ಕೆಪಿಎಸ್‌ಸಿ ಮುಚ್ಚುವುದು ಸುಲಭವಲ್ಲ: 'ತಲೆನೋವಿಗೆ ತಲೆ ಕಡಿಯಲಾಗದು' ಎಂದ ಮಾಜಿ ಎಜಿ ಬಿ.ವಿ. ಆಚಾರ್ಯ

ಭ್ರಷ್ಟಾಚಾರದ ಸರಣಿ ಆರೋಪಗಳ ಹಿನ್ನೆಲೆಯಲ್ಲಿ ಕರ್ನಾಟಕ ಲೋಕಸೇವಾ ಆಯೋಗವನ್ನು (ಕೆಪಿಎಸ್‌ಸಿ) ಮುಚ್ಚುವ ಕುರಿತು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಇತ್ತೀಚೆಗೆ ನೀಡಿದ್ದ ಹೇಳಿಕೆ ರಾಜ್ಯಾದ್ಯಂತ ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಆದರೆ, ಕೇವಲ ಸರ್ಕಾರದ ಆಶಯದಂತೆ ಏಕಾಏಕಿ ಈ ಸಾಂವಿಧಾನಿಕ ಸಂಸ್ಥೆಯನ್ನು ರದ್ದುಪಡಿಸುವುದು ಅಸಾಧ್ಯ ಎಂದು ರಾಜ್ಯದ ಮಾಜಿ ಅಡ್ವೊಕೇಟ್ ಜನರಲ್ ಬಿ.ವಿ. ಆಚಾರ್ಯ ಅವರು ಸ್ಪಷ್ಟಪಡಿಸಿದ್ದಾರೆ. 'ದಿ ಫೆಡರಲ್ ಕರ್ನಾಟಕ' ಸುದ್ದಿ ಸಂಸ್ಥೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅವರು, ಕೆಪಿಎಸ್‌ಸಿ ಮುಚ್ಚುವ ವಿಚಾರದಲ್ಲಿರುವ ಕಾನೂನಾತ್ಮಕ ತೊಡಕುಗಳು ಹಾಗೂ ವಾಸ್ತವಿಕ ಸವಾಲುಗಳನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ.

ಯಾವುದೇ ರಾಜ್ಯ ಸರ್ಕಾರವು ತಾನೇ ಹುಟ್ಟುಹಾಕಿದ ಸಂಸ್ಥೆಗಳನ್ನು ಮಾತ್ರ ತನ್ನಿಚ್ಛೆಯಂತೆ ಮುಚ್ಚುವ ಅಥವಾ ರದ್ದುಪಡಿಸುವ ಅಧಿಕಾರವನ್ನು ಹೊಂದಿರುತ್ತದೆ. ಆದರೆ, ಲೋಕಸೇವಾ ಆಯೋಗವು ಸಂವಿಧಾನಬದ್ಧವಾಗಿ ಅಸ್ತಿತ್ವಕ್ಕೆ ಬಂದಿರುವ ಸಂಸ್ಥೆಯಾಗಿದೆ. ಸಂವಿಧಾನದ 315ನೇ ವಿಧಿಯ ಪ್ರಕಾರ, ಕೇಂದ್ರಕ್ಕೆ ಯುಪಿಎಸ್‌ಸಿ ಇರುವಂತೆಯೇ ಪ್ರತಿಯೊಂದು ರಾಜ್ಯಕ್ಕೂ ಅದರದ್ದೇ ಆದ ಲೋಕಸೇವಾ ಆಯೋಗವಿರಬೇಕಾದದ್ದು ಕಡ್ಡಾಯ. ಹೀಗಾಗಿ, ಮುಖ್ಯಮಂತ್ರಿಗಳು ಹೇಳಿದ ತಕ್ಷಣವೇ ಇದನ್ನು ಮುಚ್ಚಲು ಅಥವಾ ತೆಗೆದುಹಾಕಲು ರಾಜ್ಯ ಸರ್ಕಾರಕ್ಕೆ ಯಾವುದೇ ಅಧಿಕಾರವಿಲ್ಲ. ಒಂದು ವೇಳೆ ಆಯೋಗವನ್ನು ರದ್ದುಪಡಿಸಲೇಬೇಕೆಂದರೆ, ಅದಕ್ಕೆ ಸಾಂವಿಧಾನಿಕ ತಿದ್ದುಪಡಿಯ ಅಗತ್ಯವಿರುತ್ತದೆ. ಪ್ರಾಯೋಗಿಕವಾಗಿ ಇದು ಕಾರ್ಯಸಾಧುವಲ್ಲ. ಸಂವಿಧಾನದಲ್ಲಿ ಎರಡು ರಾಜ್ಯಗಳು ಸೇರಿ ಜಂಟಿ ಆಯೋಗ ರಚಿಸಲು ಅವಕಾಶವಿದ್ದರೂ, ಅದಕ್ಕೆ ಎರಡೂ ರಾಜ್ಯಗಳ ವಿಧಾನಸಭೆಗಳ ಒಪ್ಪಿಗೆ ಬೇಕಿರುವುದರಿಂದ ಆ ಸಾಧ್ಯತೆಯೂ ಇಲ್ಲಿ ಇಲ್ಲ ಎಂದು ಬಿ.ವಿ. ಆಚಾರ್ಯ ವಿಶ್ಲೇಷಿಸಿದ್ದಾರೆ.

ತಲೆನೋವಿಗೆ ತಲೆ ಕಡಿಯುವುದು ಪರಿಹಾರವಲ್ಲ

ಕೆಪಿಎಸ್‌ಸಿಯಲ್ಲಿನ ಭ್ರಷ್ಟಾಚಾರಕ್ಕೆ ಆಯೋಗವೆಂಬ ಸಂಸ್ಥೆ ಕಾರಣವಲ್ಲ, ಬದಲಾಗಿ ಅಲ್ಲಿನ ಅಧ್ಯಕ್ಷರು ಮತ್ತು ಸದಸ್ಯರು ಕಾರಣ ಎಂದು ಆಚಾರ್ಯ ಅವರು ನೇರ ನುಡಿಗಳಲ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಆಮಿಷಗಳಿಗೆ ಹಾಗೂ ಭ್ರಷ್ಟಾಚಾರಕ್ಕೆ ತಲೆಬಾಗದ ಪ್ರಾಮಾಣಿಕರನ್ನು ಅಧ್ಯಕ್ಷರು ಹಾಗೂ ಸದಸ್ಯರನ್ನಾಗಿ ನೇಮಿಸಬೇಕಾದದ್ದು ಸರ್ಕಾರದ ಹೊಣೆಗಾರಿಕೆ. ಈ ಮಹತ್ವದ ಹುದ್ದೆಗಳಿಗೆ ಸೂಕ್ತ ವ್ಯಕ್ತಿಗಳನ್ನು ಆಯ್ಕೆ ಮಾಡಲು ಒಂದು ಪ್ರತ್ಯೇಕ ಶಿಫಾರಸು ಸಮಿತಿಯನ್ನು ರಚಿಸುವುದು ಒಳಿತು. ಅದನ್ನು ಬಿಟ್ಟು, ನೇಮಕಾತಿಯಲ್ಲಿನ ತಮ್ಮ ನ್ಯೂನತೆಗಳನ್ನು ಮುಚ್ಚಿಕೊಳ್ಳಲು ಇಡೀ ಆಯೋಗವನ್ನೇ ಮುಚ್ಚುತ್ತೇನೆ ಎನ್ನುವುದು 'ತಲೆನೋವು ಬಂದಿದೆ ಎಂದು ತಲೆ ಕಡಿದುಕೊಂಡಂತೆ' ಆಗುತ್ತದೆ ಎಂದು ಅವರು ಮಾರ್ಮಿಕವಾಗಿ ಟೀಕಿಸಿದ್ದಾರೆ. ಒಂದು ವೇಳೆ ನೇಮಕಾತಿ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ಬೇಕಿದ್ದರೆ, ನಿರ್ದಿಷ್ಟ ಪರೀಕ್ಷೆಗಳನ್ನು ನಡೆಸಿಕೊಡುವಂತೆ ರಾಜ್ಯ ಸರ್ಕಾರವು ಕೇಂದ್ರ ಲೋಕಸೇವಾ ಆಯೋಗಕ್ಕೆ (ಯುಪಿಎಸ್‌ಸಿ) ಮನವಿ ಮಾಡಿಕೊಳ್ಳಲು ಸಂವಿಧಾನದ 315ನೇ ವಿಧಿಯಲ್ಲಿಯೇ ಮುಕ್ತ ಅವಕಾಶವಿದೆ ಎಂದು ಅವರು ಪರ್ಯಾಯ ಮಾರ್ಗವನ್ನು ಸೂಚಿಸಿದ್ದಾರೆ. ಅಲ್ಲದೆ, ಆಯೋಗದ ಅಧ್ಯಕ್ಷರು ಮತ್ತು ಸದಸ್ಯರಾದವರು ನಿವೃತ್ತಿಯ ನಂತರ ಸರ್ಕಾರದಿಂದ ಬೇರೆ ಯಾವುದೇ ಹುದ್ದೆ ಪಡೆಯುವಂತಿಲ್ಲ ಎಂಬ ನಿಯಮವನ್ನೂ ಅವರು ನೆನಪಿಸಿದ್ದಾರೆ.

ವಂದೇ ಮಾತರಂ ವಿವಾದ ಅನಗತ್ಯ

ಇದೇ ಸಂದರ್ಭದಲ್ಲಿ, ರಾಜ್ಯದಲ್ಲಿ ಇತ್ತೀಚೆಗೆ ಸದ್ದು ಮಾಡುತ್ತಿರುವ 'ವಂದೇ ಮಾತರಂ' ಗೀತೆಯ ವಿವಾದದ ಕುರಿತೂ ಪ್ರತಿಕ್ರಿಯಿಸಿದ ಅವರು, ಈ ವಿಚಾರದಲ್ಲಿ ಸುಪ್ರೀಂ ಕೋರ್ಟ್ ಈಗಾಗಲೇ ಮಧ್ಯಂತರ ತೀರ್ಪು ನೀಡಿರುವುದರಿಂದ ತಾವು ಅದರ ಬಗ್ಗೆ ಹೆಚ್ಚು ಮಾತನಾಡುವುದಿಲ್ಲ ಎಂದರು. ಆದರೆ, ವೈಯಕ್ತಿಕ ನೆಲೆಯಲ್ಲಿ ಹೇಳುವುದಾದರೆ ಈ ವಿವಾದವೇ ಸಂಪೂರ್ಣ ಅನಗತ್ಯವಾಗಿತ್ತು. ರಾಜ್ಯ ಸರ್ಕಾರವು ರಾಷ್ಟ್ರಗೀತೆಯ ಗೌರವಾರ್ಥವಾಗಿ ವಂದೇ ಮಾತರಂ ಗೀತೆಯ ನಾಲ್ಕು ಚರಣಗಳನ್ನು ಹಾಡುವಂತೆ ಕೈಗೊಂಡಿರುವ ತೀರ್ಮಾನವು ಸಾರ್ವಜನಿಕರಿಗೂ ತೃಪ್ತಿದಾಯಕವಾಗಿದೆ ಮತ್ತು ಇದೊಂದು ಸರಿ ಎನಿಸುವಂತಹ ನಿರ್ಧಾರವಾಗಿದೆ ಎಂದು ಅವರು ತಮ್ಮ ಸ್ಪಷ್ಟ ಅನಿಸಿಕೆ ವ್ಯಕ್ತಪಡಿಸಿದ್ದಾರೆ. ಒಟ್ಟಾರೆಯಾಗಿ, ಸಾಂವಿಧಾನಿಕ ಸಂಸ್ಥೆಗಳ ಘನತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಸರ್ಕಾರದ ಜವಾಬ್ದಾರಿಯನ್ನು ಮಾಜಿ ಎಜಿ ಒತ್ತಿ ಹೇಳಿದ್ದಾರೆ.