ಗೆಳತಿ ಮಹಿಕಾಗೆ 1.7 ಕೋಟಿ ರೂ. ಬೆಲೆಯ ಮರ್ಸಿಡಿಸ್ ಬೆಂಝ್ ಕಾರು ಉಡುಗೊರೆ ನೀಡಿದ ಹಾರ್ದಿಕ್ ಪಾಂಡ್ಯ!

ಟೀಮ್ ಇಂಡಿಯಾದ ಸ್ಟಾರ್ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಅವರು ತಮ್ಮ ವೈಯಕ್ತಿಕ ಜೀವನ ಹಾಗೂ ದುಬಾರಿ ಜೀವನಶೈಲಿಯ ಮೂಲಕ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ತಮ್ಮ ಪ್ರೇಯಸಿ ಮಹಿಕಾ ಶರ್ಮಾ ಅವರಿಗೆ ಬರೋಬ್ಬರಿ 1.7 ಕೋಟಿ ರೂಪಾಯಿ ಮೌಲ್ಯದ ಐಷಾರಾಮಿ 'ಮರ್ಸಿಡಿಸ್ ಬೆಂಝ್ ವಿ-ಕ್ಲಾಸ್ ಎಂಪಿವಿ' (Mercedes-Benz V-Class MPV) ಕಾರನ್ನು ಉಡುಗೊರೆಯಾಗಿ ನೀಡುವ ಮೂಲಕ ಪಾಂಡ್ಯ ಅಚ್ಚರಿ ಮೂಡಿಸಿದ್ದಾರೆ.

ವಿಶೇಷವೆಂದರೆ, ಇತ್ತೀಚೆಗಷ್ಟೇ ಮಾರುಕಟ್ಟೆಗೆ ಬಿಡುಗಡೆಯಾಗಿರುವ ಈ ಹೊಸ ಮಾಡೆಲ್‌ನ ಭಾರತದ ಮೊಟ್ಟಮೊದಲ ಕಾರು ಇದಾಗಿದೆ. ಕಪ್ಪು ಬಣ್ಣದ ಈ ಐಷಾರಾಮಿ ವ್ಯಾನ್‌ನ ಮುಂದೆ ನಿಂತು ಶೋರೂಮ್‌ನಲ್ಲಿ ಈ ಜೋಡಿಯು ಫೋಟೋಗೆ ಫೋಸ್ ನೀಡಿದ್ದು, ಈ ಚಿತ್ರಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ.

ಹೊಸ ರಿಲೇಶನ್‌ಶಿಪ್‌

2024ರಲ್ಲಿ ತಮ್ಮ ಪತ್ನಿ ನತಾಶಾ ಸ್ಟಾಂಕೋವಿಕ್ ಅವರಿಂದ ವಿಚ್ಛೇದನ ಪಡೆದು ದೂರವಾಗಿದ್ದ ಹಾರ್ದಿಕ್ ಪಾಂಡ್ಯ, 2026ರ ಆರಂಭದಿಂದಲೂ ನಟಿ ಮಹಿಕಾ ಶರ್ಮಾ ಅವರೊಂದಿಗೆ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇವರಿಬ್ಬರ ಡೇಟಿಂಗ್ ವಿಚಾರ ಬಿ-ಟೌನ್ ಹಾಗೂ ಕ್ರೀಡಾ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿತ್ತು. ಇದೀಗ ತಮ್ಮ ಪ್ರೇಯಸಿಗೆ ಮರ್ಸಿಡಿಸ್ ಬೆಂಝ್‌ನಂತಹ ದುಬಾರಿ ಉಡುಗೊರೆ ನೀಡುವ ಮೂಲಕ ಪಾಂಡ್ಯ ತಮ್ಮ ಪ್ರೀತಿಯನ್ನು ಜಗಜ್ಜಾಹೀರು ಮಾಡಿದ್ದಾರೆ.

ಐಷಾರಾಮಿ ಜೀವನಶೈಲಿ ಮತ್ತು ಆದಾಯ

ಹಾರ್ದಿಕ್ ಪಾಂಡ್ಯ ಅವರ ಈ ದುಬಾರಿ ಉಡುಗೊರೆಯು ಅವರ ಐಷಾರಾಮಿ ಜೀವನಶೈಲಿಗೆ ಮತ್ತೊಂದು ಉದಾಹರಣೆಯಾಗಿದೆ. ಐಪಿಎಲ್ ಕ್ರಿಕೆಟ್ ಹಾಗೂ ವಿವಿಧ ಬ್ರ್ಯಾಂಡ್‌ಗಳ ಜಾಹೀರಾತುಗಳಿಂದ ವಾರ್ಷಿಕ 15 ರಿಂದ 20 ಕೋಟಿ ರೂಪಾಯಿಗಳಿಗೂ ಅಧಿಕ ಆದಾಯ ಗಳಿಸುತ್ತಿರುವ ಪಾಂಡ್ಯ, ಇತ್ತೀಚೆಗಷ್ಟೇ ಬರೋಬ್ಬರಿ 12 ಕೋಟಿ ರೂಪಾಯಿ ಮೌಲ್ಯದ 'ಫೆರಾರಿ 12 ಸಿಲಿಂಡ್ರಿ' ಕಾರನ್ನು ಕೂಡ ಖರೀದಿಸಿದ್ದರು. ತಮ್ಮ ಸೂಪರ್ ಕಾರಿನಲ್ಲಿ ಗೆಳತಿ ಮಹಿಕಾ ಜೊತೆ ಸುತ್ತಾಡಿದ್ದ ವಿಡಿಯೋಗಳು ಕೂಡ ನೆಟ್‌ಲೋಕದಲ್ಲಿ ಹರಿದಾಡಿದ್ದವು. ಇದೀಗ ಗೆಳತಿಗೂ ಕೋಟಿ ಬೆಲೆಯ ಕಾರು ಕೊಡಿಸಿರುವುದು ಅವರ ವೈಭವೋಪೇತ ಜೀವನವನ್ನು ತೋರುತ್ತದೆ.

ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್

ಈ ಉಡುಗೊರೆಯ ವಿಚಾರವು ಸಾಮಾಜಿಕ ಜಾಲತಾಣ 'ಎಕ್ಸ್' (X) ನಲ್ಲಿ ಭಾರಿ ವೈರಲ್ ಆಗಿದ್ದು, ಕೆಲವೇ ಗಂಟೆಗಳಲ್ಲಿ 12,000ಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ನೆಟ್ಟಿಗರು ಈ ಜೋಡಿಗೆ ಶುಭಾಶಯ ಕೋರುತ್ತಿದ್ದಾರೆ. ಅದೇ ರೀತಿ, ಹಲವರು ಪಾಂಡ್ಯ ಅವರ ಐಷಾರಾಮಿ ಖರ್ಚುಗಳ ಬಗ್ಗೆ ಹಾಸ್ಯಮಯವಾಗಿ ಹಾಗೂ ಆಶ್ಚರ್ಯದಿಂದ ಪ್ರತಿಕ್ರಿಯಿಸುತ್ತಿದ್ದಾರೆ. ಭಾರತೀಯ ಕ್ರೀಡಾ ತಾರೆಗಳ ಐಷಾರಾಮಿ ಜೀವನ ಮತ್ತು ಪ್ರೇಮಕಥೆಗಳು ಅಭಿಮಾನಿಗಳಲ್ಲಿ ಯಾವಾಗಲೂ ಕುತೂಹಲ ಕೆರಳಿಸುತ್ತವೆ ಎಂಬುದಕ್ಕೆ ಇದು ತಾಜಾ ಉದಾಹರಣೆಯಾಗಿದೆ.