ಬೆಂಗಳೂರಿನಿಂದ ಸ್ವಿಜರ್ಲೆಂಡ್ಗೆ ಹೋಗುತ್ತದೆ ಬೆಂಗಳೂರಿನ ಪೈಬರ್ ಗಣಪತಿ
ಗಣೇಶ ಚತುರ್ಥಿ ಹಿನ್ನೆಲೆಯಲ್ಲಿ 80 ವರ್ಷಗಳ ಇತಿಹಾಸ ಹೊಂದಿರುವ ಅಂಗಡಿಯಲ್ಲಿ ಪರಿಸರ ಸ್ನೇಹಿ ಗಣಪತಿ ಮೂರ್ತಿಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಮಣ್ಣಿನ, ಕಾಗದದ ಹಾಗೂ ನಾರುಮಿಶ್ರಿತ ಮೂರ್ತಿಗಳನ್ನು ವಿದೇಶಗಳಿಗೂ ಕಳುಹಿಸಲಾಗುತ್ತಿದೆ.
ಗಣೇಶ ಚತುರ್ಥಿ ಹಬ್ಬದ ಸಂಭ್ರಮ ಎಲ್ಲೆಡೆ ಮನೆಮಾಡಿದ್ದು, ಗಣಪತಿ ಮೂರ್ತಿಗಳ ಖರೀದಿ ಜೋರಾಗಿದೆ. ಈ ನಡುವೆ ಪರಿಸರಕ್ಕೆ ಹಾನಿಯಾಗದ ಗಣಪತಿ ಮೂರ್ತಿಗಳಿಗೆ ಜನರು ಹೆಚ್ಚಿನ ಆದ್ಯತೆ ನೀಡುತ್ತಿರುವುದು ಕಂಡುಬಂದಿದೆ. ಸುಮಾರು 80 ವರ್ಷಗಳಿಂದ ಗಣಪತಿ ಮೂರ್ತಿಗಳ ವ್ಯಾಪಾರ ನಡೆಸುತ್ತಿರುವ ಅಂಗಡಿಯೊಂದರಲ್ಲಿ ಈ ಬಾರಿ ಪರಿಸರ ಸ್ನೇಹಿ ಮೂರ್ತಿಗಳಿಗೆ ಹೆಚ್ಚಿನ ಬೇಡಿಕೆ ಬಂದಿದೆ. ಇಲ್ಲಿ ಪಿಓಪಿ ಗಣಪತಿ ಮೂರ್ತಿಗಳನ್ನು ಮಾರಾಟ ಮಾಡುವ ಬದಲು ಕಾಗದ, ಮಣ್ಣು ಹಾಗೂ ನಾರುಮಿಶ್ರಿತ ವಸ್ತುಗಳಿಂದ ತಯಾರಿಸಿದ ಗಣಪತಿ ಮೂರ್ತಿಗಳನ್ನು ಗ್ರಾಹಕರಿಗೆ ಒದಗಿಸಲಾಗುತ್ತಿದೆ.
ಅಂಗಡಿಯವರು ಹೇಳುವ ಪ್ರಕಾರ, ದೊಡ್ಡ ಗಾತ್ರದ ಗಣಪತಿ ಮೂರ್ತಿಗಳ ಜೊತೆಗೆ ವಿವಿಧ ಗಾತ್ರದ ಮೂರ್ತಿಗಳನ್ನು ಬಾಡಿಗೆಗೂ ನೀಡಲಾಗುತ್ತಿದೆ. ವಿಶೇಷವಾಗಿ ನಾರುಮಿಶ್ರಿತ ಗಣಪತಿ ಮೂರ್ತಿಗಳನ್ನು ಬಳಸಿ, ಹಬ್ಬದ ಬಳಿಕ ಅವುಗಳನ್ನು ಮರಳಿ ಅಂಗಡಿಗೆ ನೀಡುವ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಇದರಿಂದ ಪ್ರತಿವರ್ಷ ಹೊಸ ಮೂರ್ತಿ ತಯಾರಿಸುವ ಅಗತ್ಯ ಕಡಿಮೆಯಾಗುವುದರ ಜೊತೆಗೆ ಪರಿಸರ ಸಂರಕ್ಷಣೆಗೆ ಸಹಕಾರಿಯಾಗುತ್ತದೆ.
ಮಣ್ಣಿನ ಗಣಪತಿ ಮೂರ್ತಿಗಳಿಗೂ ಈ ಬಾರಿ ಉತ್ತಮ ಬೇಡಿಕೆ ಇದೆ. ಮಣ್ಣಿನಿಂದ ತಯಾರಿಸಿದ ಮೂರ್ತಿಗಳನ್ನು ನೀರಿನಲ್ಲಿ ವಿಸರ್ಜಿಸಿದಾಗ ಪರಿಸರಕ್ಕೆ ಹೆಚ್ಚಿನ ಹಾನಿಯಾಗುವುದಿಲ್ಲ ಎಂಬ ಕಾರಣಕ್ಕೆ ಅನೇಕರು ಇಂತಹ ಮೂರ್ತಿಗಳತ್ತ ಒಲವು ತೋರುತ್ತಿದ್ದಾರೆ.
ವಿದೇಶಗಳಿಗೂ ಗಣಪತಿ ಮೂರ್ತಿಗಳ ರವಾನೆ
ಈ ಅಂಗಡಿಯ ಗಣಪತಿ ಮೂರ್ತಿಗಳಿಗೆ ದೇಶದಲ್ಲಿ ಮಾತ್ರವಲ್ಲದೆ ವಿದೇಶಗಳಲ್ಲೂ ಬೇಡಿಕೆ ಇದೆ. ಅಮೆರಿಕ, ಸ್ವಿಟ್ಜರ್ಲೆಂಡ್ ಸೇರಿದಂತೆ ವಿವಿಧ ದೇಶಗಳಿಗೆ ಇಲ್ಲಿಂದ ಗಣಪತಿ ಮೂರ್ತಿಗಳನ್ನು ಕಳುಹಿಸಲಾಗುತ್ತಿದೆ.
ವಿದೇಶಗಳಲ್ಲಿ ನೆಲೆಸಿರುವ ಕನ್ನಡಿಗರು ಗಣಪತಿ ಮೂರ್ತಿಗಳನ್ನು ಪಡೆದು ಅಲ್ಲಿಯೇ ಕನ್ನಡ ಸಂಘಗಳ ನೇತೃತ್ವದಲ್ಲಿ ಗಣೇಶ ಹಬ್ಬವನ್ನು ಆಚರಿಸುತ್ತಿದ್ದಾರೆ. ಮೂರ್ತಿ ತಲುಪಿದ ಬಳಿಕ ಅಲ್ಲಿನ ಕನ್ನಡ ಸಂಘಗಳವರು ಕರೆ ಮಾಡಿ ಹಬ್ಬವನ್ನು ಸಂಭ್ರಮದಿಂದ ಆಚರಿಸಿರುವುದನ್ನು ತಿಳಿಸುತ್ತಾರೆ. ಇದು ನಮಗೆ ವಿಶೇಷ ಸಂತೋಷ ನೀಡುತ್ತದೆ ಎಂದು ಅಂಗಡಿ ಮಾಲೀಕರು ಸಂತಸ ವ್ಯಕ್ತಪಡಿಸಿದ್ದಾರೆ.
