ಟ್ರೋಫಿಯೊಂದಿಗೆ ಚಾಂಪಿಯನ್ಷಿಪ್ ವಿಜೇತರು.
34ನೇ ರಾಷ್ಟ್ರೀಯ ಟೆನ್ಪಿನ್ ಬೌಲಿಂಗ್: ಕಿಶನ್ಗೆ 2ನೇ ಬಾರಿ ಪ್ರಶಸ್ತಿ
ಮಹಿಳಾ ವಿಭಾಗದ ಸ್ಟೆಪ್ಲ್ಯಾಡರ್ ಸುತ್ತಿನಲ್ಲಿ ಪ್ರೀಮಲ್ ಜೆ (357) ಅವರು ಮಹಾರಾಷ್ಟ್ರದ 3ನೇ ಸೀಡ್ ಶಬೀನಾ ಕಸ್ಮಾನಿ (338) ಅವರನ್ನು ಸೋಲಿಸಿದ್ದರು.
ನಗರದ ಚರ್ಚ್ ಸ್ಟ್ರೀಟ್ನಲ್ಲಿರುವ ಅಮೀಬಾದಲ್ಲಿ ಶನಿವಾರ (ಮಾ. 14) ಅಂತ್ಯಗೊಂಡ ‘ಎಆರ್ಸಿ 34ನೇ ರಾಷ್ಟ್ರೀಯ ಟೆನ್ಪಿನ್ ಬೌಲಿಂಗ್ ಚಾಂಪಿಯನ್ಶಿಪ್’ನಲ್ಲಿ ಕರ್ನಾಟಕದ ಬೌಲರ್ಗಳು ಪಾರುಪತ್ಯ ಮೆರೆದಿದ್ದಾರೆ. ಪುರುಷರ ವಿಭಾಗದಲ್ಲಿ ಮಾಜಿ ರಾಷ್ಟ್ರೀಯ ಚಾಂಪಿಯನ್ ಕಿಶನ್ ಆರ್. ತಮ್ಮ ಎರಡನೇ ರಾಷ್ಟ್ರೀಯ ಪಟ್ಟವನ್ನು ಮುಡಿಗೇರಿಸಿಕೊಂಡರೆ,
ಮಹಿಳಾ ವಿಭಾಗದಲ್ಲಿ ಪ್ರೀಮಲ್ ಜೆ. ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ. ಪ್ರೀಮಲ್ ಅವರ ಈ ಸಾಧನೆಯೊಂದಿಗೆ, ಮಹಿಳಾ ವಿಭಾಗದಲ್ಲಿ ಬರೋಬ್ಬರಿ 15 ವರ್ಷಗಳ ಸುದೀರ್ಘ ಕಾಯುವಿಕೆಯ ಬಳಿಕ ಕರ್ನಾಟಕಕ್ಕೆ ರಾಷ್ಟ್ರೀಯ ಪ್ರಶಸ್ತಿ ಒಲಿದಿದೆ.
ಪುರುಷರ ಫೈನಲ್: ಆಕಾಶ್ಗೆ ಮಣಿಸಿದ ಕಿಶನ್
ಎರಡು ಗೇಮ್ಗಳ ಒಟ್ಟು ಪಿನ್ಫಾಲ್ ಆಧಾರದ ಮೇಲೆ ನಡೆದ ಪುರುಷರ ವಿಭಾಗದ ಚಾಂಪಿಯನ್ಶಿಪ್ (ಫೈನಲ್) ಪಂದ್ಯದಲ್ಲಿ, ಟಾಪ್ ಸೀಡ್ ಆಟಗಾರ ಕಿಶನ್ ಆರ್. ಅವರು ಆಕಾಶ್ ವಿರುದ್ಧ ಭರ್ಜರಿ ಜಯ ಸಾಧಿಸಿದರು. ಮೊದಲ ಗೇಮ್ನಲ್ಲಿ 208 – 191 ಅಂಕಗಳೊಂದಿಗೆ 17 ಪಿನ್ಗಳ ಮುನ್ನಡೆ ಸಾಧಿಸಿದ ಕಿಶನ್, ಎರಡನೇ ಗೇಮ್ನಲ್ಲಿ 244 ಅಂಕಗಳನ್ನು ಗಳಿಸಿದರು (ಆಕಾಶ್ 238 ಅಂಕ). ಅಂತಿಮವಾಗಿ ಒಟ್ಟು 452 – 429 ಅಂಕಗಳ (23 ಪಿನ್ಗಳ ಅಂತರ) ಆಧಾರದ ಮೇಲೆ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
ಇದಕ್ಕೂ ಮೊದಲು ನಡೆದ ಪುರುಷರ ವಿಭಾಗದ ಸ್ಟೆಪ್ಲ್ಯಾಡರ್ ಸುತ್ತಿನಲ್ಲಿ 3ನೇ ಸೀಡ್ ಆಕಾಶ್ ಅಶೋಕ್ ಕುಮಾರ್ (358) ಅವರು 4ನೇ ಸೀಡ್ ಶಣ್ಮುಗಾನಂದ (308) ಅವರನ್ನು ಮಣಿಸಿದ್ದರು. ಆ ಬಳಿಕ ನಡೆದ ಪಂದ್ಯದಲ್ಲಿ 476 ಅಂಕಗಳನ್ನು ಗಳಿಸಿ, 2ನೇ ಸೀಡ್ ಧ್ರುವ್ ಸಾರ್ದಾ (374) ಅವರನ್ನು ಬರೋಬ್ಬರಿ 102 ಪಿನ್ಗಳ ಅಂತರದಿಂದ ಸೋಲಿಸಿ ಫೈನಲ್ ಪ್ರವೇಶಿಸಿದ್ದರು.
ಮಹಿಳಾ ಫೈನಲ್: ಪ್ರೀಮಲ್ಗೆ ಒಲಿದ ಚೊಚ್ಚಲ ಪಟ್ಟ
ಮಹಿಳಾ ವಿಭಾಗದ ಫೈನಲ್ ಪಂದ್ಯದಲ್ಲಿ 4ನೇ ಸೀಡ್ ಪ್ರೀಮಲ್ ಜೆ, ತಮಿಳುನಾಡಿನ ಟಾಪ್ ಸೀಡ್ ಆಟಗಾರ್ತಿ ಸಬೀನಾ ಅಥಿಕಾ ಅವರನ್ನು ಮಣಿಸಿ ತಮ್ಮ ಚೊಚ್ಚಲ ರಾಷ್ಟ್ರೀಯ ಪಟ್ಟವನ್ನು ಗೆದ್ದರು. ಮೊದಲ ಗೇಮ್ನಲ್ಲಿ ಪ್ರೀಮಲ್ 188 ಅಂಕಗಳನ್ನು ಗಳಿಸಿ, ಸಬೀನಾ (168 ಅಂಕ) ಅವರಿಗಿಂತ 20 ಪಿನ್ಗಳ ಮುನ್ನಡೆ ಪಡೆದರು. ಎರಡನೇ ಗೇಮ್ನಲ್ಲಿ ತೀವ್ರ ಪೈಪೋಟಿ ಏರ್ಪಟ್ಟರೂ, ಒತ್ತಡ ನಿಭಾಯಿಸಿದ ಪ್ರೀಮಲ್ ಒಟ್ಟು 332 – 308 ಅಂಕಗಳೊಂದಿಗೆ (24 ಪಿನ್ಗಳ ಅಂತರ) ಜಯಭೇರಿ ಬಾರಿಸಿದರು.
ಮಹಿಳಾ ವಿಭಾಗದ ಸ್ಟೆಪ್ಲ್ಯಾಡರ್ ಸುತ್ತಿನಲ್ಲಿ ಪ್ರೀಮಲ್ ಜೆ (357) ಅವರು ಮಹಾರಾಷ್ಟ್ರದ 3ನೇ ಸೀಡ್ ಶಬೀನಾ ಕಸ್ಮಾನಿ (338) ಅವರನ್ನು ಸೋಲಿಸಿದ್ದರು. ನಂತರ ಹರಿಯಾಣದ 2ನೇ ಸೀಡ್ ಅನುಕೃತಿ ಬಿಶ್ನೋಯಿ ಅವರನ್ನು 422 – 409 ಅಂಕಗಳಿಂದ ಮಣಿಸಿ ಫೈನಲ್ಗೆ ಲಗ್ಗೆಯಿಟ್ಟಿದ್ದರು.
ಚಾಂಪಿಯನ್ಶಿಪ್ನ ವಿಶೇಷ ಪ್ರಶಸ್ತಿಗಳು
* ಮೋಸ್ಟ್ ಪ್ರಾಮಿಸಿಂಗ್ ಪ್ಲೇಯರ್: ಅನಿರುದ್ಧನ್ ಸಂಜೀವಿ (ತಮಿಳುನಾಡು) ಮತ್ತು ಸುಚಿತಾ ಎಸ್ ಕುಮಾರ್ (ಕೇರಳ)
* ಪುರುಷರ ವಿಭಾಗದಲ್ಲಿ 225ಕ್ಕೂ ಹೆಚ್ಚು ಅಂಕಗಳ ಗೇಮ್ಗಳ ಸಂಖ್ಯೆ: ಕಿಶನ್ ಆರ್ (ಕರ್ನಾಟಕ) – 11
* ಮಹಿಳಾ ವಿಭಾಗದಲ್ಲಿ 200ಕ್ಕೂ ಹೆಚ್ಚು ಅಂಕಗಳ ಗೇಮ್ಗಳ ಸಂಖ್ಯೆ: ಸಬೀನಾ ಅಥಿಕಾ (ತಮಿಳುನಾಡು) – 4
* ಪುರುಷರ ವಿಭಾಗದಲ್ಲಿ 6 ಗೇಮ್ಗಳ ಅತ್ಯಧಿಕ ಬ್ಲಾಕ್: ಕಿಶನ್ ಆರ್ (ಕರ್ನಾಟಕ) – 1369 ಪಿನ್ಗಳು
* ಮಹಿಳಾ ವಿಭಾಗದಲ್ಲಿ 6 ಗೇಮ್ಗಳ ಅತ್ಯಧಿಕ ಬ್ಲಾಕ್: ಸಬೀನಾ ಅಥಿಕಾ (ತಮಿಳುನಾಡು) – 1122 ಪಿನ್ಗಳು
