ವಿಶ್ವಾಸಾರ್ಹತೆಗೆ ಧಕ್ಕೆ ತಂದ ಅದಾನಿ-ಎಲ್ಐಸಿ ಸಖ್ಯ: ಪಾಲಿಸಿದಾರರಿಗಿಲ್ಲ ಅಪಾಯ

ಹಿಂಡನ್‌ಬರ್ಗ್ ವರದಿ ಹೊರಬಿದ್ದು ಸರಿಸುಮಾರು ಮೂರು ವರ್ಷಗಳು ಗತಿಸಿವೆ. ಮತ್ತು ಅಮೆರಿಕನ್ ಶಾರ್ಟ್ ಸೆಲ್ಲರ್ ತನ್ನ ಕಾರ್ಯಾಚರಣೆಯನ್ನು ಕೊನೆಗೊಳಿಸಿದೆ. ಇಷ್ಟಾಗಿಯೂ ಅದಾನಿ ಸಮೂಹವು ಇನ್ನೂ ವಿವಾದವನ್ನು ಸೃಷ್ಟಿಸುವುದರಲ್ಲಿ ಹಿಂದೆ ಬಿದ್ದಿಲ್ಲ.

ಈ ನಡುವೆ ವಾಷಿಂಗ್ಟನ್ ಪೋಸ್ಟ್ ಪತ್ರಿಕೆಯ ಇತ್ತೀಚಿನ ವರದಿಯು ಹೊಸ ಸಂಗತಿಯೊಂದನ್ನು ಬಯಲುಮಾಡಿದೆ.

ಅದಾನಿ ಸಮೂಹದ ಬಾಂಡ್ ಸಮಸ್ಯೆಯನ್ನು ಪಾರುಮಾಡಲು ಕೇಂದ್ರ ಹಣಕಾಸು ಸಚಿವಾಲಯವು ಭಾರತದ ಪ್ರಧಾನ ಜೀವವಿಮಾ ಸಂಸ್ಥೆ ಎಲ್.ಐ.ಸಿಯನ್ನು ಬಳಸಿಕೊಂಡಿದೆ ಎಂದು ಅವರು ಆರೋಪಿಸಿದೆ. ಇದೀಗ ಹೊಸ ವಿವಾದಕ್ಕೆ ಕಾರಣವಾಗಿದೆ.

ಮಾಲೀಕನೆಂಬ ನೆಲೆಯಲ್ಲಿ...

ಇದರ ಪರಿಣಾಮವಾಗಿ ಎರಡು ರೀತಿಯ ಪ್ರಶ್ನೆಗಳು ಇಲ್ಲಿ ಉದ್ಭವಿಸುತ್ತವೆ, ಮೊದಲನೆಯದೆಂದರೆ, ಹೆಚ್ಚು ಆಕರ್ಷಕವಾದ, ವಿಮರ್ಶಕರು ಎತ್ತಿರುವ ಅಂಶವೆಂದರೆ, ಈಗ ಬಹಿರಂಗವಾದ ಸಂಗತಿಯು ಸ್ವಜನಪಕ್ಷಪಾತದ ಮತ್ತೊಂದು ನಿದರ್ಶನವೇ? (ಅದರ ಅರ್ಥ ಏನೇ ಇರಲಿ). ಕೇಂದ್ರ ಹಣಕಾಸು ಸಚಿವಾಲಯವು ಎಲ್.ಐ.ಸಿಗೆ ತಾನು ‘ಮಾಲೀಕ’ ಎಂಬ ನೆಲೆಯಲ್ಲಿ ಪ್ರಮುಖ ವ್ಯಾಪಾರ ಮಿತ್ರನಿಗೆ ಅನುಕೂಲ ಮಾಡಲು ತನ್ನ ನಿಯಂತ್ರಣದ ಶಕ್ತಿಯನ್ನು ಬಳಸಿಕೊಂಡಿತೇ?

ಎಲ್ಲಕ್ಕಿಂತ ಮುಖ್ಯವಾಗಿ ಎರಡನೇ ಪ್ರಶ್ನೆಯನ್ನು ಕೇಳಲೇಬೇಕು, ಯಾಕೆಂದರೆ ಇದು ಹಣಕಾಸು ಜಗತ್ತಿನಲ್ಲಿ ಹುಟ್ಟಿಕೊಂಡ ಸಾಮಾನ್ಯ ಕಳವಳದ ಸಂಗತಿಯಾಗಿದೆ. ಈ ಕ್ರಮದಿಂದ ಪಾಲಿಸಿದಾರರಿಗೆ ಅಪಾಯ ಕಾದಿದೆಯೇ? ಎಲ್.ಐ.ಸಿಯ ಬಹುಪಾಲು ಪಾಲಿಸಿದಾರರು ಬಡವರು ಮತ್ತು ಮಧ್ಯಮವರ್ಗದವರು. ಈ ಪ್ರವರ್ತಕ ಸಂಸ್ಥೆಯ ಜೀವ ವಿಮಾ ಪಾಲಿಸಿಯನ್ನು ಪಡೆದುಕೊಳ್ಳಲು ನಂಬಿಕೆಯೇ ಬಹಳ ಮುಖ್ಯ ಕಾರಣ ಎಂಬುದು ಮಹತ್ವವನ್ನು ಪಡೆಯುತ್ತದೆ.

ಈ ಎರಡು ವಿಭಿನ್ನ ವಿಷಯಗಳನ್ನು (ಸ್ವಜನಪಕ್ಷಪಾತ ಮತ್ತು ಪಾಲಿಸಿದಾರರ ಅಪಾಯ) ಮಿಶ್ರಣ ಮಾಡಿರುವುದೇ ಹೆಚ್ಚಿನ ಮಾಧ್ಯಮಗಳು ಮಾಡಿರುವ ವಿಶ್ಲೇಷಣೆಯ ಮೂಲ. ಈ ಹಿನ್ನೆಲೆಯಲ್ಲಿ, ಮೊದಲು 'ದಿ ಪೋಸ್ಟ್' (ವಾಷಿಂಗ್ಟನ್ ಪೋಸ್ಟ್) ಮಾಡಿದ ಆರೋಪಗಳನ್ನು ವಿಶ್ಲೇಷಿಸೋಣ.

ಅದಾನಿ ಬಾಂಡ್‌ಗಳು

ಆಂತರಿಕ ದಾಖಲೆಗಳನ್ನು ಉಲ್ಲೇಖಿಸಿ, ಈ ವರ್ಷದ ಮೇ ತಿಂಗಳಲ್ಲಿ, ಹಣಕಾಸು ಸಚಿವಾಲಯದ ಹಣಕಾಸು ಸೇವೆಗಳ ಇಲಾಖೆಯು, ಅದಾನಿ ಸಮೂಹದ ಕಂಪನಿಗಳು ವಿತರಿಸಿದ 3.9 ಬಿಲಿಯನ್ ಡಾಲರ್ (33,000 ಕೋಟಿ ರೂ.) ಮೌಲ್ಯದ ಬಾಂಡ್‌ಗಳಲ್ಲಿ ಎಲ್.ಐ.ಸಿ ಹೂಡಿಕೆ ಮಾಡುವಂತೆ ಒಂದು ಯೋಜನೆಯನ್ನು ರೂಪಿಸಿತು ಎಂದು ವಾಷಿಂಗ್ಟನ್ ಪೋಸ್ಟ್ ಆರೋಪಿಸಿದೆ.

ಲೇಖನದ ಪ್ರಕಾರ, ಆ ಕಾಲಘಟ್ಟವು ಮಹತ್ವದ್ದಾಗಿತ್ತು, ಏಕೆಂದರೆ ಸಮೂಹವು ಇನ್ನೂ ಹಿಂಡನ್‌ಬರ್ಗ್ ದಾಳಿಯ ನಂತರದ ಪರಿಣಾಮಗಳಿಂದ ಹೊರಬರಲು ಹೆಣಗಾಡುತ್ತಿತ್ತು.

2023ರಲ್ಲಿ, ಅದಾನಿ ಸಮೂಹವು ಬಹಳ ದೊಡ್ಡ ಸಾಲದ ಕೂಪಡಲ್ಲಿ ಮುಳುಗಿದೆ ಮತ್ತು ತನ್ನ ಷೇರುಗಳ ಮೌಲ್ಯವನ್ನು ಕೃತಕವಾಗಿ ಹೆಚ್ಚಿಸಲು ಸಂಪರ್ಕಿತ ಪಾರ್ಟಿಗಳ ನಡುವಿನ ಷೇರು ವಹಿವಾಟುಗಳ ಜಾಲವನ್ನು ಬಳಸಿಕೊಂಡಿದೆ ಎಂದು ಹಿಂಡನ್‌ಬರ್ಗ್ ಆರೋಪಿಸಿತ್ತು, ಇದರಿಂದಾಗಿಯೇ ಅವರಿಗೆ ಇನ್ನಷ್ಟು ಸಾಲವನ್ನು ಪಡೆಯಲು ಸಾಧ್ಯವಾಯಿತು. ಮುಖ್ಯವಾಗಿ, ಸಾಗರೋತ್ತರದಲ್ಲಿರುವ ಕೆಲವು ಹೂಡಿಕೆದಾರರ ಅಸ್ಪಷ್ಟ ಗುರುತಿನ ಮೇಲೆ ಕೇಂದ್ರೀಕೃತವಾಗಿದ್ದವು, ಇದು ಭದ್ರತಾ ಮಾರುಕಟ್ಟೆ ನಿಯಮಗಳಿಗೆ ಸಂಬಂಧಿಸಿದ KYI ಬಹಿರಂಗಪಡಿಸುವ ಮಾನದಂಡಗಳ ಗಂಭೀರ ಉಲ್ಲಂಘನೆಯಾಗಿತ್ತು ಎಂಬುದು ಗಂಭೀರ ಆರೋಪಗಳಾಗಿವೆ.

ಆ ಬಳಿಕ ವಿವಾದದ ಸುಳಿಯು ಸ್ವಲ್ಪಮಟ್ಟಿಗೆ ಶಾಂತವಾಗಿತ್ತು, ಮುಖ್ಯವಾಗಿ ಭಾರತೀಯ ಭದ್ರತೆ ಮತ್ತು ವಿನಿಮಯ ಮಂಡಳಿ (SEBI), ನ್ಯಾಯಾಲಯಗಳು ಮತ್ತು ಸರ್ಕಾರ ಎಲ್ಲರೂ ಯಾವುದೋ ಒಂದು ರೀತಿಯಲ್ಲಿ ಅದಾನಿಗಳಿಗೆ ಕ್ಲೀನ್ ಚಿಟ್ ನೀಡಿದಂತೆ ಭಾಸವಾಯಿತು.

ಆದರೆ ಈ ಪರಿಹಾರವು ಅಲ್ಪಕಾಲಿಕವಾಗಿತ್ತು. 2024ರಲ್ಲಿ, ಅಮೆರಿಕ ಕಾನೂನು ಜಾರಿ ಸಂಸ್ಥೆಗಳಿಂದ ಅದಾನಿ ಸಮೂಹವು ಹೊಸ ಆರೋಪಗಳನ್ನು ಎದುರಿಸಿತು. ಸಂಸ್ಥೆಗಳು ಸಮೂಹದ ಮುಖ್ಯಸ್ಥ ಗೌತಮ್ ಅದಾನಿ ಮತ್ತು ಅವರ ಸಹವರ್ತಿಗಳ ವಿರುದ್ಧ ಲಂಚ, ವಂಚನೆ ಮತ್ತು ಇತರ ಭ್ರಷ್ಟಾಚಾರದ ಆರೋಪಗಳನ್ನು ಹೊರಿಸಿದವು. ಈ ಸಂದರ್ಭದಲ್ಲಿಯೇ ಹಣಕಾಸು ಸಚಿವಾಲಯವು ಅದಾನಿ ಸಮೂಹವನ್ನು ಪಾರುಮಾಡಲು ಪ್ರಯತ್ನ ನಡೆಸಿತು ಎಂದು ಪೋಸ್ಟ್ ಆರೋಪಿಸಿದೆ.

ಅಸಾಧಾರಣ ಬೆಂಬಲ

ಅದೇ ತಿಂಗಳಲ್ಲಿ (ಮೇ 30, 2025), ಅದಾನಿ ಸಮೂಹದ ಬಂದರುಗಳ ಅಂಗಸಂಸ್ಥೆಯು ವಿತರಿಸಿದ 585 ಮಿಲಿಯನ್ ಡಾಲರ್ (ಸುಮಾರು 4,950 ಕೋಟಿ ರೂ.) ಬಾಂಡ್ ವಿತರಣೆಗೆ ಎಲ್ಐಸಿ ಏಕೈಕ ಚಂದಾದಾರರಾಗಿ ಕಾಣಿಸಿಕೊಂಡಿತು ಎಂಬುದು ಸತ್ಯ. ಈ ವಿತರಣೆಯು ಅಸ್ತಿತ್ವದಲ್ಲಿರುವ ಸಾಲವನ್ನು ಮರುಹಣಕಾಸು ಮಾಡಲು ಉದ್ದೇಶಿಸಲಾಗಿತ್ತು ಎಂಬುದು ಮೇಲ್ನೋಟಕ್ಕೆ ಕಾಣಿಸುತ್ತದೆ.

ಈ ಚರ್ಚೆಗಳಲ್ಲಿ ಹಣಕಾಸು ಸಚಿವಾಲಯ, ನೀತಿ ಆಯೋಗ ಮತ್ತು ಎಲ್ಐಸಿ ಭಾಗವಹಿಸಿದ್ದವು ಎಂದು ಪೋಸ್ಟ್ ಆರೋಪಿಸಿದೆ. ಪೋಸ್ಟ್ ಉಲ್ಲೇಖಿಸಿದಂತೆ, ಹಣಕಾಸು ಸಚಿವಾಲಯವು ಗೌತಮ್ ಅದಾನಿಯನ್ನು "ದೂರದೃಷ್ಟಿಯ ಉದ್ಯಮಿ" ಎಂದು ಶ್ಲಾಘಿಸಿ ಅವರನ್ನು ಸಂಕಷ್ಟದಿಂದ ಪಾರುಮಾಡಿರುವುದನ್ನು ಸಮರ್ಥಿಸಿಕೊಂಡಿದೆ.

ಪೋಸ್ಟ್ ಪ್ರಕಾರ, ಸಚಿವಾಲಯವು ತನ್ನ ಕಾರ್ಯತಂತ್ರದ ಉದ್ದೇಶಗಳು "ಅದಾನಿ ಸಮೂಹದಲ್ಲಿ ವಿಶ್ವಾಸವನ್ನು ಗಟ್ಟಿಗೊಳಿಸುವುದೇ" ಆಗಿತ್ತು ಎಂದು ಹೇಳಿದೆ.

ಅತ್ಯಂತ ಮಹತ್ವದ ವಿಷಯವೆಂದರೆ, ಹಣಕಾಸು ಸಚಿವಾಲಯವು ಈ ಯೋಜನೆಯನ್ನು ಮೇಲ್ನೋಟಕ್ಕೆ "ಇತರ ಹೂಡಿಕೆದಾರರು ಭಾಗವಹಿಸುವುದನ್ನು ಉತ್ತೇಜಿಸಲು" ಎಂದು ಸಮರ್ಥಿಸಿಕೊಂಡಿದೆ ಎಂದು ಹೇಳಲಾಗಿದೆ.

ಹಣಕಾಸು ಸಚಿವಾಲಯದ ಈ ಕ್ರಮಗಳು, ಅವು ನಿಜವೇ ಆಗಿದ್ದರೆ, ಖಂಡಿತವಾಗಿಯೂ ಅಸಾಮಾನ್ಯವಾಗಿವೆ. ಬಂದರುಗಳು, ರಸ್ತೆಗಳು, ವಿಮಾನ ನಿಲ್ದಾಣಗಳು, ಸಿಮೆಂಟ್ ಮತ್ತು ದತ್ತಾಂಶ ಕೇಂದ್ರಗಳಂತಹ (ಗೂಗಲ್ ಸಹಯೋಗದೊಂದಿಗೆ) ಭಾರತೀಯ ಮೂಲಸೌಕರ್ಯದ ದೊಡ್ಡ ವಲಯಗಳಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿರುವ ಈ ಉದ್ಯಮ ಸಮೂಹವನ್ನು ಬೆಂಬಲಕ್ಕೆ ಅರ್ಹವೆಂದು ಸಚಿವಾಲಯವು ಭಾವಿಸಿದ್ದರೂ ಅದಾನಿಯನ್ನು "ದೂರದೃಷ್ಟಿಯವರು" ಎಂದು ಕರೆಯುವ ಅಧಿಕಾರಶಾಹಿ ಭಾಷೆಯನ್ನು ಏಕೆ ಬಳಸಬೇಕು? ಎಲ್ಐಸಿಗೆ "ಅದಾನಿ ಸಮೂಹದಲ್ಲಿ ವಿಶ್ವಾಸವನ್ನು ಸಂಕೇತಿಸಲು" ಒತ್ತಾಯಿಸುವ ಮೂಲಕ ಮತ್ತಷ್ಟು ವಿವಾದವನ್ನು ಏಕೆ ಸೃಷ್ಟಿಸಬೇಕು?

ವಾಸ್ತವವಾಗಿ, ಹಣಕಾಸು ಸಚಿವಾಲಯವು ಎಲ್ಐಸಿಗೆ ಭಾರತೀಯ ರಿಸರ್ವ್ ಬ್ಯಾಂಕ್ ಪರವಾಗಿ ಅದು ವಿತರಿಸುವ ತನ್ನದೇ ಆದ ಭದ್ರತೆಗಳಿಗಿಂತ ಅದಾನಿ ಬಾಂಡ್‌ಗಳು ಗಣನೀಯವಾಗಿ ಹೆಚ್ಚು ಆಕರ್ಷಕವಾಗಿವೆ ಎಂದು ಸಲಹೆ ನೀಡಿದೆ ಎಂದು ಪೋಸ್ಟ್ ಆರೋಪಿಸಿದೆ.

ಭವ್ಯ ಹೂಡಿಕೆದಾರನಾದ LIC

ಭಾರತದ ಪ್ರಧಾನ ವಿಮಾ ಸಂಸ್ಥೆಯ ವ್ಯವಹಾರಗಳನ್ನು ಗಮನಿಸಿದವರಿಗೆ ತಿಳಿದಿರುವ ವಿಷಯವೇನೆಂದರೆ, ಇಂದಿಗೂ ಸಹ, ಎಲ್ಐಸಿಯ ಹೂಡಿಕೆಗಳಲ್ಲಿ ಬಹುಪಾಲು ಇರುವುದು ಸರ್ಕಾರಿ ಸೆಕ್ಯುರಿಟಿಗಳೇ ಆಗಿವೆ. ಅದರ ಪೋರ್ಟ್‌ಫೋಲಿಯೊದಲ್ಲಿ ಇರುವ ಈ ಮಿಶ್ರಣವು ಅದರ ಗ್ರಾಹಕರ ಮಿಶ್ರಣವನ್ನು ಪ್ರತಿಬಿಂಬಿಸುತ್ತದೆ. ಅದರ ಪಾಲಿಸಿದಾರರಲ್ಲಿ ಬಹುಪಾಲು ಜನರು "ಸಣ್ಣ ಮೊತ್ತದ" ಜೀವ ವಿಮಾ ಪಾಲಿಸಿಗಳಿಗೆ ಚಂದಾದಾರರಾಗಿದ್ದಾರೆ. ಅವರಿಗೆ, ಹೆಚ್ಚಿನ ಅಪಾಯದೊಂದಿಗೆ ಕೂಡಿರುವ ಹೆಚ್ಚಿನ ಲಾಭದ ಭ್ರಮೆಗಿಂತ, ಸುರಕ್ಷತೆ ಮತ್ತು ಭದ್ರತೆಯೇ ಹೆಚ್ಚು ಮುಖ್ಯ.

ಪೋಸ್ಟ್ನ ಆರೋಪದ ಪ್ರಕಾರ, ಈ ನಡೆಯ ಹಿಂದಿನ ಸಂಭವನೀಯ ವಿವರಣೆ ಏನೆಂದರೆ, ಮಾರುಕಟ್ಟೆ ಹೂಡಿಕೆದಾರರು ಅದಾನಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಲು ಹಿಂಜರಿಯುತ್ತಿದ್ದ ಸಮಯದಲ್ಲಿ, ಇತರ ದೇಶೀಯ ಮತ್ತು ವಿದೇಶಿ ಹೂಡಿಕೆದಾರರನ್ನು ಸೆಳೆಯಲು ಸಚಿವಾಲಯವು ಎಲ್ಐಸಿಯನ್ನು ಒಂದು ಭವ್ಯವಾದ 'ಮಾರ್ಕ್ಯೂ ಇನ್ವೆಸ್ಟರ್' (ಪ್ರಮುಖ ಹೂಡಿಕೆದಾರ) ಆಗಿ ಬಳಸಿಕೊಂಡಿತು.

ನಿಜವಾಗಿಯೂ, ಎಲ್ಐಸಿಯು ಮೇ ತಿಂಗಳಲ್ಲಿ ಅದಾನಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಿದ ನಂತರ ನಡೆದದ್ದು ಇದೇ. ಎಲ್ಐಸಿ ಕೈಗೊಂಡ ಈ ಕ್ರಮದ ತಿಂಗಳೊಳಗೆ, ಅಮೆರಿಕ ಮೂಲದ ಅಥೀನ್ ಇನ್ಶೂರೆನ್ಸ್ ಕಂಪನಿಯು ಅದಾನಿ ಪೋರ್ಟ್ಸ್‌ನಿಂದ ವಿತರಿಸಿದ 750 ಮಿಲಿಯನ್ ಡಾಲರ್ ಮೌಲ್ಯದ ಬಾಂಡ್‌ಗಳಿಗೆ ಚಂದಾದಾರಿಕೆಯನ್ನು ಪಡೆಯಿತು.

ಮಾಧ್ಯಮ ವರದಿಗಳು ಸೂಚಿಸುವಂತೆ, 2025 ರಮೇ ತಿಂಗಳಲ್ಲಿ ಎಲ್ಐಸಿ ಬಾಂಡ್ ಖರೀದಿಸಿದ ನಂತರ, ಅದಾನಿ ಸಮೂಹವು ಕನಿಷ್ಠ ಹತ್ತು ಬಿಲಿಯನ್ ಡಾಲರ್ ಮೌಲ್ಯದ ಬಾಂಡ್‌ಗಳನ್ನು ವಿತರಿಸಿದೆ. ಅದಾನಿ ಸಮೂಹದ ಕನಿಷ್ಠ 13,750 ಕೋಟಿ ರೂ (1.625 ಬಿಲಿಯನ್ ಡಾಲರ್) ಮೌಲ್ಯದ ಬಾಂಡ್‌ಗಳಿಗೆ ದೇಶೀಯ ಹೂಡಿಕೆದಾರರು ಚಂದಾದಾರರಾಗಿದ್ದಾರೆ. ಇವರಲ್ಲಿ ಮ್ಯೂಚುವಲ್ ಫಂಡ್‌ಗಳು, ವಿಮಾ ಕಂಪನಿಗಳು ಮತ್ತು ಬ್ಯಾಂಕ್‌ಗಳು ಸೇರಿವೆ.

ಭರ್ಜರಿ ಜೀವನಿಧಿ

ಇತ್ತೀಚಿನ ವಿವಾದದ ನಂತರ ಬಂದಿರುವ ಹೆಚ್ಚಿನ ಮಾಧ್ಯಮ ವಿಶ್ಲೇಷಣೆಗಳು, ಒಂದು ಸಂಸ್ಥೆಯಾಗಿ ಎಲ್ಐಸಿಯ ನಿರ್ದಿಷ್ಟ ಸ್ವರೂಪ, ಪ್ರಮಾಣ ಮತ್ತು ಮಹತ್ವದ ಬಗ್ಗೆ ಅಜ್ಞಾನ ಮೂಡಿಸುತ್ತವೆ.

ಒಟ್ಟಾರೆಯಾಗಿ ಮಾರುಕಟ್ಟೆಯಲ್ಲಿ ಎಲ್ಐಸಿ ಕೇವಲ ಒಂದು ಹೂಡಿಕೆದಾರನಾಗಿರಲಿಲ್ಲ, ಅಥವಾ ಈ ಬಾಂಡ್‌ಗಳು ಕೇವಲ ಮತ್ತೊಂದು ವ್ಯವಹಾರದ ಅವಕಾಶಗಳಾಗಿರಲಿಲ್ಲ.

ಅದಾನಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಿದ ಇತರ ದೇಶೀಯ ಸಂಸ್ಥೆಗಳಲ್ಲಿ ಪ್ರಮುಖ ಸಾರ್ವಜನಿಕ ವಲಯದ ಬ್ಯಾಂಕ್ ಎಸ್‌ಬಿಐ, ಅಥವಾ ಐಸಿಐಸಿಐ ಅಥವಾ ಎಚ್‌ಡಿಎಫ್‌ಸಿಯಂತಹ ಖಾಸಗಿ ಬ್ಯಾಂಕ್‌ಗಳ ಹೂಡಿಕೆ ನಿಧಿಗಳು ಎಲ್ಐಸಿ ಜೊತೆಗೆಗೆ ಪೈಪೋಟಿಗೆ ಇಳಿಯುವಷ್ಟು ಬೃಹತ್ ಆಗಿಲ್ಲ ಎಂಬುದನ್ನು ಗಮನಿಸಿ. ವಿಮಾ ಪ್ರೀಮಿಯಂಗಳು ಹರಿದುಬರುವ ಮತ್ತು ಎಲ್ಲಾ ಬಾಧ್ಯತೆಗಳನ್ನು ಪೂರೈಸಬೇಕಾದ ಬೃಹತ್ ನಿಧಿಯಾಗಿರುವ ಎಲ್ಐಸಿಯ ಜೀವ ನಿಧಿ (Life Fund), 2024ರ ಮಾರ್ಚ್ ವೇಳೆಗೆ ಬರೋಬ್ಬರಿ ₹47.85 ಲಕ್ಷ ಕೋಟಿಯಷ್ಟಿತ್ತು ಎಂಬುದನ್ನು ಗಮನಿಸಬೇಕು.

ಯಾವುದೇ ಭಾರತೀಯ ಹಣಕಾಸು ಸಂಸ್ಥೆ ಅಥವಾ ಜಗತ್ತಿನ ಯಾವುದೇ ಜೀವ ವಿಮಾ ಸಂಸ್ಥೆಯು ಎಲ್ಐಸಿ ಹೊಂದಿರುವಂತಹ ಪ್ರಭಾವವನ್ನು ಹೊಂದಿಲ್ಲ. ಕಳೆದ ಕೆಲವು ವರ್ಷಗಳಲ್ಲಿ ವಾರ್ಷಿಕವಾಗಿ ಸುಮಾರು ಶೇ.10ರಷ್ಟು ಪ್ರಮಾಣದಲ್ಲಿ ಬೆಳೆಯುತ್ತಿರುವ ಈ ನಿಧಿಯೇ ಎಲ್ಐಸಿಗೆ ಮಾರುಕಟ್ಟೆಯಲ್ಲಿ ಇಂತಹ ಬೃಹತ್ ಶಕ್ತಿಯನ್ನು ಒದಗಿಸುತ್ತದೆ.

ಹೀಗಾಗಿ, ಎಲ್ಐಸಿಯಂತಹ ಒಂದು ಸಂಸ್ಥೆಯು ಸರ್ಕಾರದಿಂದ ಅದಾನಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಲು ಒತ್ತಾಯಿಸಲ್ಪಟ್ಟಾಗ, ಆರಂಭದಲ್ಲಿ ಹಿಂಜರಿಯುತ್ತಿದ್ದ ಇತರ ಹೂಡಿಕೆದಾರರು ಈಗ ಸಮೂಹದ ಇದೇ ರೀತಿಯ ಆಫರ್‌ಗಳ ಕಡೆಗೆ ಆಕರ್ಷಿತರಾಗುತ್ತಾರೆ.

ಈ ನಡೆ ಸರಿಯೇ?

ಎಲ್ಐಸಿಯು ವಾಷಿಂಗ್ಟನ್ ಪೋಸ್ಟ್ ವರದಿಯನ್ನು ತಳ್ಳಿಹಾಕಿದೆ ಮತ್ತು ಪತ್ರಿಕೆಯು ಆರೋಪಿಸಿದ ಯೋಜನೆಯಲ್ಲಿ ತನ್ನ ಪಾಲ್ಗೊಳ್ಳುವಿಕೆಯನ್ನು ತೋರಿಸುವ ಯಾವುದೇ ದಾಖಲೆಯ ಅಸ್ತಿತ್ವವನ್ನು ನಿರಾಕರಿಸಿದೆ. ತನ್ನ ಹೂಡಿಕೆಗಳು ಸಂಪೂರ್ಣವಾಗಿ ತನ್ನ ನಿರ್ದೇಶಕರ ಮಂಡಳಿಯ ನಿರ್ಧಾರಗಳ ಮೇಲೆ ಆಧಾರಿತವಾಗಿವೆ ಎಂದು ಅದು ಪ್ರತಿಪಾದಿಸಿದೆ.

ಈ ವಿವಾದಕ್ಕೆ ಸಂಬಂಧಿಸಿ ವರದಿಗಳ ಕುರಿತಂತೆ ಅತ್ಯಂತ ಪ್ರಮುಖ ಪ್ರಶ್ನೆಯನ್ನು ಭಾರತೀಯ ಮಾಧ್ಯಮಗಳು ಕೇಳಬೇಕಾಗಿತ್ತು: ಭಾರತದ ಅತಿದೊಡ್ಡ ಹಣಕಾಸು ಘಟಕದ ವ್ಯವಹಾರದ ನಿರ್ಧಾರಗಳನ್ನು ಸರ್ಕಾರ ಏಕೆ ನಿರ್ದೇಶಿಸಬೇಕು? ಅದಾನಿ ಸಮೂಹದಲ್ಲಿ ಎಲ್ಐಸಿಯ ಹೂಡಿಕೆಗಳು ವ್ಯವಹಾರದ ದೃಷ್ಟಿಯಿಂದ ಸರಿಯಾಗಿದೆ ಎಂಬ ಸಲಹೆಯು ಇಲ್ಲಿ ಅಪ್ರಸ್ತುತ.

ಅದಾನಿ ಸಮೂಹದಲ್ಲಿ ಎಲ್ಐಸಿಯ ಹೂಡಿಕೆಗಳು ITC, ಟಾಟಾ ಅಥವಾ ರಿಲಯನ್ಸ್ ನಂತಹ ಇತರ ಸಮೂಹಗಳಲ್ಲಿನ ತನ್ನ ಹೂಡಿಕೆಗಳ ಒಂದು ಭಾಗವಷ್ಟೇ ಎಂಬ ಸಲಹೆಯೂ ಇಲ್ಲಿ ಅಪ್ರಸ್ತುತ. ಇದಕ್ಕೆ ಸರಳ ಕಾರಣವೇನೆಂದರೆ, ಈ ಇತರ ಸಮೂಹಗಳು ಹಲವು ದಶಕಗಳಷ್ಟು ಹಳೆಯವು. ಈ ಘಟಕಗಳಲ್ಲಿ ಎಲ್ಐಸಿಯ ಹಳೆಯ ಹೂಡಿಕೆಗಳು ಬಹಳ ದೀರ್ಘಾವಧಿಯಲ್ಲಿ ರೂಪಿಸಲ್ಪಟ್ಟಿವೆ. ಇದಕ್ಕೆ ವಿರುದ್ಧವಾಗಿ, ಅದಾನಿ ಸಮೂಹದ ದಿಢೀರ್ ಬೆಳವಣಿಗೆಯು 2014ರಲ್ಲಿ ನರೇಂದ್ರ ಮೋದಿ ಅವರು ಅಧಿಕಾರಕ್ಕೆ ಬಂದ ಅವಧಿಯ ಜೊತೆಗೆ ತಳಕು ಹಾಕಿಕೊಂಡಿದೆ.

ಪಾಲಿಸಿದಾರರ ಹಿತಾಸಕ್ತಿ

ಈಗ, ಇನ್ನೊಂದು ಪ್ರಮುಖ ಪ್ರಶ್ನೆಯ ಕಡೆಗೆ ಗಮನ ಹರಿಸೋಣ: ಎಲ್ಐಸಿಯ ಈ ಹೂಡಿಕೆಗಳು ಅದರ ಪಾಲಿಸಿದಾರರಿಗೆ ಒಡ್ಡಿರುವ ಬೆದರಿಕೆಯೇ?

ಎಲ್ಐಸಿಯ ಬಗ್ಗೆ ತಿಳಿದಿರುವವರ ಪ್ರಕಾರ ಸಂಕ್ಷಿಪ್ತ ಉತ್ತರವೆಂದರೆ, ಇಲ್ಲ, ಕನಿಷ್ಠ ತಕ್ಷಣಕ್ಕಂತೂ ಇಲ್ಲ.

ಅಖಿಲ ಭಾರತ ವಿಮಾ ನೌಕರರ ಸಂಘದ (ಭಾರತದ ವೈಟ್ ಕಾಲರ್ ಕೆಲಸಗಾರರ ಅತಿದೊಡ್ಡ ಒಕ್ಕೂಟ) ಮಾಜಿ ಅಧ್ಯಕ್ಷರಾದ ಅಮಾನುಲ್ಲಾ ಖಾನ್ ಅವರು ಎಲ್ಐಸಿ ಪಾಲಿಸಿದಾರರು ಚಿಂತಿಸಬೇಕಾಗಿಲ್ಲ ಎಂಬುದಕ್ಕೆ ಮೂರು ಮುಖ್ಯ ಕಾರಣಗಳನ್ನು ನೀಡುತ್ತಾರೆ:

1. ವೈವಿಧ್ಯಮಯ ಹೂಡಿಕೆಗಳ ಪೋರ್ಟ್‌ಫೋಲಿಯೊ (Diversified Portfolio)

ಸಂಸ್ಥೆಯು ಹೊಂದಿರುವ ಹಣಕಾಸು ಸ್ವತ್ತುಗಳ ವೈವಿಧ್ಯಮಯ ಪೋರ್ಟ್‌ಫೋಲಿಯೊ ಸೀಮಿತ ಪ್ರಮಾಣದ ಆಸ್ತಿಗಳಿಂದ ಉಂಟಾಗುವ ಅಪಾಯಕ್ಕೆ ಪ್ರತಿಯಾಗಿ ಒಂದು ರೀತಿಯ ವಿಮೆಯನ್ನು ಒದಗಿಸುತ್ತದೆ.

ಖಾನ್ ಅವರ ಪ್ರಕಾರ, ಎಲ್ಐಸಿ ಸುಮಾರು 350 ಭಾರತೀಯ ಕಂಪನಿಗಳಲ್ಲಿ ಹೂಡಿಕೆ ಮಾಡುತ್ತದೆ. ಇದು ಭಾರತದ ಲಿಸ್ಟ್ ಮಾಡಲಾದ ಘಟಕಗಳ ಒಟ್ಟು ಮಾರುಕಟ್ಟೆ ಬಂಡವಾಳೀಕರಣದ ಸುಮಾರು ಶೇ.4ರಷ್ಟು ಪಾಲನ್ನು ಹೊಂದಿದೆ. ಹೀಗೆ, ಅದರ ಹೂಡಿಕೆಗಳ ವೈವಿಧ್ಯಮಯ ಸ್ವರೂಪವು ಅಪಾಯವನ್ನು ಬಹುಮಟ್ಟಿಗೆ ತಗ್ಗಿಸುತ್ತದೆ ಎಂದು ಖಾನ್ ಪ್ರತಿಪಾದಿಸುತ್ತಾರೆ.

ಅಮಾನುಲ್ಲಾ ಖಾನ್ ಅವರ ಪ್ರಕಾರ, ಎಲ್ಐಸಿಯ ಹೂಡಿಕೆ ಪ್ರಕ್ರಿಯೆಗಳು "ಪರಿಶೀಲನೆ ಮತ್ತು ಸಮತೋಲನ"ಗಳಿಂದ ಕೂಡಿದ್ದು ಬಲಿಷ್ಠವಾಗಿದೆ.

3. ಸಾರ್ವಭೌಮ ಖಾತರಿ– ಅತಿ ಮುಖ್ಯ ವೈಶಿಷ್ಟ್ಯ

ಮೂರನೇ ಹಾಗೂ ಅತ್ಯಂತ ಪ್ರಮುಖ ವೈಶಿಷ್ಟ್ಯವೆಂದರೆ: ಎಲ್ಐಸಿಯು ನೀಡಿದ ಪ್ರತಿಯೊಂದು ಜೀವ ವಿಮಾ ಪಾಲಿಸಿಯು ಸಾರ್ವಭೌಮ ಖಾತರಿಯನ್ನು ಪಡೆಯುತ್ತದೆ. ಬೇರೆ ಯಾವುದೇ ವಿಮಾ ಸಂಸ್ಥೆಯು ನೀಡುವ ಪಾಲಿಸಿಯು ಈ ಪ್ರಯೋಜನವನ್ನು ಹೊಂದಿರುವುದಿಲ್ಲ. ಸರ್ಕಾರವು ಪ್ರತಿಯೊಂದು ಪಾಲಿಸಿಯ ವಿಮಾ ಮೊಬಲಗನ್ನು (sum assured) ಮಾತ್ರವಲ್ಲದೆ, ಸಂಚಿತ ವಾರ್ಷಿಕ ಬೋನಸ್‌ಗಳನ್ನು ಕೂಡ ಖಾತರಿಪಡಿಸುತ್ತದೆ.

ವಿಶಿಷ್ಟ ಐತಿಹಾಸಿಕ ಸಂದರ್ಭ

ಸಹಜವಾಗಿ, ಎಲ್ಐಸಿಯ ಶಕ್ತಿ ಮತ್ತು ಸೃಜನಶೀಲತೆಗೆ ಸಾಕ್ಷಿಯಾಗುವ ಪ್ರಮುಖ ಸಂಗತಿ ಎಂದರೆ, 1956ರಲ್ಲಿ ಎಲ್ಐಸಿ ಜನ್ಮ ತಾಳಿದಾಗಿನಿಂದ ಈವರೆಗೆ ಅಂತಹ ಸಾರ್ವಭೌಮ ಖಾತರಿಯನ್ನು ಒಂದೇ ಒಂದು ಬಾರಿಯೂ ಬಳಸುವ ಅಗತ್ಯ ಎದುರಾಗಿಲ್ಲ. ಎಲ್ಐಸಿ ಜನ್ಮ ತಳೆದ ವಿಶಿಷ್ಟ ಐತಿಹಾಸಿಕ ಸಂದರ್ಭದಲ್ಲಿ ಸಾರ್ವಭೌಮ ಖಾತರಿಯನ್ನು ನೋಡಬೇಕಾಗಿದೆ ಎಂದು ಅಮಾನುಲ್ಲಾ ಖಾನ್ ಅವರು ಪ್ರತಿಪಾದಿಸುತ್ತಾರೆ.

1956ರಲ್ಲಿ, ಎಲ್ಐಸಿಯನ್ನು 245 ಖಾಸಗಿ ವಿಮಾ ಕಂಪನಿಗಳನ್ನು ವಿಲೀನಗೊಳಿಸುವ ಮೂಲಕ ರಚನೆ ಮಾಡಲಾಯಿತು. ಇವುಗಳಲ್ಲಿ ಹಲವು ಕಂಪನಿಗಳು ವಿಶ್ವಾಸಾರ್ಹವಲ್ಲದ ಅಥವಾ ಅಲ್ಪಾವಧಿಗೆ ಕಾರ್ಯನಿರ್ವಹಿಸುತ್ತಿದ್ದ ಸಂಸ್ಥೆಗಳಾಗಿದ್ದವು.

ಸಾರ್ವಭೌಮ ಖಾತರಿಯನ್ನು ನೀಡುವ ಅವಶ್ಯಕತೆ ಇತ್ತು, ಏಕೆಂದರೆ ಅದು ಕೇವಲ ಆ ಸಂಸ್ಥೆಗಳ ವಿಶ್ವಾಸಾರ್ಹತೆಯ ಬಗ್ಗೆ ಇದ್ದ ಅನುಮಾನವನ್ನು ಹೋಗಲಾಡಿಸಲು ಮಾತ್ರವಲ್ಲದೆ, ಭದ್ರತೆಯ ಬೇರೆ ಯಾವುದೇ ಮಾರ್ಗವಿಲ್ಲದ ಸಮಾಜದಲ್ಲಿ ಜೀವ ವಿಮಾ ವ್ಯವಹಾರದ ವಿಸ್ತರಣೆಯನ್ನು ಉತ್ತೇಜಿಸಲು ಸಹ ಅಗತ್ಯವಾಗಿತ್ತು.

ವಿಶಿಷ್ಟ ಹೂಡಿಕೆ ವಿಧಾನ

2024-25 ರಲ್ಲಿ, ಎಲ್ಐಸಿಯ ಒಟ್ಟು ಹೂಡಿಕೆಗಳು 57 ಲಕ್ಷ ಕೋಟಿ ರೂ.ಗಳಷ್ಟಿದ್ದವು, ಇವು ಪಾಲಿಸಿದಾರರು ಒದಗಿಸಿದ ನಿಧಿಗಳು. ಸಂಸ್ಥೆಯು ನೀಡುವ ಪ್ರತಿ ಮೂರು ಪಾಲಿಸಿಗಳಲ್ಲಿ ಸುಮಾರು ಎರಡು ಪಾಲಿಸಿಗಳು ಎಲ್ಐಸಿಯಿಂದಲೇ ಬರುತ್ತವೆ. ಇದು ಭಾರತೀಯ ವಿಮಾ ಮಾರುಕಟ್ಟೆಯಲ್ಲಿ ಶೇ. 57 ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದಿದೆ. ಇದು ಸರ್ಕಾರಿ ಸಾಲಗಳ ಅರ್ಧಕ್ಕಿಂತ ಹೆಚ್ಚು ಹಣವನ್ನು ಹೊಂದಿದೆ.

ಎಲ್ಐಸಿಯ ಒಟ್ಟು ಹೂಡಿಕೆಗಳಲ್ಲಿ ಸರ್ಕಾರಿ ಸಾಲ ಮತ್ತು ಕಾರ್ಪೊರೇಟ್ ಬಾಂಡ್‌ಗಳ ಪ್ರಮಾಣವು ಶೇ.77ರಷ್ಟಿದೆ ಎಂದು ಅಮಾನುಲ್ಲಾ ಖಾನ್ ಅವರು ಹೇಳುತ್ತಾರೆ. ಈ ವಾಸ್ತವ ಸಂಗತಿಯು, ಎಲ್ಐಸಿಯನ್ನು ಕೇವಲ ಒಂದು ಸಾಮಾನ್ಯ ಹೂಡಿಕೆದಾರನಂತೆ ಪರಿಗಣಿಸುವ ಹೆಚ್ಚಿನ ವೀಕ್ಷಣೆಗಳ ನಡವಳಿಕೆಯನ್ನು ಪ್ರಶ್ನಿಸುತ್ತದೆ.

ಅಮಾನುಲ್ಲಾ ಖಾನ್ ಹೇಳುವಂತೆ, ಎಲ್ಐಸಿಯು ಒಂದು "ವಿಭಿನ್ನ" ವಿಧಾನವನ್ನು ಹೊಂದಿದೆ. ಅಂದರೆ, ಇತರ ಹೂಡಿಕೆದಾರರಿಗೆ ಭಿನ್ನವಾಗಿ ಇದು ದೀರ್ಘಾವಧಿಯ ಮೇಲೆ ತನ್ನ ದೃಷ್ಟಿ ಇರಿಸುತ್ತದೆ. ಇದು ಸಾಮಾನ್ಯವಾಗಿ ಸೆಕ್ಯುರಿಟಿಗಳ ಬೆಲೆಗಳು ಕುಸಿದಾಗ ಅವುಗಳನ್ನು ಖರೀದಿಸುತ್ತದೆ. ನಂತರ, ಪಾಲಿಸಿದಾರರಿಗಾಗಿ ಹೆಚ್ಚುವರಿ ಲಾಭಗಳನ್ನು ಸೃಷ್ಟಿಸಲು, ಸರಿಯಾದ ಸಮಯದಲ್ಲಿ ಸಣ್ಣ ಪ್ರಮಾಣದ ಮಾರಾಟವನ್ನು ಮಾಡಿ ಲಾಭ ಗಳಿಸುತ್ತದೆ.

ಈ ಕಾರ್ಯತಂತ್ರವು ಸಂಸ್ಥೆಯ ಪಾಲಿಗೆ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತದೆ, ಯಾಕೆಂದರೆ ಇದು ಜೀವ ವಿಮಾ ವ್ಯವಹಾರದಲ್ಲಿ ಸಾಮಾನ್ಯವಾಗಿ ಇರುವ ತನ್ನ ದೀರ್ಘಾವಧಿಯ ಬಾಧ್ಯತೆಗಳೊಂದಿಗೆ (ಪಾಲಿಸಿದಾರರಿಗೆ ನೀಡಬೇಕಾದ ಪಾವತಿಗಳು) ಹೊಂದಿಕೆಯಾಗುತ್ತದೆ.

“ಪೋಸ್ಟ್ ಉಲ್ಲೇಖಿಸಿರುವ ನಷ್ಟಗಳು ಕೇವಲ ಭಾವನಾತ್ಮಕವಾಗಿವೆ ಎಲ್ಐಸಿ ಯಾವುದೇ ನಷ್ಟ ಅನುಭವಿಸಿಲ್ಲ,” ಎಂದು ಅಮಾನುಲ್ಲಾ ಖಾನ್ ವಾದಿಸುತ್ತಾರೆ.

ಎಲ್ಲಿ ಹೂಡಿಕೆ ಮಾಡಬೇಕು?

ಎಲ್ಐಸಿಯ ಇತ್ತೀಚಿನ ವಾರ್ಷಿಕ ವರದಿ (2024-25) ಹೇಳುವಂತೆ, 2023-24 ಮತ್ತು 2024-25ರ ನಡುವೆ ಸಂಸ್ಥೆಯ ಹೂಡಿಕೆಯು ಸುಮಾರು ಮೂರು ಲಕ್ಷ ಕೋಟಿಯಷ್ಟು ಹೆಚ್ಚಾಗಿದೆ. ಇದರಲ್ಲಿ ಬಹುಪಾಲು, ಅಂದರೆ ಶೇ. 86.5 ರಷ್ಟು, ಪಾಲಿಸಿದಾರರಿಂದ ಸಂಗ್ರಹಿಸಿದ ನಿಧಿಗಳ ಸಂಚಯದಿಂದ ಸಾಧ್ಯವಾದ ಹೂಡಿಕೆಗಳಿಂದ ಬಂದಿದೆ.

ಹಾಗಾದರೆ, ಪ್ರತಿ ವರ್ಷ ಈ ಪ್ರಮಾಣದ ಹಣವನ್ನು ಹೂಡಿಕೆ ಮಾಡಬೇಕಾದ LIC ಯಂತಹ ಬೃಹತ್ ಸಂಸ್ಥೆಯು ತನ್ನ ದೀರ್ಘಾವಧಿಯ ಬಾಧ್ಯತೆಗಳಿಗೆ, ವಿಶೇಷವಾಗಿ ಪಾಲಿಸಿದಾರರಿಗೆ ಹೊಂದಿಕೆಯಾಗುವ ಆದಾಯವನ್ನು ಗಳಿಸಲು ಎಲ್ಲಿಗೆ ಹೋಗಿ ಹೂಡಿಕೆ ಮಾಡುತ್ತದೆ?

ದುರದೃಷ್ಟವಶಾತ್, ಕಳೆದ ಎರಡು ದಶಕಗಳಲ್ಲಿ ದೀರ್ಘಾವಧಿಯ ಮೆಚ್ಯೂರಿಟಿ ಹೊಂದಿರುವ ಬಾಂಡ್‌ಗಳಂತಹ ಸೂಕ್ತ ಸಾಧನಗಳ ಕೊರತೆಯ ಬಗ್ಗೆ ಸಾಕಷ್ಟು ಚರ್ಚೆಯಾಗಿದ್ದರೂ, ಏನೂ ಬದಲಾವಣೆ ಏನೂ ಆಗಿಲ್ಲ. ಇದರ ಪರಿಣಾಮವಾಗಿ, ಎಲ್ಐಸಿಯಂತಹ ಸಂಸ್ಥೆಯು, ತನ್ನ ಸ್ವತ್ತುಗಳು ಮತ್ತು ಬಾಧ್ಯತೆಗಳನ್ನು ದೀರ್ಘಾವಧಿಯಲ್ಲಿ ಹೊಂದಿಸಲು 30-ವರ್ಷದ ಸಾಲ ಸಾಧನದಂತಹ ಸಂಗತಿಯನ್ನು ತೀವ್ರವಾಗಿ ಬಯಸುತ್ತದೆ (ಇದು ಜೀವ ವಿಮಾ ಉತ್ಪನ್ನದ ಶ್ರೇಷ್ಠ ಉದಾಹರಣೆ), ಅದು ಕಾರ್ಪೊರೇಟ್ ಬಾಂಡ್‌ಗಳಂತಹ ಇತರ ಮಾರ್ಗಗಳತ್ತ ತಿರುಗಲು ಒತ್ತಡಕ್ಕೆ ಒಳಗಾಗುತ್ತದೆ.

ಆದರೂ ಸಹ, ಅದರ ಹೂಡಿಕೆಗಳ ಅತ್ಯಂತ ಮಹತ್ವದ ಭಾಗವು ಇನ್ನೂ ಸರ್ಕಾರಿ ಬೆಂಬಲಿತ ಸೆಕ್ಯುರಿಟಿಗಳಲ್ಲಿ ಇದೆ ಎಂಬ ಅಂಶದಿಂದಾಗಿ ಈ ಅಪಾಯವು ದೊಡ್ಡ ಮಟ್ಟಿಗೆ ತಗ್ಗಿದೆ.

“ಅದಾನಿ ಭಾರತದಲ್ಲಿ ಸ್ವಜನಪಕ್ಷಪಾತದ ಶ್ರೇಷ್ಠ ಉದಾಹರಣೆ ಎಂಬುದರಲ್ಲಿ ಯಾವುದೇ ಸಂದೇಹವಿಲ್ಲ, ಆದರೆ ಈ ಇತ್ತೀಚಿನ ಕ್ರಮವು ಪಾಲಿಸಿದಾರರಿಗೆ ಅಪಾಯ ಉಂಟುಮಾಡುತ್ತದೆಯೇ ಎಂಬ ಪ್ರಶ್ನೆಯಿಂದ ಈ ವಿಷಯವನ್ನು ಪ್ರತ್ಯೇಕಿಸಬೇಕು,” ಎಂದು ಅಮಾನುಲ್ಲಾ ಖಾನ್ ಬೊಟ್ಟು ಮಾಡುತ್ತಾರೆ.

ತಮ್ಮ ಯೂನಿಯನ್ ಇಷ್ಟಪಟ್ಟರೂ ಇಲ್ಲದಿದ್ದರೂ, ಎಲ್ಐಸಿಯು "ಪ್ರಸ್ತುತ ವ್ಯವಸ್ಥೆಯ"ಲ್ಲಿ ಕಾರ್ಯ ನಿರ್ವಹಿಸಬೇಕಾದ ವಾಸ್ತವಕ್ಕೆ ಬದ್ಧವಾಗಿದೆ. ಸ್ವಜನಪಕ್ಷಪಾತದ ವಿರುದ್ಧ ಹೋರಾಡುವುದು ಒಂದು ದೊಡ್ಡ ರಾಜಕೀಯ ಹೋರಾಟದ ಭಾಗವಾಗಿದೆ, ಇದರಿಂದ ತಮ್ಮ ಯೂನಿಯನ್ ಎಂದಿಗೂ ಹಿಂದೆ ಸರಿದಿಲ್ಲ ಎಂದು ಅವರು ಪ್ರತಿಪಾದಿಸುತ್ತಾರೆ. ಆದರೆ, ಪಾಲಿಸಿದಾರರಲ್ಲಿ ಭೀತಿಯನ್ನು ಸೃಷ್ಟಿಸುವುದು ಸಂಸ್ಥೆಗೆ ದೊಡ್ಡ ಅಪಚಾರ ಮಾಡಿದಂತೆ ಎಂದು ಅವರು ಹೇಳುತ್ತಾರೆ.

ಮೇಲ್ವಿಚಾರಣೆಯ ತೀವ್ರ ಅವಶ್ಯಕತೆ

ಎಲ್ಐಸಿಯ "ಮಾಲೀಕ"ರಾಗಿ, ಹಣಕಾಸು ಸಚಿವಾಲಯವು ಎಲ್ಐಸಿಯ ವ್ಯವಹಾರಗಳಲ್ಲಿ ಪ್ರಭಾವ ಬೀರುವುದು ಅನಿವಾರ್ಯ. ಏಕೆಂದರೆ, ತನ್ನ "ಮಾಲೀಕತ್ವದ" ಕಾರಣದಿಂದಾಗಿ ಅದು ಎಲ್ಐಸಿ ಮಂಡಳಿಯಲ್ಲಿ ಗಣನೀಯ ಅಸ್ತಿತ್ವವನ್ನು ಹೊಂದಿದೆ.

ಎಲ್ಐಸಿಯು ಸಂಸತ್ತಿನ ಪರಿಶೀಲನೆಗೆ ಒಳಪಟ್ಟಿದ್ದಾಗ, ಸಾರ್ವಜನಿಕ ಪರಿಶೀಲನೆಯು ದುರುದ್ದೇಶಪೂರಿತ ಕ್ರಮಗಳನ್ನು ನಿಯಂತ್ರಣದಲ್ಲಿ ಇಡಲು ಸಹಾಯ ಮಾಡುತ್ತದೆ ಎಂಬ ಭರವಸೆ ಇತ್ತು. ಆದರೆ, 2022ರ ಐಪಿಓಗಿಂತ ಸ್ವಲ್ಪ ಮೊದಲು, ಅದನ್ನು ಕಂಪನಿಯಾಗಿ ಪರಿವರ್ತಿಸಿದಾಗಿನಿಂದ, ಈ ನಿಯಂತ್ರಣಗಳನ್ನು ತೆಗೆದುಹಾಕಲಾಗಿದೆ.

ಲಕ್ಷಾಂತರ ಭಾರತೀಯರ ಮೇಲಿರುವ ಅದರ ವಿಶ್ವಸನೀಯ ಕರ್ತವ್ಯಗಳ ಗಾಂಭೀರ್ಯತೆಯನ್ನು ಉತ್ತಮವಾಗಿ ಪ್ರತಿಬಿಂಬಿಸುವ, ಹೆಚ್ಚು ಉತ್ತರದಾಯಿಯಾದ ಪ್ರಕ್ರಿಯೆಯನ್ನು ಮರುಸ್ಥಾಪಿಸುವ ತುರ್ತು ಅಗತ್ಯವಿದೆ.