ಹೊಸ ವರ್ಷದ ಮೊದಲ ದಿನದ ಆರಂಭ ಹೀಗಿರಲಿ… ಈ ದಿನ ಅಪ್ಪಿ-ತಪ್ಪಿನೂ ಈ ಕೆಲಸ ಮಾಡ್ಲೇಬೇಡಿ!

ನೋಡ್ತಾ ನೋಡ್ತಾ ಇದ್ದಂಗೆ ಹೊಸ ವರ್ಷ ಬಂದೇ ಬಿಡ್ತು. ಇಂದು ಹೊಸ ವರ್ಷದ ಮೊದಲ ದಿನ. ಹೊಸ ವರ್ಷ ಅಂದರೆ ಕೇವಲ ದಿನಾಂಕ ಬದಲಾವಣೆ ಅಷ್ಟೇ ಅಲ್ಲ. ಅದು ಹೊಸ ಭರವಸೆ ಮತ್ತು ಹೊಸ ಆರಂಭದ ಸಂಕೇತ. ಹೀಗಾಗಿ ಹೊಸ ವರ್ಷದ ಮೊದಲ ಅರ್ಥಪೂರ್ಣವಾಗಿ ಕಳೆಯುವುದು ಬಹಳ ಮುಖ್ಯ. ಅದಕ್ಕಾಗಿ ಇಲ್ಲಿ ಕೆಲವೊಂದು ಅಂಶಗಳನ್ನು ಪ್ರಸ್ತಾಪಿಸಲಾಗಿದೆ. ನಿಮ್ಮ ಹೊಸ ವರ್ಷದ ಮೊದಲ ದಿನವನ್ನು ಹೀಗೆ ಆರಂಭಿಸಿ. ನೆನಪಿರಲಿ ನಿಮ್ಮ ಇಡೀ ವರ್ಷ ಹೇಗಿರಬೇಕು ಎಂಬುದು ನೀವು ಇಂದು ತೆಗೆದುಕೊಳ್ಳುವ ನಿರ್ಧಾರ ಮತ್ತು ನಿಮ್ಮ ಆಲೋಚನೆಯ ಮೇಲೆ ಅವಲಂಬಿತವಾಗಿರುತ್ತದೆ.

1. ಪ್ರಶಾಂತವಾದ ಆರಂಭ

ಬೇಗ ಏಳುವುದು: ಸೂರ್ಯೋದಯವನ್ನು ನೋಡುತ್ತಾ ದಿನವನ್ನು ಆರಂಭಿಸಿ. ಇದು ಮನಸ್ಸಿಗೆ ಹೊಸ ಚೈತನ್ಯ ನೀಡುತ್ತದೆ.

ಧ್ಯಾನ ಅಥವಾ ಪ್ರಾರ್ಥನೆ: ಕನಿಷ್ಠ 10 ನಿಮಿಷಗಳ ಕಾಲ ಶಾಂತವಾಗಿ ಕುಳಿತು ಕಳೆದ ವರ್ಷದ ಕಲಿಕೆಗಳಿಗೆ ಧನ್ಯವಾದ ಅರ್ಪಿಸಿ ಮತ್ತು ಮುಂಬರುವ ವರ್ಷಕ್ಕೆ ಸಿದ್ಧರಾಗಿ.

2. ಕುಟುಂಬದೊಂದಿಗೆ ಸಮಯ ಕಳೆಯಿರಿ

ವರ್ಷದ ಮೊದಲ ದಿನವನ್ನು ಪ್ರೀತಿಪಾತ್ರರ ಜೊತೆ ಕಳೆಯಿರಿ. ಅವರೊಂದಿಗೆ ನಗು ಹಂಚಿಕೊಳ್ಳುವುದು ಇಡೀ ವರ್ಷಕ್ಕೆ ಸಕಾರಾತ್ಮಕ ಶಕ್ತಿ ನೀಡುತ್ತದೆ. ಮನೆಯ ಹಿರಿಯರ ಆಶೀರ್ವಾದ ಪಡೆಯುವುದರೊಂದಿಗೆ ಶುಭಾರಂಭ ಮಾಡಿ.

3. ಗುರಿಗಳ ನಿರ್ಧಾರ

ಈ ವರ್ಷ ನೀವು ಸಾಧಿಸಬೇಕಾದ ಕನಿಷ್ಠ ಮೂರು ಮುಖ್ಯ ಗುರಿಗಳನ್ನು ಡೈರಿಯಲ್ಲಿ ಬರೆಯಿರಿ. ಅವುಗಳನ್ನು ತಲುಪಲು ಸಕಲ ಪ್ರಯತ್ನವನ್ನೂ ಮಾಡುವ ದೃಢ ನಿರ್ಧಾರ ಮಾಡಿ. ಮನಸ್ಸಿನಲ್ಲಿರುವ ದ್ವೇಷ, ಅಸೂಯೆ ಅಥವಾ ಕಹಿ ನೆನಪುಗಳನ್ನು ಇಂದೇ ಮರೆತುಬಿಡಿ.

4. ಸಣ್ಣ ಸಹಾಯ

ದಾನ: ಬಡವರಿಗೆ ಆಹಾರ ನೀಡುವುದು ಅಥವಾ ಗಿಡ ನೆಡುವುದರ ಮೂಲಕ ಪರಿಸರಕ್ಕೆ ಅಥವಾ ಸಮಾಜಕ್ಕೆ ಏನಾದರೂ ಕೊಡುಗೆ ನೀಡಿ.

ಪುಸ್ತಕ ಓದುವುದು: ನಿಮ್ಮ ಜ್ಞಾನವನ್ನು ಹೆಚ್ಚಿಸುವ ಯಾವುದಾದರೂ ಒಂದು ಒಳ್ಳೆಯ ಪುಸ್ತಕದ ಮೊದಲ ಪುಟವನ್ನು ಇಂದು ಓದಿ.

ವರ್ಷದ ಮೊದಲ ದಿನ ಈ ತಪ್ಪುಗಳನ್ನು ಮಾಡಲೇಬೇಡಿ

ಹೊಸ ವರ್ಷದ ಮೊದಲ ದಿನವು ಇಡೀ ವರ್ಷಕ್ಕೆ ಒಂದು ಸಕಾರಾತ್ಮಕ ಅಡಿಪಾಯವನ್ನು ಹಾಕಿಕೊಡುತ್ತದೆ. ಜ್ಯೋತಿಷ್ಯ ಶಾಸ್ತ್ರ ಮತ್ತು ಜೀವನಶೈಲಿಯ ದೃಷ್ಟಿಯಿಂದ ಹೊಸ ವರ್ಷದ ಮೊದಲ ದಿನ (ಜನವರಿ 1) ಈ ಕೆಳಗಿನ ತಪ್ಪುಗಳನ್ನು ಮಾಡದಿರುವುದು ಉತ್ತಮ ಎಂದು ನಂಬಲಾಗಿದೆ

1. ಜಗಳ ಮತ್ತು ಮನಸ್ತಾಪ

ಹೊಸ ವರ್ಷದ ಮೊದಲ ದಿನ ಯಾರೊಂದಿಗೂ ಜಗಳವಾಡಬೇಡಿ ಅಥವಾ ವಾದ ಮಾಡಬೇಡಿ. ಅಂದು ಮನೆಯಲ್ಲಿ ಶಾಂತಿ ಇರಲಿ. ಮೊದಲ ದಿನವೇ ಕೋಪ ಮಾಡಿಕೊಂಡರೆ ವರ್ಷಪೂರ್ತಿ ಅದೇ ನಕಾರಾತ್ಮಕತೆ ಮುಂದುವರಿಯಬಹುದು ಎಂಬ ನಂಬಿಕೆಯಿದೆ.

2. ಸಾಲ ಪಡೆಯುವುದು ಮತ್ತು ಕೊಡುವುದು

ವರ್ಷದ ಮೊದಲ ದಿನ ಯಾರಿಗೂ ಸಾಲ ನೀಡಬೇಡಿ ಅಥವಾ ಸಾಲ ಪಡೆಯಬೇಡಿ. ಹೀಗೆ ಮಾಡುವುದರಿಂದ ವರ್ಷವಿಡೀ ಆರ್ಥಿಕ ಮುಗ್ಗಟ್ಟು ಎದುರಾಗಬಹುದು ಅಥವಾ ಧನ ನಷ್ಟವಾಗಬಹುದು ಎಂದು ಹೇಳಲಾಗುತ್ತದೆ.

3. ಮಾಂಸಾಹಾರ ಮತ್ತು ಮದ್ಯಪಾನ

ಅನೇಕರು ಸಂಭ್ರಮಾಚರಣೆಗೆ ಮದ್ಯ ಮತ್ತು ಮಾಂಸಾಹಾರ ಸೇವಿಸುತ್ತಾರೆ. ಆದರೆ, ಈ ದಿನವನ್ನು ದೈವಿಕವಾಗಿ ಮತ್ತು ಸಾತ್ವಿಕವಾಗಿ ಆಚರಿಸುವುದು ಶುಭ. ಮದ್ಯಪಾನದಂತಹ ಚಟಗಳಿಂದ ದೂರವಿದ್ದರೆ ಆರೋಗ್ಯ ಮತ್ತು ಸಮೃದ್ಧಿ ವೃದ್ಧಿಸುತ್ತದೆ.

4. ಕಸ ಗುಡಿಸುವುದು ಮತ್ತು ಹಳೆಯ ವಸ್ತುಗಳ ವಿಲೇವಾರಿ

ಮನೆಯನ್ನು ಸ್ವಚ್ಛಗೊಳಿಸುವುದನ್ನು ಹೊಸ ವರ್ಷಕ್ಕೆ ಮುನ್ನವೇ (ಡಿಸೆಂಬರ್ 31ರ ಒಳಗೇ) ಮುಗಿಸಿರಿ. ಮೊದಲ ದಿನವೇ ಮನೆಯಿಂದ ಕಸವನ್ನು ಹೊರಹಾಕುವುದು ಅಥವಾ ಮನೆ ಗುಡಿಸುವುದು 'ಲಕ್ಷ್ಮೀಯನ್ನು ಹೊರಹಾಕಿದಂತೆ' ಎಂದು ಕೆಲವು ಸಂಪ್ರದಾಯಗಳಲ್ಲಿ ನಂಬಲಾಗುತ್ತದೆ.

5. ಕಣ್ಣೀರು ಹಾಕುವುದು

ಹೊಸ ವರ್ಷದ ಮೊದಲ ದಿನ ನಿಮ್ಮ ಮನಸ್ಸು ಸಂತೋಷದಿಂದಿರಲಿ. ದುಃಖ ಪಡುವುದು ಅಥವಾ ಅಳುವುದು ಬೇಡ. ಅಂದು ನೀವು ಎಷ್ಟು ಉತ್ಸಾಹದಿಂದ ಇರುತ್ತೀರೋ, ವರ್ಷವಿಡೀ ಅದೇ ಚೈತನ್ಯ ನಿಮ್ಮೊಂದಿಗಿರುತ್ತದೆ.

6. ಸೋಮಾರಿತನ

ಮೊದಲ ದಿನ ಸೂರ್ಯೋದಯಕ್ಕೂ ಮುನ್ನ ಎದ್ದು ಸ್ನಾನ ಮಾಡಿ ದೇವರ ಪ್ರಾರ್ಥನೆ ಮಾಡಿ. ಅತಿಯಾಗಿ ಮಲಗುವುದು ಅಥವಾ ಸೋಮಾರಿತನ ಪ್ರದರ್ಶಿಸುವುದು ನಿಮ್ಮ ಪ್ರಗತಿಗೆ ಅಡ್ಡಿಯಾಗಬಹುದು.

ಒಟ್ಟಿನಲ್ಲಿ ಹೊಸ ವರ್ಷದ ಮೊದಲ ಹೆಜ್ಜೆ ಸರಿಯಾಗಿದ್ದರೆ, ಇಡೀ ವರ್ಷ ಯಶಸ್ಸು ನಿಮ್ಮದಾಗುತ್ತದೆ ಎಂಬ ನಂಬಿಕೆ ಇದೆ. ನಿಮ್ಮೆಲ್ಲರಿಗೂ ಹೊಸ ವರ್ಷದ ಹಾರ್ದಿಕ ಶುಭಾಶಯಗಳು