಲ್ಲ ಎಂಬುದು ಈ ಪ್ರಶಸ್ತಿಯ ವಿಶೇಷತೆ.

ಈ ಐತಿಹಾಸಿಕ ಸಂದರ್ಭದ ಕುರಿತು ಮಾತನಾಡಿದ ಬೆಂಗಳೂರು ಮಹಾಧರ್ಮಪ್ರಾಂತ್ಯದ ವಿಶ್ರಾಂತ ಆರ್ಚ್‌ಬಿಷಪ್ ವಂದನೀಯ ಡಾ. ಬರ್ನಾರ್ಡ್ ಮೊರಾಸ್ ಅವರು, "ಯೇಸು ಕ್ರಿಸ್ತರ ಪ್ರತಿನಿಧಿಯಾಗಿರುವ ಸ್ವತಃ ಪೋಪ್ ಅವರೇ ಈ ಪ್ರಶಸ್ತಿಯನ್ನು ನೀಡಿರುವುದರಿಂದ, ಇದು ಸಾಕ್ಷಾತ್ ಯೇಸು ಕ್ರಿಸ್ತರೇ ನೀಡಿದ ಗೌರವಕ್ಕೆ ಸಮಾನವಾಗಿದೆ" ಎಂದು ಬಣ್ಣಿಸಿದರು. ತಾವು ಬೆಂಗಳೂರಿನ ಆರ್ಚ್‌ಬಿಷಪ್ ಆಗಿದ್ದ ಅವಧಿಯಲ್ಲಿ ನೈಜೆಲ್ ಅವರ ಶಿಸ್ತುಬದ್ಧ ಜೀವನ ಮತ್ತು ಚರ್ಚ್‌ಗೆ ಅವರು ನೀಡಿದ ಅಪಾರ ಕೊಡುಗೆಯನ್ನು ಸ್ಮರಿಸಿದ ಅವರು, ನೈಜೆಲ್ ಅವರ ವಿನಯಶೀಲತೆಯೇ ಅವರನ್ನು ಇಂದು ಸಾಧನೆಯ ಈ ಉತ್ತುಂಗಕ್ಕೆ ತಂದು ನಿಲ್ಲಿಸಿದೆ ಎಂದು ಶ್ಲಾಘಿಸಿದರು.

ಬೆಂಗಳೂರು ಆರ್ಚ್‌ಬಿಷಪ್ ಡಾ. ಪೀಟರ್ ಮಚಾದೋ ಅವರು ಈ ಸಾಧನೆಯನ್ನು ಇಡೀ ಮಹಾಧರ್ಮಪ್ರಾಂತ್ಯಕ್ಕೆ ಸಂದ ಹೆಮ್ಮೆ ಎಂದು ಬಣ್ಣಿಸಿದ್ದಾರೆ. ನೈಜೆಲ್ ಅವರ ಧರ್ಮನಿಷ್ಠೆ ಮತ್ತು ಬಡವರ ಏಳಿಗೆಗಾಗಿ ಅವರು ತೋರುತ್ತಿರುವ ಉದಾರತೆ ಎಲ್ಲರಿಗೂ ಆದರ್ಶಪ್ರಾಯವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ಪ್ರಶಸ್ತಿ ಸ್ವೀಕರಿಸಿದ ಬಳಿಕ ವಿನಮ್ರವಾಗಿ ಮಾತನಾಡಿದ ನೈಜೆಲ್ ಫರ್ನಾಂಡಿಸ್ ಅವರು, ಈ ಗೌರವವು ತಮ್ಮ ಜವಾಬ್ದಾರಿಯನ್ನು ಮತ್ತಷ್ಟು ಹೆಚ್ಚಿಸಿದೆ ಎಂದು ನುಡಿದರು. ತಮ್ಮ ಈ ಯಶಸ್ಸಿನ ಪಯಣದಲ್ಲಿ ಬೆನ್ನೆಲುಬಾಗಿ ನಿಂತ ಕಾರ್ಡಿನಲ್ ಓಸ್ವಾಲ್ಡ್ ಗ್ರೇಷಿಯಸ್, ಕಾರ್ಡಿನಲ್ ಫಿಲಿಪ್ ನೇರಿ, ಮಾಜಿ ಆರ್ಚ್‌ಬಿಷಪ್ ಇಗ್ನೇಷಿಯಸ್ ಪಿಂಟೋ ಸೇರಿದಂತೆ ಹಲವು ಧರ್ಮಗುರುಗಳಿಗೆ ಮತ್ತು ಬಿಷಪ್‌ಗಳಿಗೆ ಅವರು ಕೃತಜ್ಞತೆ ಸಲ್ಲಿಸಿದರು. ವಿಶೇಷವಾಗಿ ಬೈಬಲ್ ವಿದ್ವಾಂಸ ವಂದನೀಯ ಡಾ. ಲೂಸಿಯನ್ ಲೆಗ್ರಾಂಡ್ ಮತ್ತು ಸಿಸಿಬಿಐ ಉಪ ಪ್ರಧಾನ ಕಾರ್ಯದರ್ಶಿ ಫಾದರ್ ಸ್ಟೀಫನ್ ಆಲತ್ತರ ಅವರ ಮಾರ್ಗದರ್ಶನವನ್ನು ಈ ಸಂದರ್ಭದಲ್ಲಿ ಸ್ಮರಿಸಿದರು. ಸಮಾಜ ಹಾಗೂ ಧಾರ್ಮಿಕ ಕಾರ್ಯಗಳೆಡೆಗೆ ಹೆಚ್ಚಿನ ಬದ್ಧತೆಯಿಂದ ಕಾರ್ಯನಿರ್ವಹಿಸಲು ಈ ಪ್ರಶಸ್ತಿ ತಮಗೆ ದೊಡ್ಡ ಪ್ರೇರಣೆ ನೀಡಿದೆ ಎಂದು ಅವರು ತಿಳಿಸಿದರು.

ಈ ಸಂಭ್ರಮದ ಕ್ಷಣದಲ್ಲಿ ನೈಜೆಲ್ ಫರ್ನಾಂಡಿಸ್ ಅವರು ತಮ್ಮ ಪತ್ನಿ ಬ್ರೆಂಡಾ ಫರ್ನಾಂಡಿಸ್ ಹಾಗೂ ಪುತ್ರ ಕೆವಿನ್ ಜೋಶುವಾ ಅವರೊಂದಿಗೆ ಬಿಷಪ್‌ಗಳ ಸಮ್ಮುಖದಲ್ಲಿ ಹರ್ಷ ಹಂಚಿಕೊಂಡರು.