ಇರಾನ್ ಸಮರ ತಂತ್ರ ಬಳಸಿದ ಉಕ್ರೇನ್: ರಷ್ಯಾದ ಗಟ್ಟಿಗುಂಡಿಗೆಗೇ ಪ್ರಚಂಡ ಪೆಟ್ಟು!

ರಷ್ಯಾ ಮತ್ತು ಉಕ್ರೇನ್‌ ನಡುವೆ ಕದನ ಆರಂಭವಾಗಿ ಸುಮಾರು ನಾಲ್ಕೈದು ವರ್ಷಗಳೇ ಗತಿಸಿ ಹೋಗಿವೆ. ಈಗ ಅಲ್ಲಿ ವಿಚಿತ್ರವಾದುದೇನೋ ನಡೆಯುತ್ತಿರುವಂತೆ ಗೋಚರಿಸುತ್ತಿದೆ. ಮೊದಲ ಬಾರಿಗೆ ರಷ್ಯಾವೇ ಇಳಿಮುಖದ ಹಾದಿಯಲ್ಲಿರುವಂತೆ ಕಾಣುತ್ತಿದೆ. ಮೊದಲ ಬಾರಿಗೆ ಇರಾನ್‌ನ ಮಿಲಿಟರಿ ತಂತ್ರಗಳನ್ನು ಅಳವಡಿಸಿಕೊಂಡು ಮರುಜೀವ ಪಡೆದಿರುವ ಉಕ್ರೇನ್‌ ಎದುರು ರಷ್ಯಾ ಹಿನ್ನಡೆ ಅನುಭವಿಸುತ್ತಿದೆ.

ಯುದ್ಧದ ಆರಂಭಿಕ ವಾರಗಳಲ್ಲಿ ರಷ್ಯಾ ಉಕ್ರೇನ್‌ನ ರಾಜಧಾನಿ ಕೀವ್‌ಗೇ ಲಗ್ಗೆ ಹಾಕುವ ಹಂತಕ್ಕೆ ಬಂದಿದ್ದಲ್ಲದೆ, ಡೊನ್ಬಾಸ್ ಪ್ರದೇಶದ ಉದ್ದಕ್ಕೂ ಇರುವ ವಿಶಾಲವಾದ ಭೂಪ್ರದೇಶವನ್ನು ವಶಪಡಿಸಿಕೊಂಡಿತ್ತು. ಇದು ಉಕ್ರೇನ್‌ನ ಒಟ್ಟು ಭೂಪ್ರದೇಶದ ಸುಮಾರು 20 ಪ್ರತಿಶತದಷ್ಟಿದೆ. ಯುದ್ಧದ ಅವಧಿಯಲ್ಲಿ ರಷ್ಯಾ ನಿರಂತರವಾಗಿ ಉನ್ನತ ಮಟ್ಟದ ಶಸ್ತ್ರಾಸ್ತ್ರ ಬಲವನ್ನು ಪ್ರದರ್ಶಿಸಿತ್ತು.

ಯುದ್ಧದ ಆರಂಭಿಕ ಅವಧಿಯ ಬಹುಪಾಲು ಸಮಯದಲ್ಲಿ ಉಕ್ರೇನ್, ತನ್ನ ಭೂಪ್ರದೇಶವನ್ನು ಕಳೆದುಕೊಳ್ಳುವುದರ ಜೊತೆಗೆ ಮೂಲಸೌಕರ್ಯಗಳಿಗೆ ಅಪಾರ ಹಾನಿಯನ್ನು ಅನುಭವಿಸಿತು. ರಷ್ಯಾದ ದಾಳಿ ಎದುರಿಸಲು ವಿಫಲವಾಗಿ ಅನೇಕರು ಸಾವನ್ನಪ್ಪಿದರು, ಅಸಂಖ್ಯಾತ ಜನರು ಗಾಯಗೊಂಡರು ಮತ್ತು ಸಾವಿರಾರು ಮಂದಿ ತಮ್ಮ ಮನೆಗಳನ್ನು ತೊರೆದು ಪಲಾಯನ ಮಾಡಬೇಕಾಯಿತು. ಹೀಗಾಗಿ ಪರಿಸ್ಥಿತಿ ರಷ್ಯಾದ ಕಡೆಗೆ ವಾಲಿತು. ವ್ಲಾಡಿಮಿರ್ ಪುಟಿನ್ ಪರವಾಗಿ ಯುದ್ಧವು ಮುಕ್ತಾಯಗೊಳ್ಳುವುದು ಕೆಲವೇ ದಿನಗಳ ಮಾತು ಎನಿಸಿತ್ತು. ಕಳೆದ ವರ್ಷ ಡೊನಾಲ್ಡ್ ಟ್ರಂಪ್ ಎರಡನೇ ಬಾರಿಗೆ ಅಮೆರಿಕದ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದಾಗ, ಮಾತುಕತೆಗಳ ಮೂಲಕ ಯುದ್ಧವನ್ನು ಬಗೆಹರಿಸುವುದಾಗಿ ಪ್ರತಿಜ್ಞೆ ಮಾಡಿದ್ದರು.

ರಷ್ಯಾದ ಆರಂಭಿಕ ಲಾಭ

ಸಮಾಧಾನಕರ ಒಪ್ಪಂದವನ್ನು ಮಾಡಿಕೊಳ್ಳಲು ಟ್ರಂಪ್ ಮುಂದಾದ ರೀತಿಯಿಂದಾಗಿ ಉಕ್ರೇನ್ ಸೋಲಿನ ಅಂಚಿನಲ್ಲಿದೆ ಎಂಬ ಪರಿಸ್ಥಿತಿಯನ್ನು ಬಿಂಬಿಸುವಂತೆ ಮಾಡಿತು. ಅಲ್ಲದೆ, ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರು ರಷ್ಯಾದ ಬೇಡಿಕೆಗಳಿಗೆ (ವಶಪಡಿಸಿಕೊಂಡ ಭೂಪ್ರದೇಶವನ್ನು ಹಾಗೆಯೇ ಉಳಿಸಿಕೊಳ್ಳಲು ಬಿಡುವುದು) ತಲೆಬಾಗಿ ಯುದ್ಧವನ್ನು ಕೊನೆಗೊಳಿಸುವುದು ಉತ್ತಮ ಎಂಬ ಅಭಿಪ್ರಾಯವಿತ್ತು.

ಅಮೆರಿಕದ ಅಧ್ಯಕ್ಷರು ಅಧಿಕಾರ ವಹಿಸಿಕೊಂಡ ಕೆಲವೇ ದಿನಗಳ ನಂತರ, ಶ್ವೇತಭವನದ ಓವಲ್ ಕಚೇರಿಯಲ್ಲಿ ಝೆಲೆನ್ಸ್ಕಿ ಒಂದು ಕಡೆ ಹಾಗೂ ಟ್ರಂಪ್ ಮತ್ತು ಅವರ ಉಪಾಧ್ಯಕ್ಷ ಜೆ.ಡಿ. ವಾನ್ಸ್ ಮತ್ತೊಂದು ಕಡೆ ನಡೆಸಿದ ಅಸಾಧಾರಣ ಸಾರ್ವಜನಿಕ ಮಾತಿನ ಚಕಮಕಿಯಲ್ಲಿ ಇದು ಗೋಚರಿಸಿತು. ತದನಂತರ ನಡೆದ ತೀವ್ರ ವಾಗ್ವಾದದಲ್ಲಿ, ಅಮೆರಿಕದ ಅಧ್ಯಕ್ಷರು ತಮ್ಮ ಉಕ್ರೇನ್ ಸಮವರ್ತಿಯ ಧೋರಣೆಯನ್ನು ಖಂಡಿಸುತ್ತಾ, ಅವರ ಬಳಿ ಆಡಲು "ಯಾವುದೇ ದಾಳಗಳಿಲ್ಲ" ಎಂದು ಹೇಳಿದ್ದಕ್ಕೆ ಇಡೀ ಜಗತ್ತು ಸಾಕ್ಷಿಯಾಯಿತು.

ಯುದ್ಧವನ್ನು ಇತ್ಯರ್ಥಪಡಿಸಿಕೊಳ್ಳಿ ಅಥವಾ ಎಲ್ಲವನ್ನೂ ಕಳೆದುಕೊಳ್ಳಲು ಸಿದ್ಧರಾಗಿ ಎಂದು ಟ್ರಂಪ್ ಅವರು ಝೆಲೆನ್ಸ್ಕಿ ಅವರಿಗೆ ಬಹಳ ನೇರ ಎಚ್ಚರಿಕೆ ನೀಡಿದರು. ತಮ್ಮ ಮಾತನ್ನು ಬಲವಾಗಿ ಸಮರ್ಥಿಸಿಕೊಳ್ಳುತ್ತಾ, "ನೀವು ಮೂರನೇ ಮಹಾಯುದ್ಧದೊಂದಿಗೆ ಜೂಜಾಟಕ್ಕೆ ಬಿದ್ದಿದ್ದೀರಿ" ಎಂದು ಟ್ರಂಪ್ ಛೇಡಿಸಿದ್ದರು. ಈ ಮಾತಿನ ಚಕಮಕಿ ನಡೆದಿದ್ದು ಫೆಬ್ರವರಿ 28, 2025 ರಂದು. ಕಾಕತಾಳೀಯವೆಂಬಂತೆ, ಈ ವರ್ಷದ ಅದೇ ದಿನಾಂಕದಂದು ಅಮೆರಿಕ ಮತ್ತು ಇಸ್ರೇಲ್ ಮಿಲಿಟರಿ ರೂಪದಲ್ಲಿ ಇರಾನ್ ಮೇಲೆ ದಾಳಿ ನಡೆಸಿದವು. ಇದು ರಷ್ಯಾ-ಉಕ್ರೇನ್ ಯುದ್ಧದ ಮೇಲೆ ಒಂದು ಅನಿರೀಕ್ಷಿತ ಪರಿಣಾಮ ಬೀರಿದಂತೆ ತೋರುತ್ತಿದೆ.

ಇರಾನ್ ಕಲಿಸಿದ ಅನಿರೀಕ್ಷಿತ ಪಾಠ

ಇಸ್ರೇಲ್ ಮತ್ತು ಅಮೆರಿಕದ ಒಟ್ಟು ಶಕ್ತಿಗೆ ಮಿಲಿಟರಿಯಾಗಿ ಸರಿಸಾಟಿಯಲ್ಲದಿದ್ದರೂ, ಇರಾನ್ ತನ್ನ ಅನಿರೀಕ್ಷಿತ ಮತ್ತು ಅಸಾಂಪ್ರದಾಯಿಕ ಪ್ರತಿದಾಳಿ ತಂತ್ರದಿಂದ ಆಕ್ರಮಣಕಾರರ ಯೋಜನೆಗಳಿಗೆ ಕಡಿವಾಣ ಹಾಕಿತು. ಮಧ್ಯಪ್ರಾಚ್ಯ ಪ್ರದೇಶದಲ್ಲಿರುವ ಅಮೆರಿಕದ ಆಸ್ತಿಗಳ ಮೇಲೆ ಇರಾನ್ ಪ್ರತಿದಾಳಿ ನಡೆಸುತ್ತದೆ ಎಂಬುದನ್ನು ವಾಷಿಂಗ್ಟನ್ ಮತ್ತು ಟೆಲ್ ಅಲ್ವಿವ್ ಎರಡೂ ನಿರೀಕ್ಷಿಸಿರಲಿಲ್ಲ. ಮುಖ್ಯವಾಗಿ, ಅಭೂತಪೂರ್ವ ಹೆಜ್ಜೆಯಾಗಿ ಹಾರ್ಮುಜ್ ಜಲಸಂಧಿಯನ್ನು ಬಂದ್ ಮಾಡುವ ಮೂಲಕ ಜಾಗತಿಕ ಆರ್ಥಿಕತೆಗೆ ಹೊಡೆತ ನೀಡಿ, ಟ್ರಂಪ್ ಅವರ ಆತಂಕಕ್ಕೆ ಕಾರಣವಾಗುವಂತೆ ಸ್ವತಃ ಅಮೆರಿಕದ ಮಾರುಕಟ್ಟೆಯ ಮೇಲೂ ಇದು ಪರಿಣಾಮ ಬೀರಿತು.

ಈಗ ಇರಾನ್ನ ತಂತ್ರವನ್ನು ಅನುಸರಿಸಿದಂತೆ ತೋರುವ ಝೆಲೆನ್ಸ್ಕಿ, ದೊಡ್ಡ ಮತ್ತು ಉತ್ತಮ ಗುಣಮಟ್ಟದ ಶಸ್ತ್ರಾಸ್ತ್ರಗಳನ್ನು ನೀಡುವಂತೆ ನ್ಯಾಟೋ ಮಿತ್ರರಾಷ್ಟ್ರಗಳನ್ನು ಮನವೊಲಿಸಲು ಯುರೋಪ್ ಮತ್ತು ಅಮೆರಿಕದ ನಡುವೆ ನಿರಂತರ ಓಡಾಟ ನಡೆಸಿದ್ದರು. ಈಗ ಅವರು ಇದ್ದಕ್ಕಿದ್ದಂತೆ ತಮ್ಮ ಹಾದಿಯನ್ನು ಬದಲಾಯಿಸಿದರು. ಯುದ್ಧದ ನಿಯಮಗಳನ್ನು ಬದಲಾಯಿಸುವ ಮೂಲಕ ಇರಾನ್ ಜಗತ್ತಿನ ಮಹಾಶಕ್ತಿ ಮತ್ತು ಪ್ರಬಲ ಸೇನಾ ಸಾಮರ್ಥ್ಯವಿರುವ ದೇಶವನ್ನು ತಡೆಯಲು ಸಾಧ್ಯವಿರುವಾಗ, ಉಕ್ರೇನ್ಗೆ ಯಾಕೆ ಸಾಧ್ಯವಿಲ್ಲ ಎಂಬುದು ಅವರಿಗೆ ಮನವರಿಕೆಯಾಯಿತು.

ಉಕ್ರೇನ್ನ ತಂತ್ರವನ್ನು ಇರಾನ್ನ ತಂತ್ರದೊಂದಿಗೆ ಜೋಡಿಸಿ ಕೀವ್ನಿಂದ ಯಾವುದೇ ಅಧಿಕೃತ ಹೇಳಿಕೆಯೇನೂ ಬಂದಿಲ್ಲ. ವಾಸ್ತವವಾಗಿ, ಎರಡೂ ದೇಶಗಳು ಪರಸ್ಪರ ವಿರೋಧಿ ಶಿಬಿರಗಳಲ್ಲಿವೆ; ಇರಾನ್ಗೆ ರಷ್ಯಾ ಬೆಂಬಲವಿದ್ದರೆ, ಉಕ್ರೇನ್ಗೆ ಅಮೆರಿಕದ ಬೆಂಬಲವಿದೆ. ಕೆಲವು ದಿನಗಳ ಹಿಂದೆ ಉಕ್ರೇನ್ ಕ್ಷಿಪಣಿಗಳು ಕ್ಯಾಸ್ಪಿಯನ್ ಸಮುದ್ರದಲ್ಲಿದ್ದ ಇರಾನ್ನ ಸರಕು ನೌಕೆಯೊಂದರ ಮೇಲೆ ಅಪ್ಪಳಿಸಿದ್ದವು ಮತ್ತು ಇದು ಹೊಸ ಯುದ್ಧದ ರಂಗಕ್ಕೆ ನಾಂದಿ ಹಾಡಬಹುದು ಎಂಬ ಆತಂಕವಿತ್ತು. ಆದಾಗ್ಯೂ, ಉಕ್ರೇನ್ ಕ್ಷಮೆ ಯಾಚಿಸಿತು ಮತ್ತು ಆ ವಿವಾದ ತಣ್ಣಗಾಯಿತು.

ಬದಲಾದ ಉಕ್ರೇನ್ ಯುದ್ಧ ತಂತ್ರ

ಆದರೆ ಇರಾನ್ನ ತಂತ್ರವನ್ನು ಉಕ್ರೇನ್ ಸೇರಿದಂತೆ ಜಗತ್ತಿನಾದ್ಯಂತ ಸೂಕ್ಷ್ಮವಾಗಿ ಗಮನಿಸಲಾಗುತ್ತಿದೆ ಮತ್ತು ವಿಶ್ಲೇಷಣೆ ನಡೆಸಲಾಗುತ್ತಿದೆ. ರಷ್ಯಾದ ಎದುರು ಉಕ್ರೇನ್ ಕೂಡ ಅದೇ ರೀತಿಯ ಪರಿಸ್ಥಿತಿಯಲ್ಲಿ ಇರುವುದರಿಂದ, ತನ್ನ ಪ್ರಬಲ ನೆರೆಹೊರೆಯ ದೇಶವನ್ನು ಎದುರಿಸಲು ಅದು ಇರಾನ್ ಮಾದರಿಯ ತಂತ್ರವನ್ನು ಅಳಡಿಸಿಕೊಂಡಿದೆ.

ಇರಾನ್ ಯುದ್ಧಕ್ಕೂ ಬಹಳ ಮೊದಲೇ ಉಕ್ರೇನ್ ರಷ್ಯಾವನ್ನು ಗುರಿಯಾಗಿಸಿಕೊಂಡು ಮಿಲಿಟರಿ ಡ್ರೋನ್ಗಳನ್ನು ಬಳಸಿದ್ದರೂ, ಅದನ್ನು ದೊಡ್ಡ ಮಟ್ಟದಲ್ಲಿ ವಿಸ್ತರಿಸಿರಲಿಲ್ಲ. ಯುದ್ಧ ಆರಂಭವಾಗಿ ಮೂರು ವರ್ಷಗಳಿಗೂ ಹೆಚ್ಚು ಕಾಲ ಕಳೆದ ನಂತರ, ಅಂದರೆ 2025ರ ಜೂನ್ ತಿಂಗಳಲ್ಲಿ ನಡೆದ “ಆಪರೇಷನ್ ಸ್ಪೈಡರ್ ವೆಬ್" ಉಕ್ರೇನ್ನ ಮೊದಲ ಗಮನಾರ್ಹ ಡ್ರೋನ್ ದಾಳಿಯಾಗಿದೆ. ಈ ಕಾರ್ಯಾಚರಣೆಯಲ್ಲಿ, 117 ರಿಮೋಟ್-ನಿಯಂತ್ರಿತ ಡ್ರೋನ್ಗಳನ್ನು ಬಿಡಿಭಾಗಗಳ ರೂಪದಲ್ಲಿ ರಷ್ಯಾದ ಸಾಕಷ್ಟು ಒಳ ಪ್ರದೇಶಗಳಿಗೆ ಕಳ್ಳಸಾಗಣೆ ಮಾಡಿ, ಅಲ್ಲಿ ಮರುಜೋಡಣೆ ಮಾಡಲಾಯಿತು. ನಂತರ ಪರಮಾಣು ಸಾಮರ್ಥ್ಯದ ಯುದ್ಧ ವಿಮಾನಗಳು ಸೇರಿದಂತೆ ಅತ್ಯಾಧುನಿಕ ಬಾಂಬರ್ಗಳನ್ನು ಹೊಂದಿದ್ದ ಉನ್ನತ ಭದ್ರತೆಯ ವಾಯುನೆಲೆಗಳು ಸೇರಿದಂತೆ ಹಲವು ಗುರಿಗಳ ಮೇಲೆ ದಾಳಿ ಮಾಡಲು ಅವುಗಳನ್ನು ನಿರ್ದೇಶಿಸಲಾಯಿತು.

ಶ್ವೇತಭವನದ ಓವಲ್ ಕಚೇರಿಯಲ್ಲಿ ಟ್ರಂಪ್ ಮತ್ತು ವಾನ್ಸ್ ಅವರಿಂದ ಝೆಲೆನ್ಸ್ಕಿ ಅವಮಾನಕ್ಕೆ ಒಳಗಾಗಿದ್ದಕ್ಕೆ ಈ ಅದ್ಭುತವಾದ "ಸ್ಪೈಡರ್ ವೆಬ್" ಕಾರ್ಯಾಚರಣೆಯು ನೇರ ಪ್ರತಿಕ್ರಿಯೆಯಾಗಿ ಕಂಡಿರಬಹುದು. ಆದಾಗ್ಯೂ, ಇದು ಮಾತ್ರವೇ ಉಕ್ರೇನ್ನ ಮಿಲಿಟರಿ ತಂತ್ರವನ್ನು ಸಂಪೂರ್ಣವಾಗಿ ಬದಲಾಯಿಸಲಿಲ್ಲ. ಆದರೆ ಈಗ ಇತ್ತೀಚಿನ ತಿಂಗಳುಗಳಲ್ಲಿ, ಸ್ವದೇಶಿ ನಿರ್ಮಿತ ಡ್ರೋನ್ಗಳು ಮತ್ತು ಖಂಡಾಂತರ ಕ್ಷಿಪಣಿಗಳನ್ನು ಬಳಸಿ ಇರಾನ್ ನಡೆಸಿದ ತಕ್ಕ ತಿರುಗೇಟಿನಂತೆ, ಉಕ್ರೇನ್ ಕೂಡ ಅದೇ ಹಾದಿಯನ್ನು ಅನುಸರಿಸುತ್ತಿರುವಂತೆ ತೋರುತ್ತಿದೆ. ಇದು ಯಾವ ಮಟ್ಟಿಗೆ ತಲುಪಿದೆ ಎಂದರೆ, ರಷ್ಯಾಗೆ ತೀವ್ರ ಘಾಸಿ ಉಂಟುಮಾಡುವ ಮೂಲಕ ಅದು ಯುದ್ಧದ ದಿಕ್ಕನ್ನೇ ಬದಲಾಯಿಸಿದೆ.

ಡ್ರೋನ್ ಯುದ್ಧದ ವಿಸ್ತರಣೆ

ಎಲ್ಲಾ ವರದಿಗಳ ಪ್ರಕಾರ, ಉಕ್ರೇನ್ನ ಡ್ರೋನ್ಗಳು ಮತ್ತು ಕ್ಷಿಪಣಿಗಳು ಸೈಂಟ್ ಪೀಟರ್ಸ್ಬರ್ಗ್ ಮತ್ತು ಮಾಸ್ಕೋ ನಗರಗಳ ಒಳಗೆ ಇರುವ ವಾಯುನೆಲೆಗಳು ಹಾಗೂ ಪ್ರಮುಖ ಸರಬರಾಜು ಮಾರ್ಗಗಳು ಮಾತ್ರವಲ್ಲದೆ, ಮಿಲಿಟರಿ ಕೈಗಾರಿಕಾ ಸಂಕೀರ್ಣಗಳು, ತೈಲ ಶುದ್ಧೀಕರಣ ಘಟಕಗಳು ಮತ್ತು ಪ್ರಮುಖ ಮೂಲಸೌಕರ್ಯಗಳನ್ನು ಸ್ಫೋಟಿಸುವ ಮೂಲಕ ರಷ್ಯಾದಲ್ಲಿ ತಲ್ಲಣ ಮೂಡಿಸಿವೆ.

ಹಲವಾರು ಶೇಖರಣಾ ತೊಟ್ಟಿಗಳು ಸೇರಿದಂತೆ ರಷ್ಯಾದ ತೈಲ ಶುದ್ಧೀಕರಣ ಸಾಮರ್ಥ್ಯದ ಸುಮಾರು 45 ಪ್ರತಿಶತದಷ್ಟು ಭಾಗವನ್ನು ತಾನು ನಾಶಪಡಿಸಿದ್ದೇನೆ ಎಂದು ಉಕ್ರೇನ್ ಹೇಳಿಕೊಂಡಿದ್ದು, ಇದರ ಒಟ್ಟು ನಷ್ಟವು ಸುಮಾರು 15 ಬಿಲಿಯನ್ ಡಾಲರ್ಗಳೆಂದು ಅಂದಾಜಿಸಲಾಗಿದೆ.

ರಷ್ಯಾದಲ್ಲಿ, ಸಾಮಾನ್ಯ ಜನರು ಉಕ್ರೇನ್ನೊಂದಿಗಿನ ಯುದ್ಧವನ್ನು ತಮ್ಮ ಗಡಿಯಾಚೆಗಿನ, ದೂರದ ಯಾವುದೋ ಒಂದು ಘಟನೆ ಎಂದು ಭಾವಿಸಿದ್ದರು. ಆದರೆ ಈಗ, ಮಾಸ್ಕೋ ಮತ್ತು ಸೈಂಟ್ ಪೀಟರ್ಸ್ಬರ್ಗ್ ಬಳಿಯಿರುವ ದೇಶದ ಗ್ರಾಹಕ ಇ-ಕಾಮರ್ಸ್ ದೈತ್ಯ 'ವೈಲ್ಡ್ಬೆರ್ರೀಸ್'ನ ಗೋದಾಮುಗಳು ಸೇರಿದಂತೆ ನಾಗರಿಕ ಗುರಿಗಳ ಮೇಲೆ ಡ್ರೋನ್ಗಳು ದಾಳಿ ಮಾಡುತ್ತಿರುವುದರಿಂದ ಅವರು ಯುದ್ಧದ ಭೀಕರತೆಯನ್ನು ನೇರವಾಗಿ ಅನುಭವಿಸುವಂತಾಗಿದೆ.

ಈ ಲೇಖನವನ್ನು ಬರೆಯುತ್ತಿರುವ ಹೊತ್ತಿನಲ್ಲಿಯೇ ನಡೆದ ಇತ್ತೀಚಿನ ಡ್ರೋನ್ ದಾಳಿಯು, ಪ್ರವಾಸಿಗರ ನೆಚ್ಚಿನ ತಾಣವಾಗಿರುವ ರಷ್ಯಾದ ಜನದಟ್ಟಣೆಯ ಕಡಲತೀರದ ಮೇಲೆ ನಡೆದಿದ್ದು, ವರದಿಯ ಪ್ರಕಾರ ಕನಿಷ್ಠ ಏಳು ಜನರು ಸಾವನ್ನಪ್ಪಿದ್ದಾರೆ.

ರಷ್ಯಾದೊಳಗೆ ಹೆಚ್ಚುತ್ತಿದೆ ಒತ್ತಡ

ರಷ್ಯಾದ ಒಳಗೆ ಪರಿಸ್ಥಿತಿ ಹದಗೆಡುತ್ತಿರುವುದು ಸ್ಪಷ್ಟವಾಗಿ ಕಾಣಿಸುತ್ತಿದೆ. ದೇಶದಾದ್ಯಂತ ತೈಲಕ್ಕಾಗಿ ಜನರು ಉದ್ದಾನುದ್ದ ಕ್ಯೂ ನಿಂತಿರುವುದು ಕಂಡುಬರುತ್ತಿದೆ ಮತ್ತು ಉಕ್ರೇನಿನ ಡ್ರೋನ್ಗಳು ಹಾಗೂ ಕ್ಷಿಪಣಿಗಳು ಯಾವ ಕ್ಷಣದಲ್ಲಿ ಎಲ್ಲಿಯೂ ದಾಳಿ ಮಾಡಬಲ್ಲವು ಎಂಬುದನ್ನು ತೋರಿಸಿಕೊಟ್ಟಿರುವ ಕಾರಣ ಎಲ್ಲೆಡೆ ಅಭದ್ರತೆಯ ಭಾವನೆ ಆವರಿಸಿದೆ. ಕ್ರಿಮಿಯಾದಲ್ಲಿ, ಭದ್ರತೆಗೆ ಸಂಬಂಧಿಸಿ ಆತಂಕ ಹೆಚ್ಚಿರುವ ಕಾರಣದಿಂದಾಗಿ ಕಳೆದ ಹಲವಾರು ವರ್ಷಗಳಿಂದ ನಡೆಸಿಕೊಂಡು ಬರುತ್ತಿದ್ದ ಜನಪ್ರಿಯ ಸರ್ಕಾರಿ ಬೆಂಬಲಿತ ಮಕ್ಕಳ ಬೇಸಿಗೆ ಶಿಬಿರಗಳನ್ನು ರದ್ದುಗೊಳಿಸಲಾಗಿದೆ.

ಇಲ್ಲಿಯವರೆಗೆ ದಿಟ್ಟತನದ ಮುಖವಾಡ ಧರಿಸಿದ್ದ ಪುಟಿನ್ ಕೂಡ, ವೈಮಾನಿಕ ದಾಳಿಗಳ ಭೀತಿಯಿಂದಾಗಿ ಮೇ 9ರ ವಿಜಯ ದಿನದ ಪರೇಡ್ ಮತ್ತು ನೌಕಾಪಡೆ ದಿನದ ಕಾರ್ಯಕ್ರಮಗಳಂತಹ ವಾರ್ಷಿಕ ರಾಷ್ಟ್ರೀಯ ಸಮಾರಂಭಗಳನ್ನು ಅನಿವಾರ್ಯವಾಗಿ ಕಡಿತಗೊಳಿಸಬೇಕಾಯಿತು. ಉಕ್ರೇನ್ನ ಡ್ರೋನ್ಗಳನ್ನು ತಡೆಯುವಲ್ಲಿ ರಷ್ಯಾಗೆ ಇರುವ ಸಾಮರ್ಥ್ಯ ಎಷ್ಟು ಎಂಬುದರ ಬಗ್ಗೆ ಇದು ಸ್ಪಷ್ಟ ಸಂದೇಹವನ್ನು ಸಾರುತ್ತದೆ ಎಂದು ವಿಶ್ಲೇಷಿಸಲಾಗಿದೆ.

2014 ರಲ್ಲಿ ರಷ್ಯಾದಿಂದ ವಶಪಡಿಸಿಕೊಳ್ಳಲಾದ ಕ್ರಿಮಿಯನ್ ದ್ವೀಪಕಲ್ಪವು ಕೀವ್ನ ಈ ತಂತ್ರದ ನೇರ ಹೊಡೆತವನ್ನು ಎದುರಿಸಿದೆ. ಉಕ್ರೇನ್ನಿಂದ ಬಂದ ಕ್ಷಿಪಣಿಗಳು ಮತ್ತು ಡ್ರೋನ್ಗಳು ಕ್ರಿಮಿಯಾವನ್ನು ಮುಖ್ಯ ಭೂಮಿಗೆ ಸಂಪರ್ಕಿಸುವ ಸೇತುವೆಗಳು, ವಿದ್ಯುತ್ ಮಾರ್ಗಗಳು ಮತ್ತು ರಸ್ತೆಗಳ ಸಂಪರ್ಕವನ್ನು ಕಡಿತಗೊಳಿಸಿವೆ. ಅಲ್ಲಿನ ನಿವಾಸಿಗಳು ಈಗ ವಿದ್ಯುತ್ ಕಡಿತ ಮತ್ತು ಆಹಾರದ ಕೊರತೆಯನ್ನು ಅನುಭವಿಸುತ್ತಿದ್ದಾರೆ ಹಾಗೂ ನಾವು ಎಲ್ಲದರಿಂದ ಪ್ರತ್ಯೇಕಿಸಲ್ಪಟ್ಟ ಭಾವನೆಗೆ ಒಳಗಾಗಿದ್ದಾರೆ ಎಂದು ವರದಿಯಾಗಿದೆ.

ಪಾಶ್ಚಿಮಾತ್ಯ ಬೆಂಬಲದ ಬದಲಾವಣೆ

ಬದಲಾದ ಪರಿಸ್ಥಿತಿಯ ಧ್ಯೋತಕ ಎನ್ನುವಂತೆ, ಕಳೆದ ತಿಂಗಳು ಟರ್ಕಿಯಲ್ಲಿ ನಡೆದ ನ್ಯಾಟೋ ಶೃಂಗಸಭೆಯಲ್ಲಿ ಝೆಲೆನ್ಸ್ಕಿ ಅವರನ್ನು ಭೇಟಿಯಾದ ಟ್ರಂಪ್, ಉಕ್ರೇನ್ ಮತ್ತೆ ಪುಟಿದೆದ್ದಿರುವುದನ್ನು ಮೆಚ್ಚಿಕೊಂಡಂತೆ ಕಂಡುಬಂದರು. ಸಾಮಾನ್ಯವಾಗಿ ವಿಜೇತರ ಬಗ್ಗೆಯೇ ಹೆಚ್ಚು ಒಲವು ತೋರುವ ವ್ಯಕ್ತಿ ಎಂದು ಕರೆಯಲ್ಪಡುವ ಟ್ರಂಪ್, ಅತ್ಯಂತ ಬೇಡಿಕೆಯಲ್ಲಿರುವ ಪ್ಯಾಟ್ರಿಯಾಟ್ ಕ್ಷಿಪಣಿ ರಕ್ಷಣಾ ಪ್ರತಿಬಂಧಕಗಳನ್ನು ಉತ್ಪಾದಿಸಲು ಝೆಲೆನ್ಸ್ಕಿಗೆ ಅನುಮತಿ ನೀಡುವುದಾಗಿ ಸೂಚಿಸಿದರು. ಅದಕ್ಕೂ ಮುಂಚೆ, ಉಕ್ರೇನ್ನ ಪುನರಾವರ್ತಿತ ವಿನಂತಿಗಳಿಗೆ ಅವರ ಆಡಳಿತವು ಸಕಾರಾತ್ಮಕವಾಗಿ ಸ್ಪಂದಿಸಿರಲಿಲ್ಲ.

ಝೆಲೆನ್ಸ್ಕಿ ಮಾತ್ರವಲ್ಲದೆ, ಯುರೋಪಿನಲ್ಲಿರುವ ಅವರ ನ್ಯಾಟೋ ಬೆಂಬಲಿಗರು ಕೂಡ ಶತ್ರುವಿನ ಆರ್ಥಿಕ ಆಸ್ತಿಗಳನ್ನು ಗುರಿಯಾಗಿಸುವ ಇರಾನ್ ಮಾದರಿಯ ತಂತ್ರವನ್ನು ಅರ್ಥಮಾಡಿಕೊಂಡಿದ್ದಾರೆ. ಕೇವಲ ಸಾಂಪ್ರದಾಯಿಕ ಶಸ್ತ್ರಾಸ್ತ್ರಗಳನ್ನು ನೀಡುವುದರ ಬದಲಾಗಿ, ಅವರು ಈಗ ಉಕ್ರೇನ್ನಲ್ಲೇ ಕ್ಷಿಪಣಿಗಳು ಮತ್ತು ಡ್ರೋನ್ ವ್ಯವಸ್ಥೆಗಳ ಉತ್ಪಾದನೆಗೆ ಬೆಂಬಲ ನೀಡುತ್ತಿದ್ದಾರೆ.

ಮುಂದಿನ ಪ್ರತಿದಾಳಿಗೆ ಉಕ್ರೇನ್ ಸಿದ್ಧತೆ

ಜೂನ್ 26 ರಂದು ತಾವು ಘೋಷಿಸಿದ 40 ದಿನಗಳ ಅವಧಿಯಲ್ಲಿ ಝೆಲೆನ್ಸ್ಕಿ ಈ ಹೊಸ ತಂತ್ರವನ್ನು ಮುಂದುವರೆಸಿದರು. 40 ದಿನಗಳು ಮುಗಿಯುತ್ತ ಬಂದಿರುವ ಈ ಸಮಯದಲ್ಲಿ, ಲಭ್ಯವಿರುವ ಎಲ್ಲಾ ವರದಿಗಳ ಪ್ರಕಾರ ಇದು ದೊಡ್ಡ ಯಶಸ್ಸನ್ನು ಕಂಡಿದೆ. ಈ ಎಲ್ಲ ಬೆಳವಣಿಗೆಗಳು ಪುಟಿನ್ ಅವರನ್ನು ಸಾಕಷ್ಟು ಕದಲಿಸಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಪುಟಿನ್ ವಶಪಡಿಸಿಕೊಂಡಿರುವ ಭೂಪ್ರದೇಶವನ್ನು ಮುಕ್ತಗೊಳಿಸುವ ಗುರಿಯೊಂದಿಗೆ ಉಕ್ರೇನ್ ಮುಂದೆ ನಡೆಸಬೇಕಾದ ಪ್ರತಿದಾಳಿಯ ಬಗ್ಗೆ ಪರಿಶೀಲನೆ ನಡೆಸುತ್ತಿದೆ.

ಈ ನಡೆಗೆ ಪೂರಕವಾಗಿ ಉಕ್ರೇನಿನ ಕ್ಷಿಪಣಿ-ಡ್ರೋನ್ ಪ್ರತಿದಾಳಿಯಿಂದಾಗಿ ರಷ್ಯಾದ ಸೈನಿಕರು ಭಾರೀ ಸಂಖ್ಯೆಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ವರದಿಗಳು ತಿಳಿಸುತ್ತಿವೆ. ಅಮೆರಿಕ ಮೂಲದ 'ಸೆಂಟರ್ ಫಾರ್ ಸ್ಟ್ರಾಟೆಜಿಕ್ ಅಂಡ್ ಇಂಟರ್ನ್ಯಾಷನಲ್ ಸ್ಟಡೀಸ್' ಸಂಸ್ಥೆಯನ್ನು ಉಲ್ಲೇಖಿಸಿದ ಒಂದು ಅಂದಾಜಿನ ಪ್ರಕಾರ, ಈ ವರ್ಷ ಪ್ರತಿ ತಿಂಗಳು ರಷ್ಯಾ ಅನುಭವಿಸುತ್ತಿರುವ ಸಾವುನೋವಿನ ಸಂಖ್ಯೆ ಕನಿಷ್ಠ 30,000 ತಲುಪಿವೆ.

ಬಲವಂತದ ಸೇನಾ ಸೇರ್ಪಡೆಯನ್ನು ರಷ್ಯಾದ ನಾಗರಿಕರು ವಿರೋಧಿಸುತ್ತಿರುವುದರಿಂದ ಮತ್ತು ಅಸ್ತಿತ್ವದಲ್ಲಿರುವ ಸೈನಿಕರ ಕೊರತೆಯನ್ನು ಸಮರ್ಪಕವಾಗಿ ಭರ್ತಿ ಮಾಡಲು ಸಾಧ್ಯವಾಗದೇ ಇರುವುದರಿಂದ, ರಷ್ಯಾ ವಶಪಡಿಸಿಕೊಂಡಿರುವ ಪ್ರದೇಶಗಳಲ್ಲಿ ಪುಟಿನ್ ಅವರ ಪಡೆಗಳು ಒತ್ತಡಕ್ಕೆ ಸಿಲುಕಿವೆ ಎನ್ನುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಒಂದು ವರದಿಯ ಪ್ರಕಾರ ಪ್ರತಿದಿನ ಸರಾಸರಿ ಕೇವಲ 100 ಮೀಟರ್ಗಳಷ್ಟು ಮಾತ್ರ ಅವರು ಮುಂದೆ ಸಾಗಲು ಶಕ್ತರಾಗಿದ್ದಾರೆ. ರಷ್ಯಾದ ಸೈನಿಕರ ಈ ಕೊರತೆಯ ಲಾಭ ಪಡೆದು, ಸೆಪ್ಟೆಂಬರ್ನಲ್ಲಿ ಪ್ರಾರಂಭವಾಗುವ ಯೋಜಿತ ಕಾರ್ಯಾಚರಣೆಯ ಮೂಲಕ ಪ್ರತಿದಾಳಿಗಳನ್ನು ನಡೆಸಿ ಕಳೆದುಕೊಂಡ ಭೂಪ್ರದೇಶವನ್ನು ಮರಳಿ ವಶಪಡಿಸಿಕೊಳ್ಳಲು ಉಕ್ರೇನ್ ಯೋಜನೆ ರೂಪಿಸಿದೆ.

ಮುಂದಿನ ಹಂತದಲ್ಲಿ ರಷ್ಯಾದ ಕ್ಷಿಪಣಿ ಉತ್ಪಾದನಾ ಘಟಕಗಳ ಮೇಲೆ ದಾಳಿ ಮಾಡಲು ಪ್ರಯತ್ನಿಸುವುದಾಗಿ ಉಕ್ರೇನ್ನ ಕ್ಷಿಪಣಿ ತಯಾರಕ ಸಂಸ್ಥೆಯಾದ 'ಫೈರ್ ಪಾಯಿಂಟ್' ಹೇಳಿರುವುದಾಗಿ ವರದಿಯಾಗಿದೆ. ಇದು ಸುಲಭವೇನಲ್ಲ, ಆದರೆ ದೊಡ್ಡ ಸಂಖ್ಯೆಯಲ್ಲಿ ಹಾರಿಸಿದಾಗ ಅವು ರಷ್ಯಾದ ರಕ್ಷಣಾ ವ್ಯವಸ್ಥೆಯನ್ನು ಮಣಿಸಲು ಸಾಧ್ಯವಾಗುತ್ತದೆ ಎಂಬುದು ಯೋಜನೆಯಾಗಿದೆ.

ಯುದ್ಧ ಕೊನೆಗೊಳಿಸುವ ಒತ್ತಡದಲ್ಲಿ ರಷ್ಯಾ

ಉಕ್ರೇನ್ ತಾನು ಕಳೆದುಕೊಂಡಿರುವ ಎಲ್ಲಾ ಭೂಪ್ರದೇಶವನ್ನು ಮಿಲಿಟರಿ ಶಕ್ತಿಯ ಭಾಗವಾಗಿ ಮರಳಿ ಪಡೆಯಲು ಸಾಧ್ಯವಾಗದಿದ್ದರೂ ಅಥವಾ ರಷ್ಯಾದಲ್ಲಿ ಹೊಸ ಪ್ರದೇಶಗಳನ್ನು ಆಕ್ರಮಿಸಿಕೊಳ್ಳಲು ಅಸಾಧ್ಯವಾದರೂ, ಕೀವ್ನಲ್ಲಿರುವ ಯೋಜನಾಕಾರರು ಈ ಹೊಸ ಡ್ರೋನ್-ಕ್ಷಿಪಣಿ ತಂತ್ರವು ರಷ್ಯಾದ ಕೆಲವು ವಿಭಾಗಗಳನ್ನು ಅಂತಿಮವಾಗಿ ಪುಟಿನ್ ವಿರುದ್ಧ ತಿರುಗುವಂತೆ ಮಾಡುತ್ತದೆ ಎಂಬ ನಿರೀಕ್ಷೆಯಲ್ಲಿದ್ದಾರೆ. ಅಂದರೆ, ಇದು ದಂಗೆಯನ್ನು ಪ್ರಚೋದಿಸಬಹುದು. ಅಥವಾ ಕನಿಷ್ಠಪಕ್ಷ, ರಷ್ಯಾದ ಆಡಳಿತರೂಢ ಗಣ್ಯರು ಮತ್ತು ಸರ್ಕಾರದ ನಡುವೆ ಒಡಕನ್ನು ಸೃಷ್ಟಿಸಬಹುದು. ಇದರಿಂದ ಅಂತಿಮವಾಗಿ ರಷ್ಯಾ ಯುದ್ಧವನ್ನೇ ಕೊನೆಗೊಳಿಸಬೇಕಾದ ಒತ್ತಡಕ್ಕೆ ಸಿಲುಕಿದರೆ ಅಚ್ಚರಿಯಿಲ್ಲ.

Disclaimer: ವಿವಿಧ ವಲಯಗಳಿಂದ ಅಭಿಪ್ರಾಯಗಳನ್ನು ಕಲೆಹಾಕಿ ಪ್ರಸ್ತುತಪಡಿಸಲು ದ ಫೆಡರಲ್, ಪ್ರಯತ್ನಿಸುತ್ತದೆ. ಲೇಖನಗಳಲ್ಲಿನ ಮಾಹಿತಿ, ಕಲ್ಪನೆಗಳು ಅಥವಾ ಅಭಿಪ್ರಾಯಗಳು ಸಂಪೂರ್ಣವಾಗಿ ಲೇಖಕರದ್ದಾಗಿದ್ದು, ಅವು ʼದ ಫೆಡರಲ್‌ ಕರ್ನಾಟಕʼದ ದೃಷ್ಟಿಕೋನಗಳನ್ನು ಪ್ರತಿಬಿಂಬಿಸುವುದಿಲ್ಲ. ಮೂಲ ಲೇಖನ 'ದ ಫೆಡರಲ್‌' ಇಂಗ್ಲಿಷ್‌ ಜಾಲತಾಣದಲ್ಲಿ ಪ್ರಕಟವಾಗಿದೆ.