ಪೋರ್ಚುಗಲ್ ತಂಡದ ನಾಯಕ ಕ್ರಿಸ್ಟಿಯಾನೊ ರೊನಾಲ್ಡೊ
FIFA World Cup 2026: ಕಾಂಗೋ ವಿರುದ್ಧ ಪೋರ್ಚುಗಲ್ ಡ್ರಾ; ರೊನಾಲ್ಡೊ ಸ್ವಾರ್ಥದ ಆಟಕ್ಕೆ ಹೆನ್ರಿ ಕಿಡಿ!
ತಾನು ಗೋಲು ಗಳಿಸಬೇಕು ಎಂಬ ಏಕೈಕ ಉದ್ದೇಶದಿಂದ ರೊನಾಲ್ಡೊ ಬ್ಯಾಕ್-ಪಾಸ್ ಹಾದಿಗೆ ಅಡ್ಡ ಬರುತ್ತಾರೆ. ಇದರಿಂದ ಎದುರಾಳಿಗಳಿಗೆ ರಕ್ಷಣೆ ಮಾಡುವುದು ಸುಲಭವಾಗುತ್ತದೆ ಎಂದು ಮಾಜಿ ಆಟಗಾರ ಹೆನ್ರಿ ತಿಳಿಸಿದ್ದಾರೆ.
ಕ್ರಿಸ್ಟಿಯಾನೊ ರೊನಾಲ್ಡೊ ನೇತೃತ್ವದ ಪೋರ್ಚುಗಲ್ ತಂಡವು ಬುಧವಾರ ನಡೆದ 2026ರ ಫಿಫಾ ವಿಶ್ವಕಪ್ನ ತನ್ನ ಆರಂಭಿಕ ಪಂದ್ಯದಲ್ಲಿ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ (ಡಿಆರ್ ಕಾಂಗೋ) ವಿರುದ್ಧ 1-1 ಗೋಲುಗಳ ನಿರಾಶಾದಾಯಕ ಡ್ರಾ ಸಾಧಿಸಿದೆ. ಇದರ ಬೆನ್ನಲ್ಲೇ ಮಾಜಿ ಆಟಗಾರರು ಹಾಗೂ ಫುಟ್ಬಾಲ್ ಅಭಿಮಾನಿಗಳು 41 ವರ್ಷದ ಸ್ಟ್ರೈಕರ್ ರೊನಾಲ್ಡೊ ಅವರ ಕಳಪೆ ಪ್ರದರ್ಶನ ಮತ್ತು ಅಹಂಕಾರದ ಆಟವೇ ತಂಡದ ಹಿನ್ನಡೆಗೆ ಕಾರಣ ಎಂದು ಕಿಡಿಕಾರಿದ್ದಾರೆ.
ರೊನಾಲ್ಡೊ ಸ್ವಾರ್ಥವನ್ನು ಟೀಕಿಸಿದ ಥಿಯೆರ್ರಿ ಹೆನ್ರಿ
ವಿಶ್ವಕಪ್ ಇತಿಹಾಸದಲ್ಲೇ ಅತ್ಯಂತ ಹಿರಿಯ ಔಟ್ಫೀಲ್ಡ್ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದ ರೊನಾಲ್ಡೊ, ತಂಡದ ಹಿತಾಸಕ್ತಿಗಿಂತ ತಮ್ಮ ವೈಯಕ್ತಿಕ ದಾಖಲೆಗೇ ಆದ್ಯತೆ ನೀಡಿದರು ಎಂದು ಫ್ರಾನ್ಸ್ನ ಮಾಜಿ ದಿಗ್ಗಜ ಥಿಯೆರ್ರಿ ಹೆನ್ರಿ ನೇರವಾಗಿ ವಾಗ್ದಾಳಿ ನಡೆಸಿದ್ದಾರೆ. ಇಡೀ ಪಂದ್ಯದಲ್ಲಿ ಕೇವಲ 25 ಟಚ್ಗಳನ್ನು ಮಾತ್ರ ಪಡೆದ ರೊನಾಲ್ಡೊ, ಗುರಿಯತ್ತ ಒಂದೇ ಒಂದು ನಿಖರ ಶಾಟ್ ಬಾರಿಸಲಾಗದೆ ವೈಫಲ್ಯ ಅನುಭವಿಸಿದರು. ಇದರೊಂದಿಗೆ ಪೋರ್ಚುಗಲ್ ಪರ ಅವರ ಗೋಲು ರಹಿತ ಬರ ಸತತ 10 ಪಂದ್ಯಗಳಿಗೆ ವಿಸ್ತರಿಸಿದೆ.
"ತಾನು ಗೋಲು ಗಳಿಸಬೇಕು ಎಂಬ ಏಕೈಕ ಉದ್ದೇಶದಿಂದ ರೊನಾಲ್ಡೊ ಬ್ಯಾಕ್-ಪಾಸ್ ಹಾದಿಗೆ ಅಡ್ಡ ಬರುತ್ತಾರೆ. ಇದರಿಂದ ಎದುರಾಳಿಗಳಿಗೆ ರಕ್ಷಣೆ ಮಾಡುವುದು ಸುಲಭವಾಗುತ್ತದೆ. ಇಲ್ಲಿ ಮುಖ್ಯವಾಗಿ ತಂಡ ಗೋಲು ಗಳಿಸಬೇಕೇ ಹೊರತು ನೀವಲ್ಲ" ಎಂದು ಫಾಕ್ಸ್ ಪ್ರಸಾರದಲ್ಲಿ ಹೆನ್ರಿ ಲೇವಡಿ ಮಾಡಿದ್ದಾರೆ.
ವಿಶೇಷವಾಗಿ ಪಂದ್ಯದ 68ನೇ ನಿಮಿಷದಲ್ಲಿ ಜೊವಾವೊ ಕ್ಯಾನ್ಸೆಲೊ ಮತ್ತು ಬ್ರೂನೋ ಫೆರ್ನಾಂಡಿಸ್ ಅವರ ಆಕ್ರಮಣಕಾರಿ ಮೂವ್ ವೇಳೆ ರೊನಾಲ್ಡೊ ಅನಗತ್ಯವಾಗಿ ಚೆಂಡಿನತ್ತ ಧಾವಿಸಿ, ಜಾಗವನ್ನು ಕಿಕ್ಕಿರಿದು ತುಂಬುವಂತೆ ಮಾಡಿದರು. ಇದು ಕಾಂಗೋದ ರಕ್ಷಣಾ ಕೋಟೆಗೆ ಸುಲಭವಾಗಿ ತಡೆಯೊಡ್ಡಲು ಸಹಾಯ ಮಾಡಿತು ಎಂದು ಹೆನ್ರಿ ವಿಶ್ಲೇಷಿಸಿದ್ದಾರೆ.
ಮೆಸ್ಸಿ ಹ್ಯಾಟ್ರಿಕ್ ಧಮಾಕಾ: ರೊನಾಲ್ಡೊ ಮೇಲೆ ಹೆಚ್ಚಿದ ಒತ್ತಡ
ಪೋರ್ಚುಗಲ್ ನಾಯಕನ ಮೇಲಿನ ಒತ್ತಡ ಹೆಚ್ಚಾಗಲು ಕೇವಲ 24 ಗಂಟೆಗಳ ಹಿಂದೆ ನಡೆದ ಲಿಯೋನೆಲ್ ಮೆಸ್ಸಿ ಅವರ ಅದ್ಭುತ ಪ್ರದರ್ಶನವೇ ಕಾರಣ ಎನ್ನಲಾಗುತ್ತಿದೆ. ಸಮಕಾಲೀನ ಶ್ರೇಷ್ಠತೆಯ ಚರ್ಚೆಯಲ್ಲಿರುವ ಮೆಸ್ಸಿ (ಅರ್ಜೆಂಟೀನಾ), ಕೈಲಿಯನ್ ಎಂಬಪ್ಪೆ (ಫ್ರಾನ್ಸ್) ಮತ್ತು ಎರ್ಲಿಂಗ್ ಹಾಲೆಂಡ್ (ನಾರ್ವೆ) ತಮ್ಮ ಆರಂಭಿಕ ಪಂದ್ಯಗಳಲ್ಲೇ ಕನಿಷ್ಠ ಎರಡು ಗೋಲು ಗಳಿಸಿ ಮಿಂಚಿದ್ದಾರೆ. ಅದರಲ್ಲೂ ಅಲ್ಜೀರಿಯಾ ವಿರುದ್ಧ ಹ್ಯಾಟ್ರಿಕ್ ಸಿಡಿಸಿದ 38 ವರ್ಷದ ಮೆಸ್ಸಿ, ವಿಶ್ವಕಪ್ ಇತಿಹಾಸದಲ್ಲಿ ಹ್ಯಾಟ್ರಿಕ್ ಗಳಿಸಿದ ಅತ್ಯಂತ ಹಿರಿಯ ಆಟಗಾರ ಎನಿಸಿಕೊಂಡರು. ಈ ಮೂಲಕ 2018ರಲ್ಲಿ ಸ್ಪೇನ್ ವಿರುದ್ಧ 33ನೇ ವಯಸ್ಸಿನಲ್ಲಿ ಹ್ಯಾಟ್ರಿಕ್ ಸಾಧನೆ ಮಾಡಿದ್ದ ರೊನಾಲ್ಡೊ ಅವರ ದಾಖಲೆಯನ್ನು ಮೆಸ್ಸಿ ಮುರಿದರು.
'ಯುವ ಆಟಗಾರರಿಗೆ ರೊನಾಲ್ಡೊ ಜಾಗ ಬಿಡಲಿʼ
ಘಾನಾ ಮಾಜಿ ಆಟಗಾರ ಕೆವಿನ್-ಪ್ರಿನ್ಸ್ ಬೋಟೆಂಗ್ ಮಾತನಾಡಿ, "ರೊನಾಲ್ಡೊ ನಿಜವಾದ ತಂಡದ ಆಟಗಾರನಾಗಿದ್ದರೆ ಈ ಕೂಡಲೇ ಸ್ಥಾನ ಬಿಟ್ಟುಕೊಟ್ಟು ಯುವ ಆಟಗಾರರಿಗೆ ದಾರಿ ಮಾಡಿಕೊಡಬೇಕಿತ್ತು. ರೊನಾಲ್ಡೊ ಇಲ್ಲದಿದ್ದರೆ ಪೋರ್ಚುಗಲ್ ಮತ್ತಷ್ಟು ಬಲಿಷ್ಠ ತಂಡವಾಗಲಿದೆ" ಎಂದು ಎಸ್ಬಿಎಸ್ ಸ್ಪೋರ್ಟ್ಸ್ಗೆ ತಿಳಿಸಿದ್ದಾರೆ. ಮತ್ತೊಂದೆಡೆ, ಮಾಜಿ ಇಂಗ್ಲೆಂಡ್ ಸ್ಟ್ರೈಕರ್ ಕ್ರಿಸ್ ಸುಟ್ಟನ್ ಅವರು ಮುಖ್ಯ ಕೋಚ್ ರಾಬರ್ಟೊ ಮಾರ್ಟಿನೆಜ್ ಅವರ ನಿರ್ಧಾರವನ್ನು ಟೀಕಿಸಿದ್ದು, ಕಳಪೆ ಪ್ರದರ್ಶನದ ಹೊರತಾಗಿಯೂ ರೊನಾಲ್ಡೊ ಅವರನ್ನು ಸಬ್ಸ್ಟಿಟ್ಯೂಟ್ ಮಾಡಲು ಕೋಚ್ ಹೆದರುತ್ತಿದ್ದಾರೆ ಎಂದು ಹೇಳಿದ್ದಾರೆ.
'ಮೆಸ್ಸಿ.. ಮೆಸ್ಸಿ..' ಘೋಷಣೆ
52 ವರ್ಷಗಳ ನಂತರ ವಿಶ್ವಕಪ್ಗೆ ಮರಳಿದ ಡಿಆರ್ ಕಾಂಗೋ ವಿರುದ್ಧ ಪೋರ್ಚುಗಲ್ ಡ್ರಾ ಮಾಡಿಕೊಳ್ಳುತ್ತಿದ್ದಂತೆ, ಕ್ರೀಡಾಂಗಣದಲ್ಲಿದ್ದ ಕಾಂಗೋ ಅಭಿಮಾನಿಗಳು ರೊನಾಲ್ಡೊ ಅವರನ್ನು ಕಾಡಲು "ಮೆಸ್ಸಿ, ಮೆಸ್ಸಿ" ಎಂದು ಘೋಷಣೆಗಳನ್ನು ಕೂಗಿದರು. ಪಂದ್ಯದ 6ನೇ ನಿಮಿಷದಲ್ಲೇ ಜೋವೊ ನೆವೆಸ್ ಗೋಲು ಗಳಿಸಿ ಪೋರ್ಚುಗಲ್ಗೆ 1-0 ಮುನ್ನಡೆ ತಂದುಕೊಟ್ಟಿದ್ದರು. ಆದರೆ, ಮೊದಲಾರ್ಧದ ಇಂಜುರಿ ಟೈಮ್ನಲ್ಲಿ ಡಿಆರ್ ಕಾಂಗೋದ ಯೋನೆ ವಿಸ್ಸಾ ಆಕರ್ಷಕ ಹೆಡರ್ ಮೂಲಕ ಗೋಲು ಬಾರಿಸಿ ಸ್ಕೋರ್ ಸಮಬಲಗೊಳಿಸಿದರು. ಪಂದ್ಯದ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಕಾಂಗೋ ಅಭಿಮಾನಿಗಳು ರೊನಾಲ್ಡೊ ಎದುರು ಮೆಸ್ಸಿ ಹೆಸರು ಕೂಗುವ ವೀಡಿಯೊಗಳು ವೈರಲ್ ಆಗಿವೆ.
ಇತಿಹಾಸದ ಹೊಸ್ತಿಲಲ್ಲಿ ರೊನಾಲ್ಡೊ
ಪೋರ್ಚುಗಲ್ ತಂಡವು ತನ್ನ ಮುಂದಿನ ಪಂದ್ಯಗಳಲ್ಲಿ ಜೂ. 23 ರಂದು ಹೂಸ್ಟನ್ನಲ್ಲಿ ಉಜ್ಬೇಕಿಸ್ತಾನ್ ಮತ್ತು ಜೂ. 27 ರಂದು ಮಿಯಾಮಿಯಲ್ಲಿ ಕೊಲಂಬಿಯಾವನ್ನು ಎದುರಿಸಲಿದೆ. 6ನೇ ವಿಶ್ವಕಪ್ ಆಡುತ್ತಿರುವ ರೊನಾಲ್ಡೊ ಮುಂದಿನ ಪಂದ್ಯಗಳಲ್ಲಿ ಗೋಲು ಗಳಿಸಿದರೆ, ವಿಶ್ವದಾದ್ಯಂತ ಸತತ ಆರು ವಿಶ್ವಕಪ್ ಆವೃತ್ತಿಗಳಲ್ಲಿ ಗೋಲು ಗಳಿಸಿದ ಮೊದಲ ಪುರುಷ ಆಟಗಾರ ಎಂಬ ಐತಿಹಾಸಿಕ ದಾಖಲೆ ಬರೆಯಲಿದ್ದಾರೆ. ಲಿಯೋನೆಲ್ ಮೆಸ್ಸಿ ಇದುವರೆಗೆ ಆಡಿದ ಆರು ವಿಶ್ವಕಪ್ಗಳಲ್ಲಿ ಐದರಲ್ಲಿ ಮಾತ್ರ ಗೋಲು ಗಳಿಸಿದ್ದಾರೆ (2010ರ ಆವೃತ್ತಿಯಲ್ಲಿ ಮೆಸ್ಸಿ ಗೋಲು ಗಳಿಸಿರಲಿಲ್ಲ). ರೊನಾಲ್ಡೊ ಸದ್ಯ ಪೋರ್ಚುಗಲ್ ಪರ 143 ಗೋಲು ಹಾಗೂ ವೃತ್ತಿಜೀವನದಲ್ಲಿ ಒಟ್ಟು 973 ಗೋಲುಗಳ ದಾಖಲೆ ಹೊಂದಿದ್ದಾರೆ.
