HMT ರಿಯಲ್ ಎಸ್ಟೇಟ್ ದಂಗಲ್: ನೆಹರೂ ಕನಸಿನ ಕೂಸಿನ ಸುತ್ತ 15 ಸಾವಿರ ಕೋಟಿ ರೂ. ಭೂ ವಿವಾದ
ಬೆಂಗಳೂರಿನಲ್ಲಿ ಎಚ್ಎಂಟಿ ತನ್ನ ಮೊದಲ ವಾಚ್ ಕಾರ್ಖಾನೆಯನ್ನು ಆರಂಭಿಸಿತು. 'ಜನತಾ', 'ಪೈಲಟ್', 'ಸೋನಾ' ಮತ್ತು 'ಕಾಂಚನ' ಮಾದರಿಯ ಗಡಿಯಾರಗಳು ಕೇವಲ ವಸ್ತುವಲ್ಲ, ಭಾರತೀಯರ ಪಾಲಿಗೆ ಒಂದು ಭಾವನೆಯಾಗಿದ್ದವು.
ಒಂದು ಕಾಲದಲ್ಲಿ ಭಾರತೀಯರ ಮಣಿಕಟ್ಟಿನ ಮೇಲೆ ರಾಜನಂತೆ ಮೆರೆದ, 'ದೇಶದ ಸಮಯದ ದಿಕ್ಸೂಚಿ' ಎಂದೇ ಖ್ಯಾತಿ ಪಡೆದಿದ್ದ ಹಿಂದೂಸ್ತಾನ್ ಮೆಷಿನ್ ಟೂಲ್ಸ್ (ಎಚ್ಎಂಟಿ) ಸಂಸ್ಥೆ ಇಂದು ಬರೋಬ್ಬರಿ 15 ಸಾವಿರ ಕೋಟಿ ರೂ. ಮೌಲ್ಯದ ರಿಯಲ್ ಎಸ್ಟೇಟ್ ವಿವಾದದ ಕೇಂದ್ರಬಿಂದುವಾಗಿದೆ. 1953ರಲ್ಲಿ ಅಂದಿನ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಕೈಗಾರಿಕಾ ಕ್ರಾಂತಿಯ ಕನಸಿನ ಕೂಸಾಗಿ ಆರಂಭವಾದ ಎಚ್ಎಂಟಿ, ಇಂದು ಕೇವಲ ಇತಿಹಾಸದ ಪುಟಗಳಲ್ಲಿ ಮಾತ್ರವಲ್ಲದೆ, ನ್ಯಾಯಾಲಯದ ಅಂಗಳದಲ್ಲೂ ಹೋರಾಡುತ್ತಿದೆ.
ಸುವರ್ಣ ಯುಗದಿಂದ ಅವನತಿಯತ್ತ
1961ರಲ್ಲಿ ಜಪಾನಿನ ಸಿಟಿಜನ್ ಕಂಪನಿಯ ತಾಂತ್ರಿಕ ಸಹಯೋಗದೊಂದಿಗೆ ಬೆಂಗಳೂರಿನಲ್ಲಿ ಎಚ್ಎಂಟಿ ತನ್ನ ಮೊದಲ ವಾಚ್ ಕಾರ್ಖಾನೆಯನ್ನು ಆರಂಭಿಸಿತು. 'ಜನತಾ', 'ಪೈಲಟ್', 'ಸೋನಾ' ಮತ್ತು 'ಕಾಂಚನ' ಮಾದರಿಯ ಗಡಿಯಾರಗಳು ಕೇವಲ ವಸ್ತುವಲ್ಲ, ಭಾರತೀಯರ ಪಾಲಿಗೆ ಒಂದು ಭಾವನೆಯಾಗಿದ್ದವು. ಆದರೆ, 1980ರ ದಶಕದಲ್ಲಿ ಕ್ವಾರ್ಟ್ಜ್ (ಬ್ಯಾಟರಿ ಚಾಲಿತ) ತಂತ್ರಜ್ಞಾನದ ಆಗಮನ ಮತ್ತು ಖಾಸಗಿ ಕಂಪನಿ 'ಟೈಟಾನ್' ನೀಡಿದ ತೀವ್ರ ಪೈಪೋಟಿಗೆ ಅಪ್ಡೇಟ್ ಆಗುವಲ್ಲಿ ಎಚ್ಎಂಟಿ ವಿಫಲವಾಯಿತು. ಮಾರುಕಟ್ಟೆಯ ಟ್ರೆಂಡ್ ಅರಿಯದ ಆಡಳಿತ ಮಂಡಳಿಯ ನಿರ್ಧಾರಗಳು ಮತ್ತು ನಿರಂತರ ನಷ್ಟದ ಫಲವಾಗಿ, 2016ರಲ್ಲಿ ಕೇಂದ್ರ ಸರ್ಕಾರ ಈ ವಾಚ್ ವಿಭಾಗವನ್ನು ಅಧಿಕೃತವಾಗಿ ಮುಚ್ಚಿತು.
ವಿವಾದದ ಕಿಡಿ ಹಚ್ಚಿದ 'ಟಾಕ್ಸಿಕ್' ಸಿನಿಮಾ
ದಶಕಗಳಿಂದ ಶಾಂತವಾಗಿದ್ದ ಎಚ್ಎಂಟಿ ಆವರಣದಲ್ಲಿ ಇತ್ತೀಚೆಗೆ ವಿವಾದದ ಕಿಡಿ ಹೊತ್ತಿಕೊಂಡಿದ್ದು ನಟ ಯಶ್ ಅಭಿನಯದ 'ಟಾಕ್ಸಿಕ್' ಚಿತ್ರದ ಚಿತ್ರೀಕರಣದ ವೇಳೆ. ಕಾರ್ಖಾನೆಯ ಜಾಗದಲ್ಲಿ ಸೆಟ್ ನಿರ್ಮಿಸಲು ಸಾವಿರಾರು ಮರಗಳನ್ನು ಅಕ್ರಮವಾಗಿ ಕಡಿಯಲಾಗಿದೆ ಎಂಬ ಆರೋಪ ಕೇಳಿಬಂದಿತ್ತು. ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದಾಗ, ಈ ಭೂಮಿಯ ಮಾಲೀಕತ್ವದ ಅಸಲಿ ಕಥೆ ಮುನ್ನೆಲೆಗೆ ಬಂದಿತು.
ಅರಣ್ಯ ಭೂಮಿಯೋ ಅಥವಾ ಕೈಗಾರಿಕಾ ಪ್ರದೇಶವೋ?
ರಾಜ್ಯ ಸರ್ಕಾರದ ವಾದದ ಪ್ರಕಾರ, ಬೆಂಗಳೂರಿನ ಜಾಲಹಳ್ಳಿಯಲ್ಲಿರುವ ಈ 444 ಎಕರೆ ಭೂಮಿಯು 1896 ಮತ್ತು 1901ರ ಗೆಜೆಟ್ ಅಧಿಸೂಚನೆಗಳ ಪ್ರಕಾರ 'ಮೀಸಲು ಅರಣ್ಯ' ಪ್ರದೇಶವಾಗಿದೆ. ಒಮ್ಮೆ ಅರಣ್ಯವೆಂದು ಘೋಷಿತವಾದ ಜಾಗವನ್ನು ಅರಣ್ಯೇತರ ಉದ್ದೇಶಕ್ಕೆ ಬಳಸುವಂತಿಲ್ಲ ಎಂಬ ಸುಪ್ರೀಂ ಕೋರ್ಟ್ ತೀರ್ಪನ್ನು ಸರ್ಕಾರ ಉಲ್ಲೇಖಿಸುತ್ತಿದೆ. ಈ ಹಿನ್ನೆಲೆಯಲ್ಲಿ, ಇಲ್ಲಿ ಕಬ್ಬನ್ ಪಾರ್ಕ್ಗಿಂತಲೂ ದೊಡ್ಡದಾದ 'ಬಯೋಲಾಜಿಕಲ್ ಪಾರ್ಕ್' ನಿರ್ಮಿಸಲು ಸರ್ಕಾರ ಯೋಜಿಸಿದೆ.
ಹೆಚ್.ಡಿ. ಕುಮಾರಸ್ವಾಮಿ ಅವರ ಸವಾಲು
ಇನ್ನೊಂದೆಡೆ, ಕೇಂದ್ರ ಬೃಹತ್ ಕೈಗಾರಿಕೆಗಳ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ರಾಜ್ಯ ಸರ್ಕಾರದ ನಡೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ. ಎಚ್ಎಂಟಿ ಸಂಸ್ಥೆಯನ್ನು ಪುನಶ್ಚೇತನಗೊಳಿಸಲು ತಾವು ಪ್ರಯತ್ನಿಸುತ್ತಿರುವಾಗ ಸರ್ಕಾರ ಅಡ್ಡಗಾಲು ಹಾಕುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. "ಈ ಹಿಂದೆ ಇದೇ ಜಾಗದಲ್ಲಿ ಖಾಸಗಿ ಬಿಲ್ಡರ್ಗಳು ಅಪಾರ್ಟ್ಮೆಂಟ್ಗಳನ್ನು ನಿರ್ಮಿಸಿದಾಗ ಅರಣ್ಯ ಇಲಾಖೆ ಎಲ್ಲಿತ್ತು?" ಎಂದು ಪ್ರಶ್ನಿಸಿರುವ ಅವರು, 175 ಎಕರೆ ಭೂಮಿ ಅಕ್ರಮವಾಗಿ ಮಾರಾಟವಾಗಿರುವ ದಾಖಲೆಗಳು ತಮ್ಮ ಬಳಿ ಇವೆ ಎಂದು ರಾಜ್ಯ ಸರ್ಕಾರಕ್ಕೆ ನೇರ ಸವಾಲು ಹಾಕಿದ್ದಾರೆ.
ಒಟ್ಟಾರೆಯಾಗಿ, ಒಂದು ಕಾಲದಲ್ಲಿ ಸಮಯವನ್ನು ನಿಯಂತ್ರಿಸುತ್ತಿದ್ದ ಎಚ್ಎಂಟಿ ಇಂದು ಕಾಲಚಕ್ರದ ಸುಳಿಗೆ ಸಿಲುಕಿದೆ. ಇದು ಪರಿಸರ ಸಂರಕ್ಷಣೆಯ ಹೋರಾಟವೋ ಅಥವಾ 15 ಸಾವಿರ ಕೋಟಿ ರೂ. ಬೆಲೆಬಾಳುವ ಭೂಮಿಯ ಮೇಲಿನ ರಾಜಕೀಯ ಹಿಡಿತವೋ ಎಂಬುದು ಸದ್ಯಕ್ಕೆ ಕುತೂಹಲದ ವಿಷಯವಾಗಿದೆ.
